Lauti Ira na Vuli e Kiliati na Vosa ni Veivakadreti

ENA 9 Sepiteba, 2006, a vakayacori kina na nodra tuvaitutu na ika121 ni kalasi ni Watchtower Bible School of Gilead ena Watchtower Educational Center mai Patterson, Niu Yoka. E veivakauqeti dina na porokaramu.

A dolava na soqo o Geoffrey Jackson, e dua na lewe ni iLawalawa Dauvakatulewa ni iVakadinadina i Jiova, a kidavaki ira na 56 na tuvaitutu kei ira na le 6,366 na duikaikai era sureti. A vakamacalataka na Same 86:​11, e tukuni kina: “Mo ni vakavulici au, Jiova, e nomuni sala; au na muria na nomuni vosa dina: mo ni vakaduataka na lomaqu me rerevaka na yacamuni.” Dusia o Brother Jackson e tolu na tikina ena tikinivolatabu oqo. E kaya: “Ena imatai ni cegu, na veivakavulici; ena ikarua, na kena bulataki; kei na kena ikatolu, na ka e uqeti keda. E tolu na tikina oqo e bibi sara vei kemuni na daukaulotu ena nomuni lako yani ena vanua oni na lesi kina.” Oti sa qai tukuna o koya na vunau veitaravi kei na veitarotarogi ena vakabibitaki kina na tolu na tikina oqo.

Vosa ni Veivakadreti

A vosa ena ulutaga “Na iVakarau ni Bula e Vinaka Duadua” o William Malenfant, e lewe ni itikotiko liu. A vakamacalataka na ivakaraitaki kei Meri na taci Marica. Ena dua na gauna a sikovi rau kina o Jisu, a dabe sara o Meri volekata na yava i Jisu me vakarorogo ni oqori na ka e dau vakaliuca. Sa qai tukuna vei Marica o Jisu: “Sa digitaka ko Meri nai votavota vinaka, o koya ena sega ni kau tani mai vua.” (Luke 10:​38-​42) “Vakasamataka mada oya,” e kaya o Brother Malenfant. “Ena sega vakadua ni guilecava o Meri nona a dabe voleka ena yava i Jisu me rogoca nona vakamacalataka na ka dina vakayalo​—ni a digia na ka e vinaka.” Ni sa vakavinavinakataki ira oti na gonevuli ena nodra digia na ka vinaka vakayalo, e kaya sara: “Na nomuni digidigi oni sa na mai vakila kina e dua na ivakarau ni bula e vinaka duadua.”

A vosa tarava o Anthony Morris, e lewe ni iLawalawa Dauvakatulewa, ena ulutaga “Dou Vakaisulu e na Turaga ko Jisu Karisito,” e yavutaki ena Roma 13:14. Eda na cakava vakacava oqo? “Noda ‘vakaisulu ena Turaga o Jisu Karisito’ e okati kina noda vakatotomuria na nona itovo.” Kena ibalebale oqo noda vakatotomuria na ivakaraitaki i Jisu kei na nona ivakarau. “A rawarawa ni torovi o Jisu,” e kaya o Brother Morris, “baleta ni kauaitaki ira dina na tamata, ra vakila tale ga oya.” Sa qai vakamacalataka o Brother Morris na levu ni ka era vulica e Kiliati na gonevuli, ena nodra “kila . . . na kena raraba, kei na kena balavu, kei na kena titobu, kei na kena cecere” ni ka dina, me vaka e tukuni ena Efeso 3:​18. Ia, a qai vakadreti ira ena tikina e 19, e kaya: “Mo dou kila na loloma i Karisito, o koya sa uasivi cake e na ka e kilai rawa.” E uqeti ira na gonevuli o Brother Morris: “Ni o tomana tiko nomu vuli vakataki iko, vakasamataka na sala o rawa ni vakatotomuria kina na loloma i Karisito, me rawa ni taucoko sara nomu ‘vakaisulu ena Turaga o Jisu Karisito.’”

Nodra Vosa ni iTatau na Qasenivuli e Kiliati

A vosa tarava e dua na qasenivuli e Kiliati o Wallace Liverance, e yavutaki nona ulutaga ena Vosa Vakaibalebale 4:7. E kaya ni bibi dina na vuku vakalou, ia e bibi tale ga meda “rawata vata kei na yalomatua,” okati kina na noda vakalewa na veika eda vulica me rawa ni matata vei keda, da qai siqema rawa sara na kena ibalebale kei na kena yaga ina noda bula. Dusia o Brother Liverance ni noda rawata na yalomatua eda na kunea kina na marau. Me kena ivakaraitaki, ena gauna i Niemaia, “era vakamacalataka na vunau” na Livai ra qai “vakatakila na kenai balebale.” E muri, era “marau vakalevu” na tamata “ni ra sa kila na vosa sa tukuni vei ira.” (Niemaia 8:​7, 8, 12) E tinia o Brother Liverance: “Era vakila duadua ga na marau dina o ira era kila vinaka na Vosa uqeti ni Kalou.”

A vosa tarava o Mark Noumair, e qasenivuli tale ga e Kiliati, ena ulutaga “O Cei Sara Mada na Kemu Meca?” Ena bucanivalu, era dau mate e so na sotia ni lauti ira vakacalaka na nodra gasau na nodra ito. “Vakacava mada na ivalu vakayalo eda vala tiko kina?” e taroga. “Ke da sega ni qaqarauni, eda rawa ni lecava se o cei dina na keda meca, da qai vakamavoataki ira ga na noda ito.” Na vuvu e rawa ni vakavu veilecayaki vei ira e so. A vakavuna me via vakamatei Tevita o Tui Saula, na nona itokani vakabauta, e dina nira kena meca dina na kai Filisitia. (1 Samuela 18:​7-9; 23:​27, 28) Sa qai tomana o Brother Noumair: “Vakacava ke o veiqaravi vata kei na dua na daukaulotu e maqosa cake sara vei iko? O na vakamavoataka beka nomu itokani sotia ena so na nomu vosa ni vakalelewa, se o na ciqoma ga ni na tiko e so na ka era na uasivi cake kina vei iko? Noda dau kauaitaka vakamatailalai na nodra malumalumu e so e rawa ni vakavuna meda lecava se o cei dina na meca. Vorati koya na meca dina, o Setani.”

Vakasavuirogorogo Marautaki kei na Veitarotarogi

A vosa ena itavi tarava e dua na qasenivuli e Kiliati o Lawrence Bowen ena ulutaga, “Vakayacora na Cakacaka Vakadauveivakalotutaki,” e okati tale ga kina na veitarotarogi kei na vakasavuirogorogo. E kaya ni cakacaka levu duadua vei ira na daukaulotu era vuli mai Kiliati nodra vunautaka na itukutuku vinaka, e laurai nira cakava oqo na lewenikalasi ena nodra vunau vei ira na tamata ena vanua cava ga era kune kina. A vakatasuasuataki e so na ka a sotavi ena cakacaka vakavunau.

Na rua na itavi tarava rau a vakaitavi kina o Michael Burnett kei Scott Shoffner, erau lewe ni matavuvale e Peceli. Rau vakatarogi ira na lewe ni Komiti ni Tabana mai Barbados, Korea, Ositerelia, kei Uganda. E laurai mai na ka era vakamacalataka na lewe ni komiti oqo, na levu ni ka e caka ena nodra raici na daukaulotu okati kina na nodra vakavaletaki kei na nodra qaravi vakavuniwai. Era vakabibitaka na lewe ni komiti ni o ira na daukaulotu e vuavuaivinaka nodra cakacaka era dau tu vakarau mera veisautaki ira me salavata kei na ituvaki ni vanua era lesi kina.

iTinitini e Veivakayaloqaqataki

O John E. Barr, e dua sa lewena dede tu mai na iLawalawa Dauvakatulewa, a vosa ena ulutaga levu, “Rerevaka na Kalou, ka Vakarokoroko Vei Koya.” A vakamacalataka na Vakatakila 14:​6, 7, e tukuni kina: “Ka’u a raica e dua tani tale na agilose sa vuka e na maliwa kei lomalagi kei vuravura, a sa taura nai tukutuku-vinaka e sega ni oti rawa, me vunautaka vei ira era sa tiko e vuravura, vei ira kece talega na veimatanitu, kei na veimataqali, kei na duivosavosa, kei ira na tamata, ka sa kaya e na domo levu, Dou rerevaka na Kalou, ka vakarokoroko vei koya; ni sa yaco na nona gauna me lewa.”

E uqeti ira na tuvaitutu o Brother Barr mera nanuma e tolu na ka e baleti koya na agilosi. Na imatai, e lesi me vunautaka na itukutuku vinaka e sega ni oti rawa, oya e okati kina nona sa veiliutaki tiko o Karisito ena Matanitu ni Kalou. E kaya o Brother Barr: “Eda vakadeitaka ni sa dabe ena idabedabe vakatui o Karisito ena yabaki 1914. O koya gona, e dodonu me kacivaki na itukutuku vinaka oqo e veiyasa i vuravura.” iKarua, e kaya na agilosi: “Rerevaka na Kalou.” Kaya o Brother Barr ni gadrevi vei ira na tuvaitutu mera vakavulica vei ira na vuli iVolatabu mera bucina na rerevaka na Kalou. Oqo ena uqeti ira mera kua ni cakava na ka ena vakararawataka na Kalou. iKatolu, e vakarota na agilosi: ‘Vakarokorokotaka na Kalou.’ E uqeti ira na tuvaitutu: “Kua ni guilecava na inaki ni noda veiqaravi oya me vakarokorokotaki na Kalou, sega ni o keda.” Sa qai vakamacalataka o Brother Barr na ‘gauna ni veilewai,’ ena nona kaya: “Sa toso totolo tiko mai na gauna me na vakayacori oti kina na veilewai. E gadrevi gona mera rogoca na itukutuku vinaka e levu era tu ena noda yalava ni bera ni cava na gauna ni veilewai.”

Ni se dei tiko ga ena nodra vakasama na le 56 na gonevuli era tuvaitutu na ivakasala e talaucaki oqori, a soli sara nodra sitivikiti, ra qai talai yani i veiyasa i vuravura. E lauti ira sara ga na vakarorogo kei ira na tuvaitutu na ivakasala veivakauqeti era rogoca ena siga marautaki oya.

[Kato ena tabana e 17]

VEIKA ME BALETA NA KALASI

Vanua era cavutu mai kina: 6

Vanua era lesi kina: 25

Levu ni gonevuli: 56

iVakatautauvata ni nodra yabaki: 35.1

iVakatautauvata ni yabaki ena dina: 18.3

iVakatautauvata ni yabaki ena cakacaka vakaitalatala vakatabakidua: 13.9

[iYaloyalo ena tabana e 18]

Nodra Tuvaitutu na Kalasi 121 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.