Bula ena iLavo ga O Rawata e Rawa Vakacava Qori?

KAYA mada ni o taura tiko e dua na taga palasitika cicila, qai vinakati mo saga me vakacereuvuuvu tiko ga. O na cakava vakacava oya? Me levu cake na cagi o uvuca ina taga me lailai na cagi e lako i tuba, qori ena rawa ni vakacereuvuuvu tiko ga kina na taga.

E va tale ga qori na ibalebale ni nomu bula ga ena ilavo o rawata. Na ilavo o rawata e rawa ni vakatauvatani ena cagi o uvuca ina loma ni taga palasitika. Na ilavo o vakayagataka e vaka na cagi e lako tani mai na qara. Mo saga gona me lailai na ilavo o vakayagataka mai na kena levu o rawata.

E rawarawa toka na ivakamacala ni nomu bula ga ena ilavo o rawata, ia e dua tale na ka na nomu muria mo qai vakila na kena yaga. Ke ra muria na ivakavuvuli rawarawa oya e levu, era na sega ni sotava na leqa vakailavo. E rawati vakacava oya? Eda na kunea e vei na idusidusi e yaga dina? Na iVolatabu e ivurevure ni itukutuku yaga me baleta na noda bula ga ena ilavo eda rawata. Meda raica mada na ka e tukuna.

iVakavuvuli Yaga ena iVolatabu

E tu ena iVolatabu e levu na ivakavuvuli yaga mo vakayagataka vakavuku kina na nomu ilavo. Eda na veivosakitaka mada ga e vica. Ke o sega mada ga ni taleitaka, e vinaka mo raica na ivakavuvuli qori mo rawa ni bula ga ena ilavo o rawata.

Lalawa, se dua na nomu ituvatuva vakailavo. Mo vakayagataka vakavuku na ilavo, e bibi mo kila na levu ni ilavo o na rawata kei na veika o na vakayagataka kina. E kaya na iVolatabu: “A nanuma ni lomana na dautara ka sa vakauta ga ki na sautu; ia na nodra nanuma na tamata kecega sa lomariri sa vakauta ga ki na viakana.” (Vosa Vakaibalebale 21:5) Eso era wasewasea ena waqanivola na ilavo me vakayagataki, me vaka na ilavo ni “Kakana,” “Rede,” kei na “iSulu.” Ke o muria na iwalewale rawarawa qo se dua e vereverea toka, e bibi ga mo kila na ka o vakayagataka kina na nomu ilavo. Me kua soti ni kauaitaki na veika eda vinakata ia e sega ni gadrevi dina, me voli mada ga e liu na ka ni bula ni veisiga.

Kua ni kocokoco. E levu ena veivanua se qai vakatorocaketaki tiko era vinakata na veika e tu vei ira na vakaitikotiko ena vanua vutuniyau. Era temaki e levu mera vinakata na ka era sakitaka tu o ira era tiko tikivi ira. Qori e rawa ni icori. De dua o ira mada ga qori era sega ni ceguva rawa tiko na kena isau. Na cava meda muria kina na nona vakatulewa ca e dua da qai vakaleqai kina vakailavo? E vakarota na iVolatabu: “E qara na vutuniyau na tamata e kocokoco na matana, e sega ni kila sa rawai koya tiko na veika e vinakata.”—Vosa Vakaibalebale 28:22, The Jerusalem Bible.

Bula rawarawa ga. A vakasalataki ira na nona imuri o Jisu me “vinaka” na matadra. (Maciu 6:22) E rawarawa sara na nomu leqa vakailavo ke o volia na urau ni rawa ni o ceguva ga na isau ni tiniika. E ripotetaka e dua na baqe na Asian Development ni voleka ni dua na ikatolu na lewenivanua ena yatu Filipaini, e sivia tale ga e veimama na lewenivanua mai Idia era sega mada ga ni rawata na ilavo lailai sara e vinakati e Esia me bula rawa kina e dua, oya e rauta ni $1.35 ena dua na siga (na ilavo ni Merika). Ni lailai va oya na ilavo e rawati, e vinaka me voli ga na veika ni bula e veisiga. Na ivakavuvuli vata qo e yaga ena veivanua vutuniyau mada ga, nira na sega kina ni leqa vakailavo na lewenivanua.

Lomavakacegu ena ka e gadrevi dina. Qo e salavata kei na ivakasala mo bula rawarawa ga. E veivakasalataki na iVolatabu ena 1 Timoci 6:8: “Ke sa tiko na ka meda kania, na isulu meda tokara, kei na vanua meda tiko kina, meda lomavakacegu.” Eso mada ga e lailai na nodra ilavo era mamarau, era lomavakacegu ena veika e tu vei ira, qori e okati kina na veika vakayago, kei na nodra loloma na lewenivuvale vaka kina na nodra itokani.—Vosa Vakaibalebale 15:17.

Kua ni dinau vakaveitalia. E dina na ka e tukuna na iVolatabu: “O koya sa vutuniyau sa lewai ira na dravudravua, a sa veiqaravi ko koya sa kere ka vua sa soli ka vua”! (Vosa Vakaibalebale 22:7) Ena rairai sega ni levei rawa na dinau ena so na ituvaki, ia na dinau vakaveitalia me voli ga kina na ka e vinakati e ikuri ga ni leqa vakailavo. Qo e rawa ni vakadinadinataki vakalevu ena vakayagataki ni credit card. E tukuna na Time magazine: “Ni soli vua e dua na credit card, e rawa sara ga ni vakayagataka vakalialia na ilavo qai volivoli vakaveitalia.” O Eric mai na Yatu Filipaini e kaya: “Niu vakayagataka na credit card, e lailai tale na ka au volia ena ilavo. E vakaleqa sara ga na noqu ituvatuva vakailavo ena gauna au sauma kina na noqu bili.” Ke vakarawarawataki na dinau, e ka vakayalomatua meda qaqarauni sara!—2 Tui 4:1; Maciu 18:25.

Maroroi ilavo qai volivoli. Ena rairai nanumi ni ka ni gauna makawa na noda maroroi ilavo da qai volivoli, ia qori na iwalewale vinaka duadua me kua kina na leqa vakailavo. Era sega ni dinau e levu nira muria na iwalewale qori, era galala tale ga mai na leqa e salavata mai, me vaka na tubu ni dinau e lavaki me lai toso cake kina na isau ni ka kece e volia e dua. E tukuni ena iVolatabu ni “vuku” na qasikalolo baleta e dau “kumuna na kena kakana e na vula i matua” me qai vakayagataki ena dua na gauna e muri.—Vosa Vakaibalebale 6:6-8; 30:24, 25.

Vuli Vei Ira Tale Eso

De dua e vinaka na ivakasala kece vakaivolatabu eda sa dikeva oti mai, ia e vukei ira dina na lewenivanua mera bula ena ilavo ga era rawata? Meda raica mada na ka era cakava eso era muria na ivakasala qori ra qai walia kina na leqa vakailavo.

E kaya o Diosdado, e dua na tama e va na luvena, ni leqa vakailavo se qai yaco ga qo e vakadredretaka dina me vakarautaka na veika e gadrevi ena nona vuvale. Ia e kila na yaga ni ituvatuva vakailavo. E tukuna: “Au wasewasea na ilavo kece au rawata. Au vola tale ga na veika au na vakayagataka kina na ilavo.” A cakava tale ga qori o Danilo. A lusi na nodrau bisinisi vakaveiwatini, ia se rawa ga ni rau volia na veika me rau bula kina ni rau wasewasea vinaka na nodrau ilavo. E kaya o Danilo: “Keirau kila na levu ni ilavo keirau rawata e veivula, keirau kila tale ga na levu ni ilavo e vakayagataki. Ni kilai rawa qori, keirau dau veivosakitaka vakavinaka na levu ni ilavo keirau rawa ni vakayagataka.”

Me rawa ni muri na nodra ituvatuva vakailavo, eso era vakatulewataka mera vakalailaitaka na ilavo era vakayagataka ena so na ka. E tukuna o Myrna, e dua na yada e susugi iratou tiko e tolu na luvena: “Keitou sa sega ni dauvodo ni keitou lako ena soqoni vaKarisito, keitou sa taubale ga vakaveitinani.” A saga o Myrna me ratou kila na luvena na yaga ni bula rawarawa ga. E kaya: “Au saga meu ivakaraitaki vinaka niu muria na ivakavuvuli ena 1 Timoci 6:8-10, e tukuni kina meda lomavakacegu ena ka e tu vei keda.”

A cakava tale ga qori o Gerald, e dua na tama e rua na luvena. E tukuna: “Ena gauna ni neitou vuli iVolatabu vakavuvale, keitou dau veivosakitaka na veika era cakava na lotu vaKarisito era vakaliuca na veika e bibi sara, oya na veika vakayalo. E yaga na neitou dau cakava oya ni ratou sega ni dau tagica kina na luvei keirau na ka e sega soti ni yaga.”

O Janet e dawai, e dau veivakavulici vakatabakidua ena iVolatabu ena Yatu Filipaini. A se qai vakacegui ga mai na nona cakacaka, ia e bula tiko ga ena ilavo e rawata. E kaya: “Au dau lewai yau vinaka, au lalawataka tale ga meu vakayagataka sara vakavinaka na noqu ilavo kei na iyau. Au sega ni dau lako ena sitoa lelevu ni volivoli e dau saulevu kina na ka, ia au na qara ga na sitoa e saurawarawa. Na cava meu lai volia kina e dua na ka ena sitoa saulevu niu rawa ni volia na ka vata ga oya ena dua na sitoa saurawarawa? Au saga tale ga meu kua ni volivoli vakaveitalia.” E vakadinadinataka o Janet na vinaka ni maroroi ilavo qai volivoli. E kaya: “Ke lailai mada ga na ilavo e vo, au na maroroya meu sauma kina e dua na ka e vinakati vakatotolo.”

O Eric sa cavuti oti mai e tukuna me baleta na credit card: “Au vakavulici au meu vakayagataka ga na noqu credit card ena leqa e yaco vakasauri.” E tokona qo Diosdado: “Meu lewai au vinaka, au dau biuta tu yani na noqu credit card ena vanua ni cakacaka.”

O Rawa ni Bula ena iLavo ga o Rawata

Io, e levu era kila ni iVolatabu e sega ni tukuna ga na yaga ni veika vakayalo, ia e tu tale ga kina na idusidusi e yaga ena noda bula e veisiga. (Vosa Vakaibalebale 2:6; Maciu 6:25-34) O na rawa ni bula ena ilavo ga o rawata ni o muria na ivakavuvuli vakaivolatabu e vakamacalataki ena ulutaga qo, qai vuli vei ira era vakadinadinataka na kena yaga. Ke o cakava qo, o na galala mai na rarawa kei na nuiqawaqawa e bikai ira tu e vica na milioni nikua.

[Tikina bibi ena tabana e 10]

‘Keirau dau veivosakitaka vakavinaka na levu ni ilavo keirau rawa ni vakayagataka’

[Tikina bibi ena tabana e 11]

‘Keitou sa sega ni dauvodo ni keitou lako ena soqoni vaKarisito, keitou sa taubale ga’

[Tikina bibi ena tabana e 11]

‘Au saga meu kua ni volivoli vakaveitalia’