E Tiko na iSoqosoqo ni Kalou?

E LAURAI na nona dau tuvatuva maqosa na Kalou ena ka kece e bulia. Dua na kena ivakaraitaki vakasakiti, na sela ni isi e sega so ni “vereverea.” Na tikitiki ni sela qori e via tautauvata ga kei na iwiliwili ni gacagaca ni waqavuka na Boeing 777. Ia na tiki yadua ni sela ni isi e tiko na kena ikotokoto ra qai tiko kece ena qana moqimoqili e 5 wale ga na microna na kena raba. E rawa tale ga ni basika mai na dua ga na sela ni isi e levu tale na sela, e sega ni rawata qori na waqavuka. Na ituvatuva maqosa oya e vakatubuqoroqoro dina!—1 Korinica 14:33.

E sega ni laurai ga na ituvatuva maqosa ena ka buli e vuravura. E tukuna na iVolatabu ni tuvanaki matau tale ga na nodra veiqaravi na agilosi mai lomalagi me salavata kei na nona inaki na Dauveibuli. A raivotutaka na parofita o Taniela e dua na iwiliwili vakaitamera ni agilosi ena itikotiko ni Kalou mai lomalagi: “[E]ra sa udolu vakaudolu sa qaravi koya, ka oba vakaoba sa wavu tu e matana.” (Taniela 7:9, 10) Vakasamataka mada na nodra tuvanaki na iwiliwili vakaitamera oya ni agilosi—e duanadrau na milioni se sivia—mera cakava na ka e vinakata na Kalou ena vukudra na nona dauveiqaravi e vuravura!—Same 91:11.

E dau tuvatuva maqosa duadua na Dauveibuli na Kalou o Jiova, ia e sega ni yalodredre se dau buli lawa. E yalololoma ga, e Kalou mamarau qai kauaitaki ira vakalevu na nona ibulibuli kece. (1 Timoci 1:11; 1 Pita 5:7) E laurai qori ena veika e cakava vei ira na Isireli ena gauna makawa, kei ira na lotu vaKarisito ena imatai ni senitiuri.

Isireli Makawa​—Matanitu Tuvanaki Vakamatau

Na Kalou o Jiova e vakayagataki Mosese me tuvanaka na sokalou dina ena vukudra na Isireli. Dua mada ga na kena ivakaraitaki, na ituvatuva ni nodra keba nira veilakoyaki voli ena vanualiwa e Saineai. Ke a soli vei ira na vuvale na galala mera lewa ga na vanua era biri valelaca kina, ena yakusurasura na ka e caka. A vakamatatataka sara ga o Jiova na vanua mera keba kina na yavusa yadua. (Tiko Voli Mai na Lekutu 2:1-34) A vakamatatataki tale ga ena Lawa a soli vei Mosese na ka mera cakava mera bulabula kina qai savasava na nodra itikotiko—me vaka na bulu ni valelailai.—Vakarua 23:12, 13.

E levu na sala era tuvanaki vakamatau kina na Isireli nira curuma na Vanua Yalataki. E wasei na matanitu me 12 na yavusa, qai dui tiko na nodra ivotavota ni qele. Na Lawa e solia o Jiova vei Mosese e tara na nodra bula kece—sokalou, vakawati, vuvale, vuli, bisinisi, kana, teitei, qaravi ni manumanu, kei na so tale.b Eso na lawa e matailalai sara qai sega ni wereubiubi, e vakaraitaka kece qori ni kauaitaki ira na nona tamata o Jiova, era na marau tale ga kina. Nira muria na ituvatuva vakayalololoma qori, a vakadonui ira tiko ga na Isireli o Jiova.—Same 147:19, 20.

E iliuliu maqosa o Mosese, ia e sega ni vakatau ena ivakarau ni nona veiliutaki na nodra vakalougatataki se sega, e vakatau ga ena nona yalodina ina isoqosoqo ni Kalou. Kena ivakaraitaki, a vakatulewataka vakacava o Mosese na sala mera muria ena vanualiwa? Ena veidusimaki i Jiova ni vakayagataka na duru o ena siga kei na duru bukawaqa ena bogi. (Lako Yani 13:21, 22) A vakayagataki ira na tamata na Kalou, ia o koya ga e tuvanaki ira na nona tamata, e dusimaki ira tale ga. E va tale ga qori ena imatai ni senitiuri.

Lotu vaKarisito Taumada Era Tuvanaki Vakamatau

Era dau gugumatua ena vunau na yapositolo kei na tisaipeli, a tauyavutaki rawa kina ena imatai ni senitiuri na ivavakoso vaKarisito ena veiyasa i Esia kei Urope. Era veiyawaki na ivavakoso qori, ia era sega ni tu taudua se ra caka nodra. Era tuvanaki matau ga ra qai veidusimaki vakayalololoma na yapositolo. Kena ivakaraitaki, a lesi Taito na yapositolo o Paula me gole i Kiriti “me lai tuvanaka na ka kece e kea.” (Taito 1:5, The Jerusalem Bible) A vola tale ga o Paula ena ivavakoso e Korinica ni so na tagane lotu vaKarisito e kea era dau “tuvanaka maqosa na ka,” se ra “dau tuvatuvanaki.” (1 Korinica 12:28, The New Testament in Modern Speech; The Bible in Contemporary Language) Ia e rawa vakacava ni maqosa va qori na ituvatuva? A kaya o Paula ni “Kalou e vakataucokotaka” se “tuvanaka” na ivavakoso.—1 Korinica 12:24; The Riverside New Testament.

O ira era lesi mera ivakatawa ena ivavakoso vaKarisito era sega ni lewai ira na nodra itokani ena vakabauta. Ia era “itokani vakacakacaka,” era muria na veidusimaki ni yalo tabu ni Kalou, era nodra “ivakaraitaki ga na qelenisipi.” (2 Korinica 1:24; 1 Pita 5:2, 3) E ‘ulu ni ivavakoso’ o Jisu Karisito sa vakaturi oti, sega ni dua wale na tamata se ilala tagane ivalavala ca.—Efeso 5:23.

Ni tekivu vakayacori ena ivavakoso mai Korinica na veika e duidui sara mai na kena e caka ena ivavakoso tale eso, a vola o Paula: “Vakacava, e vu ga vei kemuni na vosa ni Kalou, me na yala tale beka ga vei kemuni?” (1 Korinica 14:36) A taroga qori o Paula me vakadodonutaka kina na nodra rai, mera raica tale ga kina ni sega ni dodonu mera caka nodra. A tubu na kedra iwiliwili na lewe ni ivavakoso ra qai vakalougatataki nira muria na nodratou veidusimaki na yapositolo.—Cakacaka 16:4, 5.

iVakaraitaki ni Loloma ni Kalou

Vakacava nikua? Eso era na rairai sega ni via lewena e dua na isoqosoqo vakalotu. Ia na ivolatukutuku ena iVolatabu e vakaraitaka ni dau vakayagataka na Kalou na nona isoqosoqo ni vakayacora na nona inaki. A tuvanaki ira na nona dauveiqaravi e Isireli makawa, a tuvanaka tale ga na nodra sokalou na lotu vaKarisito taumada.

E veiganiti beka me tukuni ni dusimaki ira tiko na nona tamata nikua na Kalou me vaka ga e cakava ena veigauna sa oti? Io, na nona tuvanaki ira na nona tamata kei na nona vakaduavatataki ira e vakaraitaka ni kauaitaki ira e lomani ira tale ga. E vakayagataka nikua o Jiova na nona isoqosoqo me vakayacori kina na nona inaki me baleti keda. E rawa ni kilai vakacava na nona isoqosoqo? Raica mada eso na kena ivakatakilakila.

▪ Era tuvanaki na lotu vaKarisito dina mera vakayacora e dua na cakacaka. (Maciu 24:14; 1 Timoci 2:3, 4) A vakaroti ira na nona imuri o Jisu mera vunautaka na itukutuku vinaka ni Matanitu ni Kalou ina veimatanitu kece, ena sega ni rawa qori ke sega ni tiko e dua na isoqosoqo e roboti vuravura. Kena ivakatautauvata, e rawarawa mo vakania e le dua, ia mo vakani ira e vica vata na udolu se milioni sara, ena gadrevi mera veivuke e dua na ilawalawa era tuvanaki vakamatau ra qai dauveitokoni. Mera vakayacora na nodra ilesilesi na lotu vaKarisito dina, era veiqaravi “ena lomavata” se “ra veitokonitaka na nodra qarava na [Kalou].” (Sefanaia 3:9; Byington) Ke sega na isoqosoqo e kune kina na duavata kei na veiyaloni, ena vakayacori rawa beka na cakacaka era na sotavi kina o ira era cavutu mai na duidui vanua, duidui matatamata ra qai duivosavosa? E macala ga ni sega ni rawa qori.

▪ Era tuvanaki na lotu vaKarisito dina mera veitokoni, mera veivakayaloqaqataki. E rawa ni lewa ga e dua e daucabe ulunivanua na vanua me cabeta, ena sega tale ga ni leqataki ira era sega ni matau sara kina. Ia ke donuya na vakacalaka se sotava na leqa, ena rerevaki sara oya ni sega ni dua ena vukei koya. E sega ni ka vakayalomatua me tawasei koya e dua. (Vosa Vakaibalebale 18:1) Me rawa nira vakayacora na lotu vaKarisito na ivakaro i Jisu, e dodonu mera veitokoni ra qai veivakayaloqaqataki. (Maciu 28:19, 20) E vakarautaki ena ivavakoso vaKarisito na ivakasala vakaivolatabu, veivakavulici, kei na veivakayaloqaqataki e yaga vakalevu ena nodra toso tiko ga ra qai kua ni soro. Ke sega ni tuvanaki ena soqoni vaKarisito na veivakavulici kei na sokalou, ena lai vulica tale e vei e dua na ivalavala i Jiova?—Iperiu 10:24, 25.

▪ Era tuvanaki na lotu vaKarisito dina mera qarava na Kalou ena duavata. Nira rogoca na domoi Jisu na nona sipi, era sa “dua ga na qelenisipi” ena nona veiliutaki. (Joni 10:16) Era sega ni veituyaki na nona sipi ena lotu se ilawalawa era dau caka nodra; e sega tale ga ni vu ni veisei na ka era vakavulici kina. Ia era ‘duavata ga ena ka era tukuna.’ (1 Korinica 1:10) E bibi me maqosa na ka e caka me rawa nida duavata. Ena qai maqosa ga na ka e caka ke tiko na ituvatuva. Ena vakalougatataka ga na Kalou na mataveitacini era duavata.—Same 133:1, 3.

E vica vata na milioni era lomana dina na Kalou ra qai taleitaka na ka dina ena iVolatabu, era mai lewena e dua na isoqosoqo e laurai kina na ivakatakilakila e sa tukuni oti mai kei na so tale e yavutaki ena iVolatabu. Era tuvanaki vakamatau ra qai duavata vakailawalawa na iVakadinadina i Jiova e veiyasa i vuravura ena nodra sasaga mera cakava na loma ni Kalou. Era nuitaka na nona yalayala: “Au na tiko vata kei ira, au na lako voli ena kedra maliwa, au na nodra Kalou, era na noqu tamata.” (2 Korinica 6:16) O rawa ni marautaka tale ga na veivakalougatataki totoka qori ke o lewena na nona isoqosoqo na Kalou o Jiova mo qaravi koya kina.

[iVakamacala e ra]

[iYaloyalo ena tabana e 13]

A tuvanaki vakamatau na nodra keba na Isireli

[iYaloyalo ena tabana e 14, 15]

E gadrevi na ituvatuva matau me vakayacori rawa kina e veiyasa i vuravura na cakacaka vakavunau

Vunau e veivale

Cakacaka ni vakacoko

Soqo cokovata

Tara ni vale ni sokalou