iVola Mai Madagascar

E Vaka na Rorogo ni iVakatagi Totoka

KEIRAU vakarau lako tiko vakaveiwatini ena neirau ilesilesi vou vakaulotu ina yanuyanu o Madagascar. Keirau vunitaka na neirau rarawa kei na lomaleqa ni keirau vakamoce vei ira na neirau vuvale kei ira na neirau itokani, keirau nuitaka ni veiganiti na vanua e lesi keirau kina o Jiova, ena vakalougatataka tale ga na neirau cakacaka.

Na imatai ni soqoni ni ivavakoso ena neirau ilesilesi vou ena dredre ni guilecavi. E vaka ga e liutaka tiko e dua na mataivakatagi na iVakadinadina tagane e taura tiko na vuli Vale ni Vakatawa. Ni keirau sega ni kila vinaka na vosa ni vanua oya, na veika e cavuti e vaka na rorogo ni ivakatagi totoka. Ena taura e dua na gauna balavu me keirau kila vinaka na veika e tukuni.

Na imatai ni gauna au kila kina ni tarogi e dua na ka e sega ni tiko ena parakaravu, au sega ni kila niu sauma tu yani vakadomoilevu. Era rogoca qori na dabe tikivi au, au qai tabonaka na gusuqu me kua ni rogo na noqu dredre. Au madua, ia au marau niu sa bau kila e dua na ka e tukuni!

E dodonu meu ivakaraitaki vei ira eso tale ena cakacaka vakavunau, ia au vakila ni o yau sara ga au vukei tiko. Me rawa ni kilai na noqu ivakamacala era vukei au ena yalololoma na mataveitacini ena iwalewale ni cakacaka vakavunau, na ka meu tukuna kei na tikinivolatabu meu vakayagataka.

Niu vunau tiko ena dua na siga a kailavaka mai e dua na gone, “Vazaha! Vazaha!” Qo na vosa vakaMalagasy era dau kacivi kina na “vulagi.” Keirau lako sara vakatotolo de ra lako mai na vo ni gone ra qai kailavaka na vosa vata ga oya. E dua tale na gone a cudruvi koya e kaila tiko mai qai kaya: “E sega ni vulagi o koya, e rawa ni vosataka na noda vosa!” Au sega ni taura rawa na ka era tukuna ni sa rui totolo na nodra vosa, a mani vakadewataka vei au na ka era tukuna na iVakadinadina yalewa keirau lako vata tiko. Dua na ka noqu marau niu sa bau kila na nodra vosa. Sa vaka me matau vei au na bula e Madagascar, au sa sega ni vaka na vulagi.

Ena so na gauna niu galili, au vakila ni qumia na ligaqu e dua na liga lailai. Qo e vakayaloqaqataki au niu kila era taleitaki au na gone, ke sega mada ga ni taladrodro na noqu veivosaki kei ira. O ira na gone ena ivavakoso era isolisoli i Jiova. Na goneyalewa lailai o Hasina, e dau vakadewa vei au. Ke sega ni dua tale e kila na ka au tukuna, o koya ga ena kila. E dau vukei au niu saga meu veivosaki kei ira na noqu itokani ena ivavakoso, ena vakamacalataka tale ga na ka au tukuna.

Keirau a tiko vakaveiwatini ena dua na ivavakoso ena vakarau wase ina dua tale na ivavakoso. Kena ibalebale qo, ni so na vuli iVolatabu era tiko ena yalava e qarava na ivavakoso vou sa na soli vei ira ena ivavakoso oya. A uqeti au e dua na taciqu lotu vaKarisito meu vuli iVolatabu kei na dua na nona gonevuli. Au lomaleqa au mani tukuna ni se sega ni rawa niu vakavulica e dua, ia a vakauqeti au ga meu veivakavulici. E nuidei ni na vukei au o Jiova meu veivakavulici. E laurai e matana na yalololoma qai tukuna vei au ena kena itukutukuni rawarawa duadua ena loma ga ni dua na gauna lekaleka au sa na veivakavulici me vaka ga au vinakata tiko. Qori e vakayaloqaqataki au sara ga.

A toso vinaka sara o gonevuli. Niu tiko e tuba ena dua na siga au rogoca ni kacivi au. Erau lako tiko kei na turaga erau tiko vata me rau lai vakamau. Sa vuli iVolatabu tale ga o tagane, rau qai tekia eso na isausau vakayalo erau saga tiko me rau rawata, wili kina na papitaiso. Au marautaka dina oya, ia au kila ni o Jiova ga e vakayarayarataka mai e dua me qaravi koya, sega ni o keda.

E levu sara na ka keirau vulica ena ilesilesi vou qo. Keirau dau nanumi ira na neirau itokani kei na neirau vuvale, ia vaka ga era tiko vata kei keirau eke. Keirau dau talanoataki ira vei ira na mataveitacini, qo era sa dau tarogi ira tale vei keirau na neirau itokani eke. Keirau vakanamata ena gauna mera duavata ra qai sota kina na neirau “vuvale.”

Nira veivosaki na lewenivanua e vaka au se rogoca tiko ga na “ivakatagi.” Ia ena gauna qo au sa kila na ka e tukuni. Au vakanamata ena gauna au sa na madila kina ena vosa ni vanua qo, me vaka na rorogo ni ivakatagi au rogoca ena veivosaki, sa na sega ni tatao se vaka na uvuci vagauna ni biukila. A kaya o Jisu: “Mo kua sara ni lomaocaocataka na siga nimataka, ni veisiga yadua ena tu vata kei na kena lomaocaoca.” (Maciu 6:34) Keirau na vulica tiko vakalalai na “nota,” se na vosa. Ena gauna qo au na vakarogoca vinaka qai vakasamataka tiko ga na veika e tukuni me rawa ni taladrodro na noqu vosataka na vosa ni vanua qo, me vakataki ira ga na mataveitacini e Madagascar.

[iYaloyalo ena tabana e 25]

Vunau tiko kei Hasina