Taro na Dauwiliwili . . .

E Vakaduiduitaki Ira na Matatamata na Kalou?

▪ Sega. E tukuna vakamatata na iVolatabu: “E . . . sega ni dau veivakaduiduitaki na Kalou, ia e vakadonui ira era dokai koya ra qai cakava na ka e vinakata mai na veivanua kece.”—Cakacaka 10:34, 35.

Na rai ni Kalou me baleta na vakasama qori e uasivia sara na noda rai na tamata ivalavala ca. Era vakabauta e levu ni dua na matatamata (na kena era cavutu mai kina) e vinaka cake mai na matatamata tale eso. Na rai qori e lakovata kei na nanuma i Charles Darwin, e kaya: “Ena dua na gauna e muri, . . . o ira na matatamata era sucu mai sa tu na lawa, na itovo, na rai kei na ivakarau ni bula mera muria, era na rawa ni vakawabokotaki ira ra qai sosomitaki ira na matatamata e lolovira na nodra itovo, nodra rai kei na nodra ivakarau ni bula.” E ka ni rarawa ni levu era vakalolomataki vei ira na matatamata era nanuma nira uasivi vei ira tale eso.

E tiko na yavu me nanumi kina ni vinaka cake e dua na matatamata? Me kena ivakaraitaki, sa vakadinadinataki beka vakasaenisi ni nodra gene eso na matatamata e vakavuna mera vinaka cake ra qai lolovira eso tale? E kaya o Bryan Sykes na parofesa mai Oxford e dau dikeva na gene ni tamata: “E sega ni kilai ena gene na nona yavusa e dua se na matatamata e lako mai kina. . . . Au dau tarogi se tiko na DNA ni Kirisi se na gene ni Itali, ia e sega ni dua na ka va qori e tiko. . . . Nida veiwekani voleka.”

Na itukutuku vakasaenisi qori e salavata kei na ka eda wilika ena iVolatabu. E tukuna ni Kalou a bulia e dua na tagane kei na yalewa, eda kawa kece mai kina na kawatamata. (Vakatekivu 3:20; Cakacaka 17:26) Ena rai ni Kalou, eda tautauvata kece se mani matatamata cava eda cavutu mai kina.

E sega ni bibi vei Jiova na roka ni kuliniyagoda se na keda irairai. Ia e bibi duadua vua na lomada. E kaya: “Na tamata e yavutaka na nona vakataulewa ena irairai, ia au yavutaka na noqu lewa ena ka e tu e lomadra.” (1 Samuela 16:7, Contemporary English Version) Na noda vakasamataka tiko na ka dina oya e rawa ni veivakayaloqaqataki. Ena sala cava?

Se mani matatamata cava eda cavutu mai kina, levu vei keda eda sega ni marautaka eso na ka me baleta na keda irairai, ia eda sega ni veisautaka rawa oya. Ia e rawa nida vakavinakataka na ivakarau ni lomada kei na noda vakasama, qori e bibi duadua. (Kolosa 3:9-11) Ke da vakasamataka vinaka, de dua eda nanuma tale ga ena so na gauna nida vinaka cake se da lolovira vei ira na matatamata tale eso. Ni sega ni salavata qori kei na rai ni Kalou, meda saga vagumatua meda cavuraka laivi mai lomada.—Same 139:23, 24.

Eda nuidei ni na vukei keda o Jiova nida saga meda vakatotomuria na nona rai me baleti keda kei ira eso tale. E tukuna na nona Vosa: “Sa veiraiyaki na mata i Jiova e vuravura taucoko, me totaki ira vakaidina sa dodonu na lomadra vua.” (2 Veigauna 16:9) E dina qori se mani matatamata cava eda cavutu mai kina.