Veivakaduiduitaki

Era vu mai vei na veimatatamata?

“Ko Atama, sa vakatoka na yaca ni watina ko Ivi; ni sa tinadra na tamata kecega sa bula.”—Vakatekivu 3:20.

KA ERA KAYA NA KENADAU

E volatukutukutaka na isoqosoqo na United Nations Educational, Scientific and Cultural Organization (UNESCO), “nida dua ga na matatamata da qai vu mai na dua ga na tamata.”—Na ivola na Declaration on Race and Racial Prejudice, 1978.

KA E KAYA NA IVOLATABU

E bulia na Kalou e rua na tamata, o Atama kei Ivi, qai kaya vei rau: “Drau vakaluveni, ka tubu me lewe vuqa, ka vakatawai vuravura, ka vakamalumalumutaka.” (Vakatekivu 1:28) Koya gona, erau itubutubu ni kawatamata kece o Atama kei Ivi. Toso na gauna nira vakarusai na lewe i vuravura ena waluvu, a bula ga o Noa, watina, ratou na luvena tagane kei na dui watidratou. E kaya na iVolatabu nida vu mai vei ratou na tolu na luvei Noa.—Vakatekivu 9:18, 19.

E dua na matatamata e uasivia e dua tale?

“E bulia na matatamata kece [na Kalou] mai na dua ga na tamata, mera tawana na yasa i vuravura kece.”—Cakacaka 17:26.

KA ERA TUKUNA ESO

Ena ika20 ni senitiuri, eso na ilawalawa era vakabauta ni dua na matatamata e uasivia e dua tale. Kena ivakaraitaki, era vakabauta na Nazi nira uasivi ira na vo ni matatamata ena vuku ni kedra irairai se roka ni kuliniyagodra (gene). Ena yasana adua, e tukuni ena ivolatukutuku ni UNESCO sa cavuti oti mai, “era tautauvata na veimatatamata nira vu mai na dua ga na tamata.”

KA E KAYA NA IVOLATABU

E kaya na Cakacaka 10:34, 35: “E . . . sega ni dau veivakaduiduitaki na Kalou, ia e vakadonui ira era dokai koya ra qai cakava na ka e vinakata mai na veivanua kece.” Qori na vuna e sega ni rawa kina me tukuna e dua na matatamata ni uasivia e dua tale.

E kotora o Jisu e dua na ivakatagedegede vei ira na lotu vaKarisito ni kaya vei ira na nona tisaipeli: “Ni veitacini ga.” (Maciu 23:8) A masulaka tale ga mera “duavata” na nona imuri, mera kua ni veivakaduiduitaki.—Joni 17:20-23; 1 Korinica 1:10.

Ena oti na veivakaduiduitaki vakamatatamata?

“Sa na yaco e na gauna maimuri, ni na vakataudeitaki na ulu-ni-vanua ni vale i Jiova . . . , ka ra na drodro kina na veimatanitu kecega.”—Aisea 2:2.

KA ERA NANUMA ESO

Ni sega ni oti rawa na veivakaduiduitaki, era lomatarotarotaka e levu na sasaga e caka tiko me tarova na leqa qori. Era nanuma kina ni na sega ni oti na veivakaduiduitaki.

KA E KAYA NA IVOLATABU

Ena sega ni vakalaiva na Kalou me yaco tiko ga na veicati vakamatatamata. Ena veiliutaki ni Matanitu ni Kalou, era na sokalou ena duavata na tagane kei na yalewa “mai na veimatanitu, veiyavusa, veimatatamata, kei na duivosavosa,” era na vakaraitaka tale ga na loloma dina. (Vakatakila 7:9) Na Matanitu ni Kalou e sega ni tiko e lomada, ia e dua dina na matanitu ena lewa na vuravura taucoko—na vanua sara ga e vinakata na Kalou meda bula kina, meda kua tale ga ni veivakaduiduitaki.a