Cava e Kaya na iVolatabu me Baleta na Vakawati Vakaduikaikai?

Kena iSau Vakaivolatabu

E vakadonuya na Kalou me veiwatini e dua na tagane kei na dua na yalewa duikaikai baleta ni raici keda kece vakatautauvata. E kaya na iVolatabu: “Na Kalou e raici ira kece vakatautauvata . . . , se mani matatamata cava era lewena.”—Cakacaka 10:34, 35, Good News Translation.

Raica mada eso na ivakavuvuli vakaiVolatabu e raici vakatautauvata kina na matatamata kece kei na bula vakawati

Matatamata kece era vu mai na dua na vanua

O keda kece eda vu mai vei Atama na imatai ni tagane kei na watina o Ivi, e cavuti ena iVolatabu me “tinadra kece na bula.” (Vakatekivu 3:20) Sa rauta me cavuti ena iVolatabu na ka e cakava na Kalou: “E bulia na matatamata kece mai na dua ga na tamata.” (Cakacaka 17:26) Na matatamata kece era lewe ga ni dua na vuvale. Ia vakacava ke takalevu ena nomu itikotiko na veivakaduiduitaki kei na veitovaki?

Ra dau ‘bose vata’ na vuku

E vakadonuya na Kalou na veiwatini vakaduikaikai, ia e sega ni va qori kece na noda rai. (Aisea 55:8, 9) Ke o vakasamataka tiko mo vakawatitaka e dua e lewena e duatani na matatamata, qo na ka mo drau veivosakitaka:

• Drau na vosota vakacava na ka era na vakatukuna o ira ena nomudrau itikotiko se vuvale?

• Drau na vukei ira vakacava na luvemudrau mera vosota na veivakaduiduitaki?

Ni drau ‘bosea vata’ qori, ena tini vinaka nomudrau vakawati.—Vosa Vakaibalebale 13:10; 21:5.