E Dodonu Mera Vulica na Gone na Veika me Baleta na Kalou?

“Sa veirauti na lotu e tu nikua meda veicati kina, ia e sega ga ni veirauti meda veilomani kina.”—JONATHAN SWIFT, DAUVOLAIVOLA MAI IGILADI.

ENA ika18 sara ni senitiuri a cavuta kina o Swift na vakasama qori, ia e levu nikua era duavata kina. Era vakabauta eso ni sega ni dodonu vei ira na itubutubu mera vakavulici luvedra ena veika me baleta na Kalou. Era nanuma ni o ira na gone era susu ena vuvale lotu era vakaloloma.

Na cava mada nomu rai? Na itukutuku cava e toka e ra e donu?

● Mera kua ni vakavulici luvedra na itubutubu ena veika me baleta na Kalou.

● Mera qai veivosakitaka na veika vakalotu kei luvedra na itubutubu nira sa yalomatua na gone.

● Nira se lalai na gone mera vakavulica na itubutubu na nodra vakabauta me baleta na Kalou. Ia nira sa yalomatua, mera vakauqeti luvedra na itubutubu mera vakasama ra qai vakatulewa ga ena ka mera vakabauta.

● O ira na gone mera kua tale ni lomatarotarotaka na ka era vakabauta na nodra itubutubu me baleta na Kalou, mera muria ga.

E Vakaleqai Ira na Gone na Lotu?

E sega ni dua na itubutubu ena via vakaleqa na bula i luvena. E yavutaki vinaka beka na ka era tukuna eso era sega ni taleitaka mera vulica na gone na veika me baleta na Kalou? Sa sagavulu na yabaki na nodra dikeva vinaka na dauvakadidike na kena tarai ira na gone na nodra vakabauta vakalotu na nodra itubutubu. Na cava era raica rawa na dauvakadidike?

Era raica ni sega ni veivakaleqai na lotu, ia ena rawa ni yaga ena nona bula e dua na gone. E tukuna na ripote a tabaki ena 2008 ena mekesini na Social Science Researcha: “E laurai ni lotu e vakavinakataka na nodrau veiwekani na itubutubu kei gone, qori vei rau ruarua o tama kei tina.” E tukuni tale ga kina: “Na lotu kei na veika vakayalo e rairai ka bibi ena nodra bula e levu na gone, e yaga tale ga ena veimaliwai vakavuvale.” Na macala ni vakadidike qori e tautauvata kei na ka e tukuna o Jisu Karisito: “Era marau o ira na kila nira gadreva na Kalou.”—Maciu 5:3.

Ia vakacava na rai mera qai vulica na gone na veika me baleta na Kalou kei na lotu nira sa uabula? Na rai qori e lecavi kina na ka dina qo: Na vakasama ni gone e vaka e dua na vokete lala ena vinakati me vakatawani. E tu sara ga vei rau na itubutubu na digidigi; me rau vakatawana na “vokete” qori e vale ena itovo savasava kei na ivakavuvuli erau kila e kilikili, se rau na laiva me vulica qori o gone ena ka e rogoca vei ira tale eso.

Ka me Caka

E vakadinadinataki ena veigauna sa oti ni lotu e rawa ni uqeta na veivakaduiduitaki kei na veicati. Na cava mera cakava na itubutubu me kua kina ni yaco na ka e tukuna na dauvolaivola o Jonathan Swift? E rawa nira vakavulici luvedra vakacava mera dauloloma?

Ena kilai qori ena tolu na isau ni taro qo: (1) Na cava mera vulica na gone? (2) O cei me vakavulici ira? (3) Na iwalewale ni veivakavulici cava e vinaka duadua?

[iVakamacala e ra]