O Bau Kila?

Na cava era tiko kina na dauveisauilavo ena valenisoro e Jerusalemi?

▪ Ni bera ni mate o Jisu, a vakasavasavataka na valenisoro ena dua na ka tawadodonu a caka tiko kina. E tukuna na iVolatabu: “E curu sara ina valenisoro o Jisu qai vakasavi ira kece na veivoli tiko e loma, e vukica nodra teveli na veisau ilavo kei na nodra idabedabe na volitaki ruve. E kaya vei ira: E volai, ‘Ena vakatokai na noqu vale me vale ni masu,’ ia dou sa vukica me nodra qara na daubutako.”—Maciu 21:12, 13.

Nira gole ina valenisoro mai Jerusalemi na Jiu kei ira era tavuki mera Jiu ena imatai ni senitiuri, era dau kauta na ilavo ni vanua kei na siti era gole mai kina. Ia e dua ga na mataqali ilavo era na vakayagataka ena ivakacavacava ni valenisoro, isoro manumanu era volia, kei na isoro tale eso mera cabora. O ira gona na dauveisauilavo era dau veisautaka na ilavo mai na veivanua ina ilavo e vakayagataki ena valenisoro ra qai maroroya e dua na iwase ni ilavo me nodra. Ni bera ni dau vakayacori na nodra solevu na Jiu, era lai biuta na dauveisauilavo na nodra teveli ena yasa ni valenisoro e kilai me Lomanibai ni kai Veimatanitu.

Kena irairai nira dau lavaka vakasivia na ivakacavacava o ira na dauveisauilavo, oya na vuna e tukuna kina o Jisu nira sa vukica na valenisoro me “nodra qara na daubutako.”

Na cava e taleitaki vakalevu kina ena gauna vakaivolatabu na vuniolive?

▪ E wili na vuniolive kei na veivaini ena veivakalougatataki a yalataka na Kalou vei ira na nona tamata era yalodina vua. (Vakarua 6:10, 11) Se taleitaki tiko ga me yacova mai nikua na vuniolive ena vanua e tubu kina. Ke sega mada ga ni qaravi vinaka, se rawa ni vuavuaivinaka ga me vica na drau na yabaki. E rawa sara ga ni bula ena qele vatuvatu qai sega ni mate ena lauqa. Ke musu se bale na vuniolive, ena tubu tale eso na coke vou ena tolona.

E dau vakayagataki ena gauna vakaivolatabu na kuli ni olive kei na drauna me wainimate ni fiva (fever). Na drega ni taba ni olive qaseqase e vaka na iboi ni vanila e dau caka kina na sede. Ia e vakamareqeti sara na vuniolive ni kakana, e waiwai tale ga na vuana. E rauta ni veimama ni lewe ni vuaniolive dreu e waiwai.

E dua na vuniolive vuavuaivinaka e rawati kina e 57 na lita na waiwai ena dua na yabaki. E dau vakayagataki tale ga qori me waiwai ni cina, vakayagataki ena soqo kei na lotu, ilumu ni yago kei na ulu, qai wainimate me vakamalumutaka na mosi ni mavoa kei na drakusi.—Lako Yani 27:20; Vunau ni Soro 2:1-7; 8:1-12; Ruci 3:3; Luke 10:33, 34.