“E Dau Vukei Au O Jiova”

Lomavakacegu na Sega ni Vakawati Nira Qaravi Jiova

“KEIMAMI marau e levu, dina ga ni keimami sega ni vakawati,” e kaya e dua na yalewa lotu Vakarisito mai Sipeni. Cava e vu ni nona lomavakacegu? “Keimami marautaka na neimami galala mai na lomaocaoca ni bula vakawati, e rawa kina ni keimami qarava vakavinaka cake na noda Kalou o Jiova.”

Na rai vaka oqori e salavata kei na ka e kaya na Vosa ni Kalou me baleta na sega ni vakawati. Ni vakamacalataka tiko na yapositolo o Paula na veika e baleta na vakawati, e mani tukuna kina na rai vakalou oqo: “Ia ka’u sa vosataki ira sa sega ni vakawati kei ira na yada, E yaga vei ira me ra tiko vakakina me vakataki au.” A sega ni vakawati o Paula. Ia na cava e veiuqeti kina ina sega ni vakawati? E dusia ni o koya e vakawati e wase rua na nona vakasama, ia na tagane se yalewa e sega ni vakawati “sa daunanuma ga na veika ni Turaga.” (1 Korinica 7:​8, 32-​34) Na nona qaravi Jiova e dua e sega ni vakawati e vu ni nona lomavakacegu kei na marau.

E Ka Dokai na Sega ni Vakawati

Na ivakamacala i Paula e rairai na veicalati toka kei na so na itovo ni so na vanua e dau vakabibitaka na vakawati kei na tauyavutaki ni dua na vuvale. O Jisu Karisito, o koya a sega ni vakawati, a marau qai lomavakacegu, a vakaraitaka tale ga e dua na inaki dokai ni nodra sega ni vakawati e so na lotu Vakarisito. E kaya: “[E] so sa sega ni vakawati ni ra sa lewa vaka kina e na vuku ni matanitu vakalomalagi. O koya sa rawata me muria oqori, me muria ga.”​—Maciu 19:​12, VV.

Na dina ni veivosa oqori era sa vakadinadinataka e levu na sega ni vakawati ni sega ni vakataotaka nodra qarava na Kalou na ogaoga ni bula vakawati. (1 Korinica 7:​35) E vica na udolu na lotu Vakarisito era sega ni vakawati era marautaka tiko ga nodra sokaloutaki Jiova, ra qai taleitaka tale ga nodra vukei ira na tani.a

Era vakila e levu na lotu Vakarisito era sega ni vakawati nira sega ni marau ga o ira na vakawati, se mera sega ni dau marau o ira na sega ni vakawati. E so mai na ilawalawa ruarua oqo era na sotava na marau vaka kina na rarawa. E kaya na iVolatabu ni o ira na vakawati era na “sota kaya na leqaleqa ni bula.”​—1 Korinica 7:​28, VV.

Sega ni Vakawati ena Vuku ni iTuvaki

E levu era sega ni digitaka nodra sega ni vakawati, ia ena vuku ga ni so na ituvaki. De ra gadreva beka na veilomani, veitokani, kei na veinanumi ena loma ni bula vakawati. Ia e so tale era sega ni vakawati ena gauna oqo ena vuku ni bula vakailavo, kei na so tale na ka era sotava tiko. E so na lotu Vakarisito, levu vei ira era tacida yalewa vakayalo, era sega ni vakawati baleta nira muria na ivakasala ena iVolatabu, mera vakawati ga kei “koya sa nona na Turaga.” (1 Korinica 7:​39) Era dei tiko ena nodra qara e dua na kedra isa ena kedra maliwa na tamata i Jiova, e dua e yalayala, e papitaiso tale ga.

So na gauna era na galili e so na sega ni vakawati. E vakadinata oqori e dua na yalewa sega ni vakawati lotu Vakarisito, e kaya: “Keimami kila na lawa i Jiova, sega gona ni keimami na via vakararawataki koya ena dua na ka. Keimami na vinakata beka e dua na keimami isa, ia se mani vakacava na nodra sasaga na tamata ni vuravura mera veivosakitaka e dua me keimami vakawatitaka, keimami na dei toka ga ena neimami vakatulewa. Keimami sega mada ga ni vinakata na veitokani kei ira na tagane se na yalewa era sega ni vakabauta.” Mera vakacaucautaki na lotu Vakarisito vaka oqo ena nodra muria na ivakasala ena iVolatabu kei na nodra dei ena ivakatagedegede savasava mera vakamarautaki Jiova, se mani leqa cava ga era sotava.

Veivuke Vakalevu o Jiova

O Jiova ena yalodina vei ira era daudina vua, me vakataka e dua na lotu Vakarisito e sega ni via vakawatitaka e dua e sega ni qaravi koya. E vakadinadinataka oqori o Tui Tevita ena nona kaya: “Oni [Jiova] na vakatakila na nomuni yalodina vua sa yalodina.” (Same 18:​25, NW) Vei ira gona era talairawarawa tiko ga vei Jiova, e yalataka o koya: “Au na sega sara ni biuti iko, se vakalaivi iko.” (Iperiu 13:5) Nida vakatotomuri Jiova, eda na rawa ni vakacaucautaki ira na lotu Vakarisito era sega ni vakawati e duidui na nodra yabaki ni bula nira dei toka ga ena Vosa ni Kalou. E rawa nida masuti Jiova tale ga me vakaukauataki ira mera vosota na ka ni bolebole cava ga e basika.​—Dauveilewai 11:​30-​40.

Levu na lotu Vakarisito era sega ni vakawati era kila ni vakainaki na nodra bula nira ogaoga ena cakacaka ni veivakavulici ena iVolatabu. Kena ivakaraitaki, vakasamataki Patricia mada, e dua na marama e sega ni vakawati e yabaki tolusagavulu vakacaca, e painia tudei se cakacaka vakaitalatala vakatabakidua. E kaya: “Dina ni salavata mai kei na veivakatovolei na noqu sega ni vakawati, ia e gauna vinaka meu painia tudei kina. Niu sega ni vakawati, e dau rawarawa noqu veisautaka noqu ituvatuva me rawa ni levu na gauna ni noqu vuli vakataki au. Au vulica tale ga meu dau vakararavi vakalevu vei Jiova, vakauasivi ena veigauna dredre.”

Na rai vaka oya e yavutaki ena vosa ni yalayala ena iVolatabu: “Laiva na nomu sala vei Jiova; vakararavi talega vua, ka na vakayacora ko koya.” (Same 37:5) Io, o ira kece na dauveiqaravi i Jiova yalodina, era vakawati se sega, era vakaukauataki ra qai vakacegui ena vosa uqeti vakalou oqo: “E dau vukei au o Jiova.”​—Same 121:​2, NW.

[iVakamacala e ra]

[Tikina bibi ena tabana e 9]

“Na tagane sa sega ni vakawati sa daunanuma ga na veika ni Turaga, se me vinaka vakaevei vua na Turaga.”​—1 KORINICA 7:32

[Kato ena tabana e 8]

YAGA NI SEGA NI VAKAWATI

E kaya o Jisu, o koya a sega ni vakawati: “A qau kakana me’u kitaka na loma i koya sa talai au mai; ka me’u vakaotia na nona cakacaka.”​—Joni 4:34.

Ratou ogaoga ena ‘parofisai’ na le va na luve i Filipi yalewa eratou sega ni vakawati.​—Cakacaka 21:8, 9.

O ira na tacida yalewa lotu Vakarisito sega ni vakawati era kacivaka na itukutuku ni Matanitu era tomani ira na “yalewa sa tukuna na itukutuku vinaka” era vaka “na mataivalu levu.”​—Same 68:11, NW.