Taro na Dauwiliwili

Na cava meu cakava niu lomatarotarotaka e dua na ka au wilika ena iVolatabu se niu qara ivakasala me baleta na noqu leqa?

E veiuqeti na Vosa Vakaibalebale 2:1-5 meda “qara” na kilaka kei na vuku me vaka eda vakasaqara tiko na “iyau vuni.” E kena ibalebale qo ni dodonu meda saga meda kila na ka eda lomatarotarotaka ena iVolatabu, meda saga tale ga meda qara na iwali ni noda leqa. Eda na cakava vakacava qori?

Ena ivola Me Yaga Nomu Curu ina Koronivuli ni Vuli Vunau, tabana e 33 ina 38, dikeva vinaka na “iVakarau ni Vakekeli” ni o vakayagataka na iyaya ni vakekeli e vakarautaka na “dauveiqaravi e yalodina e vuku.” (Maciu 24:45) E vakamacalataki ena tabana e 36 na ivakavakayagataki ni Watch Tower Publications Index, na kena iwasewase yadua e tu kina na veimataqali ulutaga kei na veitikinivolatabu e rawarawa na kena kune. Qo ena rawa kina ni o raica eso na vakaleleka ni vosa e vauci tiko kina na ka o via vaqara tiko se tikinivolatabu, ena vakaraitaka vei iko na ivola mo vakadikeva. Kua ni vakatotolotaka na nomu vaqara na kena isau kei na veidusimaki o vinakata. Nanuma tiko, o qara tiko na “iyau vuni,” ena taura na gauna, ena vinakati tale ga kina na sasaga.

Macala ga ni so na ulutaga kei na tikinivolatabu e se sega ni vakamacalataki vakamatailalai ena noda ivola. Ena gauna mada ga eda vakamacalataka kina na tikinivolatabu, de dua eda se sega ni lomatarotarotaka ena gauna qori. Eso tale ga na itukutuku ena iVolatabu e dau vakavu lomatarotaro baleta ni sega ni vakamacalataki sara vakamatailalai. Koya gona eda na sega ni kunea totolo na isau kece ni noda taro. Ena gauna kece qori e vinaka meda kua ni vakilakila na ka eda sega ni sauma rawa, qo e rawa ni “vakavulomatarotaro, e sega ni veivosakitaki kina e dua na ka e baleti koya na Kalou me vaqaqacotaka na vakabauta.” (1 Tim. 1:4; 2 Tim. 2:23; Taito 3:9) Ena sega ni dikeva qai sauma kece na valenivolavola ni tabana se na itikotiko e liu e Niu Yoka na taro kece e se bera ni vakamacalataki ena noda ivola. Eda nuidei ni vakarautaka na iVolatabu na ivakamacala veiganiti me dusimaki keda. Ia eda nuidei tale ga ni tiko na vuna vinaka e sega kina ni vakarautaka na iVolatabu na itukutuku matailalai me qai dei kina na noda vakabauti koya e vakarautaka.—Raica na tabana e 185 ina 187 ena ivola na Toro Voleka Vei Jiova.

Vakacava ke o solia nomu vinaka kece ena nomu vaqara na isaunitaro, o qai sega ni raica rawa na kena isau? Kua ni rere mo lai raica e dua na tacimu matua, se dua na qase ni ivavakoso. O ira qori e levu na ka era kila ena iVolatabu, era kila vinaka tale ga na ivakarau ni bula vaKarisito. Ena yaga vakalevu na nodra veivuke ni o kere ivakasala baleta nira kilai iko kei na ituvaki o sotava tiko. Kua tale ga ni guilecava mo masulaka vei Jiova na nomu leqa, kerei koya tale ga me dusimaki iko na yalona tabu, “ni sa solia na vuku ko Jiova . . . kei na yalomatua.”—Vkai. 2:6; Luke 11:13.