Vakacava na iWalewale ni Nomu Dau Veivakasalataki?

Vakacava e sa bau kere ivakasala vei iko e dua? Kena ivakaraitaki, ena tarogi iko ena so na taro qo: ‘Na cava meu cakava? Meu lako ena soqo qo? meu taura na cakacaka qo? meu veibuku kei na dua e kena inaki me keirau vakawati?’

De dua ena kerei iko nomu itokani mo vukei koya ena nona vakatulewa—ena rairai vauci tiko kina na nona veimaliwai kei ira na nona itokani, nona vuvale se nona veiwekani kei Jiova. O na yavutaka ena cava na ka o tukuna? O dau veivakasalataki vakacava? Se mani vakacava na bibi ni vakatulewa me caka, e tukuna na Vosa Vakaibalebale 15:28, “A lomana na yalododonu sa daunanuma na ka me kaya.” Vakasamataka mada na lima na ivakavuvuli vakaivolatabu eda na dikeva, ni na rawa ni vukei keda ena sala meda veivakasalataki kina.

1 Kila Mada na Dina ni iTukutuku.

“O koya sa vosa e na ka ni sa bera ni rogoca, sa ka lialia vua ka sa ka me madua kina.”—VKAI. 18:13.

Ke da via soli ivakasala vinaka, e bibi meda kila na kena ituvaki o koya e kere ivakasala, meda kila tale ga na nona nanuma. Kena ivakaraitaki: Ke dua e qiriti iko mai ena nona via kila na sala vinaka duadua me yaco kina e nomudou, na cava ena vinakati mo kila mo rawa ni qai vukei koya kina? Vakacava o sa na tukuna ga yani vua na sala vinaka duadua me muria, ia o qai sega mada ga ni kila na vanua e tiko kina? Sega! E tautauvata tale ga qori kei na nomu via soli ivakasala vinaka, ena vinakati mo kila vinaka mada na kena ituvaki o koya e kere ivakasala kei na nona nanuma. Vakaevei, sa vakamatatataki kece vei iko na itukutuku baleti koya ena lai vakatau kina na nomu ivakasala? Ke da sega ni kila na ituvaki e sotava tiko o koya e kere ivakasala, eda na rawa ni solia e dua na ivakasala ena rawa ni lai veilecayaki tale kina.​—Luke 6:39.

Mo Kila na Levu ni Vakadidike e sa Cakava. Ena vinaka tale ga mo tarogi koya e kere ivakasala: “Na ivakavuvuli vakaivolatabu cava o nanuma me muri?” “Na cava eso na ka vinaka kei na ka ca ena yaco ena ka o sa nanuma tiko qori?” “Na vakadidike cava o sa bau cakava?” “Na cava era sa bau vukei iko kina eso, me vakataki ratou na qase ni ivavakoso, rau nomu itubutubu, se nomu qasenivuli?”

Eda na kila mai na nona isaunitaro na levu ni nona sasaga o koya e kere ivakasala me kila kina na ka me cakava. Ena vinaka tale ga meda nanuma tiko na ivakasala taumada era sa tukuna vua eso tale. Eda na kila tale ga se vinakata wale ga o koya e kere ivakasala me ‘rogoca ga e daligana’ na ka e via rogoca.​—2 Tim. 4:3.

2 Kua ni Totolo Nomu Veivakasalataki.

“Me totolo ni vakarorogo na tamata yadua, me berabera ni vosa.”​—JEME. 1:19.

De dua ena vinaka na inaki ni noda dau veivakasalataki totolo. Ia vakacava, qori e ka vukutaki meda cakava, vakabibi ke veivosakitaki tiko e dua na ulutaga eda se bera ni vakadidike kina? E tukuna na Vosa Vakaibalebale 29:20: “Ko sa kunea li na tamata sa dauriri ni vosa? Sa na vuku rawa vei rau ko koya sa lialia.”

Vakadeitaka sara vakavinaka ni salavata kei na vuku vakalou na nomu ivakasala. E vinaka mo taroga, ‘E laurai ena noqu ivakasala na rai kei na “yalo ni vuravura”?’ (1 Kor. 2:12, 13) Ke vinaka na inaki ni nomu soli ivakasala, nanuma tiko ni sega ni vinakati wale ga qori. A vakasalataki Jisu na yapositolo o Pita me baleta na ituvaki dredre ena vakarau sotava: “Me kua ni va qori nomuni rai Turaga, ena sega sara ni yaco qori vei kemuni.” Na cava eda rawa ni vulica ena rai i Pita? Ke da sega ni qaqarauni, e rawa mada ga nira uqeti keda na noda itokani me ‘tiko vei keda na vakasama vakatamata, sega ni vakasama ni Kalou.’ (Maciu 16:21-23) E bibi dina meda vakasama e liu ni bera nida vosa! E vakaiyalayala tale ga na ka eda kila ni vakatauvatani kei na vuku vakalou.​—Jope 38:1-4; Vkai. 11:2.

3 Yalomalumalumu ni Muria na Vosa ni Kalou.

“Niu sega tale ga ni cakava vakataki au e dua na ka, ia au tukuna ga na ka e vakavulici au kina o Tamaqu.”​—JONI 8:28.

Vakacava o dau tukuna va qo: “Ke o yau o iko, au na . . . ”? Ke mani rawarawa mada ga na ka me tukuni, ena vinaka ga mo vuli mai na nona yalomalua kei na nona yalomalumalumu o Jisu. E sega tale ni dua e vuravura e levu vua na vuku kei na kila me vakataki Jisu, ia e tukuna ga: “Au sega ni vosa vakataki au ga, ia o Tamaqu . . . e vakaroti au ena ka meu tukuna kei na ka meu vakavulica.” (Joni 12:49, 50) Na nona ivakavuvuli o Jisu kei na nona ivakasala e yavutaki kece ena inaki i Tamana.

Kena ivakaraitaki ena Luke 22:49, eratou tarogi Jisu na nona tisaipeli se rawa ni ratou vala ena gauna e vesu kina se sega. E vakayagataka e dua vei ratou na iseleiwau. Ke o dikeva vinaka na Maciu 26:52-54, ena gauna dredre qori e se vakayagataka ga o Jisu nona gauna me vakamacalataka kina vua na tisaipeli qori na inaki i Jiova. Nona kila na ivakavuvuli ena Vakatekivu 9:6 kei na parofisai ena Same 22 kei na Aisea 53, a rawa kina ni yaga na nona ivakasala o Jisu. E sega ni vakabekataki ni veivakabulai na ivakasala qori, ena marautaka tale ga o Jiova.

4 Vakayagataka na iVola ni iSoqosoqo.

“O cei mada na dauveiqaravi e yalodina e vuku, e lesia na nona turaga me qaravi ira na nona tamata, me vakani ira ena kena gauna donu?” ​—MACIU 24:45.

E sa lesia o Jisu e dua na ilawalawa dauveiqaravi nuitaki mera vakarautaka na kakana vakayalo. Vakacava na gauna o dau veivakasalataki kina ena so na usutu bibi, o dau vakayagataka vinaka na ivola vakaivolatabu mo vakadidike kina?

E sa tu vakarawarawa ena Watch Tower Publications Index kei na Watchtower Librarya e levu na itukutuku matata. Ena ka vakalialia dina ke da sega ni via kila na itukutuku yaga qori! E vica vata na udolu na ulutaga era tu kina, qai veivuke sara vakalevu vei ira na qara ivakasala. O dau vukei ira vakacava eso tale mera vakadidike ena ivakavuvuli vakaivolatabu mera qai vakayagataka ga na Vosa ni Kalou? E dau veivuke na kabasi livaliva e vakatokai na GPS me vakaraitaka vua e dua na vanua e tiko kina, oti me vakaraitaka na vanua e via gole kina. E va tale ga qori na iyaya ni vakadidike, oya ni rawa ni kila vinaka na kena ituvaki, me kila tale ga na sala me dei tiko ga kina ena sala ni bula.

Levu na qase ni ivavakoso era sa vakavulici ira na dautukutuku mera dau vakayagataka na Index se na Watchtower Library, qo e vukei ira kina na mataveitacini mera dau vakayagataka ga na iVolatabu. Qori ena vukei ira na dautukutuku mera kua wale ga ni walia na nodra leqa, ia ena vakamatauni ira tale ga mera vakadidike ra qai dau nuitaka na isolisoli vakayalo e vakarautaka o Jiova. Na sala qo era sa ‘vakavulica tiko kina nodra vakasama mera vakaduiduitaka na ka e donu mai na ka e cala.’—Iper. 5:14.

5 Kua ni Vakatulewa ena Vukudra na so Tale.

“Nida na dui colata ga na noda icolacola.”​—KALA. 6:5.

Ena vakatau yadudua sara ga vei keda na ivakasala eda na via muria. O Jiova e solia vei keda na galala meda muria na nona ivakavuvuli se sega. (Vkru. 30:19, 20) Ena so na ituvaki ena vinakati me muri e levu na ivakavuvuli vakaivolatabu, ia na kena muri ena vakatau sara ga vei koya e qara ivakasala. Ena ituvaki se na yabaki ni nona bula o koya e kere ivakasala, ena rairai vinaka tale ga meda taroga, ‘Vakacava, e tu vei au na dodonu meu veivakasalataki?’ Ena so na ituvaki ena vinaka me raici ratou ga na qase ni ivavakoso se me gole ga vei rau na itubutubu ke se itabagone.

[iVakamacala e ra]

[Kato/​iYaloyalo ena tabana e 8]

Ka me Caka ena Sokalou Vakavuvale

Vakacava me okati ena nomu sokalou vakavuvale na nomu vakadidike sara ga ena so na taro e se qai tarogi ga vei iko? Na ulutaga kei na ivakavuvuli vakaivolatabu cava o rawa ni vukei koya kina e kere ivakasala? Kena ivakaraitaki, ena rairai tarogi iko e dua me baleta na nona via veibuku kei na dua e vinakata me watina. Ni o vakayagataka na Index se na Watchtower Library, raica na ulutaga e veiganiti sara ga kei na ulutaga qori. Kena ivakaraitaki, o rawa ni raica ena Index na ulutaga “Dating” (Veibuku) se “Marriage” (Vakawati). O rawa ni qai raica eso tale na kena ulutaga lalai. Ni o raica tiko e dua na ulutaga levu, nanuma tale ga mo raica ke volai tiko kina “See also” (Raica tale ga), ni rawa ni dusia e dua na ulutaga e lakolakovata sara ga kei na nomu vakadidike.

[Kato ena tabana e 9]

Meda vakavinavinakataki Jiova ni vakayagataka na nona isoqosoqo me vakarautaka vei keda na ivakasala vinaka, eda rawa tale ga ni soli ivakasala vinaka. E tukuni ena Dauvunau 12:11: “A nodra vosa na vuku sa vaka na mata ni moto, kei nai vako sa vakataudeitaka ko ira na turaga ni soqosoqo [se, “o ira na daukauaitaka na yatuvosa e vuqa,” NW], o koya sa solia mai e le dua bauga nai vakatawa.” Me vaka ga na ‘matanimoto’—e dau vakayagataki mera usoraki kina na manumanu ni siviyara—e dau dusimaki ira tale ga na yalomalumalumu ena sala dodonu na ivakasala yalololoma kei na ivakasala yaga. Ke ‘lauvako’ na kau ena dei qai sega ni yavala. E tautauvata tale ga qori nida soli ivakasala vinaka, ni dau yaga vakalevu. O ira na vuku era ‘daukauaitaka,’ se ra marautaka na ‘yatuvosa e vuqa,’ ni laurai kina na vuku i Jiova, na nodra ‘ivakatawa duadua ga.’

Muria na iVakatawa ni o veivakasalataki. E dua dina na ka dokai meda dau vakarorogo ena gauna kece eda dau veivakasalataki kina! Ni yavutaki na noda ivakasala ena ivakavuvuli vakaivolatabu, ena yaga tawamudu vei koya e vakarorogo.