O se Nanuma Tiko?

O sa wilika na itabataba ni Vale ni Vakatawa era se qai tabaki oti ga? Raica mada ke o rawa ni sauma e vica na taro qo:

• O cei o Olivétan, na cava meda kauaitaka kina na ka e cakava?

Qori na yaca e kilai kina na turaga ni Varanise o Pierre Robert. Donuya na veiveisau a yaco ena lotu Katolika ena ika16 ni senitiuri, a vakadewataka na turaga qo na iVolatabu ena vosa vakaVaranise. A vakayagataka na vosa “ivakatawa” me isosomi ni “bisovi,” na vosa “ivavakoso” me isosomi ni “lotu.” Ena levu na nona ivakadewa, a vakayagataka sara ga na yaca ni Kalou “Jiova.”—1/9, tabana e 18-20.

• Na cava e vakaibalebaletaka na Kalou ena nona tukuna vei ira na Livai: ‘O yau na nomuni ivotavota’?

O ira kece na yavusa e Isireli e tiko na nodra ivotavota ni qele, ia o ira na livai e nodra ‘ivotavota’ o Jiova. (Tiko 18:20) E sega na nodra ivotavota ni qele, ia era lesi ena dua na itavi dokai. O Jiova ga e vakarautaka na ka kece era gadreva. Nikua, o ira tale ga era vakaliuca na Matanitu ni Kalou era nuidei ni na vakarautaka o Jiova na ka era gadreva.—9/15, tabana e 7-8, 13.

• Eda kila vakacava na gauna a vakarusai Jerusalemi kina o Papiloni?

O ira na dauvolaitukutuku makawa mai Roma kei Kirisi, e duidui na ka era vola me baleti ira na tui e Papiloni kei na gauna era veiliutaki kina. Ia era duavata eso na daunivakadidike ni a kabai Papiloni ena 539 B.S.K. o Sairusi II. E bibi dina na tikinisiga qori. Era sereki na Jiu ra qai yaco ina nodra vanua rauta na 537 B.S.K. E tukuna na iVolatabu ni rauta ni 70 na yabaki na nodra tu vakavesu. Koya gona, a rairai kabai o Jerusalemi ena 607 B.S.K. (2 Vei. 36:21, 22; Jere. 29:10; Tani. 9:1, 2)—10/1, tabana e 26-31.

• Ena kila vakacava e dua na lotu vaKarisito na ka ni veivakamarautaki e yaga kei na kena e ca?

Me rawa nida kila se ka ni veivakamarautaki cava e yaga kei na kena ena vakamarautaki Jiova, e vinaka meda taroga: Na cava e okati kina? Vakacava na levu ni gauna au na vakayagataka kina? O cei au na vakailala kei ira ena gauna qori?—10/15, tabana e 9-12.

• Na cava e cala kina na vakalutu?

E doka na bula na Kalou, ni kunekunetaki e dua, o Jiova e raica qori me sa dua na ka bula. (Same 139:16) Ke tagutuvi na nona bula e dua na gone se bera ni sucu, e wili qori me laba. Me vaka e volai ena Lawa a soli vei Mosese, ni na lewai o koya e vakamavoataka e dua na gone se bera ni sucu. (Lako 21:22, 23)—11/1, tabana e 6.

• Ena uqeti keda vakacava na Vosa Vakaibalebale 7:6-23 meda qarauna na sara iyaloyalo ca?

E vakamacalataki e keri ni dua na cauravou e gole ena yasayasa e vakaitikotiko kina e dua na yalewa dautagane. A temaki koya na yalewa qori. Nikua eda na qarauna na site ni Internet era tu kina na itaba veivagarogaroi, e bibi gona meda kerea na veivuke i Jiova ni bera nida raica na itaba va qori ena Internet.—11/15, tabana e 9-10.

• Vakacava ena rusa na vuravura ena 2012?

Ni cakacakataki na ivolanivula na Maya, era nanuma kina eso ni icavacava kei vuravura ena yaco ena 2012. E sega ni dina qori, baleta a bulia o Jiova na vuravura me tawani. E tukuna na iVolatabu ni na sega ni vakarusai na vuravura. (Dauv. 1:4; Aisea 45:18)—12/1, tabana e 10.

• O cei o ira na dauvolaivolatabu era tiko ena Penitiko 33 S.K.?

A rairai tiko e kea e ono na dauvola iVolatabu vaKirisi vakarisito. O ratou na tolu na yapositolo, Maciu, Joni kei Pita. Erau tiko tale ga na taci i Jisu vakacabecabe o Jemesa kei Juta. De dua a tiko tale ga na cauravou o Marika.—12/1, tabana e 22.