Yadra Tiko me Vakataki Jisu

“Dou yadra, dou masu tiko.”​—MACIU 26:41.

O NA SAUMA VAKACAVA?

Ena laurai vakacava ena noda masu nida yadra tiko?

Eda na vakaraitaka vakacava nida yadra tiko ena noda cakacaka vakavunau?

Na cava e bibi kina meda yadra tiko nida vakatovolei, eda na cakava vakacava qori?

1, 2. (a) Na taro cava soti e basika me baleta na nona yadra tiko o Jisu? (b) Vakacava e yaga ina kawatamata ivalavala ca na ivakaraitaki uasivi i Jisu? Vakatauvatana.

DE DUA o na veinanuyaka: ‘E rawa niu yadra tiko me vakataki Jisu? O koya mada ga e uasivi! Ena so mada ga na gauna e kila na ka ena yaco ena vica na udolu na yabaki e tarava! Vakacava, a vinakati dina me yadra tiko o Jisu?’ (Maciu 24:37-39; Iper. 4:15) E vinaka meda sauma mada e rua na taro qori meda qai kila kina na yaga kei na bibi ni noda yadra tiko.

² Vakacava e yaga ina kawatamata ivalavala ca na ivakaraitaki uasivi i Jisu? Io, e rawa nida vuli mai na nona ivakaraitaki e dua na qasenivuli vinaka. Kena ivakaraitaki, kaya mada ke dua e se qai vulica vakadua me vakayagataka na dakaititi. E macala ga ni na sega ni lau na gasau ena takete ena imatai ni gauna, ia ena sasaga tiko ga qai vakatovotovo ena levu na gauna. Me rawa ni matau ena vana, ena vulica vinaka na iwalewale ni nona dau vana o qasenivuli baleta ni kenadau kina. Ena saga me vulica na nona iduriduri, na biubiu ni ligana kei na vanua me biuta kina nona iqaqalo. Toso na gauna ena kila me veiraurautaka na kaukaua ni nona dre na wa kei na liwa ni cagi me lewa na gasau e vanataki. Ke sasaga tiko ga me muria na ka e cakava nona qasenivuli ena voleka tiko ga ena takete na gasau e vanataka. Nida muria tiko ga na ivakaraitaki uasivi i Jisu kei na nona ivakavuvuli, eda na vakavinakataka tiko ga na noda ivakarau ni bula vaKarisito.

3. (a) E vakaraitaka vakacava o Jisu ni bibi vua me yadra tiko? (b) Na cava eda na dikeva ena ulutaga qo?

³ Vakacava, a vinakati dina me yadra tiko o Jisu? Io. Kena ivakaraitaki, ena iotioti ni nona bogi e vuravura, e uqeti ratou na nona yapositolo: “Me datou yadra tiko.” E tomana: “Dou yadra, dou masu tiko mo dou kua ni temaki.” (Maciu 26:38, 41) A yadra tiko ga o Jisu ena gauna kece e bula voli kina e vuravura. E mosimosi dina na iotioti ni vica na aua ni bera nona mate, ia e vinakata sara ga me yadra tiko, me volekata tale ga na Tamana vakalomalagi. E kila tale ga o Jisu ni vinakati me ratou cakava tale ga qori na nona imuri, vakabibi ena veigauna e se bera mai. Meda raica mada qo na vuna e vinakata kina o Jisu meda yadra tiko. Oti, eda na qai dikeva e tolu na sala eda rawa ni yadra tiko kina e veisiga me vakataki Jisu.

VUNA E VINAKATA KINA O JISU MEDA YADRA TIKO

4. Na cava e bibi kina meda yadra tiko?

⁴ Eda kila eso na ka ena yaco ena gauna e se bera mai, ia e se vinakata ga o Jisu meda yadra tiko baleta ni vakaiyalayala ga na ka eda kila qori. Vakacava na gauna e se bula kina e vuravura o Jisu, e kila kece na ka e se bera ni yaco? Sega, e yalomalumalumu mada ga me tukuna: “E sega ni dua e kila na siga ya kei na kena aua, era sega ni kila na agilosi mai lomalagi, e sega ni kila na Luvena, e kila duadua ga o Tamana.” (Maciu 24:36) Ena gauna mada ga oya, e sega ni kila ‘na Luve’ ni Kalou na tikinisiga ena vakarusai kina na vuravura ca qo. Vakacava o keda nikua? Eda kila kece na ka e se bera ni yaco? Sega. Eda sega ni kila na gauna ena tala mai kina o Jiova na Luvena me mai vakarusa na ituvaki ca qo. Ke da kila na gauna qori, ena sega ni gadrevi meda yadra tiko, se vakaevei? E vakamacalataka o Jisu ni na yaco vakidacala na icavacava, ena sega tale ga ni namaki; e bibi gona meda yadra tiko.​—Wilika Maciu 24:43.

5, 6. (a) Nida kila na ka e vauca na Matanitu ni Kalou, ena yaga vakacava ena noda yadra tiko? (b) Na cava e bibi kina meda kila na ka e baleti Setani me rawa nida yadra tiko ga kina vakalevu?

⁵ Ena yasana adua, e kila vinaka o Jisu e levu na ka totoka ena yaco ena gauna e se bera mai, qori na ka dina era lecava tu e levu ena gauna oya. E macala ga ni sega ni tautauvata na levu ni ka eda kila ni laurai vata kei Jisu, ia eda kalougata ni vakavulici keda o koya ena ka e vauca na Matanitu ni Kalou kei na ka ena cakava ena gauna se bera mai. Eda vakadinadinataka ni levu era lecava tu na veika totoka qori ena gauna eda gole kina e koronivuli, vanua ni cakacaka kei na yalava ni cakacaka vakavunau. Oya e dua tale na vuna vinaka meda yadra tiko kina. Me vakataki Jisu ga, e bibi meda yadrava tiko ga na gauna veiganiti kece meda wasea kina na ka eda kila me baleta na Matanitu ni Kalou. E talei na gauna kece qori, eda na sega tale ga ni via vakaweleweletaka baleta ni vakatau kina nodra bula e levu!​—1 Tim. 4:16.

⁶ E dua tale na ka e kila vinaka o Jisu e vakavuna me yadra tiko kina. E kila vinaka ni vinakata sara ga o Setani me temaki koya, vakacacani koya, me kua tale ga ni yalodina. Na meca voravora qo e yadrava tiko ga e dua tale na “gauna veiganiti” me temaki Jisu kina. (Luke 4:13) Ia e yadrava qori o Jisu. E tu vakarau sara ga me vakatovolei, ke mani temaki, vakacacani se vakasewasewani. Eda sotava tale ga na ituvaki qori nikua, se vakacava? Eda kila ni sega ni veisau o Setani e se “vaka [tiko ga] na laione e tagi, e vakasaqara e dua me basuraka.” Qori na vuna e uqeti keda kina na Vosa ni Kalou: “Moni yalomatua, ni yadra tiko.” (1 Pita 5:8) Eda na cakava vakacava qori?

YADRA TIKO ENA NODA MASU

7, 8. Na ivakasala cava a tukuna o Jisu me baleta na masu, na cava eda vulica ena ivakarau ni nona dau masu?

⁷ E vakaraitaka na iVolatabu ni bibi na masu me rawa nida yadra tiko kina vakayalo. (Kolo. 4:2; 1 Pita 4:7) Ni oti ga nona kerei ratou nona imuri me ratou yadra vata kei koya, e tukuna o Jisu: “Dou yadra, dou masu tiko mo dou kua ni temaki.” (Maciu 26:41) Vakacava e tukuna tiko o Jisu ni dodonu me ratou muria ga na ivakasala qori ena gauna dredre eratou vakila tiko ena bogi oya? Sega. E vinakati me muri e veisiga na ivakasala qori.

⁸ E ivakaraitaki vinaka dina o Jisu ena nona dau masu. De dua o na nanuma lesu na nona masu tiko vei Tamana ena dua na bogi taucoko. Meda raitayaloyalotaka mada na ka a yaco ena bogi oya. (Wilika Luke 6:12, 13.) Ena vulaitubutubu, kena irairai ni a tiko o Jisu ena vanua volekata na taoni o Kapenaumi. Ni sa karobo, e gole o Jisu ina dua na ulunivanua volekata na Wasa o Kalili. E raica tu yani vakayawa na ibulibuli ni vanua, de dua e raica tale ga na waqawaqa ni cina tabucagi ena vanua o Kapenaumi kei na veikoro voleka. Ena gauna a masu kina o Jisu, e sega tale ni dua na ka e vakataotaka nona vosa tiko vei Jiova. Ni oti e vica na aua, e sega ni kila mada ga ni sa boko yadudua yani na cina se na kena sa voleka ni dromu na vula se na nodra veitosoyaki na manumanu ena loma ni vanua. De dua a masulaka sara ga na vakatulewa bibi ena vakarau cakava, qori na nona digitaki ratou na 12 na nona yapositolo. Vakasamataka mada na nona talaucaka tiko na lomana o Jisu vei Tamana ena ka kece e nanuma me baleti ratou na nona tisaipeli, e kerea tale ga vakabibi na vuku kei na nona veidusimaki.

9. Na cava eda vulica ena nona masu tiko ena bogi taucoko o Jisu?

⁹ Na cava eda vulica ena ivakaraitaki i Jisu? Me balavu na noda masu? Sega. E tukuna ga ena yalovinaka o Jisu me baleti ratou na nona imuri: “E gu na yalo, ia sa malumalumu ga na yago.” (Maciu 26:41) E dina qori, ia eda se rawa ga ni vakatotomuri Jisu. Kena ivakaraitaki, vakacava eda dau masuti Jiova e liu ni bera nida vakatulewataka na ka e vauca na noda bula, noda vuvale, se o ira na tacida vakayalo? Eda dau masulaki ira na tacida vakayalo? Eda dau masu mai vu ni lomada se dua tu ga na ivakarau ni noda masu? Eda dikeva tale ga ni o Jisu e raica vakabibi na nodrau veivolekati kei Tamana, vaka kina na gauna erau dau veivosaki kina. Eda bula tu ena vuravura veilecayaki, da qai osooso vakalevu, e rawarawa sara meda tacori ena ivakarau ni bula va qori, da qai guilecava kina na ka e bibi. Ke levu na gauna eda veivosaki kina kei Jiova mai vu ni lomada, eda na yadra tiko ga kina vakalevu. (Maciu 6:6, 7) Eda na toro voleka kina vei Jiova. Eda na saga tale ga me dei na noda veiwekani kei koya, da qai sega ni cakava e dua na ka me luluqa kina na veiwekani qori.​—Same 25:14.

YADRA TIKO ENA NODA CAKACAKA VAKAVUNAU

10. Na cava e cakava o Jisu me vakaraitaka ni yadrava na gauna veiganiti kece me vunau kina?

¹⁰ E yadrava tiko ga o Jisu na itavi e lesi koya kina o Jiova. Ena so na cakacaka, ena sega ni dua na kena leqa ke ciriyawa noda vakasama nida cakacaka tiko. Ia eso tale na cakacaka ena gadrevi kina na yadrayadravaki, me kua tale ga ni ciriyawa na noda vakasama. E va sara ga qori na noda cakacaka vakaitalatala. E yadra tiko ga o Jisu ena nona cakacaka, e yadrava na gauna veiganiti kece me wasea kina na itukutuku vinaka. Kena ivakaraitaki, ni yaco yani ena taoni o Saika kei ratou na nona tisaipeli, eratou gole sara na tisaipeli me ratou lai voli kakana. E vakacegu toka ga ena yasa ni toevu o Jisu volekata na taoni, ia e yadra tiko ga, a raica qori me dua na gauna veiganiti me vunau kina. A gole yani e dua na yalewa ni Samaria me lai takiwai. A rawa sara ga ni moce vakalailai o Jisu se vakaiulubale me kua ni vosa vua. Ia a vosa ga vua, e vunau tale ga vakavinaka vua, yaco sara mera vakabauta e levu ena nona koro. (Joni 4:4-26, 39-42) Vakacava, eda rawa ni vakataki Jisu ena noda yadrava tiko ga na gauna veiganiti kece meda vunau kina vei ira eda sotava e veisiga?

11, 12. (a) Na cava a tukuna o Jisu vei ira na via vakataotaka na nona cakacaka? (b) E veiraurautaka vakacava o Jisu na nona cakacaka?

¹¹ Ena so na gauna, era saga mera vakataotaka na cakacaka i Jisu eso mada ga na lewenivanua dauveikauaitaki. E levu era vinakata me tiko ga e Kapenaumi nira raica nona veivakabulai vakacakamana. E sega ni cala na ka era via cakava, ia na inaki ga ni nona cakacaka o Jisu me vunau “vei ira na sipi ni matanitu o Isireli era yali tu,” sega ni dua ga na koro. (Maciu 15:24) E tukuna kina vei ira: “E dodonu meu tukuna tale ga na itukutuku vinaka ni matanitu ni Kalou ena veikoro tale eso, ni qo na ka au talai mai kina.” (Luke 4:40-44) Koya gona, e bibi duadua vei Jisu na nona cakacaka vakavunau. E sega ni vakalaiva e dua na ka me vakawelei koya.

¹² Vakacava e ogaoga tiko ga o Jisu ena nona cakacaka, qai sega na gauna me marautaka kina eso tale na ka? Se sa rui osooso vakalevu ena nona cakacaka vakaitalatala qai sega kina ni kauaitaka na ka era vinakata eso tale? Sega, e ivakaraitaki vinaka o Jisu ena nona veiraurautaka na ka e cakava. E marautaka na bula, e marautaka tale ga na nona dau veimaliwai kei ira na nona itokani. E dau lomani ira na vuvale, e kauaitaka na ka era gadreva kei na leqa era sotava. E kauaitaki ira tale ga na gone.​—Wilika Marika 10:13-16.

13. Eda na vakatotomuri Jisu vakacava ena nona yadra tiko kei na nona veiraurautaka na nona cakacaka vakaitalatala?

¹³ Nida saga meda yadra tiko me vakataki Jisu, eda na veiraurautaka vakacava na noda cakacaka? Eda na sega ni vakalaiva na vuravura qo me vakawelei keda mai na noda cakacaka. Eso mada ga na noda itokani vinaka kei ira na wekada era na tukuna meda kua ni ogaoga vakalevu ena cakacaka vakavunau, se meda qara na bula era nanuma ni vinaka. Ia ke da vakataki Jisu, eda na okata na cakacaka vakaitalatala me vaka ga na keda kakana. (Joni 4:34) Ena vakaukauataki keda vakayalo na cakacaka qori, eda na marau tale ga kina. Ia eda na sega ni yalododonu sivia se meda sa sega sara ga ni marautaka tale eso na ka. Me vakataki Jisu ga, eda vinakata meda marau, da qai veiraurautaka na noda qaravi koya na “Kalou mamarau.”​—1 Tim. 1:11.

EDA NA YADRA TIKO VAKACAVA NIDA VAKATOVOLEI?

14. Na cava meda nanuma tiko ena gauna eda vakatovolei kina, na cava e bibi kina qori?

¹⁴ Eda sa veivosakitaka mai eso na ivakasala i Jisu me baleta noda yadra tiko, e cavuta qori ena gauna sara ga e vakatovolei tiko kina. (Wilika Marika 14:37.) Nida vakatovolei, e bibi meda muria tiko ga na ivakaraitaki i Jisu. E levu era guilecava e dua na ka dina ena gauna era vakatovolei kina. E cavuti mada ga vakarua qori ena Vosa Vakaibalebale: “Sa dua na sala sa rairai dodonu vua na tamata, ia na kenai otioti na sala ga ni mate.” (Vkai. 14:12; 16:25) Ke da vakararavi ga ena noda vuku, vakabibi ena gauna eda sotava kina e dua na ituvaki dredre, ena rawa sara ga ni vakaleqai keda kei ira eda lomana.

15. Na cava e rawa ni temaki kina e dua na tama ena gauna e vakilai kina na leqa vakailavo?

¹⁵ Kena ivakaraitaki, ena rairai saga tiko e dua na tama me vakarautaka na ka eratou gadreva vakayago na ‘nona vuvale.’ (1 Tim. 5:8) De dua ena temaki me ciqoma e dua na cakacaka ena rawa sara ga ni calata kina na soqoni vaKarisito, ena sega ni liutaka na sokalou vakavuvale, se vakaitavi ena cakacaka vakavunau. Ke cakava na ka e nanuma ga ni donu, ena nanuma kina ni sega ni dua na kena leqa na nona ciqoma na cakacaka qori. Ia qori ena rawa ni vakaleqa sara ga na nona bula vakayalo. E bibi gona meda muria na ivakasala ena Vosa Vakaibalebale 3:5, 6! E tukuna o Solomoni: “Mo vakararavi vei Jiova e na vu ni yalomu: Ka mo kakua ni vakararavi ki na nomu yalomatua.”

16. (a) Na cava eda vulica mai na ivakaraitaki i Jisu ena nona nuitaka na vuku i Jiova? (b) Era vakatotomuri Jisu vakacava e levu na ulunivuvale ena nodra vakararavi vei Jiova nira sotava na ituvaki dredre?

¹⁶ Ena gauna e vakatovolei kina o Jisu, a sega ni vakararavi ena nona vuku. Vakasamataka mada oya! Na turaga vuku duadua a bula e vuravura e sega ni vinakata me vakararavi ena nona vuku. Ena gauna mada ga a vakatovolei koya kina o Setani, e tukuna vakarua vua o Jisu na vosa qo: “E volai.” (Maciu 4:4, 7, 10) E nuitaka ga na vuku i Tamana me vorata kina na veivakatovolei, e vakaraitaka tale ga nona yalomalumalumu. Na itovo qori e sega ni vakaraitaka o Setani, e sega tale ga ni vinakata. Vakacava eda dau nuitaka tale ga na vuku i Jiova? Na ulunivuvale e yadra tiko me vakataki Jisu ena saga me dusimaki koya na Vosa ni Kalou, vakabibi ni sotava na ituvaki dredre. Ena veiyasai vuravura, e vica vata na udolu na ulunivuvale era cakava tiko qori. Era vakaliuca tiko ga ena nodra bula na Matanitu ni Kalou kei na sokalou savasava, sega ni veika vakayago. Qori era qarava vinaka kina na nodra vuvale. E vakalougatataka o Jiova na nodra sasaga ena nona vakarautaka na ka era gadreva vakayago, me vaka ga e yalataka na nona Vosa.​—Maciu 6:33.

17. Na cava o via yadra kina me vakataki Jisu?

¹⁷ E macala ga ni ivakaraitaki uasivi o Jisu ena nona yadra tiko. E yaga na nona ivakaraitaki, eda rawa tale ga ni muria meda rawata kina na bula. Nanuma tiko ni vinakata sara ga o Setani me vakaleqai iko vakayalo, me vakamalumalumutaka nomu vakabauta, mo kua ni gumatua ni qaravi Jiova, e vinakata tale ga mo kua ni yalodina. (1 Ces. 5:6) Kua vakadua ni vakalaiva me qaqa! Yadra tiko ga me vakataki Jisu, qori ena nomu yadra tiko ena masu, cakacaka vakavunau kei na gauna o vakatovolei kina. Ke o cakava qori, ena vakainaki qai marautaki na nomu bula ena gauna qo ni sa voleka ni vakarusai na ituvaki ca kei vuravura. Ni o yadra tiko, ena raica o Jisu ni o ogaoga tiko ena cakacaka i Tamana ena gauna e lesu mai kina me vakarusa na ituvaki ca qo. Ena marautaka sara ga o Jiova me vakalougatataka na nomu yalodina!​—Vkta. 16:15.

[iYaloyalo ena tabana e 6]

A vunau o Jisu vua na yalewa ena yasa ni toevu. Vakacava o dau vunau ena gauna veiganiti kece?

[iYaloyalo ena tabana e 7]

Na nomu kauaitaka nodratou bula vakayalo e vale, e vakaraitaka ni o yadra tiko