Uqeta Tiko ga na iTovo Vinaka ena iVavakoso
“Me tiko mada ga e lomamuni na loloma soli wale ni noda Turaga o Jisu Karisito.”—FPAI. 4:23.
EDA NA UQETA VAKACAVA NA ITOVO VINAKA ENA IVAVAKOSO . . .
nida veimaliwai kei ira na tacida?
nida gugumatua ena cakacaka vakavunau?
nida sega ni vunitaka na cala bibi?
1. Na cava era vakavinavinakataki kina na ivavakoso e Filipai kei Ceatira?
ERA dravudravua na lotu vaKarisito e Filipai ena imatai ni senitiuri. Ia era dau lomasavu, era dau lomani ira tale ga na tacidra vakayalo. (Fpai. 1:3-5, 9; 4:15, 16) Oya na vuna e vola kina vei ira o Paula: “Me tiko mada ga e lomamuni na loloma soli wale ni noda Turaga o Jisu Karisito.” (Fpai. 4:23) Era vakaraitaka tale ga na itovo vinaka qori na lotu vaKarisito e Ceatira, e tukuna kina vei ira o Jisu: “Au kila na nomu cakacaka, nomu loloma, nomu vakabauta, nomu cakacaka vakaitalatala, nomu vosota, kei na vinaka cake ni nomu cakacaka ena gauna qo ni vakatauvatani kei na kena e liu.”—Vkta. 2:19.
2. Na cava meda cakava me vakilai kina ena ivavakoso na itovo vinaka?
2 Nikua era dau vakaraitaka tale ga na ivavakoso kece ni iVakadinadina i Jiova na itovo vinaka va qori, se so tale na itovo vinaka era kilai tani kina. Era kilai tani eso na ivavakoso nira dau veikauaitaki qai veilomani. Eso tale era gugumatua ena cakacaka vakavunau, era raica tale ga vakabibi na veiqaravi vakatabakidua. Nida bucina yadua na lewe ni ivavakoso na itovo vinaka va qori, eda sa vakaitavi sara tiko ga ena duavata ni ivavakoso kei na kena bulabula vakayalo. (1 Kor. 1:10) Ena dua tale na yasana, ke da sega ni uqeta na itovo vinaka, era na sega ni gumatua ni qaravi Jiova na tacida, era na sega tale ga ni gumatua ena cakacaka vakavunau, ena rawa mada ga nira vakalaiva me yaco na cala bibi ena ivavakoso. (1 Kor. 5:1; Vkta. 3:15, 16) Vakacava na nomu ivavakoso, na itovo cava e laurai kina? Na cava o rawa ni cakava me laurai kina ena ivavakoso na itovo vinaka?
UQETA NA ITOVO VINAKA
3, 4. E rawa vakacava meda ‘vakamolimoli vei Jiova ena ivavakoso’?
3 E seretaka na daunisame: “Au na vakamolimoli vei kemuni [Jiova] e nai soqosoqo levu; ka’u na vakavinavinaka vei kemuni e na kedra maliwa na lewe vuqa.” (Same 35:18) Na daunisame mada ga e dau vakalagilagi Jiova ena gauna e veimaliwai kina kei ira na dauveiqaravi ni Kalou. Koya gona, na soqoni e veimacawa, me vaka na vulici ni Vale ni Vakatawa, e gauna vinaka meda vakaraitaka kina na noda gugumatua kei na noda vakabauta nida vakamacala ena soqoni. E vinaka meda taroga: ‘Au dau vakamacala ena soqoni? Au dau vakavakarau vinaka me yaga na noqu ivakamacala? Niu ulunivuvale, vakacava au dau vukei luvequ me vakarautaka na nona isaunitaro ni bera na soqoni, au vukei koya tale ga me vakamacala ga ena nona vosa?’
4 E tukuna na daunisame o Tevita, ni rau lakolakovata na noda via cakava na ka e dodonu kei na noda lagasere. E kaya: “Sa dei na yaloqu, na Kalou, sa dei na yaloqu: Au na sere ka vakavinavinaka.” (Same 57:7) Na sere e vakayagataki ena soqoni, e gauna vinaka meda ‘lagasere qai vakavinavinaka’ kina vei Jiova ena lomada taucoko. Ke da se sega ni kila vinaka eso na sere, e vinaka meda vakatovotovotaka ena noda Sokalou Vakavuvale. Io, meda saga mada ga meda ‘sere vei Jiova ena noda bula taucoko da qai vakavinavinaka vua ena gauna sa vo.’—Same 104:33.
5, 6. Eda na vakaraitaka vakacava na noda veikauaitaki kei na noda lomasoli vei ira na tacida, nida cakava qori na cava ena uqeta ena ivavakoso?
5 Nida kauaitaki ira na tacida vakayalo, eda sa uqeta tiko na veilomani ena ivavakoso. Ena iotioti ni ivola i Paula vei ira na Iperiu, e tukuna kina: “Moni veilomani tiko ga vakaveitacini. Ni kua ni guilecava na veikauaitaki.” (Iper. 13:1, 2) Dua na sala vinaka eda vakaraitaka kina na noda veikauaitaki, oya na noda sureti ira na ivakatawa dauveilakoyaki kei na watidra se o ira na tacida ena ivavakoso era veiqaravi vakatabakidua meda vakayagataka vata e dua na kakana. Meda nanumi ira tale ga na yada, na itubutubu le dua, se so tale era gadreva tu na veivuke meda mai vakayagataka vata e dua na kakana, se tomani keda ena noda sokalou vakavuvale.
6 A tukuna o Paula vei Timoci me uqeti ira na tacina vakayalo “mera cakava na ka e vinaka, mera vakaitavi vakalevu ena cakacaka yaga, mera lomasavu, mera yalosolisoli, mera maroroya me nodra na yavu vinaka ni bula e se bera mai, mera taura matua kina na bula dina.” (1 Tim. 6:17-19) O Paula e uqeti ira tiko na tacina vakayalo mera dau lomasoli. Ena gauna mada ga e drakidrakita kina na bula vakailavo, e se rawa ga nida lomasoli. Kena ivakaraitaki, ke o vakamotoka, o rawa ni kauti ira na tacida era gadreva dina na veivuke ena cakacaka vakavunau kei na soqoni. Ia vakacava o ira na tacida era vukei qori, na cava e rawa nira cakava? Era na uqeta na itovo vinaka ena ivavakoso ke ra vakaraitaka na nodra vakavinavinaka, de dua era na solia na ka ga era rawata me isau ni waiwai ni motoka. Dua tale na sala eda vakaraitaka kina na noda lomani ira na tacida, oya na noda veimaliwai vakalevu kei ira. Nida caka vinaka “vei ira eda vakabauta vata” da qai tu vakarau meda vakayagataka na noda gauna kei na noda iyau meda vukei ira kina, eda na lomani ira kina vakalevu, eda na uqeta tale ga na itovo vinaka ena ivavakoso.—Kala. 6:10.
7. Ena uqeta vakacava na itovo vinaka ena ivavakoso na noda maroroya na itukutuku e sega ni dodonu me talanoataki?
7 Dikeva mada e dua tale na sala e rawati kina na veilomani vakaveitacini: na veitokani kei na maroroi ni itukutuku e sega ni dodonu me talanoataki. (Wilika Vosa Vakaibalebale 18:24.) O ira na itokani dina era na sega ni talanoataka na ka vuni. Ke talaucaka na lomana e dua na tacimu, e nuitaka ni o na sega ni talanoataka. Na nona nuitaki iko tale ga, ena vakaukauataka na nomudrau veitokani. Meda saga gona meda nuitaki ena noda maroroya na itukutuku e sega ni dodonu me talanoataki. Nida cakava qori, eda sa uqeta tiko na veilomani ena ivavakoso.—Vkai. 20:19.
GUMATUA ENA CAKACAKA VAKAVUNAU
8. Na cava e tukuna o Jisu vei ira na lotu vaKarisito e Leotisea, na cava na vuna?
8 Ena nona vosa tiko vei ira na ivavakoso e Leotisea, e tukuna o Jisu: “Au kila na nomu cakacaka, ni o sega ni batabata se katakata. Au diva mo batabata se mo katakata. O koya gona, ni o katakata vakalailai ga o qai sega ni katakata se batabata, au na luaraki iko mai gusuqu.” (Vkta. 3:15, 16) Era sega ni gumatua ena cakacaka vakavunau na lotu vaKarisito e Leotisea. Qori e vakaleqa sara ga na nodra veimaliwai. E mani vakasalataki ira vakayalololoma o Jisu: “O ira kece au lomana au vunauca, au vakadodonutaka tale ga. O koya gona, mo gumatua, mo veivutuni.”—Vkta. 3:19.
9. Na cava ena vakilai ena ivavakoso nida gumatua ena cakacaka vakavunau?
9 Ke da vinakata me laurai ena ivavakoso na itovo vinaka, ena vinakati meda gumatua ena cakacaka vakavunau. E nona itavi na ivavakoso me qarai ira na yalomalumalumu ena yalava, mera vukei tale ga vakayalo. Koya gona, e bibi meda gumatua ena cakacaka ni veivakatisaipelitaki, me vakataki Jisu ga. (Maciu 28:19, 20; Luke 4:43) Nida gumatua vakalevu ena cakacaka vakavunau, eda na duavata tale ga vakalevu na “tamata cakacaka kece ni Kalou.” (1 Kor. 3:9) Nida cakacaka vakavunau kei ira na tacida, da qai raica na nodra tutaka na nodra vakabauta kei na nodra taleitaka na ka dina, eda na lomani ira da qai dokai ira vakalevu. Na noda “lomavata” tale ga ena cakacaka vakavunau, e rawati kina na duavata ena ivavakoso.—Wilika Sefanaia 3:9.
10. Ena uqeti ira vakacava na tacida na noda vakavinakataka na noda cakacaka vakavunau?
10 Na noda vakavinakataka na noda cakacaka vakavunau, ena uqeti ira tale ga eso tale. Ke da kauaitaki ira vakalevu na tiko ena yalava, da qai saga me tara sara ga na lomadra na itukutuku vinaka, eda na gumatua tiko ga kina vakalevu ena cakacaka vakavunau. (Maciu 9:36, 37) Ke da gumatua, era na gumatua tale ga na tacida. O Jisu mada ga e talai ira yarua na nona tisaipeli mera lai vunau, mera kua ni gole yadudua. (Luke 10:1) E caka qori me rawa kina nira vakayaloqaqataki na tisaipeli, mera vuli kina, vukei ira tale ga mera gugumatua ena cakacaka vakavunau. Vakacava, o dau marautaka na nomu cakacaka kei ira na dautukutuku gumatua? Io, e uqeti keda na nodra dau gumatua, e vukei keda tale ga meda kua ni guce ena vunau.—Roma 1:12.
QARAUNA NA VOSA KUDRUKUDRU SE CAKA CALA
11. Na itovo cava era bucina na Isireli ena gauna i Mosese, e vakaleqai ira vakacava qori?
11 Era tekivu vosa kudrukudru na Isireli ni oti ga e vica na macawa na kena tauyavu na nodra matanitu vou. Era talaidredre kina vei Jiova kei ira e digitaka na Kalou me liutaki ira na Isireli. (Lako 16:1, 2) Koya gona, vei ira kece na Isireli era biuti Ijipita, e vica ga era vakatarai mera curuma na Vanua Yalataki. O Mosese mada ga a sega ni vakatarai me curuma na Vanua Yalataki, ena vuku ni ka e cakava ena nodra vosa kudrukudru na Isireli! (Vkru. 32:48-52) Na cava meda cakava nikua me kua kina nida bucina na itovo ca qori?
12. Na cava meda cakava me kua kina ni buroro e lomada na vosa kudrukudru?
12 Meda qarauna me kua ni buroro e lomada na vosa kudrukudru. E rawa nida levea na itovo qori ke da dau yalomalumalumu da qai dokai ira na veiliutaki. Meda qarauna tale ga na noda ilala. E rawa ni veivakaleqai ke da digitaka na ka ni veivakamarautaki e sega ni kilikili, se noda veimaliwai vakalevu kei ira eda cakacaka vata se icaba e koronivuli era sega ni kauaitaka na ivakavuvuli dodonu. Meda yalomatua mada ga meda kua ni veimaliwai vakalevu kei ira na dau vosa kudrukudru se o ira na dau via lewai ira ga.—Vkai. 13:20.
13. Na cava e rawa ni yaco ena ivavakoso nida vosa kudrukudru?
13 Na vosa kudrukudru e rawa ni uqeta eso tale na itovo ena lai vakaleqa na noda bula vakayalo. Kena ivakaraitaki, e rawa sara ga ni vakaleqa na veiyaloni kei na duavata ni ivavakoso. Ke da vosa kudrukudrutaki ira na tacida, ena sega wale ga ni vakararawataki ira, ia ena rawa ni tini sara ena vakaucaca kei na veivakasewasewani. (Vunau 19:16; 1 Kor. 5:11) Eso na dauvosakudrukudru ena ivavakoso ena imatai ni senitiuri “era sega ni dokai ira na veiliutaki, era vosavakacacataki ira tale ga e vakadonui ira na Kalou.” (Juta 8, 16) E sega ni vakadonuya o Jiova na nodra vosa kudrukudrutaki na tagane era lesi ena ivavakoso.
14, 15. (a) Ena vakaleqa vakacava na ivavakoso na noda sega ni vakaraitaka na cala bibi e caka? (b) Na cava meda cakava ke da kila ni dua e cakava lo tiko na valavala ca?
14 Vakacava ke da kila ni dua e cakava lo tiko na valavala ca, me vaka na gunu sivia, sara iyaloyalo ca, se cakava tiko eso na ka vakasisila? (Efeso 5:11, 12) Ke da sega ni kauaitaka na cala qori, ena kauta laivi o Jiova na yalona tabu ena ivavakoso, ena vakaleqa tale ga na duavata ni ivavakoso. (Kala. 5:19-23) Me vaka ga na nodra vakasavasavataka na ivavakoso o ira na lotu vaKarisito e Korinica, e dodonu tale ga nikua me kau laivi mai na ivavakoso na itovo ca qori, me kune tiko ga kina na itovo vinaka. Ia na cava mo cakava me kune tiko ga kina ena ivavakoso na veiyaloni?
15 Me vaka ga sa vakamacalataki oti mai, e bibi meda maroroya na itukutuku e sega ni dodonu me talanoataki, vakabibi nira talaucaka vei keda na tacida na lomadra kei na ka era nanuma. E sega sara ga ni vinaka ke da talanoataka na itukutuku e sega ni dodonu me talanoataki me baleti ira na tacida, e rawa sara ga ni vakararawataki ira! Ia ke cala bibi e dua na tacida, e dodonu ga me ratou kila na qase ni ivavakoso, nira vakaroti ena iVolatabu mera qarava na itavi qori. (Wilika Vunau ni Soro 5:1.) Koya gona, ke da kila ni dua na tacida e caka cala, e dodonu meda uqeti koya me lai raici ratou na qase, me qara tale ga na nodratou veivuke. (Jeme. 5:13-15) Ke sega ni cakava qori ena loma ni dua na gauna yalataki, meda tukutuku sara vei ratou na qase.
16. Eda na taqomaka vakacava na ivavakoso nida vakaraitaka na cala bibi era cakava na tacida?
16 E vanua ni vakacegu na ivavakoso vaKarisito, e dodonu gona meda taqomaka. Eda na cakava ga qori ke da vakaraitaka na cala bibi e caka. Nira vukei koya e caka cala na qase me kila na bibi ni cala e cakava, e laurai tale ga ni veivutuni qai ciqoma na veivakadodonutaki, qori ena sega ni vakaleqa na itovo vinaka ena ivavakoso. Ia vakacava ke sega ni veivutuni, sega tale ga ni muria na nodra ivakasala vakayalololoma na qase? Ena vakasivoi mai na ivavakoso. Ni caka qori ena ‘vakarusa’ se kauta laivi na itovo ca ena ivavakoso, ena laurai tiko ga kina na itovo vinaka. (Wilika 1 Korinica 5:5.) Koya gona, e noda itavi meda tukuna vei ira na qase na cala bibi e caka lo tiko, meda tokoni ira tale ga. Meda cakava mada ga na ka e vinaka vei ira na tacida, da qai taqomaka na ivavakoso.
UQETA NA “DUAVATA E VAKAVUNA NA YALO TABU”
17, 18. Na cava ena vukei keda meda “gumatua [ni] maroroya na duavata e vakavuna na yalo tabu”?
17 Ena nodra “cuqena tiko ga na nodra ivakavuvuli na yapositolo,” a rawa kina vei ira na imuri i Jisu mera uqeta na duavata ena ivavakoso. (Caka. 2:42) Era doka na ivakasala vakaivolatabu kei na nodra veidusimaki na tagane matua. Nikua, o ira na qase ni ivavakoso era tokoni koya tiko na dauveiqaravi yalodina e vuku. Qori na vuna era dau uqeti keda kina ra qai veivuke me rawati na duavata. (1 Kor. 1:10) Nida talairawarawa ina ivakaro vakaivolatabu e vakarautaka na isoqosoqo i Jiova kei na nodra veidusimaki na qase, eda sa vakaraitaka tiko nida “gumatua [meda] maroroya na duavata e vakavuna na yalo tabu, [oya meda] veiyaloni.”—Efeso 4:3.
18 Koya gona, meda saga mada ga ena noda vinaka taucoko me laurai tiko ga ena ivavakoso na itovo vinaka. Nida cakava qori, eda nuidei ni na ‘tiko e lomada na loloma soli wale ni noda Turaga o Jisu Karisito.’—Fpai. 4:23.
[iYaloyalo ena tabana e 19]
O dau uqeta na itovo vinaka ena nomu vakarautaka vinaka na nomu ivakamacala ena ivavakoso?
[iYaloyalo ena tabana e 20]
O na uqeta na itovo vinaka ni o kila vinaka na noda sere