iVola Mai Ailadi

Gade au Taleitaka Duadua!

ERAU tukuna vei au na noqu itubutubu: “E vinaka mo cakava mada e dua na ka mo kua ni vakasamataka kina vakalevu nomu veitarogi. Tou gade mada vei tavalemu e Ailadi, me tou lai veivuke tale ga ena vunautaki ni itukutuku vinaka ni Matanitu ni Kalou vei ira era sega ni dau rogoca vakalevu.”

Au sega ni duavata ena ka rau nanuma. Au sega wale ga ni leqataka na noqu vuli lesoni, au leqataka tale ga na noqu gade niu se bera vakadua ni biuti Igiladi se vodo waqavuka. Ena rawa vakacava vua e dua na goneyalewa yabaki 17 e bulabula vinaka qai susu ena yasa ni siti osooso o Lodoni me gade ena dua na taoni lailai ena ceva i ra kei Ailadi?

Ena gauna ga e ro kina na waqavuka e Ailadi, dua na ka na noqu taleitaka na vanua qo, e seavu sara ga na noqu lomaleqa. Ia me vaka ni keitou biubiu mai vakamataka, e totolo ga na noqu sosovu ena gauna sa toso kina na motoka. E levu na gauna niu yadra mai e tasivi totolo ga e mataqu na totoka ni veikau era tu ena taudaku ni gaunisala qiqo e baivatu.

Ena imatai ni bogi keitou yaco kina ena taoni o Skibbereen, keitou gade sara ena yakavi ena dua na vuvale eratou toki yani e Ailadi me ratou lai veivuke ena kena vunautaki na Matanitu ni Kalou. Au marautaka dina qori, e veivakauqeti tale ga. Keitou qitotaka eso na qito vakaivolatabu. Keitou na taura yadua mai ena kato na yacana e dua e cavuti ena iVolatabu, oti keitou sa na qai matanataka e dua na ka a cakava. Eratou sa na qai vakilakila na kena vo se o cei e matanataki tiko.

Au vodo waqa ena siga tarava meu gole ina yanuyanu lailai o Heir, e voleka ni le 30 na lewenivanua era tiko kina. Eratou veitomani ena ilakolako qori na noqu itubutubu, o ganequ, eso na wekai keitou voleka, kei na dua tale na vuvale. Ni tukuna o Jisu me vunautaki na itukutuku vinaka ena veiyasa i vuravura, dua na ka neitou sasaga me keitou lai vunau ena vanua lailai qori. Keitou veitalanoataka kina eso na ulutaga momona vakaivolatabu vei ira na lewenivanua dauveikauaitaki qai dauveiciqomi. Keitou taleitaka tale ga na totoka ni vanua ni sega ni levu kina na veivakatorocaketaki.

E serau na matanisiga qai karakarawa na lomalagi, e robota na vanua na totoka, malumu, kei na iboi sareguregu e vaka na niu ni dua na mataqali kau e se dromodromo [Ulex europaeus]. E vaka ga na ibe ni valagi na senikau ni vulaitubutubu e robota tu na vanua lolobo. E totoka na toba nukunuku kei na barinivatu era tiko kina [Phalacrocorax carbo] kei na luvedra [Morus bassanus] na cormorant (manumanu domo balavu e dau kana ika) kei na gannet (manumanu vulavula). Ni o veiraiyaki ena toba o Roaringwater, o raica wale ga na veiyanuyanu lalai qai levu vei ira qori e sega tu ni tawani. Dua na ka na neitou qoroya na ibulibuli kece qori i Jiova.

Ni keiotu lesu i Skibbereen, au marautaka na itokani vinaka au kunea ena ivavakoso ni iVakadinadina i Jiova, au vakatovolea tale ga na veika au sega ni dau cakava e liu. Dua na ka vou au vulica au qai taleitaka vakalevu na vakatasosoko ena kayak (waqa lalai e vaka na bavelo). O sarava vinaka sara ga kina na baravi kei Ailadi. Keitou lai siwa [family Phocidae] me rawa mai na ivakayakavi, ia era liu tale na seal. Keitou bulia eso na qito vovou me caka ena baravi, au tovolea tale ga na danisi vakaAiladi.

Keitou saga tale ga me keitou kila eso na itukutuku me baleta na taoni o Skibbereen. Ni vakaleqai na pateta ena veiyabaki ni 1840, a vakaleqai sara ga vakalevu na taoni qori kei na veivanua volekata. Era mate ena walokai e udolu vakacaca, e rauta na le 9,000 era bulu vakavudi ena dua ga na ibulubulu vakaitamera. E veivakacegui ni keitou kila ni gauna ena veiliutaki kina na Matanitu ni Kalou ena sega tale na dausiga, e levu tale ga era mate vakaloloma era na vakaturi mera bula ena parataisi e vuravura.

Keitou gole vata kei ira na iVakadinadina e kea mera lai sikovi o ira era tiko ena yalava e sega ni dau tara vakalevu na ivavakoso. Keimami sirova sobu na baba e qiqo na kena gaunisala, me keimami yaco ina vale era toka ena bati ni barinivatu qai raica tu yani na wasawasa na Irish. Dua na ka na nodra veikauaitaki kei na nodra veiciqomi o ira keimami sotava. Keimami muria tale na iwalewale a caka mai na yanuyanu o Heir, keimami vakamacalataka ni keimami gade tiko mai ena nodra yasayasa, keimami wasea tale tiko ga na itukutuku veivakacegui ena iVolatabu.

A vosa vua e dua na marama o tinaqu, a ciqoma na mekesini Na Vale ni Vakatawa kei na Yadra! Keitou sotavi koya ni oti e vica na siga, a tukuna ni marautaka vakalevu na mekesini.

E kerea na marama qori: “Yalovinaka lesu mai me datou veitalanoa tale, kauta mai eso tale na mekesini.” Keirau mani tukuna vua ni keirau sa vakarau lesu tale, ia keirau na qai kerea e dua me mai raici koya tale.

E tukuna: “Ni o lesu mai, nanuma mo mai raici au, au na wawa tiko ga!”

Ena iotioti ni siga ni gade, keitou lai vakatakakana e baravi kei ira na mataveitacini ena ivavakoso e kea. Keimami vakayagataka na tolo ni kau e takasa tu e matasawa kei na vatu me caka kina na tatavu, e saqa tale ga eso na vivili ni waitui [marine family Mytilidae] keimami tomika mai ena veivatu e matasawa. Dua na ka noqu marautaka na ka kece qori dina niu susu mai ena siti!

Koya gona, au rawa ni tukuna ni sa dua dina na gade guiguilecavi dredre! Au sega wale ga ni marautaka na noqu gade, au kila tale ga niu cakava na ka e vakamarautaki Jiova qai vakacaucautaki koya. E ka marautaki dina noqu qarava na Kalou, au qai marau ga vakalevu nira cakava tale ga na ka au taleitaka o ira na noqu itokani kei na noqu vuvale. Niu lesu mai vale, au vakavinavinakataki Jiova niu veitokani kei ira era lomani koya, au vakavinavinakataka tale ga na veika guiguilecavi dredre au sotava.

[iTaba ni Credit Line ena tabana e 25]

An Post, Ireland