Toro Voleka Vua na Daurogo Masu

E LEVU era dau tukuna nira vakabauta na Kalou, ia era sega ni vakamacalataka rawa na vuna era vakabauta kina. Se mera vakamacalataka na vuna e sega ni vinaka kina o lotu kei na nona vakalaiva tiko na Kalou na rarawa. Na ka ga era na cakava mera masuta na Kalou era sega ni kila.

Ia o rawa ni veivolekati sara kei na Kalou. Ni o vakaukautaka nomu vakabauta ena nomu kila na Kalou, o na lomani koya kina qai dokai koya. Na vakabauta dina e yavutaki ena ivakadinadina. (Iperiu 11:1) Ke o vulica na ka dina me baleta na Kalou, o na rawa ni kilai koya qai vosa vua me vaka e dua na itokani. Raica mada na ka era tukuna eso era dau masu tu e liu, dina ga nira vakatitiqataka nona bula dina tiko na Kalou.

◼ O Patricia a cavuti ena imatai ni ulutaga. “Keitou veitalanoataka tiko ena dua na siga kei na vica tale na noqu itokani na veika me baleta na lotu. Au tukuna vei ratou niu gole tani mai vale meu kua ni rogoca na nodrau veivosaki o tamaqu—e sega ni vakabauta na Kalou—kei na dua na iVakadinadina i Jiova e veisiko yani. E tukuna sara e dua na noqu itokani: ‘De dua era dina tiko na iVakadinadina i Jiova.’

“E tukuna e dua tale: ‘Vakacava me tou lai vakadinadinataka qori ena dua na nodra vale ni soqoni?’ Oya sara ga na ka keitou qai cakava. Keitou a via vakatitiqa e liu, ia na nodra veikauaitaki na iVakadinadina e vakavuna mera lako tiko ga kina ena soqoni eso vei keitou.

“Ia ena dua na Sigatabu au rogoca kina e dua na ka e veisautaka sara ga na noqu bula. E vakamacalataka o koya e vunau na vuna e sotava kina na kawatamata na rarawa. Au sega ni kila tu e liu ni a buli taumada na tamata me uasivi, au sega tale ga ni kila ni tekivu vua e dua na tamata na ivalavala ca kei na mate sa qai takavi keda kece na kawatamata. E vamacalataka tale ga o koya e vunau na vuna e gadrevi kina me mate o Jisu, me vakalesuya tale mai na ka a vakayalia na imatai ni tamata.a (Roma 5:12, 18, 19) Qori sa qai matata kina vei au na ka kece. Au sa qai raica rawa, ‘ni tiko dina e dua na Kalou e kauaitaki keda.’ Au tomana tiko ga noqu vuli iVolatabu, toso na gauna au sa rawa ni masu vua e dua e bula dina tiko. Qori sara ga na imatai ni gauna meu masu kina.”

◼ O Allan, a vakamacalataki tale ga ena imatai ni ulutaga. “Dua na siga rau veisiko mai na iVakadinadina i Jiova, sureti rau sara e vale o watiqu baleta ni kauaitaka na nodrau vakamacalataka na veika me baleta na bula tawamudu e vuravura. Au sega sara ga ni taleitaka. Ni rau se tiko na vulagi e lomanivale, au kacivi watiqu i valenikuro qai tukuna vua, ‘Kua ni dau lialia, e sega ni dina na ka erau tukuna tiko!’

“E tukuna sara o watiqu: ‘Ke va qori, lako i loma ya lai vakadinadinataka.’

“E macala ga niu na sega ni vakalasui rau. Ia rau vosa ga vakayalovinaka qai solia vei au e dua na ivola e vakamacalataki kina se buli na veika bula se bula vakaidewadewa. E matata vinaka na vakasama e volai kina qai yavutaki vakavinaka, au mani vakatulewataka meu vulica e levu na ka me baleta na Kalou. Au tekivu vulica na iVolatabu kei ira na iVakadinadina, au qai raica ni ka e tukuni kina e duidui mai na veika au dau nanuma tu e liu me baleta na lotu. Noqu vulica na veika me baleti Jiova, e vakavuna meu tukuna vakadodonu vua na lomaqu. Eso na ka au dau cakava tu e sega ni vinaka, au kerea kina na nona veivuke ena masu. Au nuidei ni o Jiova ena sauma na noqu masu.”

◼ O Andrew, e tiko mai Igiladi. “Au dau tokona qai taleitaka na ka vakasaenisi, au vakabauta tale ga na ivakavuvuli ni bula vakaidewadewa baleta nira kaya eso ni tiko na kena ivakadinadina. Au sega ni via vakabauta na Kalou baleta ni levu na ka ca e yaco tiko.

“Ia eso na gauna au dau vakasamataka: ‘Ke bula dina tiko na Kalou, au na via kila sara ga na cava na inaki ni bula. Na cava e levu kina na basulawa kei na ivalu?’ Ena gauna au sotava kina na ituvaki dredre, au dau kere veivuke ena masu, ia au sega ni kila o cei au masuta tiko.

“E dua e solia vei watiqu na ivolacebaceba era tabaka na iVakadinadina i Jiova, kena ulutaga: Ena Bula Tu Ga na Vuravura Oqo? Qori sara ga na taro au dau vakasamataka tu. E vakavuna tale ga meu lomatarotarotaka na iVolatabu, ‘Ena yaga beka keu dikeva kina na kena isau?’ Niu gade ena dua na gauna, e dua e solia vei au na ivola The Bible—God’s Word or Man’s?b Ena gauna au raica kina ni tokona na iVolatabu eso na ka dina vakasaenisi, au kila ni gadrevi meu vulica e levu na ka ena iVolatabu. Ni sureti au gona e dua na iVakadinadina i Jiova meu vulica na iVolatabu, au vakadonuya. Niu sa mai kila na inaki i Jiova, au vakila ni tiko e dua e rawarawa meu talaucaka vua na lomaqu ena masu.”

◼ Jan, a susugi ena dua na Lotu Tawase mai Lodoni. “Na veivakaisini ena lotu kei na veika rarawa e yaco tiko e vakavuna meu sa kua ni lotu. Au sega tale ga ni qai tomana noqu vuli torocake, au tekivu lagasere, dau qiri qita meu rawa ilavo kina. Au sotavi Pat ena gauna qori. A susu ena lotu Katolika, sa sega tale ga ni lotu me vakataki au.

“Keirau tiko ena dua na vale lala kei na so tale era sa biuta tale ga na nodra vuli torocake ra qai taleitaka na lotu vakaesia. Keirau dau veitalanoataka na ulutaga me baleta na inaki ni bula me vica vata na aua, qai yacova sara na bogi levu. Keirau sega ni vakabauta kei Pat na Kalou, ia keirau siqema ni dua na ka kaukaua e vakavuna na bula.

“A sucu na luvei keirau tagane ena gauna keirau toki kina ena vualiku kei Igiladi me keirau lai vaqara cakacaka ni daunivakatagi. A tauvimate ena dua na bogi na luvei keirau, au qai liaca niu sa masu tiko vua na Kalou au sega ni vakabauta. Sega ni dede sa qai ca ga vakalevu na neirau veimaliwai kei Pat, keirau mani biubiu vakaveitinani. Au masu tale niu kere veivuke, de dua ena rogoci. Au sega ni kila ni masu tale tiko ga o Pat.

“Ena yakavi ni siga ya, erau tukituki ena mata ni katuba i Pat e rua na iVakadinadina i Jiova, rau qai vakamacalataka vua eso na idusidusi yaga ena iVolatabu. A qiriti au mai o Pat, qai kerea me keirau vulica na iVolatabu kei rau na iVakadinadina. Toso na gauna keirau vulica ni vinakati me vakalawataki na neirau vakawati me keirau vakamarautaka kina na Kalou. Dua dina na ka dredre qori ni sega tiko mada ga ni vinaka na neirau veimaliwai.

“Keirau via kila e levu tale na ka me baleta na vakayacori ni parofisai ena iVolatabu, na vuna e yaco tiko kina na rarawa, kei na ibalebale ni Matanitu ni Kalou. Toso na gauna keirau kila ni dauveikauaitaki na Kalou, keirau via cakava tale ga na ka e tukuna. Keirau mani vakamau sara. Na vuku ena Vosa ni Kalou e vukei keirau ena nodratou susugi na tolu na luvei keirau. Keirau vakadeitaka ni a rogoca o Jiova na neirau masu.”

Vakacava mo Vakadinadinataka Sara Ga?

Me vakataki ira e vica vata na milioni, o ira era cavuti ena ulutaga qo era sega ni vakacalai vei lotu lasu, era vulica tale ga na vuna e vakalaiva kina na Kalou na rarawa. Vakacava o siqema ena ituvaki yadua qori ni kilaka dodonu ga ena iVolatabu e vakadeitaka kina vei ira ni dau rogoca o Jiova na masu?

Vakacava o via vakadinadinataka ni bula dina tiko na Kalou? Era na marau na iVakadinadina i Jiova mera vukei iko mo vulica na ka dina me baleti Jiova kei na sala o rawa ni toro voleka kina vua na “daurogoca na masu.”—Same 65:2.

[iVakamacala e ra]

[Tikina bibi ena tabana 10]

“Niu sa mai kila na inaki i Jiova, au vakila ni tiko e dua e rawarawa meu talaucaka vua na lomaqu ena masu”

[iYaloyalo ena tabana 9]

Na vakabauta dina e yavutaki ena ivakadinadina kei na noda vinakata meda kila na ka dina me baleta na Kalou