Qarava na Kalou e Dau Veisereki

“Qo na ibalebale ni noda lomana na Kalou, meda muria na nona ivunau, ia e sega ni icolacola bibi na nona ivunau.”​—1 JONI 5:3.

O RAWA NI SAUMA?

E saga vakacava o Setani meda nanuma ni icolacola bibi na lawa ni Kalou?

Na cava meda digi ira vinaka kina na noda itokani?

Eda na yalodina tiko ga vakacava vua na Kalou e dau veisereki?

1. E vakayagataka vakacava o Jiova na nona galala? Na galala cava a solia vei Atama kei Ivi?

E SEGA tale ni dua e vakataki Jiova ni tawavakaiyalayala na galala e tu vua. Ia e sega vakadua ni vakayagataka vakatawadodonu nona galala, se me lewa na ka kece mera cakava na nona dauveiqaravi. E solia ga vei ira na galala mera vakatulewa mera cakava tale ga na ka vinaka era taleitaka. Kena ivakaraitaki, a vakatabuya na Kalou e dua ga na ka vei Atama kei Ivi, me rau kua ni kania na “kau sa kilai kina na ka vinaka kei na ka ca.” (Vkte. 2:17) Sa bau dua na ka na galala e solia na Dauveibuli vei rau, me rau cakava kina na lomana!

2. Erau vakayagataka vakacava na galala soli vakalou o rau na vuda?

² Na cava e solia kina vakalevu na Kalou vei rau na vuda na galala? A solia vei rau na Kalou na lewaeloma qai buli rau me rau ucui koya. A namaka gona me rau cakava na ka dodonu nirau lomani koya a buli rau. (Vkte. 1:27; Roma 2:15) E ka ni rarawa ni rau sega ni doka na Dauveibuli o Atama kei Ivi, rau sega tale ga ni doka na galala e solia vei rau. Erau digia na galala a solia o Setani, me rau lewa ga na ka dodonu kei na ka e cala. Ia erau sega ni vakila e levu na galala, erau bobula ga ina ivalavala ca kei ira na nodrau kawa, qori e vakavuna na rarawa kei na mate.​—Roma 5:12.

3, 4. Na cava e vinakata o Setani meda nanuma me baleta na ivakatagedegede i Jiova?

³ Ke sa rawai rau na tamata uasivi kei na levu tale na ka bula vakayalo o Setani mera beca na veiliutaki cecere ni Kalou, e rawa tale ga ni cakava qori vei keda. E sega ni veisau na ilawaki i Setani. E vinakata meda nanuma ni icolacola bibi na ivakatagedegede ni Kalou, eda na sega kina ni marau. (1 Joni 5:3) Ke da veimaliwai vakalevu kei ira e va qori na nodra rai, ena rawa ni basika tale ga vei keda na rai va qori. E tukuna e dua na tacida yalewa e yabaki 24 a sikalutu ina veiyacovi vakasisila: “Na noqu vakailala cala e vakaleqai au sara ga, niu dau leqataka de ra na qai raici au vakatani na noqu icaba.” De dua era dau vakasagai iko tale ga na nomu icaba.

⁴ E ka ni rarawa ni so mada ga ena ivavakoso era ilala cala. E tukuna e dua na itabagone iVakadinadina: “Au kilai ira eso na itabagone era veibuku tiko kei ira na sega ni tiko ena dina. Au qai liaca na levu ga ni noqu maliwai ira, au sa vakataki ira tale ga. Qori e vakaleqa sara ga na noqu bula vakayalo. Au sa sega ni marautaka na kakana vakayalo e rogoci ena soqoni, vakavudua tale ga na noqu cakacaka vakavunau. Au kila ni dodonu meu biuti ira na noqu ilala, au mani cakava sara qori!” Vakacava o kila ni rawa nira vakamuai iko na nomu ilala? Raica mada qo e dua na ivakaraitaki vakaivolatabu ena vukei iko.​—Roma 15:4.

E VAGOLEA NA LOMADRA

5, 6. E lawakitaki ira vakacava na Isireli o Apisalomi? A mana na ilawaki i Apisalomi?

⁵ E volai ena iVolatabu e levu na nodra ivakaraitaki o ira era ilala ca. Dua vei ira o Apisalomi na luvei Tui Tevita, e cauravou rairai totoka. Ia me vakataki Setani, ni toso na gauna a vakalaiva o Apisalomi me buroro e lomana na gagadre cala, a saga sara me kovea na veiliutaki i tamana. A sega ga ni dodonu me tui.a Me rawata o Apisalomi na ka e vinakata, a rawai ira na lewenivanua mera nanuma ni via vukei ira, mera nanuma tale ga ni sega ni kauaitaki ira o Tui Tevita. Io, me vaka ga e cakava na Tevoro ena were o Iteni, e vagolei ira na lewenivanua o Apisalomi mera vakabauta ni daulomani ira, ena gauna vata qori e vakaucacataki tamana.​—2 Sam. 15:1-5.

⁶ Vakacava a mana na lawaki i Apisalomi? Io, ni tukuni ena iVolatabu: “Sa qai rawa na yalodra na Isireli ko Apisalomi.” (2 Sam. 15:6) E muri, a qai lauti Apisalomi tale na sui ni kena ni a mate vakaloloma kei ira na vica vata na udolu era rawai ena nona ilawaki.​—2 Sam. 18:7, 14-17.

7. Na cava eda vulica mai na italanoa kei Apisalomi? (Raica na yaloyalo ena tabana e 14.)

⁷ Na cava e sa rui rawarawa kina na nodra rawai na Isireli? De dua era dau vinakata tu na ka e yalataka vei ira o Apisalomi. Se vakacalai ira na irairai kei Apisalomi. Se mani cava na vuna, qo na ka eda kila rawa: Era sega ni yalodina vei Jiova kei na nona tui lumuti. Nikua, o Setani e vakayagataka ira tiko na tamata era vakataki “Apisalomi” me rawa ni vagolea na lomadra na dauveiqaravi i Jiova. Era na rairai kaya: ‘Na ivakatagedegede i Jiova sa rui levu na kena vakatatabu. Raici ira mada na tamata era sega ni qaravi Jiova. E levu na ka era rawa ni marautaka!’ Ke o rogoca qori, vakacava o na vakabauta nira itukutuku lasu o qai yalodina tiko ga vua na Kalou? O raica ni rawa ni dusimaki iko ena galala dina na “lawa uasivi” i Jiova se na lawa i Karisito? (Jeme. 1:25) Ke va qori na nomu rai, mo mareqeta gona na lawa qori, mo kua vakadua ni vakacalai mo lai vakayagataka kina vakatawadodonu na nomu galala vaKarisito.—Wilika 1 Pita 2:16.

8. Na ivakaraitaki cava e dusia ni dau vakavu rarawa na beci ni ivakatagedegede i Jiova?

⁸ O Setani e taketetaki ira vakalevu na itabagone. Dua na tacida tagane sa yabaki 30 vakacaca, e tukuna me baleta na gauna e se itabagone kina: “Au raica na ivakatagedegede i Jiova me baleta na itovo savasava me vakatatabu, sega ni itataqomaki.” A sikalutu sara ena veiyacovi vakasisila. Ia e sega ni vakamarautaki koya qori. E tukuna: “Rauta ni vica na yabaki na noqu rarawataka kei na noqu veivutunitaka na ka au cakava qori.” A tukuna e dua na tacida yalewa me baleta na gauna e se itabagone kina: “Ni o veidauci, o na lomaleqa tu ga qai sega ni lomavakacegu rawa. Sa oti qo e 19 na yabaki, e dau votu tale mai na noqu vakasama na ka ca au cakava.” E tukuna e dua tale na tacida yalewa: “Na noqu dau vakasamataka na kena vakararawataki ira au lomana na ka au cakava, e vakaleqa sara ga na noqu vakasama, noqu bula vakayalo, kei na lomaqu. E ka mosimosi ni sega ni vakadonui keda o Jiova.” E sega ni vinakata o Setani mo vakasamataka na revurevu ni cala o cakava.

9. (a) Na taro cava e rawa nida kila kina na noda rai me baleti Jiova, nona lawa kei na nona ivakavuvuli? (b) Na cava e bibi kina meda kila vakavinaka na Kalou?

⁹ E ka ni rarawa ni levu na itabagone era tiko ena dina kei na so mada ga na uabula era tara sara na mawe ni vako ra qai kila na ca ni nodra beca na ivakatagedegede i Jiova! (Kala. 6:7, 8) E vinaka mo taroga: ‘Au kila na ilawaki ena vakayagataka o Setani me rawai au kina? E noqu itokani voleka o Jiova, au vakabauta tale ga ni dau tukuna na ka dina qai vinakata meu marau? Au vakadinata ni na sega vakadua ni bureitaka vei au o Jiova na ka vinaka au na marau kina?’ (Wilika Aisea 48:17, 18.) O na rawa ga ni vakaiotaka na taro qori ke o kilai Jiova vinaka. Mo kila tiko ni nona lawa kei na nona ivakavuvuli ena iVolatabu e vakaraitaka na levu ni nona lomani iko, e sega ni kena inaki me kauta tani na nomu galala.​—Same 25:14.

MASULAKA MO VUKU QAI TALAIRAWARAWA

10. Na cava meda saga kina meda vakatotomuria na tui gone o Solomoni?

¹⁰ Ni se itabagone o Solomoni, a yalomalumalumu ni masulaka: “Ka’u sa gone lailai: au sa sega ni kila me’u curu yani se curu mai.” A kerea gona vei Jiova me vuku qai talairawarawa. (1 Tui 3:7-9, 12) A rogoca o Jiova na kerekere qori, ena cakava tale ga qori vei keda se da gone se qase. Ena sega ni solia vakacakamana vei iko o Jiova na vuku. O na vuku ga ke o vulica vagumatua na nona Vosa, kerea na veidusimaki ni yalo tabu qai vakayagataka vakavinaka na kakana vakayalo e vakarautaki ena ivavakoso. (Jeme. 1:5) Io, o Jiova e dau vakavukui ira na itabagone era qaravi koya mera vuku cake vei ira era sega ni talairawarawa vua na Kalou, o ira mada ga e nanumi tu nira ‘vuku ra qai yalomatua’ ena vuravura qo.—Luke 10:21; wilika Same 119:98-100.

11-13. (a) Na cava eda vulica ena Same 26:4, Vosa Vakaibalebale 13:20, kei na 1 Korinica 15:33? (b) O na muria vakacava na ivakavuvuli vakaivolatabu qori?

¹¹ Meda veivosakitaka mada qo eso na tikinivolatabu eda na vulica kina na ivakavuvuli yaga me baleta na noda digitaki ira na noda ilala. Qo ena vukei keda meda kila ni bibi meda vulica na iVolatabu da qai vakasamataka vakatitobu me rawa nida kilai Jiova vinaka. E tukuni ena Same 26:4: “Au na sega ni tiko kei ira na tamata lasulasu; ka’u na sega talega ni lako vata kei ira era dauveivakaisini.” Eda wilika ena Vosa Vakaibalebale 13:20: “Ena vuku mai ko koya sa malele vata kei ira na vuku: ia ko koya era veitokani vata kei na lialia ena rusa.” E tukuni tale ga ena 1 Korinica 15:33: “Na ilala ca e vakacacana na itovo vinaka.”

¹² Na cava eda vulica ena tikinivolatabu qori? (1) E vinakata o Jiova meda digitaki ira vinaka na noda ilala. E vinakata me taqomaki keda meda kua ni cakava na ka ena vakaleqai keda kei na noda veiwekani kei koya. (2) O ira na noda itokani era na uqeti keda meda caka vinaka se caka ca. E dau yaco ga qori ina noda bula. Na vosa e vakayagataki eke e vakadeitaka ni vinakata sara ga o Jiova me tara na lomada. Ena sala cava? Na tikinivolatabu kece qori e sega ni lawa, me vaka “mo kua . . . ” Ia e tukuna ga na ka e rawa ni yaco dina. E vaka ga e tukuna tiko vei keda o Jiova: ‘Qo na ka mo kila. Na cava o na cakava? Na cava e tu e lomamu?’

¹³ Ni tukuna na ka e rawa ni yaco dina na tolu na tikinivolatabu sa cavuti oti mai, e se yaga tiko ga nikua me vaka na gauna a volai kina, qai rawa ni vakayagataki ena duidui ituvaki eda sotava. Kena ivakaraitaki, e vinaka mo taroga: Na cava meu cakava meu kua kina ni veitokani kei ira na “dauveivakaisini”? Na ituvaki cava soti au rawa ni veikilai kina kei ira va qori? (Vkai. 3:32; 6:12) O cei o “ira na vuku” e vinakata o Jiova meu veitokani kei ira? O cei o ira na “lialia” e sega ni vinakata meu veitokani kei ira? (Same 111:10; 112:1; Vkai. 1:7) Na “itovo vinaka” cava ena vakacacani ena noqu vakailala cala? Era ilala ca ga o ira na sega ni qaravi Jiova? (2 Pita 2:1-3) O na sauma vakacava na taro qori?

14. O rawa ni vakavinakataka vakacava na nomudou ivakarau ni Sokalou Vakavuvale?

¹⁴ Ena sala vata ga o vakasamataka kina na tolu na tikinivolatabu sa veivosakitaki oti mai, vakacava mo dikeva eso tale na tikinivolatabu mo kila kina na rai ni Kalou me baleta na veika o dau kauai kina se o iratou na nomu vuvale?b Ra itubutubu, dou rawa ni veivosakitaka qori ena nomudou gauna ni Sokalou Vakavuvale. Ni dou cakava qori, nanuma tiko mo vukei ratou yadudua na lewe ni nomu vuvale me ratou vakadeitaka ni nona lawa kei na nona ivakavuvuli na Kalou e ivakaraitaki ni nona lomani keda. (Same 119:72) Io, na vuli va qori ena vakavolekati kemudou vei Jiova, dou na veivolekati tale ga kina vakavuvale.

15. O na kila vakacava ni sa laurai tiko vei iko na vuku kei na talairawarawa?

¹⁵ O na kila vakacava ni sa laurai tiko vei iko na vuku kei na talairawarawa? Dua na sala oya mo veidutaitaka na nomu rai kei na nodra rai na tamata yalodina ena gauna makawa me vakataki Tui Tevita, a vola: “Au sa reki me’u kitaka na ka ko ni sa vinakata, noqu Kalou: Io, na nomuni vunau sa tu e na vu ni yaloqu.” (Same 40:8) A tukuna tale ga o koya a vola na Same 119: “A ka vakaidina na noqu loloma ki na nomuni vunau! Au sa vakanananu kina e na siga taucoko ka bogi.” (Same 119:97) E sega ni tu tu ga me laurai vei iko na loloma va qori. Ia ena rawa ga qori ke titobu na ka o vulica, o dau masu, vakasama vakatitobu, o qai vakadinadinataka sara ga ena nomu bula na veivakalougatataki e vakilai nida muria na ivakatagedegede ni Kalou.​—Same 34:8.

VALATAKA NA NODA GALALA NA LOTU VAKARISITO!

16. Na cava meda nanuma tiko ke da via qaqa ena noda valataka na galala dina?

¹⁶ Ena veigauna sa oti me yacova mai nikua, era sega ni tu suka na veimatanitu mera vala me rawa kina nira galala. Sa qai wacava sara na kena bibi meda valataka na lotu vaKarisito na galala e tu vei keda! Nanuma tiko, e sega ni kemu meca ga o Setani, na vuravura qo kei na kena yalo. E vinakati mo valuta tale ga na nomu malumalumu, wili kina na lomamu e dau veivakaisini. (Jere. 17:9; Efeso 2:3) Ia o rawa ni qaqa ena veivuke i Jiova. E rua na ka vinaka e dau yaco ena gauna kece o vakatulewataka kina mo cakava na ka dodonu. Kena imatai, o na vakamarautaki Jiova. (Vkai. 27:11) Kena ikarua, ke o dau vakadeitaka ni na yaga vei iko na nomu talairawarawa ina “lawa uasivi ni veisereki,” o na qai nuidei ga mo muria tiko ga na ‘sala qiqo’ ina bula tawamudu. O na marautaka tale ga ena gauna se bera mai e levu tale na galala e yalataka tu o Jiova vei ira kece era yalodina vua.​—Jeme. 1:25; Maciu 7:13, 14.

17. Na cava meda kua kina ni yalolailai nida cala? Ena vukei keda vakacava o Jiova nida cala?

¹⁷ Eda na cala kece ena so na gauna. (Dauv. 7:20) Ni yaco qori, kua ni beci iko se yalolailai. Ke o cala, cakava na ka me vakavinakataki kina na kemu ituvaki, ke gadrevi mada ga mo lai kere veivuke vei ratou na qase ni ivavakoso. A vola o Jemesa ni nodra “masu ni vakabauta ena vakabulai koya e tauvimate, ena vakaukauataki koya o Jiova. Ke valavala ca ena vosoti.” (Jeme. 5:15) Io, kua sara ni guilecava ni dau yalololoma na Kalou, a vagolei iko tale ga mai ena ivavakoso ni raica na veika o vinaka kina. (Wilika Same 103:8, 9.) Ke o qaravi Jiova tiko ga ena lomamu taucoko, ena tokoni iko tiko ga o koya.—1 Vei. 28:9.

18. Na cava meda cakava me taqomaki keda kina o Jiova?

¹⁸ Ni masu vata kei ratou na nona yapositolo yalodina o Jisu ena bogi ni bera na nona mate, dua na malanivosa guiguilecavi dredre a cavuta me baleti ratou: “Vakatawai iratou tiko ena vuku i koya na Vunica.” (Joni 17:15) A sega ni kauaitaki ratou ga na nona yapositolo o Jisu, ia e kauaitaki ira kece na nona imuri. Eda nuidei gona ni na vakayacora o Jiova na kerekere i Jisu me vakatawai keda ena gauna dredre eda donuya tu qo. “Ai sasabai ko koya [Jiova] vei ira era sa lako vakadodonu . . . Sa maroroya na nodra sala na yalosavasava.” (Vkai. 2:7, 8) E sega ni dau rawarawa meda cakava na ka e vinakata o Jiova, ia o ira ga era talairawarawa vei Jiova era na bula tawamudu ra qai vakila na galala dina. (Roma 8:21) Era na rairai vakacala qori eso tale, ia mera kua ni vakacalai iko!

[iVakamacala e ra]

[iYaloyalo ena tabana e 14]

Eda na kilai ira vakacava era vakataki Apisalomi nikua? Na cava meda cakava mera kua ni rawai keda kina?