“Me’u Taqaya e na Vuku i Cei?”
“Kevaka sa yaco vei au nai valu, ka’u na vakararavi ga ni na vakakina.”—SAME 27:3.
ENA VUKEI IKO VAKACAVA NA TIKINIVOLATABU QO MO YALOQAQA?
1. Na cava eda na vulica ena ika27 ni Same?
SA QAI torosobu tiko ga na ituvaki ni vuravura qo, ia na cava eda gu tiko ga kina ni vakaitavi ena cakacaka vakavunau? Na cava eda solia wale kina ena cakacaka qori na noda gauna kei na noda igu ni tarai vuravura tu na leqa vakailavo? Eda na yaloqaqa tiko ga vakacava nira leqataka tu e levu na veika ena yaco ena veisiga ni mataka? Na isaunitaro qo e tiko ena dua na sere uqeti vakalou a vola o Tui Tevita ena Same 27.
2. Ena vakacava o koya e domobula, ia na cava meda nuidei kina?
2 A tekivuna na same qo o Tevita ena nona kaya: “Noqu rarama kei na noqui vakabula ko Jiova; ko cei me’u rerevaka? A kaukauwa ni noqu bula ko Jiova; me’u taqaya e na vuku i cei?” (Same 27:1) Na rere e rawa ni vakamalumalumutaki keda, ia e duatani sara na domobula ni rawa ni vakavuna meda sega ni cakava rawa e dua na ka. Ia ena sega ni domobula e dua e rerevaki Jiova. (1 Pita 3:14) Nida nuitaki Jiova me noda idrodro, eda na “tiko vinaka, ka vakacegu ka sega ni rerevaka e dua na ka.” (Vkai. 1:33; 3:25) Na cava na vuna?
“NOQU RARAMA KEI NA NOQUI VAKABULA KO JIOVA”
3. Na sala cava e noda rarama kina o Jiova, ia na cava meda cakava?
3 Na ivosavosa na ‘noqu rarama o Jiova’ e tiko kina na vakasama ni nona sereki keda o Jiova mai na lecaika kei na butobuto vakayalo. (Same 27:1) E yaga na rarama meda raica kina na ka e rawa ni veivakaleqai se dua na ka e vakaosooso, ia e sega ga ni rawa ni kauta laivi. E dodonu gona meda vakatulewa vakayalomatua. O Jiova tale ga e vakatakila vei keda na ibalebale ni veika e yaco tiko e vuravura nikua. E tukuna vei keda na ka e rawa ni veivakaleqai ena vuravura ca qo. E vakarautaka vei keda na ivakavuvuli vakaivolatabu e dau yaga. Ia o keda sara ga meda bulataka na ka eda vulica. Nida cakava qori, ena laurai nida vuku cake vei ira na keda meca kei ira na noda qasenivuli.—Same 119:98, 99, 130.
4. (a) Na cava e rawa ni tukuna kina ena nuidei o Tevita ni ‘nona ivakabula o Jiova’? (b) Ena gauna cava ena vakabulai ira kina nona tamata o Jiova?
4 Na vosa i Tevita ena Same 27:1 e vakaraitaka ni a rairai vakasamataka lesu na sala a vakabulai koya kina o Jiova, se taqomaki koya ena veigauna sa oti. Kena ivakaraitaki, a vakabulai koya o Jiova mai na “liga ni laioni, kei na liga ni pera.” A vakavuna tale ga o Jiova na nona qaqa vei Koliaci. Ena dua na gauna e muri a saga o Tui Saula me cokai Tevita, ia a vakabulai koya ena gauna kece qori o Jiova. (1 Sam. 17:37, 49, 50; 18:11, 12; 19:10) Sa rauta me tukuna ena nuidei o Tevita: “Na noqui vakabula ko Jiova”! Me vaka ga a cakava vei Tevita, ena vakabulai keda tale ga o Jiova. Ena gauna cava? Ena vakabulai ira na sokaloutaki koya ena “veivakararawataki levu” sa tu qo e matada.—Vkta. 7:14; 2 Pita 2:9.
VAKASAMATAKA NA GAUNA KECE E VAKABULAI IKO KINA
5, 6. (a) E vukei keda vakacava na ka eda vakasamataka meda yaloqaqa? (b) E uqeti keda vakacava na noda vakasamataka na ka e cakava vei ira na nona tamata ena gauna makawa o Jiova meda yaloqaqa?
5 E dua na ka bibi meda cakava me rawa kina nida yaloqaqa e laurai ena Same 27:2, 3. (Wilika.) A vakasamataka lesu o Tevita na ituvaki kece a vakabulai koya kina o Jiova. (1 Sam. 17:34-37) Na nona dau vakasamataka qori e vakanuideitaki koya me vosota na ituvaki dredre duadua e sotava. E dau va tale ga qori na ka o vakila? Kena ivakaraitaki, o bau masuta wasoma e dua na leqa o sotava qai raica na sala e vakavukui iko kina o Jiova qai vakaukauataki iko mo vosota na ituvaki ya? O nanuma lesu na gauna a vukei iko kina o Jiova mo walia eso na ituvaki e vakadredretaka nomu qaravi koya ena marau, qai dola kina vei iko na katuba levu ni cakacaka? (1 Kor. 16:9) E tarai iko vakacava ena gauna qo na nomu vakasamataka lesu na ituvaki ya? Vakacava, e vakadeitaka tiko ga vei iko ni rawa ni vukei iko o Jiova mo walia se vosota na ituvaki dredre sara e basika?—Roma 5:3-5.
6 Na cava meda cakava ke saga e dua na matanitu kaukaua me vakawabokotaki keda vakailawalawa na iVakadinadina i Jiova? Era saga sara ga qori e levu nikua, ia a dreve na nodra sasaga. Ke da dau vakasamataka gona na sala e vukei ira kina na nona tamata ena veigauna sa oti o Jiova, ena vakanuideitaki keda meda vosota na veika eda na sotava ena veigauna se bera mai.—Tani. 3:28.
DOKA NA SOKALOU DINA
7, 8. (a) Me vaka e tukuni ena Same 27:4, na cava e kerea vei Jiova o Tevita? (b) Na cava na valenisoro vakayalo i Jiova, e caka vakacava ekea na sokalou?
7 E dua tale na sala meda yaloqaqa kina, oya na noda doka na sokalou dina. (Wilika Same 27:4.) Ena gauna i Tevita, na valeniveitavaki e “vale i Jiova.” A tuvanaka sara ga o Tevita me tara e dua na valenisoro totoka na luvena o Solomoni. Ena vica na senitiuri e muri, a vakatakila o Jisu ni na sega tale ni vakayagataki na valenisoro me sokaloutaki kina o Jiova. (Joni 4:21-23) A vakaraitaka na yapositolo o Paula ena Iperiu wase 8 ina 10 ni a tauyavu na valenisoro vakayalo ni papitaiso o Jisu ena 29 S.K., ena nona soli koya me vakayacora na loma i Jiova. (Iper. 10:10) Na valenisoro vakayalo qo e nona ituvatuva o Jiova meda sokaloutaki koya kina ena sala e vakadonuya ena noda vakabauta na isoro ni veivoli i Jisu. Eda na sokalou vakacava ena valenisoro oya? Nida masu vua “ena lomada dina kei na vakabauta e dei”; nida gumatua ni tukuna yani na noda inuinui; da veinanumi, veivakauqeti, qai vakayaloqaqataki ira na tacida nida tiko ena soqoni kei na gauna ni sokalou vakavuvale. (Iper. 10:22-25) Na noda doka na ituvatuva ni sokalou dina ena vakanuideitaki keda ena iotioti ni veisiga qo.
8 O ira na tamata yalodina i Jiova e veiyasa i vuravura era vakalevutaka na nodra cakacaka vakaitalatala, vulica na vosa vou, ra qai toki ena vanua e gadrevi vakalevu kina o ira na vunautaka na Matanitu ni Kalou. E laurai ena ka era cakava, me vakataki koya ga na daunisame nira kerea vei Jiova e dua ga na ka, era vinakata na veivakalougatataki i Jiova, ra via qaravi koya tale ga se mani cava e yaco.—Wilika Same 27:6.
NUITAKA NA VEIVUKE NI KALOU
9, 10. Na cava na ibalebale ni ka e yalataki ena Same 27:10?
9 E kilai ena vosa i Tevita na levu ni nona nuitaka na veivuke i Jiova ena nona kaya: “Ni sa laivi au na tamaqu kei na tinaqu, ena qai keveti au cake ko Jiova.” (Same 27:10) Eda rawa ni vakadeitaka mai na ka e cavuti ena 1 Samuela wase 22 ni rau a sega ni biuti Tevita na nona itubutubu. Ia e levu era cati vei ira na nodra vuvale. Nira sega ni lomani o ira qori, era vukei ra qai taqomaki ena ivavakoso vaKarisito.
10 Ke tu vakarau o Jiova me tokoni ira na nona tamata nira cati, me qai sega vakacava ni taqomaki ira ena ituvaki dredre tale eso! Kaya mada ke da leqataka se da na vakarautaka vakacava na ka me bula kina na noda vuvale, eda nuidei ni na vukei keda o Jiova? (Iper. 13:5, 6) E kila vinaka na kedra ituvaki kei na ka era gadreva na nona tamata yalodina.
11. Ena tarai ira vakacava eso na noda nuitaki Jiova? Tukuna e dua na kena ivakaraitaki.
11 Vakasamataka mada na ka a sotava e dua na vuli iVolatabu mai Liberia o Victoria. A biuti koya kei ratou na tolu na luvena na turaga rau tiko vata. A sega ni guce nona sasaga vakayalo, dina ni sega na nona vale se cakacaka. Ni papitaiso oti o Victoria, a kunea na luvena yalewa yabaki 13 e dua na baosi e sinai tu kina na ilavo. Erau sega ni wilika na ilavo, de rau temaki me rau kauta eso. Erau kauta ga vua na sotia e nona na baosi. A kaya vei rau na sotia, ke ra daudina kece na tamata me vakataki ira na iVakadinadina i Jiova, ena vinaka cake na vuravura qo qai vakilai dina na sautu. A vakaraitaka vua na sotia o Victoria na yalayala i Jiova me baleta na vuravura vou e volai tu ena iVolatabu. Dua na ka nona drukataka na sotia na nona yalodina na marama qo, mani solia sara vua e dua na iwase levu ni ilavo. Io, na noda nuitaki Jiova vakatabakidua me vakarautaka na veika eda gadreva eda sa kilai levu kina na iVakadinadina i Jiova meda daudina.
12. Ke sega vei keda na ilavo se na cakacaka, na cava meda qaravi Jiova tiko ga kina? Tukuna e dua na kena ivakaraitaki.
12 Vakasamataka tale ga na ka a sotava e dua na dautukutuku bera ni papitaiso mai Sierra Leone o Thomas. A qasenivuli tiko ena dua na sekeniri, ia e voleka ni dua na yabaki na nona sega ni taura na kena isau me yacova ni sa vakaleweni kece na ka vakaivola. Sa qai vo ga e dua na ka me cakava me qai taura kina na kena isau. Me na veivosaki kei na bete e ivakalesilesi tiko ni koronivuli. A vakamacalataka na bete ni sega ni duavata na koronivuli ena ka era vakabauta na iVakadinadina i Jiova. Sa qai solia vei Thomas na digidigi, me iVakadinadina i Jiova tiko ga se cegu na nona cakacaka. A biuta nona cakacaka o Thomas qai sega ni taura na kena isau e dodonu me soli vua. A kunea e dua tale na cakacaka o Thomas, me dau ripea retio kei na mobail. E laurai gona ena ivakaraitaki qo kei na levu tale ni sega ni dodonu meda leqataka na ka meda bula kina. Ni bulia na ka kece o Jiova qai dau taqomaki ira na nona tamata, eda kila ni na karoni keda tale ga.
13. Na cava era ogaoga tiko kina ena cakacaka vakavunau na tacida ena veivanua era sega ni rawaka vinaka vakailavo?
13 Ena levu na vanua era sega ni rawaka vinaka vakailavo, era ogaoga voli ga na tacida ena cakacaka vakavunau. Na cava na vuna? E dua na valenivolavola ni tabana e vola: “Era sega ni cakacaka e levu na itaukeinivale era via vulica na iVolatabu, e levu kina na gauna mera vuli ena siga. E levu tale ga na gauna mera vunau kina na mataveitacini. E sega ni gadrevi me tukuni vei ira era tu ena vanua e vakaleqai vakalevu nida bula tu ena iotioti ni veisiga, era sa kila ga ena veika era raica.” A veiqaravi tiko e dua na daukaulotu me sivia e 12 na yabaki ena dua na vanua era vakavulica kina na dautukutuku e tolu se sivia na vuli iVolatabu. E vola: “E rawarawa ga nodra bula na dautukutuku qai sega ni levu na ka e vakalatilati, e levu gona na gauna era vakaitavi kina ena cakacaka vakaitalatala kei na caka vuli iVolatabu.”
14. Ena sala cava ena taqomaki ira kina na isoqosoqo levu na Kalou?
14 Sa yalataka o Jiova me vukei ira, taqomaki ira, se vakabulai ira vakailawalawa na nona tamata, vakayago, vakayalo tale ga. Eda nuitaka ni na cakava dina qori. (Same 37:28; 91:1-3) O ira na bula ena “veivakararawataki levu” era ilawalawa levu dina. (Vkta. 7:9, 14) Ena taqomaka o Jiova na ilawalawa qori mera kua ni kawaboko me yacova na ivakataotioti. Ena vakarautaki na ka kece e gadrevi mera vosota kina na veivakatovolei, me taqomaki vinaka tale ga na nodra veiwekani kei Jiova. Ena qai vakabulai ira na nona tamata ena Amaketoni.
“VAKAVULICI AU, JIOVA, E NA NOMUNI SALA”
15, 16. Ena yaga vakacava vei keda na noda muria na veidusimaki vakalou? Tukuna na kena ivakaraitaki.
15 Ke da via yaloqaqa tiko ga, ena vinakati me vakavulici keda tiko ga na Kalou. Eda kila qori ena vakamamasu i Tevita: “Ni vakavulici au, Jiova, e na nomuni sala, ka tuberi au e na sala dodonu, e na vukudra na noqu meca.” (Same 27:11) Me salavata kei na masu qori, ena vinakati meda rogoca da qai muria vinaka na veidusimaki vakaivolatabu cava ga e vakarautaka na isoqosoqo i Jiova. Kena ivakaraitaki, e levu era muria na ivakasala vuku mera bula rawarawa ga. Era sauma na nodra dinau ra qai volitaka na veika era sega ni gadreva. Ni tarai vuravura na leqa vakailavo, era sega ni lomaleqa. Era sa sega ni cakacaka vakasivia mera sauma kina na ka era sega ni gadreva, sa ra galala kina mera vakarabailevutaka na nodra cakacaka vakaitalatala. Ena vinaka meda dui taroga, ‘E dau totolo na noqu muria na ka kece au wilika ena iVolatabu kei na ivola e vakarautaka na dauveiqaravi yalodina e vuku, ke dredre mada ga meu muria?’—Maciu 24:45.
16 Nida yalorawarawa me vakavulici keda o Jiova, me tuberi keda tale ga ena sala ni yalododonu, eda na sega ni rerevaka e dua na ka. A kere cakacaka e dua na painia tudei mai Merika me rawa ni vukei ratou na nona vuvale me ratou veiqaravi vakatabakidua tiko ga. A kaya na nona supavaisa ni na sega ni soli vua na cakacaka ya baleta ni sega ni vakaivola kina. Ke yacovi iko qori, o na veivutunitaka nomu sega ni vuli torocake qai digia na veiqaravi vakatabakidua? Ni oti ga e rua na macawa, a sake mai na nona cakacaka na supavaisa. A taroga na tacida e dua tale na manidia me baleta na nona isausau. A vakamacalataka ni rau iVakadinadina i Jiova vakaveiwatini, erau cakacaka vakaitalatala vakatabakidua rau qai via tomana tiko ga. Ni bera ni vosa na tacida, a kaya na manidia: “Au liaca ni o duatani sara ga! Ni sa davo bibi tu o tamaqu, erau dau mai wili iVolatabu tiko vua e veisiga e rua dou lotu vata. Au mani yalataka, keu na sotava e dua na iVakadinadina i Jiova e gadreva na veivuke, au na vukei koya sara ga.” Ena siga tarava a soli vua na tacida ya na cakacaka sara ga a sega ni solia vua na supavaisa e liu. Io, nida vakaliuca na Matanitu ni Kalou ena noda bula, ena vakayacora o Jiova na nona yalayala me vakarautaka na veika vakayago eda gadreva.—Maciu 6:33.
BIBI NA VAKABAUTA KEI NA INUINUI
17. Na cava ena vukei keda meda kua ni leqataka na veika ena yaco ena veisiga ni mataka?
17 Sa qai vakamacalataka vei keda o Tevita na bibi ni vakabauta kei na inuinui ena nona kaya: “Kevaka ka’u a sega ni vakadinata me’u raica na yalovinaka i Jiova e na vanua ni bula—!” (Same 27:13) Ena vakacava tu na noda bula ke sega ni solia vei keda na Kalou na inuinui da qai sega ni kila na veika e veivosakitaki ena Same 27? Meda masuti Jiova tiko ga ena nuidei ena iotioti ni veisiga qo me vakaukauataki keda qai vakabulai keda ena Amaketoni.—Wilika Same 27:14.
[iYaloyalo ena tabana e 23]
A vakaukauataki Tevita na nona dau vakananuma na veivakabulai i Jiova
[iYaloyalo ena tabana e 25]
O raica na dredre ni bula vakailavo me sala o vakalevutaka kina na nomu cakacaka vakaitalatala?