Qarauna na Dai ni Tevoro!

“Kilai yalodra tale mai na dai ni Tevoro.”​—2 TIM. 2:26.

O NA SAUMA VAKACAVA?

Na cava meda cakava ke da dau veivakalewai?

Na cava o rawa ni vulica ena ivakaraitaki i Pailato kei Pita me baleta na noda sega ni rawai ena rere se veivakasaurarataki?

Na cava mo cakava mo kua ni rarawataka vakasivia na nomu cala?

1, 2. Na dai cava soti ni Tevoro eda na veivosakitaka ena ulutaga qo?

E DAU vakasagai ira na tamata i Jiova na Tevoro. E sega ni nona inaki me vakamatei ira me vaka na nodra dau vakamate manumanu na dauvakasasa. E vinakata ga o Setani me toboki ira bulabula qai vakayagataki ira mera cakava na lomana.​—Wilika 2 Timoci 2:24-26.

² Ena rairai vakayagataka na dai se icori e dua na dauvakasasa me toboka bulabula kina na manumanu. Ena saga me lako laivi na manumanu ena vanua e vuni tu kina me rawarawa na nona tudaitaki. E rawa tale ga ni vunia na dai me kua ni kila na manumanu. E vakayagataka tale ga na iwalewale va qori na Tevoro me toboki ira bulabula kina na tamata ni Kalou. Ke da sega ni via coko ena dai qori, ena vinakati meda yadra tiko da qai kila na ivakatakilakila eso e vakaraitaka na dai i Setani. Eda na raica tiko ena ulutaga qo na sala eda rawa ni vorata kina e tolu na dai ni Tevoro sa dau veirawai voli mai. Qori na (1) noda sega ni lewa vinaka na ka eda tukuna, (2) rere, veivakasaurarataki, kei na (3) rarawataki vakasivia ni cala. Eda na raica ena ulutaga tarava e rua tale na dai i Setani.

LEWA VINAKA NA KA EDA TUKUNA

3, 4. Na cava e rawa ni yaco ke da sega ni lewa vinaka na yameda? Tukuna e dua na kena ivakaraitaki.

³ Mera lako laivi na manumanu mai na vanua era vuni tu kina, eso na dauvakasasa era dau vakama na gasau ra qai toboki ira na manumanu era via dro. Na Tevoro tale ga e via vakama vakaivakatakarakara na ivavakoso. Ke yaco na nona inaki, sa rawa sara ga ni vakamuai ira tani na lewe ni ivavakoso mai na vanua era taqomaki kina vakayalo qai toboki ira. E rawa vakacava nida tokoni Setani ke da sega mada ga ni nakita?

⁴ A tukuna na tisaipeli o Jemesa na yameda e vaka na yameyame. (Wilika Jemesa 3:6-8.) Ke da sega ni lewa vinaka na yameda, eda rawa sara ga ni vakama vakaivakatakarakara na ivavakoso. Ena yaco vakacava qori? Vakasamataka mada e dua na ituvaki qo: E kacivaki ena soqoni ni sa painia tudei e dua na tacida yalewa. Erau veivosaki sara e rua na tacida yalewa ni oti na soqoni. A marautaka e dua vei rau na itukutuku ya qai nuitaka ni na toso vinaka na nona painia na tacida yalewa sa kacivaki ya. Dua tale e vakalewa na inaki ni nona painia na tacida qori qai tukuna ni vinakata ga me dokai ena ivavakoso. O cei vei rau na dautukutuku qori o vinakata me nomu itokani? O rawa sara ga ni kila o cei vei rau e rawa ni vakama na ivavakoso ena ka e tukuna.

5. Na cava meda cakava meda lewa vinaka kina na ka eda tukuna?

⁵ Eda na lewa vinaka vakacava na ka eda tukuna? A kaya o Jisu: “Ni na cavuta ga na gusumudou na ka e sinai tu e lomamudou.” (Maciu 12:34) Na imatai gona ni ka meda cakava, oya meda dikeva na lomada. Vakacava eda cata na rai cala e rawa ni vakavuna meda tauca na vosa mosimosi? Kena ivakaraitaki, nida rogoca ni sasaga tiko me veiqaravi ena ivavakoso e dua na tacida tagane, eda vakabauta ni vinaka na nona inaki se cakava ya ena nona nanumi koya ga? Ke dau noda ivakarau meda veivakalewai, ena vinaka meda dau vakasamataka ni vakalewa tale ga na Tevoro na inaki ni nona yalodina voli vua na Kalou o Jope. (Jope 1:9-11) Meda kua ni dau kasamitaki ira na tacida, ena vinaka meda vakasamataka ga na vuna eda vakalewai ira kina. E tiko na vuna vinaka eda cakava kina ya? Se sa vagagai na lomada ena yaloca e takalevu tu ena iotioti ni veisiga qo?​—2 Tim. 3:1-4.

6, 7. (a) Na cava eso na vuna eda na rairai veivakalewai kina? (b) Na cava meda cakava nida vakasewasewani?

⁶ Dikeva mada eso tale na vuna eda veivakalewai kina. Dua ya na noda via vakadrukai ira eso tale ena ka eda rawata. De dua eda via vakaraitaka nida vinaka cake vei ira eso tale. Se da via vakaiulubaletaka na noda sega ni cakava na ka e dodonu meda cakava. Se mani vu ni noda veivakalewai na dokadoka, vuvu, se noda nanuma nida sega ni rawata e dua na ka, e rawa sara ga ni veivakaleqai na vakalelewa.

⁷ E rawa tale ga nida nanuma ni tiko na vuna vinaka eda vakalewai ira kina eso tale. De dua a vakamosia na yaloda na nona sega ni lewa vinaka na ka e tukuna e dua. Ke yaco ya, e sega ni dodonu meda sauma na ka e cakava. Qori sa na qai kuria ga na leqa qai vakayacori ga kina na lomana na Tevoro, sega ni loma ni Kalou. (2 Tim. 2:26) E vinaka meda vakatotomuria sara ga na ivakaraitaki i Jisu. Ni vakasewasewani “e sega ni veivakasewasewani lesu,” e “vakamalumalumu tiko ga vei koya e dau lewa vakadodonu.” (1 Pita 2:21-23) A nuidei ga o Jisu ni tiko na gauna kei na sala veiganiti ena vakadodonutaka kina o Jiova na ituvaki ya. Me va tale ga qori na noda nuitaka na Kalou. Ke dau veivakacegui na ka eda tukuna, sa da maroroya sara tiko ga “na duavata” ena ivavakoso.​—Wilika Efeso 4:1-3.

KUA NI RAWAI ENA RERE KEI NA VEIVAKASAURARATAKI

8, 9. Na cava e vakadonuya kina o Pailato me vakamatei o Jisu?

⁸ Ni coko ena dai e dua na manumanu, sa sega ni rawa ni yavala. Ke dua tale ga e vakamalumalumu ena rere se veivakasaurarataki, sa solia sara tiko ga eso na galala mera lewai koya na so tale. (Wilika Vosa Vakaibalebale 29:25.) Meda raica mada na ka eda rawa ni vulica ena nodrau ivakaraitaki e rua na turaga erau a vakamalumalumu ena veivakasaurarataki kei na rere.

⁹ A kila vinaka na Kovana ni Roma o Ponitio Pailato ni sega ni dua na nona cala o Jisu, a sega kina ni vinakata me totogitaki. A kaya mada ga ni “sega ni raica e dua na cala me totogimate kina.” Ia a vakadonuya ga o Pailato me vakamatei o Jisu. Na cava na vuna? A vakamalumalumu o Pailato ena nodra veivakasaurarataki na tamata. (Luke 23:15, 21-25) Era kailavaka na dauveitusaqati, “ke oni sereka na tamata qo, oni sega ni tokoni Sisa.” Na ka era cakava ya era vakasaurarataki Pailato kina me yaco na lomadra. (Joni 19:12) A rairai leqataka o Pailato ni na vakacegui mai na nona itutu se na mate ke sereki Karisito. A vakamalumalumu o Pailato me cakava na loma ni Tevoro.

10. Na cava e cakitaki Jisu kina o Pita?

¹⁰ Dua vei ira na itokani voleka i Jisu na yapositolo o Pita. A tukuna sara ga ni o Jisu na Mesaia. (Maciu 16:16) A yalodina voli ga o Pita nira sega ni kila eso na tisaipeli na ibalebale ni ka e tukuna o Jisu, ra qai biuti koya. (Joni 6:66-69) Nira mai vesuki Jisu na meca, e ucuna mai na nona iseleiwau o Pita me taqomaki nona Turaga. (Joni 18:10, 11) E muri a qai vakamalumalumutaki Pita na rere mani cakitaka ni kilai Jisu Karisito. Ena dua ga na gauna lekaleka a coriti na yapositolo qori ena dai ni rerevaka na tamata, a sega kina ni doudou me cakava na ka e dodonu, a sega tale ga ni yalodina vei Jisu.​—Maciu 26:74, 75.

11. Na cava eso na ka eda rawa ni vakasaurarataki kina?

¹¹ Nida lotu vaKarisito e dodonu meda vorata na nodra veivakasaurarataki eso meda cakava na ka ena sega ni vakamarautaka na Kalou. De dua era na vakasaurarataki keda na noda boso ni cakacaka se so tale, meda lawaki se ra na via rawai keda ena veiyacovi vakasisila. De dua era na vakasaurarataki ira na gonevuli na nodra icaba mera lawaki ena veitarogi, sara iyaloyalo ca, vakatavako, vakayagataka na wainimate gaga, gunu vakasivia, se veiyacovi vakasisila. Na cava gona e rawa ni vukei keda meda kua ni coriti ena dai ni noda rerevaka na tamata kei na noda vakasaurarataki meda cakava na ka e sega ni vakamarautaki Jiova?

12. Na cava eda rawa ni vulica vei Pailato kei Pita?

¹² Na cava eda rawa ni vulica vei Pailato kei Pita? A sega ni levu na ka e kila o Pailato me baleti Karisito. E kila ga ni sega ni dua na nona cala o Jisu qai sega ni vakataki keda na tamata. A sega ga ni yalomalumalumu o Pailato qai sega ni lomana na Kalou dina, mani toboki koya bulabula na Tevoro. O Pita e kila na ka dina qai lomana na Kalou. Ia ena so na gauna e sega ni yalomalumalumu, dau rerere, qai rawai rawarawa ena veivakasaurarataki. Ni bera ni vesu o Jisu, a raqataka o Pita: “Ke ratou tarabe kece qo, au na sega ga ni tarabe.” (Mari. 14:29) A rawa sara ga ni vakarautaki koya o Pita ena veivakatovolei a tu e matana ke a vakatotomuria na nona nuitaka na Kalou na daunisame, a lagata: “Sa totaki au ko Jiova; ka’u na sega ni rere: A cava beka me ra kitaka vei au ko ira na tamata?” (Same 118:⁠6) Ena iotioti ni bogi a bula kina e vuravura o Jisu a kauti Pita kei na rua tale na yapositolo ena were o Kecisemani. A kerei ratou o Jisu me ratou yadra tiko, ia ratou moce ga. A vakayadrati ratou o Jisu qai kaya: “Dou yadra, dou masu tiko mo dou kua ni temaki.” (Mari. 14:38) Ia e moce tale o Pita, e muri a rawai ena rere kei na veivakasaurarataki.

13. Eda na vorata vakacava na veivakasaurarataki meda caka ca?

¹³ E dua tale na lesoni bibi eda rawa ni vulica ena nodrau ivakaraitaki o Pailato kei Pita: Meda kua ni rawai ena veivakasaurarataki, ena vinakati meda vulica na ka dina, meda yalomalumalumu, yalomalua, meda lomana na Kalou qai rerevaki Jiova, sega ni tamata. Ke yavutaki ena ka dina na noda vakabauta, eda na doudou ni vakamacalataka na noda vakabauta. Qori ena vukei keda meda kua ni rawai ena veivakasaurarataki, eda na sega ni rerevaka tale ga na tamata. Meda kua ni vakararavi ena noda kaukaua ga. Meda yalomalumalumu da qai vakadinata ni na vinakati na kaukaua ni Kalou meda vorata rawa kina na veivakasaurarataki. E bibi meda masuta na yalo tabu i Jiova, me uqeti keda tale na noda lomani koya meda muria kina na nona ivakatagedegede, meda kua ni cakava e dua na ka ena vakarogorogocataka na yacana. Ia ena vinakati sara ga meda vakarautaki keda rawa ni bera nida vakatovolei. Kena ivakaraitaki, e bibi meda masu kei ira na luveda qai vakarautaki ira rawa mera kila na ka mera cakava nira veivakasaurarataki na nodra ilala mera caka ca.​—2 Kor. 13:7.a

KUA NI RAWAI ENA RARAWATAKI VAKASIVIA NI CALA

14. Na cava e vinakata na Tevoro meda nanuma me baleta na noda cala ena veigauna sa oti?

¹⁴ So na gauna e rawa ni vakayagataki me dai na tolonikau bi se vatu levu e lili tu ena sala e lakova wasoma na manumanu. Ni butuka na vakariba ni dai qori na manumanu lecaika, ena lutu mai na vatu se tolonikau qai qaqi koya. Na noda dau rarawataka tale ga vakasivia na noda cala, e rawa ni vaka na vatu bi se tolonikau levu e qaqi keda. Nida vakasamataka na cala eda cakava ena veigauna sa oti, eda na rairai “malumalumu ka musulaki sara.” (Wilika Same 38:3-5, 8.) E vinakata o Setani meda nanuma ni na sega ni lomani keda tale o Jiova, eda na sega ni yacova tale ga na nona ivakatagedegede.

15, 16. Na cava mo cakava mo kua ni rawai ena dai ni nomu rarawataka vakasivia na nomu cala?

¹⁵ Na cava mo cakava mo kua ni rawai ena dai ni nomu rarawataka vakasivia na nomu cala? Ke o cala bibi, vakavinakataka sara ga qo na nomu veiwekani kei Jiova. Raici iratou na qase ni ivavakoso qai kerea me ratou vukei iko. (Jeme. 5:14-16) Saga mo vakadodonutaka na cala o cakava. (2 Kor. 7:11) Ke o vunauci se vakadodonutaki, kua ni yalolailai. E vakadodonutaki iko o Jiova ni lomani iko. (Iper. 12:6) Mo vakadeitaka sara ga mo kua ni vakayacora tale na cala ya, qai kua ni cakava na ka o na rawa ni cala tale kina. Ni o sa veivutuni qai saumaki, mo vakabauta ni rawa ni vosoti na nomu cala ena isoro ni veivoli i Jisu Karisito.​—1 Joni 4:9, 14.

¹⁶ Eso sa vosoti na nodra cala, ia se ora voli ga na lomadra ena cala era cakava. Ke o sotava tiko qori, nanuma tiko ni a vosoti Pita o Jiova kei ratou na vo ni yapositolo ena nodratou biuta na Luvena lomani o Jisu ena gauna sara ga a gadreva kina na nodratou veivuke. O Jiova a vosota tale ga na turaga a vakasivoi mai na ivavakoso e Korinica a veivutunitaka na ivalavala dukadukali a vakayacora. (1 Kor. 5:1-5; 2 Kor. 2:6-8) E vakamacalataki tale ga ena Vosa ni Kalou o ira era vakayacora na ivalavala tawakilikili era veivutuni qai vosoti ira na Kalou.​—2 Vei. 33:2, 10-13; 1 Kor. 6:9-11.

17. E yaga vakacava vei keda na isoro ni veivoli?

¹⁷ Ena vosota qai guilecava o Jiova na cala o vakayacora ena veigauna sa oti ke o veivutuni dina qai vakabauta ni na lomani iko. Kua ni nanuma ni na sega ni vosoti na nomu ivalavala ca ena isoro ni veivoli i Jisu. Ke o dau nanuma ni na sega ni vosoti na nomu ivalavala ca, o sa tacori ena dai i Setani. E vinakata na Tevoro mo nanuma ni na sega ni vosota na cala kece o Jiova ena isoro ni veivoli. Ia e rawa ni vosoti na nodra cala o ira era veivutuni. (Vkai. 24:16) Ni o vakabauta na isoro ni veivoli, o na sega ni rarawataka vakasivia na nomu cala qai vakaukauataki iko mo qaravi Jiova tiko ga ena lomamu taucoko, nomu vakasama kei na nomu bula taucoko.​—Maciu 22:37.

EDA SEGA NI LECAVA NA ILAWAKI I SETANI

18. Na cava meda cakava meda kua ni tacori ena dai ni Tevoro?

¹⁸ E sega ni kauaitaka o Setani se na dai cava eda na tacori kina, me toboki keda rawa ga. Nida sega ni lecava na ilawaki i Setani, eda rawa ni dro me kua ni rawai keda. (2 Kor. 2:10, 11) Eda na sega ni tacori ena nona dai ke da masuta na vuku meda vosota kina na veivakatovolei. A vola o Jemesa: “O koya gona, ke dua vei kemuni e lailai vua na vuku, me kerea tiko ga vua na Kalou, ni na soli vua. Ni lomasavu o koya vei keda kece, e sega ni dau vaqara cala.” (Jeme. 1:5) Meda vakayacora sara ga na ka eda masulaka nida dau vuli vakataki keda da qai bulataka na Vosa ni Kalou. Na ivola vakaivolatabu e vakarautaka na dauveiqaravi yalodina e vuku e vakatakila vei keda na dai ni Tevoro qai vukei keda meda kua ni tacori kina.

19, 20. Na cava meda cata kina na ka ca?

¹⁹ Na noda masu kei na noda vulica na iVolatabu ena uqeti keda meda via cakava na ka e dodonu. E bibi tale ga meda cata sara ga na ka ca. (Same 97:10) Eda na sega ni muria na gagadre ca ni lomada ke da dau vakasamataka na leqa e rawa ni yaco. (Jeme. 1:14, 15) Nida vulica meda cata na ka ca da qai via cakava na ka e dodonu, eda na sega ni rawai ena dai e biuta o Setani.

²⁰ Eda marau ni vukei keda o Jiova meda kua ni rawai ena dai nei Setani! E vakabulai keda o Jiova mai “vua na Vunica” ena veivuke ni yalona tabu, nona Vosa kei na nona isoqosoqo. (Maciu 6:13) Eda na vulica ena ulutaga tarava na sala meda kua ni coriti kina ena rua tale na dai ni Tevoro e kilai ni dau toboki ira bulabula kina na dauveiqaravi ni Kalou.

[iVakamacala e ra]

[iYaloyalo ena tabana e 21]

Ena yaco na leqa ena ivavakoso ke da sega ni lewa vinaka na ka eda tukuna

[iYaloyalo ena tabana e 24]

E tiko na ka mo cakava mo kua ni rarawataka vakasivia na nomu cala