Na Bose Vakairogorogo

“NI CAVA na bose qo o na tukuna, ‘Qo e dua na bose vakayabaki ni isoqosoqo e vakairogorogo dina!’” A cavuta na vosa qori o Stephen Lett e lewe ni iLawalawa Dauvakatulewa ni iVakadinadina i Jiova, e uqeti ira tiko na mataveitacini era soqo vata yani ena ika126 ni bose vakayabaki ni Watch Tower Bible and Tract Society of Pennsylvania ena ka mera nanamaki kina. A vakayacori na soqo qori ena nodra Assembly Hall na iVakadinadina i Jiova e Jersey City, New Jersey, e Merika, ena ika2 ni Okotova, 2010. Na cava eso na ka e vakarogoi ena bose vakairogorogo qo?

A tekivuna o Brother Lett e dua na ivunau bulabula a vakamacalataka na qiqi vakalomalagi i Jiova me vaka e tukuni ena Isikeli. Na qiqi vakaitamera qori e vakatayaloyalotaka na isoqosoqo vakalomalagi ni Kalou, e lewa sara ga o Jiova. E kaya o Brother Lett ni isoqosoqo vakalomalagi qori era lewena na ibulibuli vakayalo, e vaka na tibi ni liva na totolo ni nodra veitosoyaki—e dusia qori na totolo ni vakasama i Jiova. E toso tale tiko ga na isoqosoqo i Jiova e vuravura. A cavuta o Brother Lett e vica na veisau vakasakiti e caka tiko ena isoqosoqo i Jiova ena vica na yabaki ga qo.

Kena ivakaraitaki, e vica na valenivolavola ni tabana era cokovata, me rawa nira oga kina vakalevu ena cakacaka vakavunau o ira na veiqaravi tu e Peceli ena veivanua oya. A uqeti ira na vakarorogo o Brother Lett mera masulaki ratou tiko ga na iLawalawa Dauvakatulewa, eratou matataka na dauveiqaravi yalodina me ratou kua wale ga ni yalodina, me ratou vuku tale ga.—Maciu 24:45-47.

Na Irogo e Veivakayaloqaqataki kei na Veitarotarogi Veivakauqeti

O Tab Honsberger, e lewe ni Komiti ni Tabana mai Haiti a vakamacalataka e dua na itukutuku vakaciriloloma ni vakacaca ni uneune mai Haiti ena ika12 ni Janueri, 2010, era mate kina e rauta ni le 300,000. A tukuna nira vakamacalataka na iliuliu ni lotu vei ira na lewenivanua ni o ira na vakaleqai e totogitaki ira na Kalou nira sega ni vakabauta, e vakabulai ira ga na tamata vinaka. Ena yasana a dua, era dro e vica na udolu na kaivesu ni kasura na lalaga ni nodra valeniveivesu ena uneune. Ia e levu na lewe i Haiti yalomalumalumu, e vakacegui ira na ka dina era vulica me baleta na vuna e rui levu kina na leqa ena gauna qo. A tukuna o Brother Honsberger na ka e tukuna e dua na tacida tagane yalodina mai Haiti a mate na watina, e kaya: “Au se tagi tiko ga me yacova mai nikua. Au sega ni kila ena oti ni naica na noqu lolosi, ia au marau niu vakila na loloma e vakarautaka o Jiova ena nona isoqosoqo. Sa tiko na noqu inuinui, au na saga tale ga meu wasea na inuinui qori vei ira tale eso.”

O Mark Sanderson, sa lewe ni vuvale e Peceli mai Brooklyn, a vakamacalataka na itukutuku mai na Yatu Filipaini. A lewe tu ni Komiti ni Tabana mai kea, e vakamacalataka kina ena marau na ika32 ni tubu levu duadua era rawata ena vanua oya. A tukuna tale ga ni levu sara na iwiliwili ni vuli iVolatabu ni laurai vata kei na levu ni dautukutuku. A tukuna e dua na italanoa me baleta na tacida tagane o Miguel a labati na makubuna tagane. A vinakata sara ga o Miguel me veilewaitaki o koya e laba, me bala tale ga e valeniveivesu. Ena dua na gauna e muri ni vunau tiko e valeniveivesu, a sotava sara na tagane a laba. A rere o Miguel, ia e vosa ga vakamalua ena yalovinaka. Mani rau vuli iVolatabu sara kei na turaga oya, a taleitaka na ka e vulica, mani qaravi Jiova sara. Sa papitaiso ena gauna qo. E veitokani dredre sara kei Miguel, sa saga tale ga o Miguel me sereki totolo mai valeniveivesu na nona itokani vou qori.a

A dewa sara na porokaramu ina veitarotarogi, e vakaitavi kina o Mark Noumair, e qasenivuli ena Tabana e Qarava na Vuli Vakayalo. A vakataroga e tolu na veiwatini—o Alex kei Sarah Reinmueller, David kei Krista Schafer, vata kei Robert kei Ketra Ciranko. O Alex Reinmueller, e veivuke tiko ena Komiti ni Tabaivola, a vakamacalataka ni a saga me nona na dina ena nona painia tiko mai Kenada ni se yabaki 15, e dau cakacaka taudua ga ena levu na gauna. Ni tarogi se o cei e Peceli a uqeti koya, a cavuta o Brother Reinmueller e tolu na turaga yalodina, a tukuna tale ga na sala ratou uqeti koya kina me matua vakayalo. A talanoataka o Sarah na watina, nona veitokani kei na dua na tacida yalewa, e dua a vosota voli ena vica na yabaki na nona vesu tu ena valeniveivesu mai Jaina ena vuku ni nona vakabauta. E vulica kina o Sarah me dau vakararavi vei Jiova ena masu.

O David Schafer e veivuke tiko ena Komiti ni Veivakavulici, a vakavinavinakataka na dei ni vakabauta i tinana, qai tukuna tale ga nodra vukei koya eso na tacida tagane dau ta kau me painia veivuke ni se gone. O Krista na watina, e vakavinavinakataka na nona uqeti koya o ira sa veiqaravi dede toka e Peceli era dau “dina ena ka lailai,” me vaka e veivakasalataki kina o Jisu.—Luke 16:10.

A nanuma lesu o Robert Ciranko, e veivuke tiko ena Komiti ni Volavola, na nodratou ivakaraitaki e va na tubuna ena yasana vei tamana kei tinana, eratou kai Hungary, eratou lotu vaKarisito lumuti tale ga. A uqeti koya ni se gone na soqo ni tikina lelevu a vakayacori ena 1950 vakacaca kei na nona vulica ni isoqosoqo i Jiova e levu sara mai na nona ivavakoso. A talanoataka o Ketra na watina, na nona vulica me yalodina ni painia voli ena dua na ivavakoso e basika kina na vukitani kei na so tale na leqa. A vosota na ituvaki qori qai lesi me painia lavotaki ena dua na ivavakoso e tarai koya vakalevu na nodra duavata.

A vakamacalataka o Manfred Tonak na ripote mai Iciopea. Na vanua qo e kilai tale ga ena gauna vakaivolatabu, sa vakalougatataki ena 9,000 na dautukutuku. E levu vei ira era tiko ena koroturaga o Addis Ababa kei na veivanua voleka. Ia e gadrevi vakalevu na veivuke ena veivanua ribayawa e Iciopea. Era sureti na iVakadinadina kai Iciopea ena veivanua tale eso mera gole ena nodra vanua mera vunau ena so na yalava ribayawa e kea. E levu sara era gole yani ekea mera vakayaloqaqataki ira na mataveitacini ena vanua oya, e levu tale ga na tataleitaki.

Na ilutua ni porokaramu qo e dua na vosa veitaravi me baleti ira na iVakadinadina i Jiova e Rusia kei na sasaga ni matanitu me tarova na cakacaka e kea. O Aulis Bergdahl e lewe ni Komiti ni Tabana e Rusia a vakamacalataka e dua na ripote ni nodra vakacacani na iVakadinadina mai Rusia, vakauasivi e Moscow. O Philip Brumley e veiqaravi tiko ena Tabana Vakalawa ena valenivolavola ni tabana e Merika e vakamacalataka na ka vakasakiti a yaco ena vica ga na vula qo ni rogoca na European Court of Human Rights (ECHR) (Mataveilewai ni Dodonu ni Lewenivanua e Urope) na ciwa na ka era beitaki kina na iVakadinadina. A raica na Mataveilewai ni cala na veibeitaki oya, ena vica mada ga na kisi ni veibeitaki, a vakamacalataka vinaka kina na mataveilewai na vuna e cala kina. Ni se waraki tiko na kena macala, a tukuna o Brother Brumley ni na yaga tale ga ena so tale na vanua na vakatulewa ni Mataveilewai.

A kacivaka tarava o Brother Lett e dua na itukutuku marautaki, ni sa vakadonuya na ECHR me rogoca na kisi ni veilewai ni ivakacavacava ni matanitu o Varanise kei ira na iVakadinadina i Jiova e kea. Na Mataveilewai dokai qo e Urope, a vakamacalataka e vica ga na kisi eratou dikeva. Ena gauna qo sa rogoca na ECHR e rauta ni 39 na kisi ni veilewai ni iVakadinadina i Jiova, sa talaca tale ga e 37 na veilewai qori. A vakauqeti ira kece na tamata ni Kalou o Brother Lett mera kerea na veivuke i Jiova me baleta na ka e yaco tiko qori.

Na otioti ni ripote a vakamacala kina o Richard Morlan, e dau veivakavulici ena Vuli ni Qase ni iVavakoso. A bulabula na nona ivakamacala me baleta na vuli kei na nodra vakavinavinaka na qase ni ivavakoso era tiko kina.

Eso Tale na Nodratou iVunau na iLawalawa Dauvakatulewa

A veivakauqeti dina na ivunau nei Guy Pierce e lewe ni iLawalawa Dauvakatulewa me baleta na tikinivolatabu ni yabaki ni 2011, ‘Lai vakaruru ena yaca i Jiova.’ (Sefa. 3:12) E tukuna ni levu na vuna e marautaki kina vei keda na tamata i Jiova na gauna qo, ia e vinakati meda kauaitaka vakabibi. Sa voleka sara na siga i Jiova, ia e levu era qara ga mera vakaruru ena lotu lasu, isoqosoqo vakapolitiki, iyau, ivakavuvuli vakatamata kei na so tale. Me rawa nida kunea na ivakaruru dina, ena vinakati meda vakayagataka na yaca i Jiova, qori ena noda vulica, doka, da qai dokai koya e vakatokayacataki ena yaca oya, meda lomani koya tale ga mai vu ni lomana.

O David Splane e lewe ni iLawalawa Dauvakatulewa a vakamacalataka tarava e dua na ulutaga e vakavure vakasama, “O sa Curu ina iVakavakacegu ni Kalou?” E tukuna ni ivakavakacegu ni Kalou e sega ni vanua ni wele, baleta ni “cakacaka tiko ga” o Jiova kei Luvena ena siga kece ni vakavakacegu vakaivakatakarakara me vakacavari vinaka kina na inaki ni Kalou kei na veika me baleta na vuravura qo. (Joni 5:17) Eda na curu vakacava ena ivakavakacegu ni Kalou? E sega wale ga ni okati kina na noda tagutuva na noda ivalavala ca kei na noda vakadonui keda ga. E vinakati meda cakacakataka na noda vakabauta da qai vakasamataka na inaki ni Kalou da qai tokona ena noda vinaka taucoko na veika me baleta na inaki qori. E rairai sega ni rawarawa qori ena so na gauna, ia e vinakati meda ciqoma na ivakasala i Jiova ena nona isoqosoqo da qai muria na kena veidusimaki. A vakamasuti ira na vakarorogo o Brother Splane mera cakava na ka kece era rawata mera curu kina ena ivakavakacegu ni Kalou.

Na iotioti ni vunau, e kena ulutaga “Na Cava Eda Waraka Tiko?” a vosa kina o Anthony Morris e lewe ni iLawalawa Dauvakatulewa. A vakabibitaka qai tauca ena yalololoma na ulutaga qo o Brother Morris, me vaka e veivakamasuti tiko e dua na tama, ena nona vakadreti ira na vakarorogo ena kena vakayacori na parofisai sa tu qo e matada kei na veika mera nanamaki kina na yalodina. Qo e okati kina na gauna ena tukuni kina na, “Vakacegu kei na sautu!” kei na vakarusai ni lotu lasu. (1 Ces. 5:2, 3; Vkta. 17:15-17) A veivakaroti o Brother Morris me qarauni na kena tukuni, “Qo sara ga na Amaketoni,” me baleta eso na itukutuku ni veika e yaco e sega ni salasalavata kei na parofisai ena iVolatabu. A vakatututaka meda muria na ka e cavuti ena Maika 7:7, oya meda marau, meda vosota, da qai wawa tiko ga. A vakaroti ira kece na tiko ena bose oya mera “kabiti” iratou na iLawalawa Dauvakatulewa, me vaka na nodra dau veikabiti na sotia nira vakarau veiraravui. E kaya me ‘kaukaua na yalomudou o kemudou kece ga sa nuitaki Jiova.’—Same 31:24.

E tini na porokaramu ena kena kacivaki eso na itukutuku bibi. O Geoffrey Jackson e lewe ni iLawalawa Dauvakatulewa a kacivaka na ituvatuva ni kena sagai me vakayagataki na Watchtower, qo na itabataba vou ni vuli sa vakarawarawataki me baleti ira na sega ni kila vinaka na vosa vakavalagi. A kacivaka o Stephen Lett ni na tuvanaka na iLawalawa Dauvakatulewa na nodra sikovi na ivakatawa ni tikina kei na watidra era vakaitikotiko mai Merika. A kacivaki tale ga ni koronivuli e dau vakatokai tu e liu me Koronivuli ni Vuli Veiqaravi Vakaitalatala me sa Koronivuli ni Vuli iVolatabu ni Tagane Dawai. Ena dua tale ga na Koronivuli ni Vuli iVolatabu ni Veiwatini. Na inaki ni vuli qori mera vakavulici ena levu tale na ka na veiwatini mera yaga vakalevu ena isoqosoqo i Jiova. A kacivaka tale ga o Brother Lett ni nodra Koronivuli na iVakatawa Dauveilakoyaki Kei Watidra kei na nodra Koronivuli na Lewe ni Komiti ni Tabana Kei Watidra ena caka vakarua e veiyabaki e Patterson, sa vakadonui tale ga mera tiko ena vuli qori o ira na sa vuli oti kina.

Sa bau vakaciriloloma dina na itinitini ni porokaramu. E tinia na porokaramu o John E. Barr sa yabaki 97, e dua sa lewena dede tu mai na iLawalawa Dauvakatulewa, e masu ena yalomalumalumu qai vu mai lomana.b Ni cava na soqo, era matalau dina na tacida ra qai vakabauta ni qo e dua dina na siga vakairogorogo.

[iVakamacala e ra]

[Tikina bibi ena tabana e 19]

Era marautaka kece na tiko ena soqo na veitarotarogi

[Tikina bibi ena tabana e 20]

E vakalougatataka o Jiova na cakacaka vakavunau e Iciopea