Vuli Vakalou​—iVakaraitaki ni Loloma i Jiova

O JIOVA na noda ‘Qasenivuli Lagilagi.’ (Aisea 30:20) Na loloma e dau uqeti koya me veivakavulici, me veituberi tale ga. Kena ivakaraitaki, na titobu ni nona lomani Jisu o Jiova e uqeti koya me “vakaraitaka vua na ka kece e dau cakava.” (Joni 5:20) O Jiova e lomani keda na nona iVakadinadina, e uqeti koya qori me solia vei keda “na yame sa vakavulici rawa,” nida sasaga tiko meda rokovi koya qai vukei ira eso tale.​—Aisea 50:4.

E vakatotomuria na nona dauloloma o Jiova na Komiti ni Veivakavulici ni iLawalawa Dauvakatulewa, e tuvanaka kina e tini na vuli vakalou mera vakavulici kina o ira era vinakata mera vuli qai rawa nira cakava qori ena kedra ituvaki. Vakacava o raica na vuli qori me ivakaraitaki ni loloma i Jiova?

O na raica ena ulutaga qo na vuli vakalou e vakarautaki ena gauna qo, kei na veika era kaya eso era sa tiko ena vuli qori. Oti qai taroga: ‘Ena yaga vakacava vei au na vuli vakalou?’

ME YAGA VEI IKO NA VULI VAKALOU

Ni “Kalou dauloloma” o Jiova, e vakarautaka na vuli me vakainaki kina na noda bula, meda vosota rawa na veika dredre eda sotava, meda marautaka tale ga vakalevu na noda cakacaka vakaitalatala. (2 Kor. 13:11) Me vakataki ira ga na tisaipeli ena imatai ni senitiuri, eda vakarautaki vinaka tale ga meda vukei ira eso tale, meda “vakavulici ira mera muria na ka kece” eda vakaroti kina.​—Maciu 28:20.

De dua eda na sega ni rawa ni lai vuli ena koronivuli kece qo, ia e rawa ni yaga vei keda e dua se vica vei ira na vuli e tuvanaki. Eda rawa ni muria na ivakavuvuli vakaivolatabu e vakarautaki kina. E rawa tale ga ni laulau cake na noda cakacaka vakaitalatala nida cakacaka vata kei ira na tamata i Jiova era sa vakavulici vinaka.

Qo na ka mo taroga, ‘Ni vakatau ena kequ ituvaki, au na rawa ni tiko ena dua vei ira na vuli qo?’

Era raica na tamata i Jiova me ka dokai na nodra tiko ena vuli totoka qori mera vakavulici kina. Me vakavolekati iko mada ga vua na Kalou na ka o vulica qai vakarautaki iko mo vakayacora na itavi e lesi iko kina, vakabibi na cakacaka e vakatotolotaki tiko nikua, na vunautaki ni itukutuku vinaka.

[Kato/​iYaloyalo ena tabana e 13-17]

IVAKAMACALA NI VULI VAKALOU

Koronivuli ni Vuli Vunau

Kena iNaki: Mera vakavulici na dautukutuku me laulau na nodra vunautaka na itukutuku vinaka kei na nodra veivakavulici.

Kena Dede: Caka tu ga na vuli qo.

Vanua: Vale ni Soqoni.

iVakatagedegede: Ira kece na dau tiko ena soqoni era vakabauta na ivakavuvuli vakaivolatabu, e salavata tale ga na nodra bula kei na ivakavuvuli vaKarisito.

Vei Ira na Via Vuli: Tukuna vua na iVakatawa ni Koronivuli.

O Sharon e paralasi ni tauvi koya na mate e dau vakaleqa na nave ni suitu kei na ruku ni mona e vakatokai na amyotrophic lateral sclerosis (ALS), e kaya: “E vakavulici au na Koronivuli ni Vuli Vuli Vunau meu dau vakadidike, meu tuvana vinaka tale ga na noqu ivakamacala. Au vulica meu kua ni dau nanumi au ga, ia meu kauaitaka tale ga na nodra bula vakayalo eso tale.”

E tukuna o Arnie, e dua sa dede na nona veiqaravi vakaivakatawa dauveilakoyaki: “E dau kaka na noqu vosa niu tubucake tiko, dredre tale ga meu veiraimata kei ira eso tale. Na koronivuli qo e vukei au meu nuidei, meu kila tale ga ni tiko na kequ yaga. E vukei au o Jiova ena vuli qo meu kila na ka meu cakava meu dau cegu vinaka kina, me dei tale ga na noqu vakasama ena ka au cakava. Au vakavinavinakataka vakalevu niu rawa ni vakacaucautaka na Kalou ena ivavakoso kei na noqu cakacaka vakaitalatala.”

Nodra Vuli na Lewenivuvale e Peceli

Kena iNaki: Mera vukei kina na lewenivuvale vou me dei na nodra veiqaravi e Peceli.

Kena Dede: 45 na miniti e veimacawa qai caka qori me va na vula.

Vanua: Peceli.

iVakatagedegede: Mera lewenivuvale tudei se vakadonui mera veivuke e Peceli me dua na yabaki se sivia.

Vei Ira na Via Vuli: Era na vuli na lewenivuvale vou e Peceli.

O Demetrius a tiko ena vuli qo ena veiyabaki ni 1980, e kaya: “Na vuli qo e vakavinakataka na noqu ivakarau ni vuli vakataki au, vakarautaki au tale ga meu veiqaravi vakadede e Peceli. Na ka era tukuna na veivakavulici, na ituvatuva ni vuli e vakarautaki, kei na ivakasala yaga au vulica e vakadeitaka vei au ni dau veikauaitaki o Jiova, e vinakata tale ga meu marautaka na noqu veiqaravi e Peceli.”

E tukuna o Kaitlyn: “Au vukei meu kauaitaka ga na ka e bibi duadua​—meu matua vakayalo. Na vuli qo e vakalevutaka na ka au kila me baleti Jiova, nona vale, kei na nona isoqosoqo, meu doka tale ga vakalevu qori.”

Koronivuli ni Cakacaka Vakaitalatala ni Matanitu

Kena iNaki: Mera vakavulici kina na ivakatawa dauveilakoyaki kei na qase ni ivavakoso, era vuli tale ga ena so na gauna na dauveiqaravi ni ivavakoso. Na vuli qo e vukei ira ena nodra itavi ni veivakatawani kei na itavi era lesi kina ena isoqosoqo. (Caka. 20:28) Ena veivosakitaki kina na ituvaki e sotavi tu nikua, na ivakarau, kei na ka e gadrevi sara tu ga ena ivavakoso. E dau tuvanaka na iLawalawa Dauvakatulewa na vuli, qai dau caka ni oti e vica na yabaki.

Kena Dede: Ena vica na yabaki sa oti, e rua ina rua veimama na siga na nodra vuli na ivakatawa dauveilakoyaki, dua veimama na siga na nodra vuli na qase, qai dua na siga na nodra vuli na dauveiqaravi ni ivavakoso.

Vanua: Levu na gauna ena caka ena Vale ni Soqoni se Assembly Hall.

iVakatagedegede: Me ivakatawa dauveilakoyaki, qase se dauveiqaravi ni ivavakoso.

Vei Ira na Via Vuli: Na ivakatawa ni tabacakacaka ena sureti ira na qase se dauveiqaravi ni ivavakoso. Na valenivolavola ni tabana ena sureti ira na ivakatawa dauveilakoyaki.

“E levu na ka e vulici qai caka qori ena dua ga na gauna lekaleka, ia e vukei ira na qase ni ivavakoso mera marau tiko ga qai ‘yaloqaqa’ ena nodra qaravi Jiova. E bibi mera vulica o ira era se qai lesi ga mera qase kei ira sa dede na nodra qase ni ivavakoso mera veivakatawani vinaka, qai duavata ena ‘inaki.’”​—Quinn (e ra).

“Na vuli qo e veiraurautaka vinaka na veika e vauca na neimami vakabauta, veivakasalataki ena leqa e rawa ni yaco, vakamacalataka tale ga na vakatutu yaga me baleta na nodra qaravi na qelenisipi. Sa yalololoma dina o Jiova me vukei keimami.”​—Michael.

Koronivuli ni Cakacaka Vakapainia

Kena iNaki: Mera vukei na painia mera ‘vakacavara sara na nodra itavi vakaitalatala.’​—2 Tim. 4:5.

Kena Dede: Rua na macawa.

Vanua: Ena lewa na valenivolavola ni tabana; levu na gauna ena caka ena Vale ni Soqoni.

iVakatagedegede: Painia tudei me dua na yabaki se sivia.a

Vei Ira na Via Vuli: Sa dau tuvanaki tu mera vuli na painia kece era rawata na kena ivakatagedegede. Ena qai tukuna ga vei ira na ivakatawa ni tabacakacaka.

E tukuna o Lily (imatau): “Na vuli qo e vukei au vakalevu meu vosota na veika dredre au sotava ena noqu bula kei na cakacaka vakaitalatala. Sa vinaka sara na noqu iwalewale ni vuli, veivakavulici, kei na noqu vakayagataka na iVolatabu. Au sa rawa ni vukei ira vinaka eso tale, tokoni ira na qase ni ivavakoso, meu veivuke tale ga ena toso ni ivavakoso.”

E tukuna o Brenda, sa vakarua na nona tiko ena vuli qo: “Au vukei meu solia na noqu vinaka kece ena noqu sokalou, meu vakayagataka vinaka noqu lewaeloma, meu kauaitaka vakalevu na noqu vukei ira eso tale. Sa yalovinaka dina o Jiova!”

[iVakamacala e ra]

Vuli ni Qase ni iVavakoso

Kena iNaki: Me vukei ira na qase ena nodra qarava na nodra itavi ena ivavakoso, me titobu tale ga na nodra kila na ka e gadrevi ena nodra qaravi Jiova.

Kena Dede: Lima na siga.

Vanua: Ena lewa na valenivolavola ni tabana; levu na gauna ena caka ena Vale ni Soqoni se Assembly Hall.

iVakatagedegede: Me qase ni ivavakoso.

Vei Ira na Via Vuli: Na valenivolavola ni tabana ena sureti ira na qase ni ivavakoso.

Raica mada na ka era tukuna eso era tiko ena ika92 ni kalasi e Merika:

“E yaga vakalevu na vuli, e veiuqeti sara ga meu dikevi au tale, meu raica na sala au rawa ni qarava kina na sipi i Jiova.”

“E vakarautaki au vinaka na vuli, e uqeti au tale ga meu vakayagataka na iVolatabu meu vakayaloqaqataki ira kina eso tale.”

“Au na sega vakadua ni guilecava ena noqu bula taucoko na ka au vulica.”

Nodra Vuli na iVakatawa Dauveilakoyaki kei na Watidra

Kena iNaki: Mera vukei na ivakatawa ni tabacakacaka kei na ivakatawa ni tikina mera vakavinakataka na nodra veisiko ena ivavakoso, mera “gumatua ena nodra tukuna kei na nodra vakavulica na vosa ni Kalou.”​—1 Tim. 5:17; 1 Pita 5:2, 3.

Kena Dede: Rua na vula.

Vanua: Ena lewa na valenivolavola ni tabana.

iVakatagedegede: iVakatawa ni tabacakacaka se ivakatawa ni tikina.

Vei Ira na Via Vuli: Na valenivolavola ni tabana ena sureta na ivakatawa dauveilakoyaki kei na watina.

“Keimami sa qai kila ga e levu na ka me baleta na veiliutaki i Jisu ena isoqosoqo. Keimami raica ni bibi mera vakayaloqaqataki na mataveitacini keimami qarava, me dei tale ga na duavata ena ivavakoso kece. E vakabibitaki tale ga vei keimami ena vuli ni na veivakasalataki se veivakadodonutaki ena so na gauna na ivakatawa dauveilakoyaki, ia e bibi duadua me saga me vukei ira na mataveitacini mera kila ni lomani ira o Jiova.”​—Joel, imatai ni kalasi, 1999.

Koronivuli ni Vuli iVolatabu ni Tagane Dawai

Kena iNaki: Me vukei ira na tagane dawai era qase se dauveiqaravi ni ivavakoso mera qarava eso tale na itavi ena isoqosoqo i Jiova. Ni oti na vuli, levu era na lesi tale ina nodra vanua mera lai veiqaravi ena vanua e gadrevi vakalevu kina na veivuke. Eso era na rairai lesi i vanuatani ke ra vakaraitaka nira rawa ni lai veivuke ena dua tale na vanua. Eso era na painia lavotaki vakalekaleka mera lai tauyavutaka se vakarabailevutaka na cakacaka ena veivanua tu yawa.

Kena Dede: Rua na vula.

Vanua: Ena lewa na valenivolavola ni tabana; levu na gauna ena caka ena Assembly Hall se Vale ni Soqoni.

iVakatagedegede: Tagane dawai bulabula era yabaki 23 ina 62, era vinakata mera lai veiqaravi ena vanua e gadrevi vakalevu kina na veivuke. (Marika 10:29, 30) Me sa bau rua na yabaki na nodra painia tudei, me bau rua na yabaki na nodra qase ni ivavakoso tiko ga se dauveiqaravi.

Vei Ira na Via Vuli: E dau caka na bose ena soqo ni tabacakacaka me vakamacalataki kina na ka me baleta na vuli vei ira era via tiko kina.

E kaya o Rick a vuli ena ika23 ni kalasi mai Merika: “Niu qacoya na vuli qo, e uqeti au sara ga na yalo tabu i Jiova meu veisautaka na ivakarau ni lomaqu. Ni solia vei iko o Jiova e dua na ilesilesi, ena tokoni iko ena ilesilesi qori. Au vulica ni na vakaukauataki au na Kalou keu vakaliuca na lomana, sega ni ka au vinakata.”

E tukuna o Andreas e veiqaravi tiko mai Jamani: “Au vulica ni vaka na cakamana na sala e dusimaka tiko kina nikua na nona isoqosoqo na Kalou. Na ka au vulica e vakarautaki au ena cakacaka ena veigauna se bera mai. Au vulica tale ga ena levu na ivakaraitaki vakaivolatabu na ka dina qo: Ena vakilai na marau dina ena noqu qaravi ira na taciqu kei na noqu qaravi Jiova.”

Koronivuli ni Vuli iVolatabu ni Veiwatini

Kena iNaki: Na vuli qo e baleti ira sara ga na veiwatini, me rawa ni vakayagataki ira vinaka o Jiova kei na nona isoqosoqo. Ni oti na vuli, e levu era na lesi tale ina nodra vanua mera lai veiqaravi ena vanua e gadrevi vakalevu kina na veivuke. Eso era na rairai lesi i vanuatani ke ra tu vakarau mera gole. Eso era na painia lavotaki vakalekaleka mera lai tauyavutaka se vakarabailevutaka na cakacaka ena veivanua tu yawa.

Kena Dede: Rua na vula.

Vanua: E vakayacori na vuli qo e Merika, ena tekivu ena Seviteba, 2012, ena caka tale ga ena so na vanua e digitaki e veiyasa i vuravura e tiko kina na valenivolavola ni tabana, levu na gauna ena caka ena Assembly Hall se Vale ni Soqoni.

iVakatagedegede: Na veiwatini bulabula era yabaki 25 ina 50, era rawa ni lai veiqaravi ena vanua e gadrevi vakalevu kina na veivuke, era rawa tale ga ni tukuna: “Koi au oqo; mo ni talai au.” (Aisea 6:8) E dodonu me bau rua na yabaki na nodra vakawati qai sega ni cegu na nodra veiqaravi vakatabakidua me rua na yabaki. Me bau rua na yabaki na nona qase ni ivavakoso tiko ga se dauveiqaravi o tagane.

Vei Ira na Via Vuli: E dau caka na bose ena soqo ni tikina me vakamacalataki kina na ka me baleta na vuli vei ira era via tiko kina. Ke sega ni dau caka na bose ena soqo ni tikina o qai via tiko ena vuli, o rawa ni volavola ina valenivolavola ni tabana mo kila eso tale na kena ivakamacala.

“E veisau sara ga na bula ena loma ni walu na macawa qai gauna vinaka dina vei ira na veiwatini era via vakalevutaka na ka era cakava ena nodra qaravi Jiova! Keirau vakadeitaka me rawarawa tiko ga na neirau bula me rawa ni keirau vakayagataka vakavuku na neirau gauna.”​—Eric kei Corina (e ra), imatai ni kalasi, 2011.

Koronivuli o Kiliati

Kena iNaki: Mera tuberi o ira era tiko ena vuli mera lai veiqaravi vaka daukaulotu ena vanua lalai e levu na kena lewenivanua, mera ivakatawa dauveilakoyaki se veiqaravi e Peceli. Na inaki ni vuli mera vukei na dautukutuku, na ivavakoso, kei na valenivolavola ni tabana me toroi cake kina na ivakatagedegede ni cakacaka vakaitalatala.

Kena Dede: Lima na vula.

Vanua: Watchtower Educational Center, Patterson, Niu Yoka, Merika.

iVakatagedegede: O ira na veiwatini era sa bau vakaitavi rawa toka ena so na taba ni cakacaka vakaitalatala vakatabakidua​—era daukaulotu, ia era se sega ni tiko ena kena vuli, era painia lavotaki, ivakatawa dauveilakoyaki se veiqaravi e Peceli. Me sega ni cegu na nodra bau vakaitavi toka ena taba ni veiqaravi qori me tolu na yabaki. E dodonu mera kila vinaka na vosa vakavalagi, me vinaka tale ga na nodra wiliwili kei na nodra volavola ena vosa vakavalagi.

Vei Ira na Via Vuli: Na valenivolavola ni tabana ena sureti ira na veiwatini mera vakalewe fomu.

O Lade kei Monique mai Merika erau veiqaravi tiko ena gauna qo e Aferika. E kaya o Lade: “Na Koronivuli o Kiliati e vakarautaki keirau me keirau gole ina yasa i vuravura cava ga, me keirau ogaoga ena itavi keirau na lai qarava, keirau cakacaka vata tale ga kei ira na mataveitacini.”

E tomana o Monique: “Niu bulataka na ka au vulica ena Vosa ni Kalou, au marautaka vakalevu kina na noqu ilesilesi. Au okata na marau ya me dua tale na ivakaraitaki ni loloma i Jiova.”

Nodra Koronivuli na Lewe ni Komiti ni Tabana kei na Watidra

Kena iNaki: Me vukei ira na lewe ni Komiti ni Tabana ena nodra qarava na nodra itavi e Peceli, qaravi ni veika e gadrevi ena ivavakoso, qaravi ni tabacakacaka kei na tikina. Era vulica tale ga na veika e vauca na vakadewa, tabaivola, kei na kena vakau na ivola.

Kena Dede: Rua na vula.

Vanua: Watchtower Educational Center, Patterson, Niu Yoka, Merika.

iVakatagedegede: Me lewe ni Komiti ni Tabana se Komiti ni Vanua, se dua e sa lesi tu me lewe ni komiti qori, ia se bera ni tekivu nona veiqaravi.

Vei Ira na Via Vuli: Na iLawalawa Dauvakatulewa ena sureti ira na veiwatini.

Erau vuli ena ika25 ni kalasi o Lowell kei Cara, erau veiqaravi tiko e Nigeria. E tukuna o Lowell: “Seu mani osooso vakacava se na itavi cava au lesi kina, au vakadreti ena vuli ni bibi meu cakava na ka e vinakata o Jiova meu rawa ni vakamarautaki koya. Keimami vulica tale ga ni bibi me keimami vakatotomuria na nona dau lomani ira na nona tamata o Jiova.”

E tomana o Cara: “Dua na ivakamacala au dau vakasamataka vakatitobu qo: Keu sega ni rawa ni vakamatatataka e dua na ka, ena vinakati meu vulica rawa qori ni bera niu vakavulici ira eso tale.”