O se Vuli Tiko ga Vei Jiova?

1. Na cava na rai i Jiova me baleta na vuli?

¹ Na noda ‘Dauveivakavulici Levu’ o Jiova e vinakata meda vuli. (Aisea 30:20) A tekivu na nona veivakavulici ni bulia oti na Luvena ulumatua. (Joni 8:28) A sega ni mai cegu na nona veivakavulici ni talaidredre o Atama, se vakavulici keda tiko ga na tamata ivalavala ca ni lomani keda.—Aisea 48:17, 18; 2 Tim. 3:14, 15.

2. Na veivakavulici cava e vakayacori tiko nikua?

² E dusimaka tiko nikua o Jiova na veivakavulici levu duadua me bau caka. Me vaka ga a parofisaitaka o Aisea, e milioni vakacaca era sa tabili tiko ina “ulu-ni-vanua ni vale i Jiova.” (Aisea 2:2) Na vuna? Mera vakavulici ena nona ivalavala na Kalou, me vakavulici ira sara ga o Jiova! (Aisea 2:3) Ena yabaki ni cakacaka ni isoqosoqo ena 2010, eda vakayagataka na iVakadinadina i Jiova e sivia na 1.6 na bilioni na aua ena vunau kei na nodra vakavulici eso tale ena ka dina ena iVolatabu. Kena ikuri, e dau caka e veimacawa na veivakavulici vakayalo ena sivia na 105, 000 na ivavakoso e veiyasa i vuravura qai vakarautaka na dauveiqaravi yalodina e vuku na ivola ni vuli ena sivia na 500 na vosa.

3. E yaga vakacava vei iko na vuli vakalou?

³ Yaga na Vuli: Sa yaga vakalevu vei keda na vuli vakalou! Eda kila kina ni tiko na yaca ni Kalou qai kauaitaki keda. (Same 83:18; 1 Pita 5:6, 7) Eda kila na isau ni taro bibi qo: Na cava eda rarawa kina da qai mate? Eda na kunea vakacava na marau dina? Na cava na inaki ni bula? E dusimaki keda tale ga o Jiova ena ka meda cakava me ‘rawa vinaka na noda sasaga.’—Josua 1:8.

4. Na cava eso na vuli era rawa ni tiko kina na dauveiqaravi i Jiova, ena yaga vakacava na noda vuli tiko ga vei Jiova?

⁴ E vakarautaka tale ga o Jiova eso na vuli mera rawa ni vakarabailevutaka kina na nodra veiqaravi e levu na nona tamata. E volai ena tabana e 4-6 na vuli era rawa ni tiko kina eso. Ke da sega ni rawa ni tiko ena vuli va qori ena vuku ni keda ituvaki, vakacava eda vakayagataka vinaka tiko na vuli vakalou e tu vakarawarawa vei keda? Nira dau veivakamuai na qasenivuli kei na so tale mera saga na gone na vuli torocake, eda uqeti ira tiko beka na luveda mera tekia na isausau vakayalo ra qai digia na vuli vinaka duadua, oya na vuli vakalou? Nida vuli tiko ga vei Jiova, eda na marautaka vakalevu na bula ena gauna qo da qai bula tawamudu ena veigauna se bera mai.—Same 119:105; Joni 17:3.

Eso na Vuli e Vakarautaki ena iSoqosoqo i Jiova

Vuli Wilivola kei na Volavola

Kena iNaki: Me vulici kina na wilivola kei na volavola me rawa nira vuli iVolatabu vakataki ira ra qai vakavulica eso tale ena ka dina.
Kena Dede: Vakatau ena ituvaki.
Vanua: Kingdom Hall.
Ira na Rawa ni Vuli: Na dautukutuku kece kei ira na tataleitaki.
Ka me Caka: Ke gadrevi, era na tuvanaka na qase ni ivavakoso na vuli wilivola kei na volavola ra qai veiuqeti mera tiko kina o ira kece e rawa ni yaga vei ira na vuli qo.

Koronivuli ni Vuli Vunau

Kena iNaki: Mera vakavulici na dautukutuku me laulau na nodra vunautaka na itukutuku vinaka kei na nodra veivakavulici.
Kena Dede: Caka tu ga na vuli qo.
Vanua: Kingdom Hall.
Ira na Rawa ni Vakaitavi: Na dautukutuku kece, vaka kina o ira na dau tiko ena soqoni ke ra vakabauta na ivakavuvuli vakaivolatabu, e salavata tale ga na nodra bula kei na ivakavuvuli vaKarisito.
Ka me Caka: Tukuna vua na iVakatawa ni Koronivuli.

Vulici e Dua Tale na Vosa

Kena iNaki: Mera vakavulici na dautukutuku mera vunautaka na itukutuku vinaka ena dua tale na vosa.
Kena Dede: Va se lima na vula. E dua se rua na aua na vuli ena mataka ni Vakarauwai.
Vanua: Levu na gauna ena caka na vuli ena Kingdom Hall.
Ira na Rawa ni Vuli: O ira na dautukutuku ivakaraitaki vinaka era via vunau ena dua tale na vosa.
Ka me Caka: Ena tuvanaka na vuli na valenivolavola ni tabana qai vakatau qori ena ituvaki.

Tara Kingdom Hall

Kena iNaki: Me tara se vakavinakataki na Kingdom Hall. E sega ni dua na kena koronivuli, ia o ira era bole mera veivuke era na vulica na kila vakacakacaka ena yaga ena tara vale.
Kena Dede: Vakatau ena kena ituvaki o koya e bolecakacaka.
Vanua: Yasayasa cava ga e qarava na Komiti ni Taravale ena Duidui Vanua. Era na rairai kerei eso mera veivuke ena cakacaka ni vakacoko ena dua na vanua yawa e yaco kina na leqa tubukoso.
iVakatagedegede: Tagane se yalewa papitaiso, tiko na kila vakacakacaka se sega. Me veivakadonui tale ga na ilawalawa qase.
Ka me Caka: Kerea vei ratou na qase ni ivavakoso qai vakalewena na Kingdom Hall Volunteer Worker Questionnaire (S-82).

Vuli ni Painia

Kena iNaki: Mera vukei na painia mera ‘vakacavara sara na nodra itavi vakaitalatala.’—2 Tim. 4:5.
Kena Dede: Rua na macawa.
Vanua: Ena lewa na valenivolavola ni tabana; levu na gauna ena caka ena Kingdom Hall.
iVakatagedegede: Sa bau painia tudei me dua na yabaki.
Ka me Caka: Sa dau tuvanaki tu mera vuli na painia kece era rawata na kena ivakatagedegede. Ena qai tukuna ga vei ira na ivakatawa ni tabacakacaka.

Nodra Vuli na Lewenivuvale e Peceli

Kena iNaki: Mera vukei kina na lewenivuvale vou me dei na nodra veiqaravi e Peceli.
Kena Dede: Dua na aua e veimacawa qai caka qori me va na vula.
Vanua: Peceli.
iVakatagedegede: Mera lewenivuvale tudei se sa dede nodra veivuke e Peceli (dua na yabaki se sivia).
Ka me Caka: Era na vuli o ira era veiqaravi e Peceli era rawata na kena ivakatagedegede.

Koronivuli ni Cakacaka Vakaitalatala ni Matanitu

Kena iNaki: Mera vakavulici na qase kei na dauveiqaravi ena ivavakoso ena nodra itavi ni veivakatawani kei na itavi era lesi kina ena isoqosoqo. (Caka. 20:28) E dau tuvanaka na iLawalawa Dauvakatulewa na vuli, qai dau caka ni oti e vica na yabaki.
Kena Dede: Ena vica na yabaki sa oti, e dua veimama na siga na nodra vuli na qase qai dua na siga ni nodra vuli na dauveiqaravi ni ivavakoso.
Vanua: Levu na gauna ena caka ena Kingdom Hall se Assembly Hall.
iVakatagedegede: Qase se dauveiqaravi ni ivavakoso.
Ka me Caka: Na ivakatawa ni tabacakacaka ena sureti ira na qase se dauveiqaravi ni ivavakoso era rawata na kena ivakatagedegede.

Vuli ni Qasea

Kena iNaki: Me vukei ira na qase ena nodra qarava na nodra itavi ena ivavakoso.
Kena Dede: Lima na siga.
Vanua: Ena lewa na valenivolavola ni tabana; levu na gauna ena caka ena Kingdom Hall se Assembly Hall.
iVakatagedegede: Qase ni ivavakoso.
Ka me Caka: Na valenivolavola ni tabana ena sureti ira na qase ni ivavakoso era rawata na kena ivakatagedegede.

Nodra Vuli na iVakatawa Dauveilakoyaki kei na Watidrab

Kena iNaki: Mera vukei na ivakatawa ni tabacakacaka kei na ivakatawa ni tikina mera vakavinakataka na nodra veisiko ena ivavakoso, mera “gumatua ena nodra tukuna kei na nodra vakavulica na vosa ni Kalou” ra qai vakatawani ira na qelenisipi.—1 Tim. 5:17; 1 Pita 5:2, 3.
Kena Dede: Rua na vula.
Vanua: Ena lewa na valenivolavola ni tabana.
iVakatagedegede: iVakatawa ni tabacakacaka se ivakatawa ni tikina.
Ka me Caka: Na valenivolavola ni tabana ena sureta na ivakatawa dauveilakoyaki kei na watina erau rawata na kena ivakatagedegede.

Koronivuli ni Vuli iVolatabu ni Tagane Dawaic

Kena iNaki: Me vukei ira na tagane dawai era qase se dauveiqaravi ni ivavakoso mera qarava eso tale na itavi. Ni oti na vuli, levu era na lesi tale ina nodra vanua mera lai veiqaravi ena vanua e gadrevi vakalevu kina na veivuke. Eso era na rairai lesi i vanuatani ke ra vakaraitaka ina valenivolavola ni tabana nira rawa ni lai veivuke ena dua tale na vanua.
Kena Dede: Rua na vula.
Vanua: Ena lewa na valenivolavola ni tabana; levu na gauna ena caka ena Assembly Hall se Kingdom Hall.
iVakatagedegede: Tagane dawai bulabula era yabaki 23 ina 62, era vinakata mera vukei ira na tacidra vakayalo vaka kina na vakatetei ni itukutuku vinaka ena vanua e gadrevi kina na veivuke. (Mari. 10:29, 30) Me dua e qase ni ivavakoso tiko ga se dauveiqaravi me rua na yabaki se sivia.
Ka me Caka: Ke dau caka na vuli qo ena nomu vanua, na nodra bose na via tiko kina e dau vakayacori ena soqo ni tabacakacaka. Ena vakamacalataki kina eso tale na ka me baleta na vuli qo.

Koronivuli ni Vuli iVolatabu ni Veiwatinid

Kena iNaki: Na vuli qo e baleti ira sara ga na veiwatini, me rawa ni vakayagataki ira vinaka o Jiova kei na nona isoqosoqo. Ni oti na vuli, e levu era na lesi tale ina nodra vanua mera lai veiqaravi ena vanua e gadrevi vakalevu kina na veivuke. Eso era na rairai lesi i vanuatani ke ra vakaraitaka ina valenivolavola ni tabana nira rawa ni lai veivuke ena dua tale na vanua.
Kena Dede: Rua na vula.
Vanua: Na imatai ni vica na vuli ena vakayacori ena Watchtower Educational Center e Patterson, Niu Yoka, Merika. Ena qai lewa na valenivolavola ni tabana na vanua me vakayacori tale kina na vuli, levu na gauna ena caka ena Assembly Hall se Kingdom Hall.
iVakatagedegede: Na veiwatini bulabula era yabaki 25 ina 50, era rawa ni lai veiqaravi ena vanua e gadrevi vakalevu kina na veivuke, era rawa tale ga ni tukuna: “Koi au oqo; mo ni talai au.” (Aisea 6:8) E dodonu me bau rua na yabaki na nodra vakawati qai sega ni cegu na nodra veiqaravi vakatabakidua me rua na yabaki.
Ka me Caka: Ke dau caka na vuli qo ena nomu vanua, na nodra bose na via tiko kina e dau vakayacori ena soqo siga dua. Ena vakamacalataki kina eso tale na ka me baleta na vuli qo.

Koronivuli o Kiliati

Kena iNaki: Mera vakavulici na painia kei na so tale era veiqaravi vakatabakidua mera daukaulotu.
Kena Dede: Lima na vula.
Vanua: Watchtower Educational Center, Patterson, Niu Yoka, Merika.
iVakatagedegede: O ira na veiwatini e sa tolu na yabaki nodra papitaiso ra qai yabaki 21 ina 38 ena gauna era se qai solia kina nodra fomu. E dodonu mera kila na vosa vakavalagi, me bau rua na yabaki na nodra vakawati qai sega ni cegu na nodra veiqaravi vakatabakidua me rua na yabaki. Mera bulabula vinaka o ira na via vuli. Ke ra rawata na kena ivakatagedegede, era rawa ni kerea tale ga mera lai vuli o ira na painia era veiqaravi e vanuatani (wili kina o ira na daukaulotu); ivakatawa dauveilakoyaki, lewenivuvale e Peceli; kei ira sa vuli oti ena Koronivuli ni Vuli Veiqaravi Vakaitalatala, Koronivuli ni Vuli iVolatabu ni Tagane Dawai, kei na Koronivuli ni Vuli iVolatabu ni Veiwatini.
Ka me Caka: Ena so na valenivolavola ni tabana, na nodra bose o ira na via vuli e dau vakayacori ena soqo ni tikina. Ena vakamacalataki kina eso tale na ka me baleta na vuli qo. Ke sega ni dau caka na bose ena soqo ni tikina ena nomu vanua o qai via tiko ena vuli, o rawa ni volavola ina valenivolavola ni tabana mo kila kina eso tale na kena ivakamacala.

Nodra Koronivuli na Lewe ni Komiti ni Tabana kei na Watidra

Kena iNaki: Me vukei ira na lewe ni Komiti ni Tabana mera vakavinakataka na nodra itavi e Peceli, qaravi ni ivavakoso, qaravi ni tabacakacaka kei na tikina ena nodra dui yalava, vaka kina na vakadewa, tabaivola, kena vakau na ivola, kei na qaravi ni tabana tale eso.—Luke 12:48b.
Kena Dede: Rua na vula.
Vanua: Watchtower Educational Center, Patterson, Niu Yoka, Merika.
iVakatagedegede: Lewe ni Komiti ni Tabana se Komiti ni Vanua, se na qai lesi me lewe ni komiti qori ni sa oti na vuli.
Ka me Caka: Na iLawalawa Dauvakatulewa ena sureti ira na veiwatini era rawata na kena ivakatagedegede.

a E sega ni vakayacori nikua na vuli qo ena vanua kece.

b E sega ni vakayacori nikua na vuli qo ena vanua kece.

c E sega ni vakayacori nikua na vuli qo ena vanua kece.

d E sega ni vakayacori nikua na vuli qo ena vanua kece.