Vuna e Yaco Tiko Kina
Sa lewa kina na tamata vua na tamata tani ka sa mani ca kina.”—DAUVUNAU 8:9.
NA TIKINIVOLATABU qori e vakamacalataka vinaka sara ga na ivakarau ni veiliutaki vakatamata. E vakavuna sara tiko ga e levu na rarawa kei na veivakalolomataki. Era saga e veiyabaki na tamata vinaka me vakilai e vuravura na lewadodonu, ia era dau rawai tale ena kocokoco kei na veidabui. Na cava e va kina ya? Na cava e sega ni oti kina na cakacaka vakailawaki? Ena saumi qori ena tolu na ka e dau veivakamuai vakalevu. Dikeva mada qo.
1. Na veivakamuai ni ivalavala ca.
E tukuna vakamatata na iVolatabu nida “vauci kece . . ena ivau ni ivalavala ca.” (Roma 3:9) Na ivalavala ca e vaka ga e dua na mate ni kawa e sega na kena iwali, e “tiko” sara ga vei keda. E “veiliutaki” voli mai me vica vata na udolu na yabaki me vaka e dua na tui. Na kena “lawa” e cakacaka tiko e yagoda ena veigauna kece. Na gagadre vakayago e uqeta e levu mera vakaliuca na ka e baleti ira se na nodra vakaliuca na qarai ni iyau ra qai vakayagataka na nodra lewa mera rawaka kina, ia era vakaloloma kina eso tale.—Roma 5:21; 7:17, 20, 23, 25.
2. Na veivakamuai ni vuravura ca qo.
E kilai tu na noda vuravura ena kocokoco kei na yalo ni dui nanumi koya ga. Ena ituvaki va qori, e dredre kina vei ira eso mera duatani mai vei ira na kena vo. Ena nodra via vaqara rogo, era vinakata kina mera veiliutaki. Era vinakata tale ga vakalevu na ilavo kei na iyau—e sivia tale mai na ka era gadreva dina. Ia e ka ni rarawa nira bolea mera cakacaka vakailawaki me rawa nira rawata kina na ka era vinakata. Era sa sega ni via vorata na veivakamuai cala, ia era via ‘muri ira ga na lewe vuqa mera caka ca.’—Lako Yani 23:2.
3. Nona veivakamuai o Setani na Tevoro.
O Setani, na ka bula vakayalo talaidredre, “e vakacala tiko na vuravura taucoko.” (Vakatakila 12:9) E dau taleitaka me vakamuai keda na tamata. Ena rawa ni uqeta vaqaseqase e dua me vinakata na tiko vinaka vakayago se me levu na nona ilavo, lai yaco sara me cakacaka vakailawaki.
Kena ibalebale beka qori ni lewai keda tu o Setani—oya nida na talairawarawa vua ena gauna e vakamuai keda kina? Ena saumi qori ena ulutaga e tarava.
[iYaloyalo ena tabana e 4]