Cakacaka Vakailawaki ena Oti!

Waraki Jiova, ka muria na nona sala . . . Ni ra sa muduki tani na tamata ca, ko na raica.”​—SAME 37:34.

VAKACAVA o duavata kei ira e levu ena kena lomaleqataki ni na sega ni tarovi rawa na cakacaka vakailawaki, ena sega tale ga ni oti vakadua? Ke vaka kina, e sega ni cala na rai qori. Ena veigauna sa oti, era saga na tamata e levu na mataqali veiliutaki. Ia era sega vakadua ni walia na cakacaka vakailawaki. Vakacava ena yaco na gauna era na sega kina ni veidabui na tamata kece?

E ka ni marau ni tukuna na iVolatabu ni na yaco dina qori! E tukuna vei keda ni sa voleka na gauna me na yavala kina na Kalou me vakaotia vakadua na cakacaka vakailawaki ena vuravura qo. Ena cakava vakacava qori? Ena vakayagataka na nona Matanitu, qori na matanitu vakalomalagi ena veisautaka vakadua na vuravura. Qo na Matanitu vata ga a vakavulica o Jisu vei ratou na nona imuri me ratou masuta. E dau vakatokai me Masu ni Turaga, e tukuna kina o Jisu: “Me yaco mai na nomuni matanitu. Me caka na lomamuni e vuravura.”​—Maciu 6:10.

E parofisaitaka na iVolatabu me baleti koya na iLiuliu ni Matanitu ni Kalou, o Jisu Karisito: “Ni na vakabula ko koya na dravudravua ni sa tagi; kei koya sa vakararawataki ka sa sega e dua me vukei koya. Ena lomana ko koya na tamata malumalumu ka dravudravua, ka vakabula na yalodra na dravudravua. Ena vakabula na yalodra mai na lawaki kei nai valavala kaukauwa.” (Same 72:12-14) Eda raica rawa e keri ni o Jisu e nanumi ira na lawakitaki, ena cakava tale ga e dua na ka me muduka kina na veivakalolomataki! E sa bau veivakacegui dina oya, se vakaevei?

Ni sa na veiliutaki na iLiuliu ni Matanitu ni Kalou e kaukaua qai dauveinanumi, ena vakaotia vakadua na cakacaka vakailawaki ena noda vuravura. Ena sala cava? Ena nona vakaotia e tolu na ka e vakavuna tiko na cakacaka vakailawaki.

Na Veivakamuai ni iValavala Ca

Ena gauna qo e bibi meda vorata kece na gagadre ni yagoda ivalavala ca, ni dau uqeti keda qori meda nanumi keda ga. (Roma 7:21-23) Ia e se tiko eso na tamata vinaka era dau via cakava na ka dodonu. Era vakabauta na yaga ni ivoli ni dra i Jisu, e vosoti kina na nodra ivalavala ca.a (1 Joni 1:7, 9) O ira qori era vakila na yaga ni nona loloma levu na Kalou me vaka e tukuni tiko ena Joni 3:16: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa o ira era vakabauti koya, mera rawata ga na bula tawamudu.”

Ena cakava na Kalou e dua na ka totoka vei ira na tamata yalodina. Ena vuravura vou sa roro tiko mai, ena kauta laivi kina na Kalou na ivalavala ca, era na vakavulici tiko vakamalua na tamata yalodina mera uasivi, mera yalododonu tale ga vua. (Aisea 26:9; 2 Pita 3:13) Ena sega tale ni veivakamuai tiko na ivalavala ca me cakacaka vakailawaki kina e dua. Ena ruku ni veiliutaki ni Matanitu ni Kalou, o ira na tamata yalodina era na sereki mai na nodra bobula tu ina cakacaka vakailawaki.

Na Veivakamuai ni Vuravura ca Qo

E ka ni rarawa ni levu era dau nakita na nodra dauvakalolomataki ira eso tale. Era dau vakasaurarataki ira na vakaloloma kei ira na dravudravua, ra qai dau uqeti ira eso tale mera cakacaka vakailawaki. Na iVolatabu e vakasalataki ira na tamata va qori: “Me biuta mada na nonai tovo na tamata ca, kei na nona vakanananu na tamata daucaka cala.” Ke ra veivutuni o ira na dauveidabui, e yalataka na iVolatabu ni na ‘veivosoti vakalevu’ na Kalou.​—Aisea 55:7.

Ia na Kalou ena vakarusai ira sara ga era sega ni via veisautaka na nodra ivakarau ni bula. Na Matanitu ni Kalou ena vakayacora na ka e yalataka na iVolatabu: “Waraki Jiova, ka muria na nona sala . . . Ni ra sa muduki tani na tamata ca, ko na raica.”b (Same 37:34) Ni sa yali na veika ca a nanumi tu ni na sega ni oti rawa, era na sega tale ni vakaleqai ena cakacaka vakailawaki o ira na dausokalou ena yalodina.

Veivakamuai i Setani na Tevoro

O Setani na Tevoro e levu duadua na nona dau caka ca. Eda marautaka dina ni sa voleka na gauna ena vesuki Setani kina o Jiova, me kua ni vakamuai keda na tamata, oti sa na qai vakarusai koya vakadua. Ena sega tale vakadua ni vakamuai ira na tamata na gata rerevaki qori mera cakacaka vakailawaki.

Ia de dua ena nanumi ni ka ni tatadra wale ga na nona vakaotia vakadua na Kalou na cakacaka vakailawaki. De dua o na veinanuyaka, ‘E tiko dina vua na Kalou na kaukaua me kauta mai na veisau qori? Ke vaka kina, na cava ga e sega ni se cakava makawa kina?’ Qori era taro vinaka dina, era tu tale ga ena iVolatabu na kedra isau e veivakacegui.c O ni sureti moni vakadinadinataka sara ga na ka e vakavuvulitaka na iVolatabu me baleta na gauna se bera mai, ni na oti kina vakadua na cakacaka vakailawaki.

[iVakamacala e ra]

[iYaloyalo ena tabana e 7]