Yaloqaqa ni O Sotava na Veika Dredre Nikua

“A nodai drodro kei na noda kaukauwa na Kalou, sa voleka sara me vukei keda ni da sa rarawa.”​—SAME 46:1.

O RAWA NI SAUMA?

Na cava meda cakava meda kua kina ni yalolailai nida sotava na veika dredre?

Na cava meda yaloqaqa kina?

Na sala cava e vakarautaka o Jiova me vukei keda meda vosota na veika dredre?

1, 2. Na veika dredre cava era sotava e levu, ia na cava eda vinakata?

EDA bula tu qo ena dua na gauna dredre. Sa sega ni caka rawa na leqa e yaco tu e vuravura. E vakaleqa na bula ni kawatamata na uneune, ualoka, kama ni veikau, waluvu, volukano, covulaca, kei na cagilaba. Na leqa tale ga e sotavi vakavuvale se sotavi yadudua e dau vakavuna na rarawa kei na lomaleqa. Sa rauta me tukuni nida dau sotava kece na ‘ka e sega ni namaki ena gauna e tawanamaki.’​—Dauv. 9:11.

2 Era vosota rawa tiko na tamata ni Kalou na veika dredre era sotava. Ia eda vinakata meda vakarautaki keda ena veika dredre cava ga eda na rairai sotava ena veigauna se bera mai ni voleka ni cava na ituvaki qo. Na cava meda cakava meda vosota kina na veika dredre, meda kua tale ga ni yalolailai? Eda na yaloqaqa vakacava nida sotava na veika dredre nikua?

VULI VEI IRA ERA YALOQAQA

3. Na cava e tukuna na Roma 15:4 e rawa ni vakacegui keda nida sotava na veika dredre?

3 E levu era sotava na veika dredre nikua ni laurai vata kei na veigauna sa oti, ia e sega ni ka vou vei keda na tamata na leqa. Meda raica mada na veika eda rawa ni vulica vei ira na tamata ni Kalou ena veigauna sa oti, era yaloqaqa nira sotava na veika dredre.​—Roma 15:4.

4. Na veika dredre cava a vosota o Tevita, na cava a vukei koya?

4 Vakasamataka mada eso na ka e sotava o Tevita, a katakatataki koya e dua na tui, era ravuti koya eso na meca qai kau vakavesu na watina, nodra liumuri eso na nona itokani kei na nona vuvale, e dau lomabibi tale ga ena so na gauna. (1 Sam. 18:8, 9; 30:1-5; 2 Sam. 17:1-3; 24:15, 17; Same 38:4-8) E laurai ena ka e tukuna na iVolatabu me baleta na bula i Tevita ni vakararawataki koya sara ga na leqa e sotava, ia e kaukaua tiko ga vakayalo. E dei na nona vakabauta, qai kaya: “A kaukauwa ni noqu bula ko Jiova; me’u taqaya e na vuku i cei?”​—Same 27:1; wilika Same 27:5, 10.

5. Erau vosota vakacava o Eparama kei Sera na veika dredre erau sotava?

5 Ena levu na gauna erau vakaitikotiko voli ga ena valelaca o Eparama kei Sera ena vanua erau vulagi kina. Erau sotava tale ga na veika dredre. Ni yaco na dausiga ra qai vakarerei rau na veimatanitu era tiko voleka, erau vakadeitaka me rau vosota tiko ga. Ia erau yaloqaqa rau qai vosota na ka kece qori. (Vkte. 12:10; 14:14-16) Erau cakava rawa vakacava qori? E tukuna vei keda na Vosa ni Kalou ni o Eparama “a waraka tiko na koro e dei na kena yavu, na koro e tara e cakava na Kalou.” (Iper. 11:8-10) E sega ni vakayalolailaitaki Eparama kei Sera na veika e yaco wavoliti rau tu e vuravura, ia e coba dei tiko ga ena nodrau vakasama na veika e yalataka vei rau na Kalou.

6. Eda rawa vakacava ni vakatotomuri Jope?

6 A sotava e levu na ka mosimosi o Jope. Vakasamataka mada na ka e vakila ena gauna e nanuma kina ni sa ca kece ga na veika e sotava. (Jope 3:3, 11) Sa qai ikuri ga ni leqa na nona sega ni kila vinaka na vuna e sotava kina na veika qori. Ia e sega ni soro, a yalodina qai vakabauta tiko ga na Kalou. (Wilika Jope 27:5.) Dua dina na ivakaraitaki totoka meda vakatotomuria!

7. Na cava e sotava o Paula ena nona qarava na Kalou, ia e rawa vakacava ni yaloqaqa tiko ga?

7 Vakasamataka tale ga na nona ivakaraitaki na yapositolo o Paula. A sotava na ‘leqa ena koro lelevu, ena veikau, e wasawasa tale ga.’ A tukuna ni ‘waloloi, karamaca, liliwa qai luvawale.’ E tukuna tale ga o Paula ni ‘bogi dua siga dua e wasawasa,’ a rairai yaco qori ena dua na gauna a voca kina na waqa a vodo tiko kina. (2 Kor. 11:23-27) Qori na ka kece e sotava o Paula, ia raica mada na ka e tukuna ni voleka ni mate: “Me keitou kua ni nuitaki keitou ga, me keitou nuitaka ga na Kalou e dau vakaturi ira na mate. E vakabulai keitou gona ena ituvaki rerevaki ya, keitou kila ni na vakabulai keitou tale.” (2 Kor. 1:8-10) E sega ni levu sara era sotava na ituvaki rerevaki a sotava o Paula. Ia e levu vei keda eda na rairai vakila na ka vata ga a vakila o Paula, e rawa gona nida vuli mai na nona ivakaraitaki ni yaloqaqa.

KUA NI YALOLAILAI NI YACO NA LEQA

8. Na cava e rawa ni yacovi keda nida sotava na leqa nikua? Tukuna e dua na ivakaraitaki.

8 E levu era yalolailai ni sa qai levu ga na leqa tubukoso, na veika dredre, kei na so tale na ituvaki rarawataki e yaco tu e vuravura nikua. Eso mada ga na lotu vaKarisito era vakila qori. Erau marautaka tiko na nodrau veiqaravi vakatabakidua mai Ositerelia o Lania kei na watina ena gauna e kilai kina ni tauvi koya na kenisa ni sucu, e kidacala qai rarawa sara ga. E kaya: “E vakamalumalumutaki au vakalevu na veiqaravi e caka vei au, au sa nanuma ga sa sega na kequ yaga.” Ena gauna tale ga qori, a vinakati vei Lani me qaravi watina ni sele oti na nona suitu. Na cava eda rawa ni cakava nida sotava na ituvaki va qori?

9, 10. (a) Na cava meda kua ni vakalaiva me cakava vei keda o Setani? (b) Na rai cava me tiko vei keda me rawa nida vosota na ituvaki rarawa e tukuni ena Cakacaka 14:22?

9 E vinaka meda nanuma tiko ni via vakayagataka o Setani na ituvaki rarawa eda sotava me vakamalumalumutaka na noda vakabauta. Ia meda kua ni vakalaiva me cakava qori vei keda o Setani me vakaseavutaka kina na noda marau. E kaya na Vosa Vakaibalebale 24:10: “Kevaka ko sa gu ca e na siga ni rarawa, sa lailai na nomu kaukauwa.” Na noda vakasamataka vakatitobu na ivakaraitaki vakaivolatabu, me vaka na kena sa veivosakitaki oti mai, ena rawa ni vakayaloqaqataki keda nida sotava na ituvaki dredre.

10 E vinaka meda nanuma tale ga nida sega ni rawa ni kauta laivi kece na leqa. Meda namaka ga nida na sotava na veika qori. (2 Tim. 3:12) E tukuna vei keda na Cakacaka 14:22: “Eda na vakararawataki mada vakalevu, eda na qai curu ina matanitu ni Kalou.” Me kua ni vakayalolailaitaki iko na veika rarawa o sotava, mo raica ga qori me sala o rawa ni vakaraitaka kina na yaloqaqa, ni o vakabauta ena rawa ni vukei iko na Kalou.

11. Na cava meda cakava meda kua kina ni yalolailai nida sotava na veika dredre?

11 E bibi meda dau vakasamataka na veika vinaka. E tukuna na Vosa ni Kalou: “Ni sa marau na loma ni tamata, sa vinaka kina na matana: Ia ni sa rarawa na lomana, sa ramusu kina na yalona.” (Vkai. 15:13) Era sa kila tu mai vakadede na vuniwai ni rawa ni bula vinaka e dua na tauvimate ke dau vakasamataka na veika vinaka. Era bula vinaka e levu na tauvimate nira gunuva na vuanikau era nanuma ni na vukei ira, dina ga ni sega ni wainimate dina ni kedra mate na vuanikau qori. Ia e dua tale na ka era dikeva na vuniwai, oya ni dau ikuri tale ni tauvimate vei ira eso ni tukuni vei ira ni na vakaleqai ira na vuanikau era gunuva. Na noda vakasamataka tiko ga na ituvaki eda sega ni rawa ni veisautaka ena rawa ni vakayalolailaitaki keda ga. Eda kalougata ni solia vei keda o Jiova na wainimate dina. Nida sotava mada ga na leqa, e dau vukei keda dina o Jiova ni vakayaloqaqataki keda ena nona Vosa, e vakayagataki ira na mataveitacini mera tokoni keda, qai vakaukauataki keda ena yalona tabu. Na noda vakasamataka tiko ga na veika qori ena vakamarautaki keda vakalevu. Meda kua ni vakasamataka tiko ga na veika ca e yaco ena noda bula, ia meda cakava na ka eda rawata meda vosota kina na leqa kece eda sotava qai vakasamataka ga na veika vinaka eda marautaka tu ena noda bula.​—Vkai. 17:22.

12, 13. (a) Era vosota vakacava na tamata ni Kalou na veika era sotava ena gauna ni leqa tubukoso? Tukuna e dua na ivakaraitaki. (b) Ena gauna e yaco kina na leqa tubukoso, ena kilai vakacava na ka e bibi duadua ena noda bula?

12 Ena dua na gauna lekaleka sa oti, e vakacaca vakalevu ena so na vanua na leqa tubukoso. E vakasakiti dina na nodra vosota e levu na tacida ena vanua va qori, dina ga ni sega ni rawarawa vei ira. A kurei Chile ena Feperueri, 2010, e dua na uneune levu qai cabe na ualoka, e levu na tacida e vakacacani na nodra vale, na nodra iyau, eso e vakaleqai sara ga na nodra ivurevure ni ilavo. Ia era kaukaua tu ga vakayalo na mataveitacini. E tukuna o Samuel, a kasura na nona vale: “Ena gauna dredre ya, keirau gole tiko ga vakaveiwatini ina soqoni kei na cakacaka vakavunau. Au vakabauta na neirau dau cakava qori, keirau sega kina ni lomaleqa vakalevu.” Me vakataki ira ga na levu tale na mataveitacini, erau sega ni vakasamataka tiko ga na leqa tubukoso a yaco, rau qai qaravi Jiova tiko ga.

13 Ena Seviteba 2009, a luvu e dua na iwase levu ni siti o Manila ena yatu Filipaini ena taubi ni uca. E kaya e dua na turaga vutuniyau a vakacacani e levu na ka e taukena: “E tarai keimami kece na waluvu, keimami sotava kece na veika dredre kei na rarawa na vutuniyau kei na dravudravua.” Qori eda lai nanuma kina na ivakasala vuku i Jisu: “Kumuna na nomu iyau mai lomalagi, ni sega ni rawa ni vakacacana na sarasara kei na veveka, ra sega tale ga ni butakoca na daubutako.” (Maciu 6:20) Na iyau vakayago ena sega ni dei, o koya gona e vakaliuca na veika qori ena rarawa ga. E ka vakayalomatua meda vakaliuca na noda veiwekani kei Jiova, qori na ka ena dei tu ga se mani cava e yaco wavoliti keda!​—Wilika Iperiu 13:5, 6.

BIBI NA YALOQAQA

14. Na cava meda yaloqaqa kina?

14 A tukuna o Jisu ni na sotavi na leqa ena gauna e sa tiko kina, ia e kaya tale: “Dou kua ni domobula.” (Luke 21:9) E noda Tui o Jisu qai tokoni keda tiko na Dauveibuli ni lomalagi kei vuravura. E dodonu gona meda yaloqaqa. A vakayaloqaqataki Timoci o Paula ena nona kaya: “[E] sega ni solia vei keda na Kalou na yalodatuvu, ia e solia na yaloqaqa, na yalololoma, kei na yalomatua.”​—2 Tim. 1:7.

15. Tukuna eso na ivakaraitaki ni ka era tukuna ena nuidei na tamata ni Kalou, vakamacalataka tale ga na sala eda rawa ni yaloqaqa kina me vakataki ira.

15 Raica mada na ka era tukuna ena nuidei eso na tamata ni Kalou. A kaya o Tevita: “A noqu kaukauwa kei na noqui sasabai ko Jiova; sa vakararavi vua na yaloqu, ka sa vukei au mai; ka sa reki vakalevu kina na yaloqu.” (Same 28:7) A kaya ena nuidei o Paula: “Eda qaqa ga ena ka kece qo ena vuku i koya e lomani keda.” (Roma 8:37) Ni vakarau vesu qai vakamatei o Jisu, a vakadeitaka vei ira era rogoci koya ni dei na nona veiwekani kei na Kalou ena nona kaya: “Au sega ni tiko duadua ni tiko vata kei au o Tamaqu.” (Joni 16:32) Na cava eratou vakaraitaka o Tevita, Paula kei Jisu ena ka eratou tukuna? Eratou nuitaki Jiova kece vakatabakidua. Ke da saga meda nuitaka tale ga va qori na Kalou, eda na yaloqaqa nida sotava na ituvaki dredre cava ga nikua.​—Wilika Same 46:1-3.

SALA MO YALOQAQA TIKO GA KINA

16. Na cava e bibi kina meda vulica na Vosa ni Kalou?

16 Na noda yaloqaqa na lotu vaKarisito e sega ni kena ibalebale meda nuitaki keda ga. Ia e rawa ga nida yaloqaqa ena noda kila na Kalou kei na noda nuitaki koya. Eda rawa ni cakava qori ena noda vulica na nona Vosa volai na iVolatabu. E tukuna e dua na yalewa lotu vaKarisito me baleta na ka e vukei koya ena nona lomabibi: “Au dau wilika vakavica vata na tikinivolatabu e veivakacegui.” Vakacava eda sa muria tiko na veidusimaki ni dauveiqaravi yalodina e vuku me wasoma na noda sokalou vakavuvale? Na noda cakava qori ena vukei keda meda vakatotomuria na nona rai na daunisame, a tukuna: “A ka vakaidina na noqu loloma ki na nomuni vunau! Au sa vakanananu kina e na siga taucoko ka bogi.”​—Same 119:97.

17. (a) Na cava e dua tale na sala ena rawa ni vukei keda meda yalodina tiko ga? (b) Tukuna e dua na italanoa e tabaki ena noda ivola a vukei iko.

17 Na veika tale ga e vakamacalataki ena noda ivola vakaivolatabu ena vakayaloqaqataki keda meda nuitaki Jiova. E levu na mataveitacini era raica ni yaga vakalevu na italanoa era dau tabaki ena noda mekesini. E dua na tacida yalewa mai Esia e tauvi koya na bipolar mood disorder (veilecayaki vakalevu na lomana), e marau sara ga ni wilika na kena italanoa e dua na tacida tagane a daukaulotu tu e liu qai tauvi koya na mate qori, ia e vosota rawa. A vola na tacida yalewa: “E vukei au meu kila vinaka na leqa au sotava tiko, e vakacegui au tale ga.”

18. Na cava meda dau vakayagataka kina na isolisoli ni masu?

18 E rawa ni vukei keda na masu ena ituvaki kece eda sotava. A vakamacalataka na yapositolo o Paula na bibi ni masu ena nona kaya: “Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere salavata kei na vakavinavinaka; ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece, ena vuku i Karisito Jisu.” (Fpai. 4:6, 7) Vakacava eda dau vakayagataka vinaka na isolisoli qori me vukei keda meda vosota na veika dredre eda sotava? A tukuna o Alex e dua na tacida tagane mai Peritania a lomabibi tu ena dua na gauna balavu: “E vukei au vakalevu na noqu dau vosa vei Jiova ena masu kei na noqu dau vakarogoci koya niu wilika na nona Vosa.”

19. Meda raica vakacava na noda tiko ena soqoni?

19 Dua tale na sala bibi e vukei keda kina o Jiova, na noda veimaliwai ena soqoni. A vola e dua na daunisame: “Sa guta vakalevu na yaloqu, ia sa mate e na via tiko e na lomanibai i Jiova.” (Same 84:2) E dau va tale ga qori na noda rai? O Lani sa cavuti oti mai, e tukuna me baleta na nona dau veimaliwai kei ira na lotu vaKarisito ena soqoni: “E sega tale ni gadrevi meu vakatulewataka meu lako ina soqoni se sega. Au kila ga ni dodonu meu tiko kina keu vinakata me vukei au o Jiova meu vosota.”

20. Ena vukei keda vakacava na noda vakaitavi ena cakacaka vakavunau?

20 Eda yaloqaqa tale ga nida ogaoga tiko ga ena cakacaka vakavunau. (1 Tim. 4:16) E tukuna e dua na yalewa lotu vaKarisito mai Ositerelia e sotava e levu na leqa: “Na iotioti sara ga ni ka au via cakava na vunau, ia a sureti au e dua na qase ni ivavakoso meu tomani koya. Au mani lako. E rairai vukei au tiko o Jiova, niu dau marau vakalevu ena gauna kece au vakaitavi kina ena cakacaka vakaitalatala.” (Vkai. 16:20) E levu era raica ni vakaukauataki na nodra vakabauta nira vukei ira eso tale me dei na nodra vakabauti Jiova. Nira cakava qori, era sega ni vakasamataka kina na nodra leqa ra qai vakasamataka ga na veika e bibi sara.​—Fpai. 1:10, 11.

21. Na cava meda vakadeitaka nida sotava na veika dredre nikua?

21 E levu sara na sala e vakarautaka o Jiova meda vakayaloqaqataki kina meda vosota na veika dredre eda sotava nikua. Ke da vakayagataka kece qori, ke da vakasamataka vakatitobu qai vakatotomuria na nodra ivakaraitaki vinaka ni yaloqaqa na tamata ni Kalou, eda rawa ni vakadeitaka nida na vosota na veika dredre eda sotava. E levu tale na leqa eda na rairai sotava ni voleka ni cava na ituvaki ca qo, ia me vakataki Paula eda rawa tale ga ni tukuna: ‘Keitou vakabalei, keitou sega ga ni vakarusai, keitou sega ni soro.’ (2 Kor. 4:9, 16) Ena veivuke i Jiova, eda rawa ni yaloqaqa nida sotava na veika dredre nikua.​—Wilika 2 Korinica 4:17, 18.

[iVakamacala e ra]

[iYaloyalo ena tabana e 7]

[iYaloyalo ena tabana e 10, 11]

Nida sotava na veika dredre, vakayagataka na sala e vakarautaka o Jiova meda vukei kina