Marautaka na Soli iLoloma

Vuna era solevutaka kina eso na Kirisimasi.

Me vaka a kaya o Jisu, ena marau o koya e solia na ka kei koya e taura na ka. Me vakilai na marau qori, era raica e levu me ka bibi duadua ena Kirisimasi na soli iloloma. Kena ivakaraitaki, e laurai ena dua na vakadidike mai Ailadi ena gauna mada ga e yaco kina na leqa vakailavo ena yabaki sa oti, era vakayagataka na itaukeinivale e rauta ni 660 na dola na ilavo ni Merika mera voli iloloma ni siganisucu.

Na cava e dredre kina me caka qori?

E levu era nanuma ni soli iloloma ni siganisucu e sega ni vakilai vakalevu kina na marau, e vakavu lomaocaoca ga. Ena sala cava? Era nanuma e levu na dauvolivoli nira vakasaurarataki mera volia na iloloma saulevu era sega ni ceguva rawa. Ni levu era dau voli iloloma ena gauna qori, e dau votivoti vei ira e levu na osodrigi ni tamata kei na balavu ni laini ena sitoa.

Na ivakavuvuli vakaivolatabu cava e rawa ni vukei iko?

A tukuna o Jisu: “Moni dau soli ka.” (Luke 6:38) A sega ni tukuna o koya me dua ga na gauna lokuci e veiyabaki mera qai soli iloloma kina na tamata. A uqeti ira na nona imuri o Jisu me nodra ivakarau sara ga ni bula na soli ka.

“Me cakava na tamata yadua na ka e vakadeitaka e lomana, me kua ni cakava ena voraki se vuturi, baleta na Kalou e taleitaki koya e solia na ka ena marau.” (2 Korinica 9:7) Na ka ga e vakabibitaka tiko e keri o Paula ni “sega ni dodonu me soli ‘ena voraki’ e dua na ka, oya na nona vakasaurarataki e dua me soli ka,” e kaya e dua na ivakamacala ni iVolatabu. Na ‘solia ka ena marau’ e sega ni kena ibalebale me soli ga na iloloma ena dua na gauna lokuci​—me vaka na soli iloloma ena gauna ni Kirisimasi.

“E ciqomi vakalevu ga na ka e soli ena yalo e vinakata. E namaki vua e dua me solia ga na ka e tu vua, e sega ni namaki me solia na ka e sega vua.” (2 Korinica 8:12) E sega ni vinakata na Kalou mera lai dinau na lotu vaKarisito me rawa ni saumi kina na iloloma saulevu. Ia ni dua e solia ga “na ka e tu vua,” na nona iloloma ena sega wale ga ni vinaka, ena ‘ciqomi tale ga vakalevu’ vua na Kalou. Qori e veivakacegui cake mai na rai e vakabulabulataka na itukutuku ni veivoli ena gauna ni Kirisimasi, oya mo “volia rawa qai sausaumi malua.”