Taro na Dauwiliwili

E dau kena ivalavala ena vuqa na vanua e veiyasa i vuravura me dau soli na iloloma ni vakamau. Na ivakavuvuli cava gona vakaivolatabu ena vukei keda nida soli iloloma se da tauri iloloma ni vakamau?

Na iVolatabu e vakadonuya na soli iloloma ke vu mai lomada, qai veiganiti tale ga kei na ituvaki e soli kina. Me baleta gona na soli iloloma, e uqeti ira na lotu Vakarisito dina na iVolatabu mera vakatotomuria na Dausolisoli levu, o Jiova. (Jemesa 1:​17) Uqeti ira tale ga vaka oqo na nona itokani lotu Vakarisito na yapositolo o Paula: “Kakua talega ni guilecava na caka vinaka kei na dausoli ka: ni sa vinakata sara na Kalou nai madrali vakaoqo.” Io, era uqeti na lotu Vakarisito mera dau soli ka.​​—⁠Iperiu 13:16; Luke 6:​38.

Ena so na vanua mai valagi, e dau kena ivakarau me rau lako na vakarau vakamau ina dua na sitoa sau levu me rau lai vakaraica kina na iyaya erau na vinakata me lolomataki vei rau. Ni oti na nodrau vakalewa se iyaya cava erau vinakata, ena qai volai kece ena dua na tikidua me biu toka ena sitoa oya vata kei na yacadrau. Vei ira na wekadrau kei na nodrau itokani era sureti ina vakamau era via voli iloloma, era na dusimaki mera gole ina sitoa oya, ra qai digitaka mai na tikidua sa volai oti koto na iyaya mera lolomataka vei rau. Vakacaca, eda rawa ni kaya ni dua na iwalewale ni voli iloloma vinaka oya, ni sega ni kania na gauna i koya e voli iloloma. Ena sega tale ga ni lai ogaoga kina o koya e voli me nona, ni na saga me vakalesuya ina sitoa na iloloma e sega ni yaga vua, me vaka e dau caka ena so na vanua mai valagi.

Na nodrau muria se sega na vakarau vakamau na iwalewale ni voli iloloma vaka oqo, ena vakatau sara ga vei rau. Ia, me qarauna na lotu Vakarisito me kua ni cakava e dua na ka e veisaqasaqa kei na ivakavuvuli ni iVolatabu. Me vaka beka na nodrau vola na vakarau vakamau na iyaya isau lelevu me lolomataki vei rau. Ke rau cakava oqo, de dua era na sega ni ceguva rawa o ira e leka na nodra iqila, se ra lai nanuma kina e so mera sa vakadaroya mada ga na veisureti ni vakamau me kua nira vakamadualaki ena nodra kauta yani na iloloma isau lailai. E vola kina e dua na marama lotu Vakarisito: “Sa dua na icolacola levu na soli iloloma ni vakamau. Dina niu saga meu dau lomasoli, ia ena dua na gauna lekaleka tiko ga oqo, e vaka me sa seavu na noqu dau marautaka na soli iloloma.” Dua na ka rarawataki ke yaco na soqo ni vakamau me ka ni veivakayalolailaitaki!

E sega ni dodonu mera lai guca wale na via voli iloloma nira raica ni tiko ga na sitoa erau na marautaka na vakarau vakamau me voli kina na nodrau iloloma, se me rau ciqoma ga na iloloma e donu vei rau na kena isau. Vakauasivi ni dusia o Jisu Karisito ni soli iloloma e talei ena mata ni Kalou na kena e vu mai lomada, e sega ni baleta ni isau levu. (Luke 21:​1-4) Vaka kina na ka e vola na yapositolo o Paula, me baleta na soli iloloma vei ira na dravudravua: “Na tamata yadua me dui solia sara ga na ka e vinakata na lomana, ka me kua e na voraki se ni sa vakaukauwataki. Ni sa dau vinakata na Kalou na tamata e soli ka e na yalomarau.”​​—⁠2 Korinica 9:​7, VV.

Vakaivolatabu, e sega tale ga ni cala ke o vakatakila ni nomu na iloloma, ena nomu vakacuruma vata beka kei na dua na tikidua lailai o vola kina na yacamu kei na nomu vakanuinui vinaka. Ia ena so na vanua, e kena ivalavala me dau kacivaki e matadra kece na tiko ena soqo na yacadra na soli iloloma. Na ivalavala vakavanua oqo e rawa ni vakavuleqa. De dua era sega ni vinakata o ira na soli iloloma me kilai raraba na ka era solia. O ira vaka oqo era muria na ivakavuvuli i Jisu ena Maciu 6:3 (VV), e kaya: “Ni dou sa soli ka ni loloma, me kakua ni kila na ligamu i mawi na ka e cakava tiko na ligamu i matau.” Rairai ena so tale era nanuma ni iloloma e soli e sega ni dodonu me kilai raraba, me rau kila taurua ga o koya e volia kei koya e lolomataki vua. Kuria, ni kacivaki vaka oya na yaca e matanalevu, e rawa ni vu kina na vakatauvatani ni iloloma, oqo ena vakavurea na “veivuvutaki.” (Kalatia 5:​26) Macala ni lotu Vakarisito ena qarauna me kua nira logalogaica se madua na tiko ena soqo ena kena kacivaki e matadra na yacadra na soli iloloma.​​—⁠1 Pita 3:⁠8.

Io, ke salavata kei na ivakavuvuli ni Vosa ni Kalou na soli iloloma eda cakava, ena yaco tiko ga me ivurevure ni noda marau se kalougata.​—Cakacaka 20:35.