SAUMI NA TARO VAKAIVOLATABU

E rawa ni vosoti noda valavala ca?

E tukuna na iVolatabu nida ivalavala ca, e vakadewa vei keda na imatai ni tamata o Atama. Ena so na gauna eda dau vakayacora na ka ca da qai veivutunitaka e muri. A mai mate ena vuku ni noda ivalavala ca na Luve ni Kalou o Jisu Karisito. Nona mate gona vakaisoro e rawa ni vosoti kina na noda ivalavala ca. Qori e iloloma ni Kalou vei keda.​—Wilika Roma 3:​23, 24.

Eso era lomatarotarotaka se na vosoti ira na Kalou nira vakayacora eso na cala bibi. Ia eda marau ni tukuna na Vosa ni Kalou: “E vakasavasavataki keda mai na noda ivalavala ca kece na dra i Jisu, na Luvena.” (1 Joni 1:7) E yalorawarawa gona o Jiova me vosota na noda cala bibi ke da vakaraitaka nida veivutuni dina.​—Wilika Aisea 1:18.

Na cava meda cakava meda vosoti kina?

Ke da vinakata me vosoti keda na Kalou o Jiova, e dodonu meda vulica na veika me baleti koya​—kila nona ivalavala, nona ivakasala, kei na nona ivakatagedegede. (Joni 17:3) O Jiova ena vosoti ira era veivutunitaka nodra cala ra qai saga mera veisau.​—Wilika Cakacaka 3:19.

E sega ni dredre meda rawata nona veivakadonui na Kalou. E kila o koya noda dui malumalumu. E Kalou yalololoma qai yalovinaka. Vakacava e uqeti iko qori mo vulica na sala o rawa ni vakamarautaki koya kina?​—Wilika Same 103:​13, 14.