Toro Voleka Vua na Kalou
Ni Veivosoti na Kalou, ena Guilecava?
NA KENA isau lekaleka ga na io. E yalataka o Jiova me baleti ira e vakadonuya: “Ni’u na bokoca na nodra caka cala, ia na nodrai valavala ca ka’u na sega ni nanuma tale.” (Jeremaia 31:34) E vakadeitaka gona vei keda o Jiova ni gauna e vosoti ira kina era veivutuni, e sa vakatulewataka me guilecava. Ia e kena ibalebale dina qori ni sega ni nanuma na cala e sa vosota o koya e bulia na lomalagi kei vuravura? E vakamatatataki ena Isikeli na ka e dau cakava na Kalou me veivosoti kina qai guilecava.—Wilika Isikeli 18:19-22.
O Jiova e vakayagataki Isikeli na parofita me vakasavuya na nodra lewai na lewe i Juta tawayalodina. Era vakanadakuya kece na lewe ni matanitu qori na sokalou vei Jiova ra qai vakatara me yaco na valavala voravora ena nodra vanua. E parofisaitaka o Jiova ni o ira na kai Papiloni era na vakarusai Jerusalemi, na koroturaga e Juta. Ia ena gauna mada ga e vakasavui tiko kina na itukutuku ni veivakarusai qori, e vakarautaka o Jiova e dua na itukutuku ena rawati kina na bula. E soli na galala vei ira na tamata yadua mera digia na ka mera cakava, era na dui saumitaro ga kina.—Tikina 19, 20.
Vakacava ke saumaki e dua mai na nona ivakarau ca? E tukuna o Jiova: “Kevaka ena saumaki mai na tamata ca mai na nonai valavala ca kecega sa kitaka, ka vakabauta kecega na noqu vunau, ka cakava na ka sa dodonu ka vinaka, ena bula vakaidina ko koya, ena sega ni mate.” (Tikina 21) Io, e ‘tu vakarau’ o Jiova me vosota nona saumaki e dua mai na nona sala cala, qai vakaraitaka ni veivutuni dina.—Same 86:5.
Vakacava na valavala ca a cakava? E tukuna o Jiova: “Na nona talaidredre kecega ena sega ni cavuti vua.” (Tikina 22) Eda raica e keri ni nona valavala ca e dua e veivutuni “ena sega ni cavuti vua.” Na cava e bibi kina qori?
E tukuna e dua na ivola me baleta na ivakadewa vakaIperiu ni matavosa “sega ni cavuti” e volai ena iVolatabu: “E vakaibalebaletaki ena levu na gauna ena dua na ka e caka se dau vakayagataki vata kei na vu e kilai kina na ka e caka.” Koya gona, na matavosa na “sega ni cavuti” e rawa ni vakaibalebaletaka na kena “caka e dua na ka.” Ni tukuna gona o Jiova ena “sega ni cavuti vua” e dua e veivutuni na nona valavala ca, a vakaibalebaletaka tiko ni na sega ni cakava e dua na ka me baleta na nona cala, kena ivakaraitaki me beitaki koya se totogitaki koya kina.a
E vakaraitaka na Isikeli 18:21, 22 na sala e uqeti keda kina na ivakarau ni nona dau veivosoti o Jiova. Ni vosota noda ivalavala ca o Jiova, ena sega ni kauta tale tiko mai me beitaki keda ena dua tale na gauna. Ia ena biuta e dakuna nona valavala ca o koya e veivutuni. (Aisea 38:17) E vaka ga e sa bokoca na cala e cakava.—Cakacaka 3:19.
Nida ivalavala ca, eda vinakata me vosoti keda na Kalou baleta nida dau cala. (Roma 3:23) Ia o Jiova e vinakata meda kila ni na tu vakarau me vosoti keda ke da veivutuni dina mai vu ni lomada. Ena gauna tale ga ena veivosoti kina, ena guilecava—kena ibalebale ni na sega ni beitaki keda tale se totogitaki keda ena cala e sa vosota. E veivakacegui dina qori! Vakacava o via toro voleka vua na Kalou ena vuku ni nona dau veivosoti?
Wili iVolatabu e Vakatututaki ena Julai:
[iVakamacala e ra]
a E rawa ni vakaibalebaletaki tale ga na matavosa ‘nanuma nodra cala’ me ‘totogitaki ira era cala.’—Jeremaia 14:10.