“Raica Mada na iYaloyalo!”

Sa vakavica na nomu dau tukuna qori ni o cega e dua na itabataba vou ni mekesini qo? Dua na cakacaka levu na kena vakarautaki na itaba se iyaloyalo totoka qai tiko na kena inaki e biu kina ena mekesini. Era ivukevuke ni vuli, me vukei keda meda vakasama, me tara tale ga na lomada. Qori ena yaga sara nida vakavakarau qai vakaitavi ena vuli Vale ni Vakatawa.

Kena ivakaraitaki, vakasamataka mada na vuna e digitaki kina me vakayagataki na imatai ni iyaloyalo ena dua na ulutaga ni vuli. Na vakasama cava e vakavotuya? E sema vakacava ina ulutaga levu se na tikinivolatabu e yavutaki kina na vuli? Meda vakasamataka tale ga na sala e sema kina na iyaloyalo tale eso ena ka e veivosakitaki tiko, e yaga tale ga vakacava ena noda bula.

Ena vinakata o koya e taura na vuli Vale ni Vakatawa mera vakamacala na lewe ni ivavakoso ena iyaloyalo kece, mera tukuna e sema vakacava ena ka e vulici tiko kei na lesoni era vulica kina. Ena volai toka ena so na gauna ena ruku ni iyaloyalo na parakaravu e vakavotuya na vakasama me vakabibitaki. E rawa ni digia o koya e taura na vuli na parakaravu cava ena veiganiti me veivosakitaki vata kei na iyaloyalo tale eso. Ni caka qori, ena yaga vei keda kece na ivukevuke e vakarautaki meda raitayaloyalotaka kina na ivakavuvuli e tu ena Vosa ni Kalou.

E tukuna e dua na tacida tagane: “Ni wiliki oti e dua na ulutaga totoka, na iyaloyalo e vakataucokotaka na ulutaga qori me vaka ga na kirimu e vakataucokotaka na keke.”