Gauna Cava Meda Lesuvi Ira Kina na Tataleitaki?
1. Na cava e okati ena veivakatisaipelitaki?
1 Noda veivakatisaipelitaki e okati kina noda lesuvi ira na taleitaka mera kila na veika e vauca na Matanitu i Jiova. (Maciu 28:19, 20) Na gauna vinaka ni noda veisikovi lesu e dau vakatau ena noda ituvatuva kei ira na tataleitaki. Na cava meda lesu totolo kina?
2, 3. Na cava meda lesu totolo kina?
2 Na Cava Meda Lesu Totolo Kina? Sa voleka sara ni vakacavari na vunautaki ni “itukutuku vinaka” ni Matanitu ni Kalou, sa voleka tale ga ni cava na iotioti ni veisiga ca qo. (Maciu 24:14; 1 Pita 4:7) Koya gona, ni se rawa nira sasaga na tataleitaki mera ‘vakabulai’, meda gumatua mada ga ni “vunautaka na vosa,” okati kina noda lesu totolo meda vakarabailevutaka nodra kilaka.—2 Kor. 6:1, 2; 2 Tim. 4:2.
3 E dau saga o Setani me vakamatea na sore ni ka dina eda sa teivaka oti ena lomai koya e tataleitaki. (Mari. 4:14, 15) Era dau veivakalialiai nodra lewenivuvale, ira era cakacakavata, kei na so tale. Ke da sega ni lesu totolo, era na rawa ni vakayalolailaitaki, ena seavu tale ga nodra taleitaka na ka dina eda wasea vei ira ena imatai ni veisiko.
4. Na cava meda cakava meda rawa kina ni veisikovi lesu?
4 Lalawataka na Gauna: Vakadeitaka na gauna meda na lesu kina ena imatai ni veisiko. Laiva toka vua e dua na taro meda sauma ena noda veisiko tarava. E bibi me volai vakamatata na veika eda veivosakitaka ena imatai ni veisiko kei na gauna meda na lesuvi koya kina. Ke rawa, de dua eda na kerei koya meda lesu ga ena siga tarava se na gauna totolo duadua. Ke drau a sota ena muanimacawa qai cakacaka ena lomanimacawa o koya e tataleitaki, de na taleitaka mo lesuvi koya ena muanimacawa tarava. Mo lesu dina ena siga o sa lokuca.—Maciu 5:37.
5. Ena yaga vakacava ena noda muria na ivakaro i Jisu meda veivakatisaipelitaki noda lesuvi ira totolo na tataleitaki?
5 E tiko na vuna vinaka meda veisikovi lesu kina ena gauna totolo duadua. O koya gona, lokuca na gauna qai lesu totolo ni “sa vakalekalekataki na gauna se vo.” (1 Kor. 7:29) Na totolo ga ni noda sikovi ira lesu na taleitaka na itukutuku vinaka, na vuavuaivinaka tale ga ni noda sasaga.