Cava e Kaya na iVolatabu me Baleta na Soli Ka?

Kena isau vakaivolatabu

E veiuqeti na iVolatabu meda lomasavu na soli ka, me donu tale ga na inaki eda cakava kina. Qori ena vakamarautaki koya e solia na ka, kei koya e taura na ka. (Vosa Vakaibalebale 11:25; Luke 6:38) E kaya o Jisu: “E marau vakalevu o koya e solia na ka, vakalailai o koya e taura na ka.”—Cakacaka 20:35.

Ena marautaki vakacava na soli ka?

Ena yaga na soli ka, ke vu mai lomada. E kaya na iVolatabu: “Me cakava na tamata yadua na ka e vakadeitaka e lomana, me kua ni cakava ena voraki se vuturi, baleta na Kalou e taleitaki koya e soli ka ena marau.”—2 Korinica 9:7.

Na soli ka mai vu ni lomada e ivakarau ni sokalou se “lotu” e vakadonuya na Kalou. (Jemesa 1:27) O koya e dau lomasavu me veivuke ena veivolekati kei na Kalou, qai okata o koya na noda soli ka me vaka eda soli ka vua. (Vosa Vakaibalebale 19:17) E kaya na iVolatabu na Kalou ena saumi koya e dau soli ka.—Luke 14:12-14.

Ena sega ni marautaki vakacava na soli ka?

Ke caka ena inaki ca. Kena ivakaraitaki:

Mera vakadrukai kina eso tale.—Maciu 6:2.
Namaka me saumi lesu.—Luke 14:12-14.
Me vakadonui ira na Kalou.—Same 49:6, 7.

Ke vakayagataki ena veika e cata na Kalou. Kena ivakaraitaki, e cala ke soli na ilavo vua e dua me veimauilavo, se vakayagataka kina vakasivia na wainimate gaga kei na alakaolo. (1 Korinica 6:9, 10; 2 Korinica 7:1) E sega tale ga ni vinaka me soli na ilavo vua e dua e rawa ni tokoni koya vakailavo, ia e vucesa.—2 Cesalonaika 3:10.

Ke da soli ka vakalevu vei ira eso tale, ia sa vakawaleni noda vuvale. E kaya na iVolatabu ni dodonu me vakarautaka na ulunivuvale na veika ratou vinakata nona vuvale. (1 Timoci 5:8) E cala ke soli ka vakalevu vei ira eso tale, ia ratou vakila tiko na leqa nona vuvale. O Jisu tale ga a cudruvi ira na sega ni vakarautaka na ka vei ira nodra itubutubu itabaqase. Nira kaya ni dodonu me “soli me nona vakatabakidua na Kalou” na ka era taukena.—Marika 7:9-13.

Tikinivolatabu me baleta na soli ka

Vosa Vakaibalebale 11:25: “Na tamata lomasavu ena rawaka, o koya e veivakacegui ena vakacegui tale ga.”

Kena ibalebale: E yaga na soli ka vei koya e taura, kei koya e solia.

Vosa Vakaibalebale 19:17: “O koya e lomana na dravudravua e soli ka tiko vei Jiova, ena saumi vua na ka e cakava.”

Kena ibalebale: Na Kalou e okata noda vukei ira na dravudravua me vaka e dinau tu vei keda, e yalataka tale ga ni na vakalougatataki keda.

Maciu 6:2: “Ni dou soli iloloma, kua ni uvudavui me vaka era cakava . . . na dauveivakaisini, mera dokai kina.”

Kena ibalebale: Sega ni dodonu meda qoroi nida soli ka.

Cakacaka 20:35: “E marau vakalevu o koya e solia na ka, vakalailai o koya e taura na ka.”

Kena ibalebale: Eda na marau ni vu mai lomada noda soli ka.

2 Korinica 9:7: “Me cakava na tamata yadua na ka e vakadeitaka e lomana, me kua ni cakava ena voraki se vuturi, baleta na Kalou e taleitaki koya e soli ka ena marau.”

Kena ibalebale: Ena marau na Kalou nida soli ka mai vu ni lomada.