E VEISAUTAKA NA BULA NA IVOLATABU

“Levu Era Sevaki Au”

Talanoataka o Waldo Moya

SUCU: 1978

VANUA: CHILE

KA E KILAI KINA: VORAVORA NONA ITOVO

NOQU BULA E LIU: Au susu e Santiago, na koroturaga kei Chile. E kilai na noqu yasayasa ni levu kina na basulawa, ilala dau veibuturaki, e vanua tale ga ni volitaki wainimategaga. A labati o tamaqu niu se yabaki lima, mani lai tiko o tinaqu kei na dua na turaga voravora. E dau mokulaki keirau. Na ituvaki qori e tara sara ga na vo ni noqu bula.

Niu se itabagone era vakamuai au na noqu ilala ca, lai voravora sara kina na noqu itovo. Au dau taleitaka na ivakatagi karakaravisa, au gunusivia, au vakayagataka tale ga ena so na gauna na wainimategaga. Keimami dau veibuturaki kei ira na dauvolitaki wainimategaga, era saga tale ga vakavica mera vakamatei au. Dua na gauna era sauma e dua na daulaba me vakamatei au. Au mavoa ni a suaki au na daulaba qori, ia au mani dro bula. Ena dua tale na gauna, era dodoka vei au na dakai eso na dauvolitaki wainimategaga ra qai via vakaliligi au.

Ena 1996 au sotavi Carolina e dua na marama totoka, keirau mani vakamau ena 1998. Ni sa sucu na luvei keirau tagane, dua na ka noqu rivarivabitaka na noqu ivakarau voravora, au nanuma niu na vakamavoataki rau na noqu veitinani me vaka ga e dau cakava o tamaqu vakacabecabe. Meu lewa vinaka noqu cudru, au lai qara veivuke ena dua na valenibula era dauvukei kina o ira e voravora nodra ivakarau. Era vakasalataki au na vuniwai, e soli tale ga na mequ wainimate. Ia e maumau wale na sasaga qori niu se sega tiko ga ni lewai au vinaka qai dau cudruvaka na ka kece. Au nanuma ena dua na siga meu sa na vakamatei au me cegu kina na noqu ivakarau voravora e vale. Au marau ni a sega ni yaco na ka au saga qori.

Dua na gauna balavu au sega tu kina ni vakabauta na Kalou, ia qo au sa vinakata meu qaravi koya. Au mani saga sara meu lai lotu. Ena gauna qori a vuli iVolatabu tiko o watiqu kei ira na iVakadinadina i Jiova. Au sevaki ira qai dau vosa vakacacataki ira. Ia era sega ni bau sauma lesu, au sega sara ga ni vakabauta.

A kerea ena dua na siga o Carolina meu raica mada na Same 83:18 ena noqu iVolatabu. E tukuna sara tu ga vakamatata na tikinivolatabu qori ni yaca ni Kalou o Jiova. Au drukataka qori ni dau tukuni tu ga e valenilotu ni dua na kalou, ia e sega ni tukuni ni yacana o Jiova. Ena itekitekivu ni yabaki 2000, au vulica tale ga na iVolatabu kei ira na iVakadinadina i Jiova.

VEISAUTAKI AU NA IVOLATABU: Ni toso noqu vuli iVolatabu, au lomavakacegu niu kila ni dauveikauaitaki qai dauveivosoti na Kalou o Jiova. Kena ivakaraitaki, ena Lako Yani 34:​6, 7, e tukuni kina ni o Jiova “na Kalou, sa yalololoma ka daulomasoli, sa vosovoso vakadede, ka levu na nona yalovinaka kei na dina, sa dauyalovinaka tiko vei ira na veiudolu, sa sega ni cudruvaka na caka ca kei na talaidredre kei nai valavala ca.”

Ia e sega ni rawarawa meu bulataka na ka au vulica. Au nanuma niu na sega tu ga ni lewa rawa na noqu cudru. Niu dau vakayacora na itovo voravora, e sega ni cegu o Carolina me vakayaloqaqataki au ena nona tukuna ni sega ni guilecava na noqu sasaga o Jiova. Na ka e cakava qori e uqeti au meu vakamarautaki Jiova tiko ga, dina niu nanuma ni na sega tu ga ni rawa.

A kerei au ena dua na siga na noqu qasenivuli ni iVolatabu o Alejandro meu wilika na Kalatia 5:​22, 23. E tukuna na tikinivolatabu qori ni itovo e umani ena vua ni yalo tabu ni Kalou na “loloma, marau, vakacegu, vosota vakadede, yalololoma, yalovinaka, vakabauta, yalomalua, lewai koya vinaka.” E kaya o Alejandro niu na sega ni rawa ni bulataka na itovo qori ena noqu kaukaua ga, ena gadrevi na veivuke ni yalo tabu ni Kalou. Na ka dina qori e veisautaka sara ga na noqu rai!

Ena dua na gauna e muri au lai tiko ena nodra soqo ni tikina na iVakadinadina i Jiova. Noqu raica na ivakarau ni veimaliwai, na kena savasava qai tuvanaki vinaka na soqo, au vakadinadinataka ni lotu dina. (Joni 13:​34, 35) Au papitaiso ena Feperueri 2001.

KENA YAGA: A voravora tu e liu na noqu bula, sa rauta me levu era sevaki au. Ia e veisautaki au o Jiova meu yalomalua. E vaka ga e dreti au cake mai na soso au lomoci tu kina. Au marau ena gauna qo ni keitou duavata vakavuvale ni qaravi Jiova.

Era sega sara ga ni vakabauta na noqu itokani kei ira na wekaqu ni sa veisau na noqu ivakarau ni bula. E vica vei ira qori era sa vulica tale ga na ka dina ena iVolatabu. Au kalougata niu bau vukea eso mera mai kilai Jiova. Dua na ka na noqu marau niu raica ni veisautaka tale ga na nodra bula na iVolatabu!

[iYaloyalo ena tabana e 12]

[iYaloyalo ena tabana e 12]

[Tikina bibi ena tabana e 13]

Au lomavakacegu niu vulica ni dauveikauaitaki qai dauveivosoti na Kalou o Jiova

[iYaloyalo ena tabana e 13]

Au marau meu bau wasea vei ira eso tale na ka au vulica

[iYaloyalo ena tabana e 13]

Keitou duavata vakavuvale ni qaravi Jiova