Era Yalorawarawa Mera Gole ina Yatu Filipaini

ENA tini na yabaki sa oti, rau a painia tu e Manila o Gregorio kei Marilou, dua na veiwatini rau yabaki 30 vakacaca, rau cakacaka saumi tale ga ena gauna vata qori. E dina ni dredre me rau qarava ruarua, ia rau rawata. A qai tosoi cake na itutu nei Marilou me manidia ena baqe e cakacaka tiko kina. E kaya: “Ena neirau cakacaka vinaka qo e rawa kina me keirau marautaka na ivakarau ni bula totoka.” Ni levu na ilavo e rau rawata, rau vakatulewataka kina me rau tara e dua na nodrau vale rau dau tatadrataka tu ena dua na vanua totoka ena 19 na kilomita ena tokalau kei Manila. Rau veidinadinati kei na kabani ena tara na nodrau vale qai tuvanaki me rau sausaumi tiko ena veivula ena loma ni tini na yabaki.

“AU VAKILA NIU SA BUTAKOCI JIOVA TIKO”

E tukuna o Marilou: “Na cakacaka vou qo e gadrevi vakalevu kina noqu gauna kei na noqu kaukaua, e lai luluqa kina noqu veika vakayalo. Au vakila niu sa butakoci Jiova tiko.” E tomana: “Sa sega ni rawa niu solia vei Jiova na gauna au a yalataka vua.” Ena nodrau rarawataka na kedrau ituvaki, rau veitalanoataka sara ena dua na gauna o Gregorio kei Marilou na vanua e sa mua tiko kina na nodrau bula. E kaya o Gregorio: “Keirau vinakata me keirau cakava eso na veiveisau, ia keirau sega ni kila me caka vakacava. Keirau veitalanoataka na sala me keirau vakayagataka vinaka kina na neirau bula vei Jiova, vakabibi ni keirau sega ni vakaluveni. Keirau mani masulaka na veidusimaki i Jiova.”

Ena gauna vata qori rau rogoca eso na vunau me baleta na veiqaravi ena vanua era gadrevi vakalevu kina na dautukutuku ni Matanitu ni Kalou. E kaya o Gregorio: “Keirau raica qori me sala e sauma kina o Jiova na neirau masu.” Rau masulaka na veiwatini me vakalevutaki na nodrau vakabauta me rau vakatulewa vinaka kina. Ia e dua na ka e vakadredretaka vakalevu qori, oya ni sa tara tiko na nodrau vale. Rau sa sauma rawa tu na sausaumi ni tolu na yabaki. Na cava rau na cakava? E kaya o Marilou: “Kevaka keirau na bokoca na konitaraki, ena maumau na ka keirau sa sauma tu—dua na ilavo levu. Keirau raica ni gadrevi me keirau vakatulewataka me vakaliuci na loma i Jiova se vakaliuci na neirau gagadre.” Na nodrau vakananuma na nona vosa na yapositolo o Paula, oya me rau ‘vakanadakuya na ka,’ rau bokoca kina na veidinadinati a vakayacori me baleta na nodrau vale, rau kere vakacegu mai na nodrau cakacaka, rau volitaka e dua na wase levu ni nodrau iyaya, qai toki ina dua na koro tu yawa ena yanuyanu o Palawan, ena 480 na kilomita ena ceva kei Manila.—Fpai. 3:8.

ERAU ‘VULICA NA KA ME CAKA’ ME RAU LOMAVAKACEGU KINA

Ni bera ni rau toki, rau sa vakatovotovotaka tiko na bula rawarawa, ia rau sega ni kila ni se vinaka cake qori mai na kena rau na lai sotava dina ena vanua ya. E kaya Marilou: “Keirau sega sara ga ni tadra. E sega na livaliva, sega tale ga na veika me rawarawa kina na bula. Sa sega na vakasaqa raisi ena kuro livaliva, keirau sa na kola buka me caka kina na vakasaqa. Au diva na gauna au dau gole kina ina vanua ni volivoli, kana ena valenikana, kei na so tale na ka era tu ena siti.” Ia erau vakadeitaka tiko ga na inaki ni nodrau toki, qai toso na gauna sa matau vei rau na ivakarau ni bula ekea. E kaya o Marilou: “Au sa qai marautaka qo na totoka ni veika bula, okati kina na totoka ni kalokalo ena bogi. Koya e bibi sara, au marautaka niu raica nodra mata mamarau na tamata ena gauna keirau vunau kina vei ira. Na neirau mai veiqaravi eke, keirau ‘vulica na ka me caka’ me keirau lomavakacegu kina.”—Fpai. 4:12.

E kaya o Gregorio: “Ni keirau yaco yani ekea, e va wale ga na iVakadinadina. Dua na ka na nodratou marau ena gauna au sa tekivu solia kina na vunau soqovi levu ena veimacawa kei na kena lagati na sere ni Matanitu ni salavata kei na noqu qiria na qita.” Ena loma ga ni dua na yabaki, rau vakadinadinataka na veiwatini na tubu ni iwasewase lailai me lai dua na ivavakoso e 24 na kena dautukutuku. E kaya o Gregorio: “Na loloma era vakaraitaka na ivavakoso qo e uqeti keirau dina.” Ena gauna qo, na nodrau vakananuma lesu na ono na yabaki nodrau veiqaravi tu ena yasayasa tu yawa qori, rau kaya: “E sega ni dua na ka e vakatauvatani rawa kei na marau e vakilai mai na neirau raica na nodra tabili mai e levu na ka vou ena ivavakoso. Keirau sa qai vakila ni sa vakainaki na neirau bula.”

‘AU SA TOVOLEA QAI RAICA NI SA YALOVINAKA O JIOVA!’

Ena Yatu Filipaini, voleka ni 3,000 na mataveitacini era sa toki ena vanua era gadrevi vakalevu kina na dautukutuku ni Matanitu. Qai le 500 vei ira qori era tacida yalewa dawai. Kena ivakaraitaki o Karen.

O Karen e sa yabaki 20 vakacaca, a susu ena taoni o Baggao mai Cagayan. Ni se itabagone, e dau vakasamataka vakalevu me vakarabailevutaka na nona cakacaka vakaitalatala. E kaya: “Noqu kila ni sa vakalekalekataki na gauna sa vo qai gadrevi mera rogoca na matatamata kece na itukutuku ni Matanitu, au vinakata kina meu veiqaravi ena vanua e gadrevi vakalevu kina na dautukutuku.” Era uqeti koya eso na nona lewenivuvale me kua ni toki ina dua na vanua tu yawa me lai vunau kina, me saga ga na vuli torocake, a mani masuta na veidusimaki i Jiova. A veitalanoa tale ga kei ira era veiqaravi ena vanua tu yawa. Ena gauna e yabaki 18 kina, a toki ina dua na vanua tu yawa e rauta ni 64 na kilomita mai na taoni e susu kina.

Na ivavakoso lailai a lai veitokoni kina o Karen, e qarava tiko na yalava ena veiulunivanua ena baravi e tadrava na Wasa Pasifika. E nanuma lesu o Karen: “Keirau taubale me tolu na siga mai Baggao me yaco ina ivavakoso vou qo, cabesiro ena veiulunivanua qai takosova vaka30 na veiuciwai.” E tomana: “Au na taubale tiko me ono na aua meu yacovi ira na vuli iVolatabu, au na moce ena nona vale e dua na noqu gonevuli, qai taubale lesu i vale ena siga tarava me ono na aua.” Vakacava e yaga na sasaga kece qori? E tukuna ena marau o Karen: “E dina ni mosi ena so na gauna na yavaqu, ia au vakavulica rawa kina e 18 na vuli iVolatabu. Au sa ‘tovolea qai raica ni sa yalovinaka o Jiova’!”—Same 34:8.

“AU VULICA MEU VAKARARAVI VEI JIOVA”

O Sukhi e dua na tacida yalewa dawai e yabaki 40 vakacaca e tiko i Merika. Ia na cava e uqeti koya me toki ina Yatu Filipaini? A tikova e dua na soqo ni tabacakacaka ena 2011 qai vakatarogi kina e dua na veiwatini. Rau tukuna na sala rau volitaka kina e dua na wase levu ni nodrau iyaya qai toki i Mexico me rau lai veivuke ena cakacaka vakavunau ekea. E kaya o Sukhi: “Na vakasavuirogorogo qori e vakavuna meu vakasamataka na isausau au sega vakadua ni bau vakasamataka tu e liu.” Ena gauna e rogoca kina o Sukhi, e tikitiki Idia, ni gadrevi na veivuke ina Yatu Filipaini, oya me vunau vei ira na Punjabi era tu ekea, e mani bole me lai veivuke. Vakacava e sotava eso na ituvaki dredre?

E kaya o Sukhi: “Sa bau dredre dina meu vakatulewataka na iyaya me volitaki kei na kena me maroroi. Au tiko duadua ga ena loma ni 13 na yabaki qai marautaka na ivakarau ni bula e vinaka, ia au qai tiko vakalekaleka kei na dua na wekaqu. E sega ni rawarawa, ia e sala vinaka meu vulica kina na bula rawarawa.” Na ituvaki dredre cava a vakila ni sa toki ina Yatu Filipaini? “E rua na ituvaki sa bau dredre sara ga vei au, ya noqu rerevaka na manumanu lalai era dau qasi, kei na noqu vakanananu vakalevu i vale. Ia au vulica meu nuitaki Jiova sara ga vakalevu!” Vakacava e yaga? E tukuna ena matadredredre o Sukhi: “E kaya vei keda o Jiova, ‘Vakatovolei au mada, au na qai sovaraka vei kemudou na ka ni veivakalougatataki.’ Au vakadinadinataka na veivosa qori ena gauna e tarogi au kina e dua na itaukeinivale, ‘Gauna cava o na gole tale mai kina? E levu tiko na noqu taro.’ E vakamarautaki au dina qai solia vei au na vakacegu na noqu vukei ira era via kana tu vakayalo!” (Mala. 3:10) E tomana o Sukhi: “E dredre dina me’u vakatulewataka meu toki. Ia na gauna au sa cakava kina, dua na ka noqu qoroya na sala e vukei au kina o Jiova.”

“AU VALUTA NA NOQU LOMALEQA”

O Sime, e dua na tacida tagane vakawati sa yabaki 30 vakacaca. A biubiu mai na Yatu Filipaini me taura e dua na cakacaka isaulevu ena dua na vanua ena Tokalau e Loma. A vakauqeti koya ekea e dua na ivakatawa ni tabacakacaka, a rogoca tale ga nona ivunau e dua na lewe ni iLawalawa Dauvakatulewa, qori e uqeti Sime me vakaliuci Jiova. E kaya o Sime: “Ia au lomaleqa ena gauna au vakasamataka kina meu cegu mai na noqu cakacaka.” Ia a vakatulewataka ga me cegu ena nona cakacaka me lesu ina Yatu Filipaini. Nikua, rau sa veiqaravi tiko o Sime kei watina o Haidee ena yasayasa o Davao del Sur, ena ceva kei Yatu Filipaini. Era gadrevi vakalevu kina na dautukutuku ni Matanitu mera vunau ena yalava levu qori. E kaya o Sime: “Niu vakananuma lesu, au vakavinavinakataka niu sega ni kauaitaka vakalevu na noqu cegu mai na noqu cakacaka, au marautaka tale ga niu vakaliuci Jiova. E sega ni dua na ka e vakatauvatani kei na noda solia vei Jiova na noda vinaka kece!”

“KEIRAU VAKILA NA VAKACEGU DINA!”

O Ramilo kei Juliet, e rau veiwatini painia rau qai yabaki 30 vakacaca. Erau rogoca ni gadrevi na veivuke ena dua na ivavakoso e rauta ni 30 na kilomita na kena yawa mai na nodrau itikotiko, rau bole me rau veitokoni kina. E veimacawa, ke mani draki vinaka se draki ca, rau na vodo motopai ena soqoni kei na cakacaka vakavunau. E dina ni sega ni rawarawa na nodrau muria na gaunisala sukusukura kei na nodrau takosova na wavulili, ia rau marautaka ni rau vakarabailevutaka na nodrau cakacaka vakaitalatala. E kaya o Ramilo: “E 11 na neirau vuli iVolatabu! Na veiqaravi ena vanua e gadrevi vakalevu kina na veivuke e vinakati kina na yalo ni vakuai keda, ia eda na vakila na vakacegu dina!”—1 Kor. 15:58.

O via kila eso tale na ka me baleta na veiqaravi ena vanua e gadrevi vakalevu kina na dautukutuku ni Matanitu ena nomu vanua se i vanuatani? Ke vaka kina, mo veitalanoa kei na ivakatawa ni tabacakacaka, qai wilika na ulutaga “O Rawa ni ‘Lako i Masitonia’?” ena Cakacaka Vakaitalatala ni Okosita 2011.