Eda na Vakalougatataki Nida Vakararavi Vei Jiova

ERAU a sota ena 1919 na noqu itubutubu ena nodra soqo ni tikina na Gonevuli ni iVolatabu i Cedar Point, Ohio, Merika. Erau qai vakamau ena yabaki tiko ga ya. Au a sucu ena 1922, a sucu na taciqu o Paul ni oti e rua na yabaki. Ia a sucu ena 1930 na watiqu o Grace. Na nona itubutubu o Roy kei Ruth Howell, erau susugi ena vuvale era Gonevuli ni iVolatabu, rau lewena tale ga na Gonevuli ni iVolatabu na tubuna, erau itokani i Brother Charles Taze Russell.

Au sotavi Grace ena 1947, keirau mani vakamau ena ika16 ni Julai, 1949. Ni bera ni keirau vakamau keirau dau veitalanoataka sara ga na ka keirau na cakava ena neirau bula. Keirau vakatulewataka me keirau cakacaka vakaitalatala vakatabakidua, keirau sega tale ga ni via vakaluveni. Keirau mani tekivu painia ena 1 ni Okotova, 1950. Keirau sureti sara ena 1952 me keirau veiqaravi vakaivakatawa ni tabacakacaka.

CAKACAKA VAKADAUVEILAKOYAKI KEI NA VULI E KILIATI

Keirau raica ni gadrevi me keirau vukei vakalevu ena ilesilesi vou qori. Au dau vuli vei ira na taciqu tagane era sa vakaitavi vakalevu ena ilesilesi qo, ena gauna vata qori au raica tale ga me dua e vukei Grace. Au lai raici Marvin Holien, e dua keitou dau veitokani vinaka e vale, e buta vinaka tale ga ena cakacaka vakaivakatawa dauveilakoyaki, au kerei koya: “E se gone o Grace, e se vou tale ga ena dina. O rawa ni raica mai e dua me rau cakacaka vata vakalailai me rawa ni vakavulici koya?” E tukuna sara o Marvin, “Io, e rawa ni vukei koya o Edna Winkle, e dua na painia gugumatua.” E muri e sa qai tukuna o Grace me baleti Edna: “Niu duri ena matanikatuba, o Edna e vukei au meu kua ni rere, e kila na ka me cakava ke sega ni veiciqomi o itaukeinivale, e vakavulici au tale ga meu dau vakarogoca vinaka na ka era tukuna na itaukeinivale meu rawa ni kila na vosa veiganiti meu cavuta. E vukei au dina o koya!”

Keirau veiqaravi ena rua na tabacakacaka ena yasayasa o Iowa, wili tale ga kina eso na tikina mai na yasayasa o Minnesota kei South Dakota. Oti keirau mani lesi sara ena New York Circuit 1, era wili kina na yasayasa na Brooklyn kei na Queens. Keirau se nanuma vinaka tu ga na kena vou vei keirau na veiqaravi ekea. E wili ena tabacakacaka qo o Brooklyn Heights Congregation, era dau soqoni ena Vale ni Soqoni e Peceli, ra qai lewena e levu na lewe ni vuvale e Peceli sa dede tale ga nodra veiqaravi. Ni oti ga na imatai ni noqu ivunau ena ivavakoso ya, e gole sara mai o Brother Nathan Knorr qai vaka me tukuna vei au: “Malcolm, e vinaka sara ga na veivakasalataki o tukuna me keimami cakacaka kina. Nanuma tiko, ke o sega ni dau veivakasalataki me keimami vukei kina, o na sega ni yaga vakalevu ena isoqosoqo. Tomana tiko ga na cakacaka vinaka.” Ni oti na soqoni, au talaucaka sara qori vei Grace. Keirau mani gole sara ena neirau rumu e Peceli. Ena neirau lomaleqataka na neirau itavi, keirau tagi sara ga kina.

Ni oti e vica na vula, keirau sureti ina ika24 ni kalasi ni Koronivuli e Kiliati, na tauri ivola ena qai caka ena Feperueri 1955. Ni bera ni keirau lai vuli, a tukuni rawa vei keirau ni sega ni inaki ni vuli qo me vakarautaki keirau ena veiqaravi vakadaukaulotu. Ena vukei keirau ga vakalevu ena cakacaka vakaivakatawa dauveilakoyaki. E totoka dina na vuli, keirau vulica tale ga kina na yalomalumalumu.

Ni cava na vuli, keirau lesi me keirau veiqaravi ena cakacaka vakaivakatawa ni tikina. E wili tiko ena tikina keirau qarava na vanua o Indiana, Michigan, kei Ohio. Ia ena Tiseba 1955, keirau sega ni namaka me keirau ciqoma e dua na ivola i Brother Knorr, e tukuni kina: “Tukuna mai vakadodonu qo vei au. Drau vinakata mo drau tiko e Peceli . . . se drau via veiqaravi e vanua tani ni oti nomudrau tiko vakalailai e Peceli, drau tukuna ga mai vei au. Ke vinaka vei kemudrau na cakacaka vakaivakatawa ni tikina kei na vakatawa ni tabacakacaka, drau tukuna tale ga mai.” Keirau sauma ni keirau na marautaka me keirau ciqoma na ilesilesi cava ga e soli mai. Sega ni bera sa tukuni me keirau gole e Peceli!

VICA NA YABAKI MARAUTAKI E PECELI

E marautaki na vica na yabaki ni veiqaravi e Peceli, niu dau vunau qai veivakavulici ena ivavakoso, soqo cokovata kei na soqo ni tikina e Merika taucoko. Au dau vakavulica qai vukei ira e levu na cauravou, ni toso na gauna era sa qai qarava e levu na itavi ena isoqosoqo i Jiova. Yaco sara meu nona vunivola o Brother Knorr e dau tuvanaka na cakacaka vakavunau e vuravura raraba.

Au marautaka vakalevu na noqu tiko ena Tabana e Qarava na Cakacaka. Au cakacaka kei T. J. (Bud) Sullivan. E sa dede na nona liutaka tiko na tabana qo. Ia eso tale era vakavulici au ena levu na ka, dua vei ira o Fred Rusk. Au se nanuma vinaka tiko ga na noqu tarogi koya, “Fred, na cava e dau levu kina na veiveisau o cakava ena so na noqu ivola?” A dredre, ia qai tukuna, “Malcolm, nida dauveivosaki, e rawarawa nida vakamacalataka na ka, ia ni o volavola, vakabibi ke volai yani eke, e vinakati me rogorogo vinaka, me donu tale ga.” Oti e qai uqeti au, “Vinaka na cakacaka, vakaukaua tiko—toso na gauna o sa na qai kila na ka mo cakava.”

Ena vica vata na yabaki keirau tiko kina e Peceli, a lesi vei Grace na veimataqali itavi, okati kina na dausasamaki, kei na kena laurai me vinaka tiko ga na nodra rumu na lewe i Peceli. E marautaka na nona cakacaka. Yaco mai qo, ni keirau sotava eso na tacida tagane era se cauravou ena gauna ya e Peceli, era dau tukuna ena matadredredre vei Grace, “E yaga sara ga na nomu vakavulici au meu samaka noqu imocemoce, e taleitaka sara ga qori o tinaqu.” E marautaka tale ga o Grace nona cakacaka ena tabana ni Mekesini, na Veivolavolai (Correspondence), kei na Katoni ni Tepi (Tape Duplicating). Nona veiqaravi ena duidui ilesilesi qori e vulica kina o Grace ni ka dokai qai veivakalougatataki na noda cakava na itavi kece e lesi vei keda, se mani vanua cava ga ena isoqosoqo i Jiova. E sega ni veisau na nona rai me yacova mai nikua.

VEIVEISAU KEIRAU CAKAVA

Ena lomaloma ni 1970 vakacaca, keirau liaca ni rau gadreva na neirau veivuke na neirau itubutubu qase. E vinakati me keirau cakava e dua na vakatulewa dredre. Keirau sega ni via biuti Peceli kei ira na taci keirau vakayalo keirau daulomana vakalevu. Ia au raica ni noqu itavi me rau qaravi na neirau itubutubu. Keirau mani biubiu mai Peceli, ia keirau nuitaka ni gauna sa veisau kina na ituvaki, keirau na lesu tale mai.

Meu tokoni keirau vakailavo, au sa qai cakacaka ena tabana e dau volitaki inisua. Au sega ni guilecava rawa na ka e tukuna e dua na manidia ena gauna au se qai vakavulici tiko kina: “Me rawa ni tubu na bisinisi qo, ena vinakati meda dau golevi ira na tamata ena yakavi. Qori na gauna o rawa ni sotavi ira kina. E bibi sara ga meda dau golevi ira ena veiyakavi.” Au tukuna sara vua, “Au kila ni o kenadau sara ena tikina qori, au dokai iko kina. Ia e tiko tale ga na noqu itavi vakayalo au se bera vakadua ni calata, au sega tale ga ni vinakata meu tekivu calata qo. Au rawa ni gole ena so na yakavi, ia ena yakavi ni Tusiti kei na Lotulevu, au na vinakata meu na tiko ena rua na soqoni bibi.” E vakalougatataka dina o Jiova na noqu sega ni calata na soqoni niu cakacaka saumi tiko.

Keirau a tu sara ga e yasa ni mocemoce i tinaqu ena gauna a takali kina ena dua na vale ni malumalumu ena Julai 1987. A gole mai na nasi e liutaka tiko na veiqaravi ekea qai tukuna vei Grace: “Ni gole e vale, ni lai vakacegu. Keimami kila kece ni o dau tu ga eke kei nomu nei. Lai vakacegu baleta o kila ni o sa cakava na kece e gadrevi mo vukei nomu nei.”

Ena Tiseba 1987, keirau vakalewena tale na fomu ni Peceli, na vanua keirau dau taleitaka. Ia ni oti e vica na siga, e tauvi Grace na kenisa ni davuibuco. Ni oti na veisele, sa qai bula vinaka tale, a qai laurai ni sa yali vua na kenisa. Ia ena gauna qori keirau taura kina e dua na ivola mai Peceli, e tukuni kina me keirau veiqaravi tiko ga ena neirau ivavakoso. Keirau vakadeitaka me keirau gumatua tiko ga ena cakacaka ni Matanitu ni Kalou.

Ni toso na gauna, a dua sara noqu cakacaka mai Texas. Keirau kila ni na vinaka vei keirau na draki katakata ekea, me yacova mai qo keirau se vakila tiko ga qori. Sa rauta ni 25 na yabaki na neirau veimaliwai voleka sara kei ira na mataveitacini dauveikauaitaki e Texas.

VEIKA KEIRAU VULICA

A tauvi Grace toka ga vakalailai na kenisa ni davuibuco kei na kenisa ni domo, ia wale tiko ga qo a tauvi koya tale na kenisa ni sucu. Ia e sega vakadua ni vuturitaka na ka e yaco ena nona bula se me sabaya na ituvatuva ni veiliutaki ena vuvale, e dau tokona na noqu vakatulewa. Era dau taroga e levu vei Grace, “Na cava drau dau cakava me vinaka kina nomudrau bula vakawati, mo drau mamarau tale ga?” E tukuna e va na vuna: “Keirau veitokani vinaka. Keirau dau veivosaki e veisiga. Keirau dau taleitaka me keirau vakayagataka vata e levu neirau gauna. Keirau se bera vakadua ni moce ena dua na bogi me keirau se veicudruvi tu ga.” E tiko ga na gauna keirau dau veileqaleqati kina, ia keirau dauveivosoti qai keirau guilecava—e yaga dina qori.

Ena ituvaki dredre kece keirau sa lakova mai, e levu na ka vinaka keirau vulica kina:

1.  Dau vakararavi vei Jiova qai ciqoma na ka e sa vakatara. Kua ni vakararavi ena nomu yalomatua.—Vkai. 3:5, 6; Jer3. 17:7.

2.  Nuitaka na veidusimaki ena Vosa i Jiova, veitalia se mani ituvaki cava eda sotava. E bibi na talairawarawa vei Jiova kei na nona lawa. E sega na lomalomarua, e vinakati mo vakatulewataka mo talairawarawa se sega.—Roma 6:16; Ipe. 4:12.

3.  E bibi duadua ena noda bula—me rogo vinaka na yacada vei Jiova. Vakaliuci koya, sega ni qarai ni iyau.—Vkai.  28:20; Dauv. 7:1; Maciu 6:33, 34.

4.  Dau masulaka mo vakaitavi vakalevu, me yaga tale ga nomu cakacaka vei Jiova ena kena levu e rawa. Kauaitaka ga na ka o rawa ni cakava, sega ni ka o sega ni cakava rawa.—Maciu 22:37; 2 Tim. 4:2.

5.  Mo kila tiko ni sega tale ni dua na isoqosoqo e tiko kina na veivakalougatataki i Jiova.—Joni 6:68.

Sa sivi qo e 75 na yabaki na neirau qaravi Jiova yadudua mai, ia sa voleka ni 65 na yabaki na neirau qaravi koya vakaveiwatini. Keirau marautaka dina na neirau qaravi Jiova tu mai ena vicasagavulu na yabaki qori. Keirau nuitaka, keirau masulaka tale ga mera vakila tale ga qori na taci keirau vakayalo, oya nida na vakalougatataki nida vakararavi vei Jiova.