Qara e Levu na Gauna mo Veivakasalataki Kina

E taleitaki sara vakalevu na iyaloyalo e sega na kena rorogo, na Trip Down Market Street, e laurai kina na ivakarau ni bula e San Francisco, e Merika ena ika20 ni senitiuri. Era biuta na dau caka iyaloyalo e dua na itaba ena mua e liu ni dua na sitimanivanua qai tabaka na gaunisala osooso. Era tabaki ena iyaloyalo qo na kareti era dreta na ose, na motoka ni gauna ya, ira na volivoli tiko kei ira na cauravou lalai era volitaki niusipepa.

E vakaciriloloma na iyaloyalo qo baleta ni a tabaki ena Epereli 1906, qori ni se bera toka ga na uneune levu kei na kama ena ika18 ni Epereli. Era mate kina e vicasagavulu na udolu na lewenivanua qai voleka ni kamayavu kina e dua na yasa ni siti. De dua eso vei ira na lewenivanua mamarau era tabaki ena iyaloyalo qori, a lekaleka ga na gauna era bula kina. E kaya o Scott Miles, e dua vei ira na makubudratou a cakava na iyaloyalo oya: “Niu raici ira na tamata ena gauna ya, era sega ni kila na ka e sa na vakarau yacovi ira. Eda sega ni rawa ni cakava kina e dua na ka, ia eda nanumi ira ga.”

Eda rawa ni vakatauvatana na ituvaki qori kei na noda gauna. Eda sega ni rawa ni cakava kina e dua na ka, ia eda nanumi ira ga. Era vakaogai ira ena ka ni bula ni veisiga ra qai sega ni kidava na ituvaki rarawataki sa tiko mai e liu, oya na kena vakarusai na ituvaki ca qo kei na ivakarau ni nodra bula. Ia qo e sega ni vaka na uneune e yaco vakidacala, baleta ni se vo tiko na gauna meda vakasalataki ira na tiko tikivi keda me baleta na siga ni veilewai i Jiova. De dua o sa tuvanaka e veimacawa mo vunau e veivale, ia vakacava o rawa ni qara e levu na gauna mo vakasalataki ira kina eso tale?

E DAU TU VAKARAU E VEIGAUNA O JISU ME VUNAU

E ivakaraitaki vinaka dina o Jisu ni dau tu vakarau e veigauna me vunau. E vunau vei ira kece na tamata, se mani vunau vua e dua na daukumuni ivakacavacava e sotava e gaunisala, se dua na marama e sotava ena toevu ena gauna e vakacegu kina ena sigalevu tutu. (Luke 19:1-5; Joni 4:5-10, 21-24) E dina ni dau vakatikitikitaka o Jisu na gauna me vakacegu kina, ia e yalorawarawa me vakayagataka na gauna qori me veivakavulici kina. Na levu ni nona lomani ira na tamata e solia vakalevu kina na nona gauna vei ira. (Mari. 6:30-34) Era vakatotomuria vakacava eso nikua na nona sega ni dau vakawelewele o Jisu?

ERA VAKAYAGATAKA NA GAUNA VEIGANITI KECE

E vakaitikotiko o Melika ena dua na tabavale e yadravi vinaka tu. E levu vei ira na tiko tikivi koya era gonevuli mai vanuatani, ra qai vakayagataka na mobail e sega ni volai ena ivola ni talevoni, e sega tale ga ni tiko na yacadra ena lisi e tiko ena rumu ni wawa. Sa qai vakayagataka vinaka o Melika na gauna era mai tu kina ena rumu ni wawa kei na gauna era dau vodo kina na liva o ira na rede me veivosakitaka kina na veika vakayalo. E kaya: “Au raica qori me noqu yalava.” E dau tawana o Melika na ivola ena vica vata na vosa, qai levu era dau taura na tikidua kei na mekesini. E dau uqeti ira tale ga mera raica na noda Web site, na jw.org. E sa tauyavutaka e vica na vuli iVolatabu.

E dau tu vakarau tale ga o Sonia me vunau vei ira kece e sotava. E cakacaka tiko ena dua na vanua ni veiqaravi vakavuniwai, e nona isausau me vunau vei ira kece era cakacaka vata. Na imatai ni ka e cakava, oya me kila na veika era gadreva kei na ka era kauaitaka yadua na tamata. Oti sa na qai vakayagataka nona gauna ni vakasigalevu me veitalanoataka na veika vakayalo kei ira yadua. A tauyavutaka kina o Sonia e rua na vuli iVolatabu. E vinakata tale ga me vakayagataka na gauna e dau cegu kina vakalekaleka me vunau vei ira era mai dikevi vakavuniwai era tiko ena rumu ni wawa.

VAKAYAGATAKA NA GAUNA VEIGANITI KECE

E tukuna e dua e bula donuya na uneune ni 1906, ni “dua dina na leqa tubukoso ca duadua me bau vakacaca ena dua na yasayasa se siti.” Ia era sega soti ni vakadomobula na leqa tubukoso kece va qori ni vakatauvatani kei na siga ni veisausaumi ena yacovi ira “era sega ni kila na Kalou.” (2 Ces. 1:8) E vinakata dina o Jiova mera veisautaka na tamata na ivakarau ni nodra vakasama kei na lomadra mera rogoca na nodra veivakasalataki nona iVakadinadina.—2 Pita 3:9; Vkta. 14:6, 7.

E ka dokai dina meda dolava na matadra na tamata mera raica na gauna bibi eda sa bula tiko kina qai vukei ira mera kua ni nanumi ira ga, ia mera vakasaqarai Jiova. (Sefa. 2:2, 3) Vakacava o rawa ni vakayagataka na gauna veiganiti kece mo vunau vei ira nomu itokani vakacakacaka, ira era tiko tikivi iko, kei ira o sotava e veisiga? O rawa ni qara e levu tale na gauna mo vakasalataki ira kina eso tale?