Jisu Karisito​—Na Cava sa Cakava Tiko ena Gauna Qo?

Ena vula o Tiseba e levu e veiyasa i vuravura era dau raica na itaba se na ivakatakarakara kei Jisu ni se qai sucu. E davo koto ena kisi co madu ena nodra ikanakana na manumanu. Ia se gonedramidrami tiko ga o Jisu, se cava sa cakava tiko ena gauna qo?​—a Eda na kila na isaunitaro qori ena ka e yaco ni ratou vakatawa sipi voli ena bogi ena dua na vanua voleka i Peceliema na ivakatawanisipi.

E basika vakasauri e dua na agilosi vei ratou na ivakatawa, qai tukuna: “Sa sucu nikua na nomuni iVakabula o Karisito, na Turaga.” E tukuna tale ga ni ratou na raici Jisu ni “ovici tu ena isulu qai davo koto ena ikanakana ni manumanu.” Era basika mai e levu tale na agilosi ra qai “vakacaucautaka na Kalou.”

Ke o rogoci ira na agilosi nira vakacaucautaka tiko na Kalou, o na marau?​— Dua na ka na nodratou marau na ivakatawanisipi! Eratou tukuna, “Vakacava me datou sa lako sara ga qo i Peceliema me datou lai raica na ka e vakaraitaka vei kedatou o Jiova.” Ni ratou yaco yani, eratou raici “Meri kei Josefa, vaka tale ga kina na gone ni davo koto ena ikanakana ni manumanu.”

Sega ni dede era tokatu eso tale ena vanua erau tiko kina o Meri kei Josefa e Peceliema. Era qoroqoro ena ka eratou tukuna na ivakatawa. O marau mo kila na veika vakatubuqoroqoro me baleti Jisu?​— Eda na marau ga ke da lomana na Kalou. Meda dikeva mada qo na vuna e marautaki kina na nona sucu o Jisu. Eda na lesu tale ni se bera ni vakamau o Meri.

Dua na siga a sikovi Meri yani na agilosi o Keperieli. A yalataka ni na vakasucuma e dua na gone “ena dokai o koya, ena vakatokai me Luvei koya e Cecere Duadua.” E tukuna tale ga o Keperieli ni na ‘lewa vakatui’ qai “sega ni mudu na nona matanitu.”

Ni se sega ni veiyacovi kei na dua na tagane, e via kila o Meri se na yaco vakacava ya. Mani tukuna vua o Keperieli: “Ena vakaruguti iko na kaukaua i koya e Cecere Duadua,” oya na vuna “ena vakatokai kina o koya o na vakasucuma me yalosavasava, na Luve ni Kalou.” Na tokitaki ni bula ni Luve ni Kalou mai lomalagi ina katonigone i Meri me kunekunetaka, e cakamana vakatubuqoroqoro dina!

O sa bau raica na iyaloyalo se ivakatakarakara ni tolu na “tamata vuku” kei ira na ivakatawa era sikova na gonedramidrami o Jisu?​— E laurai vakalevu qo ena Kirisimasi. Ia e veicalati kei na ka e tukuna na iVolatabu. O ratou na “tamata vuku” ya eratou dauraikalokalo, na ivalavala e cata na Kalou o Jiova. Se gonedramidrami tiko ga o Jisu ni ratou sikovi koya yani? E tukuna na iVolatabu: “Ni ratou curu i vale eratou raica na gone kei Meri na tinana.” Sa sega ni gonedramidrami o Jisu me tiko ena valenimanumanu, ia sa dua na gonetagane lailai e vakaitikotiko ena dua na vale kei rau o Josefa kei Meri!

Eratou kunei Jisu vakacava na dauraikalokalo?​— Eratou vakamuria e dua na “kalokalo” i Jerusalemi vei Tui Eroti, a sega ni dusimaki iratou vakadodonu i Peceliema. E tukuna na iVolatabu ni vinakata o Eroti me vakamatei Jisu. Vakasamataka mada qo. O cei mada o nanuma e vakavuna na ka e vaka na rarama ni kalokalo e dusimaki ratou na dauraikalokalo vei Eroti?​— Sega ni Kalou dina o Jiova, ia na kena meca o Setani na Tevoro!

Se saga voli ga nikua o Setani meda nanuma ni o Jisu se gonedramidrami tiko ga. Ia e tukuna vei Meri na agilosi o Keperieli: ‘Ena lewa vakatui, ena sega tale ga ni mudu na nona matanitu.’ Ena gauna qo sa veiliutaki tiko vakatui mai lomalagi o Jisu, sa na voleka tale ga me vakawabokotaki ira kece na meca ni Kalou. Qori na ka meda tukuna yani vei ira tale eso.