Na Yalayala ni Parataisi e Vuravura e Veisautaka na Noqu Bula!

NOQU BULA E LIU:

Au sucu mai Riga, na koroturaga kei Latvia. A susugi keirau vakaveiganeni o Na. O koya e lotu Katolika, ia keitou na lai lotu ga ena siga ni olodei vakalotu. Au vakabauta ni bula tiko e dua e cecere, ia e levu na ka au malele kina niu se itabagone.

Niu se gone e raica o tinaqu niu dau taleitaka meu sere iyaya qai cobara tale. Ni levu gona na iyaya e tu e vale au rawa ni sereka, e dau lomaleqa o Na me biuti au duadua tu e vale. A mani solia kina vei au e dua na kato iyaya ni vakatatalo e tiko e loma eso na ka au rawa ni cobara vata qai sereka tale. Na noqu dau sere iyaya e yaga ena dua tale na ka au taleitaka, na motopai. A lai vakacurumi au o tinaqu ena veitau motopai na Zelta Mopēds (se na Golden Moped). Au tekivu veitau ena motopai berabera, oti au sa veitau ena motopai totolo.

E sega ni bera noqu sa kila na iwalewale ni veitau ena motopai totolo, au kenadau sara ena qito rerevaki qo. Au qaqa vakatolu ena veisisivi levu ni veitau motopai mai Latvia, au qaqa tale ga vakarua ena veisisivi levu ni veitau motopai ena veivanua ena Baltic.

VEISAUTAKI AU NA IVOLATABU:

A veitaratara kei ira na iVakadinadina i Jiova o Evija na noqu itau (qai watiqu e muri) ena gauna au rogo tu kina ena veitau motopai. A raica na kuponi ni kere vuli iVolatabu ena nodra ivola, mani vakalewena qai vakauta. Sega ni dede rau sikovi koya mai e rua na iVakadinadina, tekivu vulica tale ga na iVolatabu. Au sega ni cata ya, niu sega mada ga ni kauaitaka vakalevu na lotu ena gauna qori.

Ena dua na siga, rau sureti au na iVakadinadina keu via vakarorogo ena gauna e vuli iVolatabu kina o Evija. Au cakava qori, au taleitaka vakalevu na ka au rogoca. E tara sara ga na lomaqu na yalayala ena iVolatabu me baleta na parataisi e vuravura. Me kena ivakaraitaki, na Same 37:10, 11, e kaya: “Malua mada vakalailai, ena qai takali na tamata ca; io, ko na vakananuma na nona yasana, ia sa na yali kina ko koya. Ia ko ira na yalomalumalumu era na taukena na vanua; ka na daumarau tiko e na veivakacegui vakaidina.” Na yalayala qori e veisautaka sara ga na noqu bula.

Au sa qai taleitaka ga vakalevu na veika vakayalo. Au kila tale ga na levu ni lasu e vakavuvulitaka o lotu. Na dina kei na matata ni ivakavuvuli ena iVolatabu e tarai au vakalevu.

Niu vulica tiko na iVolatabu, au kila kina ni ka talei vei Jiova na bula, e mareqeta tale ga. (Same 36:9) Na ka au kila qori, au biuta kina na veitau motopai ni rawa ni vakaleqa na noqu bula. Au via vakayagataka na noqu bula meu vakacaucautaki Jiova kina. Sa ka wale vei au na rogo, lagilagi kei na talei ni veitau motopai.

Ena 1996, au lai tiko ena dua na soqo cokovata ni veimatanitu ni iVakadinadina i Jiova e Tallinn, mai Estonia, voleka toka ga ena rara au dau veitau motopai kina. Levu era tiko ena soqo cokovata qori era cavutu mai na veivanua, ia era veiyaloni ra qai duavata. Me kena ivakaraitaki, e dua na iVakadinadina yalewa a yali na nona baosi, au nanuma ni sa na sega ni kune. Ia a mani kunea na baosi e dua tale na iVakadinadina qai solia vua e nona, e sega ni yali e dua na ka. Au kurabuitaka sara ga qori! Au sa qai kila nira bulataka na iVakadinadina na ivakatagedegede e volai ena iVolatabu. E toso vinaka na neirau vulica na iVolatabu kei Evija, keirau qai papitaiso me iVakadinadina i Jiova ena 1997.

KENA YAGA:

Eso na noqu itokani era dau veitau motopai era sa mate ni sega ni bibi vei ira na nodra bula. Au sa qai kila ena noqu vulica na iVolatabu niu na saumitaro vua na Kalou o Jiova o koya e solia na bula. E vukei au na kilaka qori meu kua ni vakasabusabutaka na noqu bula.

Keirau kalougata kei Evija ni keirau lai veiqaravi me va na yabaki ena valenivolavola ni tabana ni iVakadinadina i Jiova mai Riga. Ena gauna qo keirau susugi Alise tiko na luvei keirau yalewa qai vakavulici koya me rawa ni dei nona veiwekani kei Jiova. Au kalougata tale ga meu lai cakacaka ena dua na siga e veimacawa ena valenivolavola ni vakadewa ena ripea motoka kei na so tale na ka e ca. Au marautaka dina niu vakayagataka na taledi au vulica niu se gone! Au se sere iyaya tiko ga nikua.

Au raica ni bibi qai dokai me keitou tukuna yani vakavuvale na veika me baleta na Kalou dina, e rawa ga qori ena noqu vulica na iVolatabu. Io, na yalayala me baleta na parataisi e vuravura e veisautaka na noqu bula!