SAUMI NA TARO VAKAIVOLATABU

Cava mo masuta kina me yaco mai na Matanitu ni Kalou?

E tiko mai lomalagi na Matanitu ni Kalou. A uqeti ira gona na nona imuri o Jisu mera masuta me yaco mai, me vakalesuya mai vuravura na lewadodonu kei na sautu. E sega ni dua na matanitu vakatamata e rawa ni vakaotia na itovo voravora, na veivakalolomataki kei na tauvimate, na Matanitu ga ni Kalou. Na Kalou e sa lumuti Luvena o Jisu me Tui ni Matanitu qori. E sa digitaka tale ga o Jiova e dua na ilawalawa era imuri i Jisu mera veiliutaki vata kei koya ena Matanitu qori.​—Wilika Luke 11:2; 22:28-30.

Sa voleka me yavala na Matanitu ni Kalou me vakarusai ira na saqata na veiliutaki ni Kalou. Na noda masuta gona me yaco mai na Matanitu ni Kalou eda sa kerea tiko kina me yaco mai na Matanitu qo me sosomitaka na matanitu vakatamata.​—Wilika Taniela 7:13, 14; Vakatakila 11:15, 18.

Ena yaga vakacava vei keda na Matanitu ni Kalou?

E ganiti Jisu dina me kena Tui ni dau yalololoma. E Luve ni Kalou qai tu tale ga vua na kaukaua me vukei ira era kere veivuke vua na Kalou.​—Wilika Same 72:8, 12-14.

Ena yaga na Matanitu ni Kalou vei ira era masuta vagumatua me yaco mai, e laurai tale ga ena nodra ivakarau ni bula nira cakava tiko na loma ni Kalou. O na sega vakadua ni veivutunitaka nomu vulica na ka e tukuna na iVolatabu me baleta na Matanitu ni Kalou.​—Wilika Luke 18:16, 17; Joni 4:23.