‘Lewa Vinaka Nomu iLakolako’ mo Rawa ni Toso

NIRA biubiu mai Papiloni na dauveiqaravi ni Kalou ena 537 B.S.K., a kauaitaka o Jiova na gaunisala era na muria e Jerusalemi. E tukuna vei ira: “Caramaka na nodra sala na tamata; vakacerea, vakacerea na salatu; biuta tani na vatu.” (Aisea 62:10) Vakasamataka mada nira sa cakava qori na Jiu. De dua a liu e dua na ilawalawa mera ta gaunisala, era buluta na qara ra qai vakatautauvatataka na vanua sukusukura. Qori ena vukei ira na wekadra era muri mai mera yaco ina nodra vanua.

Eda rawa ni vakatautauvatataka qori kei na dua na gaunisala. Ni muri na gaunisala qori ena rawati kina na isausau vakayalo. E vinakata o Jiova mera muria kece na nona dauveiqaravi na sala qori, me kua tale ga ni dua na ka me vakataotaki ira. E vakamasuti keda na Vosa ni Kalou: “Mo lewa deivaka nai lakolako ni yavamu, ia na nomu sala kecega ena vakadodonutaki.” (Vkai. 4:26) Ke mani o gone se qase, e rawa ni yaga vei iko na ivakasala vakavuku qori.

CARAMAKA NA SALA NI O VAKATULEWA VINAKA

De dua o sa dau rogoca na kena tukuni me baleti ira na itabagone: ‘Dua na vanua vinaka ena yacova na gone ya.’ E levu na itabagone era bulabula vinaka, totolo nodra vulica na ka, ra qai vinakata me vakainaki nodra bula. E tukuna vakamatata na iVolatabu: “Sa nodra ka ni lagilagi na cauravou ni ra sa kaukauwa.” (Vkai. 20:29) Na itabagone e vakayagataka na nona taledi kei na nona kaukaua me qaravi Jiova, e rawa ni sauva na isausau vakayalo qai rawata na marau dina.

Nikua, e dau sakitaki vakalevu na ka e rawa nira cakava na itabagone. Ke toso vinaka nona ka ni vuli e dua na tacida itabagone e Koronivuli, e rawa nira vakauqeti koya na qasenivuli, dauniveivakasalataki se nona icaba me tadolova na vuli torocake, nira nanuma ni idewadewa ni rawaka ena vuravura qo. Ke dua na tacida itabagone e kenadau ena qito, era na uqeti koya na dau veidigitaki me saga me dua nona konitaraki. Vakacava o bau sotava ena dua na gauna na ituvaki qori, se o kila e dua e sotava? Na cava ena vukea e dua na lotu vaKarisito me vakatulewa vakavuku?

Na ivakavuvuli vakaivolatabu e rawa ni vukea e dua me muria na sala vinaka duadua. E tukuna na Dauvunau 12:1: “Mo nanumi koya ka Buli iko ni ko sa cauravou tiko.” Na sala vinaka duadua cava o rawa ni ‘nanumi koya kina e buli iko’?

Vakasamataki Erica mada mai na Ra kei Aferika. E taleitaka na qito soka. Ni sa yabaki 15, a digitaki me lewena na timi ni nona vanua. Kena ibalebale sa na voleka me gole e Urope me lai vakaukauayago ena vanua ni veivakarautaki me baleti ira na dauqito, rawa ni dua sara kina nona konitaraki. Ia sa qai yaga vakacava na ivakasala vakaivolatabu me ‘nanumi koya na Dauveibuli?’ Na cava eda rawa ni vulica e ke, se rawa ni vulica o ira na itokani itabagone?

A vulica o Eric na iVolatabu kei ira na iVakadinadina i Jiova ni se vuli tiko. Sa qai mai kila ni na vakaotia vakadua na Dauveibuli na leqa kece ni kawatamata. A kila o Eric ni bibi me vakayagataka nona gauna kei na nona kaukaua me vakayacora kina na loma ni Kalou. Ni vakasamataka tiko na veika ena yaco ena veigauna se bera mai, a vakatulewataka o Eric me kua ni saga na konitaraki ena qito. A mani papitaiso, qai toso sara vakayalo. Ni toso na gauna, a dua sara na dauveiqaravi ni ivavakoso, a qai sureti me lai tikova na Koronivuli ni Vuli iVolatabu ni Tagane Dawai.

Ke saga o Eric me dua na nona konitaraki, de dua ena vutuniyau se rogo. Ia e vakadinata na dina ni ivakavuvuli vakaivolatabu qo: “Ai yau ni tamata vutuniyau sa nona koro kaukauwa, ka sa vakasama ko koya ni sa vaka na bai cecere.” (Vkai. 18:11) Io, e ka ni tadra wale ga na nona nanuma e dua ni na taqomaki koya na nona iyau. O ira tale ga era saga vakaukaua na iyau era dau ‘sualaka na yagodra taucoko ena levu ni mosi.’—1 Tim. 6:9, 10.

Eda marautaka ni levu na itabagone era vakila na vakacegu kei na marau nira veiqaravi vakatabakidua. E tukuna o Eric: “Au sa mai lewena na ‘timi’ levu era lewena na dauveiqaravi vakatabakidua i Jiova. Qori na timi vinaka duadua, au vakavinavinakataki Jiova ni vakaraitaka vei au na sala vinaka duadua meu rawata kina na marau dina, me vakainaki tale ga noqu bula.”

Vakacava o iko? Kua ni tadolova na isausau vakavuravura, ena vinaka mo tekivuna ‘nomu ilakolako’ vei Jiova ena nomu painia.—Raica na kato “Na Veivakalougatataki ena Sega ni Rawati ena Univesiti.”

CARAMAKA NODA SALA

Erau gade e dua na veiwatini ena valenivolavola ni tabana e Merika, erau raica nodra mamarau na vuvale e Peceli era veiqaravi e kea. E vola e muri na tacida yalewa: “Keirau nanuma ni sa totoka na ka keirau cakava tiko.” Erau mani nanuma na veiwatini me rau na vakayagataka na nodrau gauna galala kei na nodrau kaukaua me rau qarava kina eso tale na itavi ni veiqaravi.

A via tarabi toka vei rau na veiwatini na veisau ena vinakati me rau cakava. Dua na siga erau dikeva tiko na tikinivolatabu ni siga ya, qori na Joni 8:31, a tukuna kina o Jisu: “Oni noqu tisaipeli dina ke oni muria tiko ga na noqu vosa.” Ni rau vakasamataka tiko qori, erau kaya: “Na ka kece keirau na cakava me rawarawa kina neirau bula, qori ena yaga vakalevu.” Erau volitaka nodrau vale levu, kauta laivi na ka e rawa ni vakaicolacolataki rau, qai toki ena dua na ivavakoso e vinakati kina vakalevu na veivuke. Erau sa painia tiko, rau veivuke ena tara Vale ni Soqoni, rau dau bolecakacaka tale ga ena soqo ni tikina. Vakacava e yaga vei rau qori? “Keirau drukataka sara ga na marau e vakilai ni rawarawa na noda bula, kei na noda cakava na ka e vinakata na isoqosoqo i Jiova.”

MURIA TIKO GA NA SALA MO TOSO KINA VAKAYALO

E vola o Solomoni: “Me rai vakadodonu yani na matamu, kei na dakudaku-ni-matamu me qaradonu ga kiliu.” (Vkai. 4:25) Me vakataki koya na draiva e vakaraica matua tiko na sala e muria, meda qarauna tale ga me kua ni vakaleqa na noda tekia kei na noda rawata na isausau vakayalo na ka e dau veivakawelei.

Na isausau vakayalo cava o rawa ni tekia qai tadolova? Dua na isausau vinaka na veiqaravi vakatabakidua. Dua tale na noda veiqaravi ena ivavakoso voleka, era rairai vinakata na dautukutuku matua me rawa ni tarai vinaka kina na nodra yalava. Se na rairai tiko ena dua na ivavakoso e levu na dautukutuku matua, ia e sega so ni levu na kena qase se dauveiqaravi ni ivavakoso. Vakacava o rawa ni veivuke ena dua vei rau na ivavakoso qori? Vakacava mo veivosaki kei na ivakatawa ni tabacakacaka mo kila ke o rawa ni veivuke. Ke oni vinakata moni veiqaravi ena vanua vakayawa, o rawa ni kerea eso na itukutuku me baleta na ivavakoso tu yawa era gadreva na veivuke.b

Meda lesu tale mada ena ka e cavuti ena Aisea 62:10. Eso na Jiu era cakacaka vakaukaua me caramaki na gaunisala se vakatautauvatataki vinaka me rawa nira muria na dauveiqaravi ni Kalou nira lesu tiko ina nodra vanua. Mo kua ni soro koso ke o sasaga tiko mo rawata na isausau vakayalo. Ena veivuke ni Kalou, o rawa ni rawata na isausau qori. Mo kerei Jiova tiko ga me solia na vuku ni o saga tiko mo kauta laivi na ka e rawa ni vakataotaka nomu toso. Ni toso na gauna, ena rawa ni vukei iko na Kalou mo ‘lewa deivaki na ilakolako ni yavamu.’—Vkai. 4:26.