Cava me Dikevi Kina na iVolatabu?

IVOLATABU​—DONU ENA ITUKUTUKU MAKAWA

Eroni: Raica, au sega ni dau kauai ena veika vakalotu. Na sega ni yaga nodaru veitalanoa.

Bose: Vinaka na vakaraitaka vakadodonu. O yau o Bose. O kemuni?

Eroni: Eroni.

Bose: Bula vinaka.

Eroni: Bula.

Bose: Au taro mada, oni a susu ena vuvale daulotu?

Eroni: Io. Niu curu ga ena univesiti au sa sega ni qai kauai kina.

Bose: Oi. Cava o vulica ena univesiti?

Eroni: Veika me baleta na bula ni veimaliwai kei na itukutuku makawa. Au dau taleitaka na itukutuku makawa​​—kila na itukutuku ni bula ena gauna makawa sara.

Bose: Totoka vakaoti na lesoni qori. Na iVolatabu tale ga era tu kina na itukutuku makawa. O bau vakadidike kina?

Eroni: Sega. Au kila ni ivola vinaka, au sega ga ni dau raica tu me ivola ni itukutuku makawa.

Bose: Au raica ni sega ni qiqo nomu rai. Ke o galala tiko vakalailai, rawa niu vakaraitaka vei iko e vica na ivakaraitaki ni itukutuku makawa vakaivolatabu era a yaco dina.

Eroni: Sa donu. Ia e sega tu noqu iVolatabu.

Bose: Kua ni leqa. Daru vakayagataka ga na noqu. Kena imatai e tiko ena 1 Veigauna wase 29, tikina e 26 kei na 27. E tukuni kina: “A sa lewa ko Tevita na luve i Jese vei ira kecega na Isireli. Ia na gauna sa lewai ira kina na Isireli sa vasagavulu na yabaki; sa lewa tiko mai Epironi ka yabaki vitu, ka sa lewa tiko mai Jerusalemi ka yabaki tolusagavulu ka tolu.”

Eroni: Donu vakacava na itukutuku makawa qori?

Bose: Dua na gauna era kaya na dauvakalelewa ni a sega ni bula dina o Tui Tevita.

Eroni: E dina? Oi cava era vakatitiqataka kina?

Bose: Na iVolatabu ga e levu kina na ivakadinadina ni a bula dina, sega ni dua tale na vanua. Ia ena 1993 era kunea e dua na ilala dauvakadidike e dua na vatu makawa e volai toka kina na matavosa e kena ibalebale “Vale i Tevita.”

Eroni: Sa dina.

Bose: Dua tale na turaga ena iVolatabu o Ponitio Pailato, a vakatitiqataki ni a bula dina, qo na kovana a veiliutaki tiko ena gauna i Jisu. Volai toka qo na yacana ena Luke wase 3, tikina e 1, kei ira eso tale na vakailesilesi vakamatanitu ena gauna ya.

Eroni: Io. E tukuni kina: “A kovana tiko kei Jutia o Ponitio Pailato, e iliuliu ena yasana o Kalili o Eroti.”

Bose: Vinaka. Vica na yabaki nodra vakatitiqataka tu eso na vuku ni a bula dina o Ponitio Pailato. Ia rauta ni 50 na yabaki sa oti, a kune e dua na vatu ena Tokalau e Loma qai ceuti tu kina na yacana.

Eroni: Hmm. Vou vei au itukutuku qo.

Bose: Marau ni daru veitalanoataka qori.

Eroni: Meu vakaraitaka ga vakadodonu, au dau doka na iVolatabu ni ivola ga ni italanoa, au sega ga ni raica e dua na kena yaga ena noda gauna qo. Rairai tu kina na itukutuku makawa era dina, ia noqu rai ni sega ni yaga.

NA IVOLATABU​—MAKAWA IA SE YAGA TIKO

Bose: Levu e va qori nodra rai. Ia o yau, e sega. Meu vakamacalataka mada na vuna. Sega ni veisau na ka eda dau gadreva e veisiga. Kena ivakaraitaki, eda dau gadreva na kakana, isulu kei na vale. Eda dau via veimaliwai tale ga, da vinakata na bula marau vakavuvale. Vakacava sega ni bibi vei keda na ka kece qori?

Eroni: Io dina taucoko.

Bose: Rawa sara ga ni vukei keda na iVolatabu ena veika kece qori. Eda na rairai kaya ni sa ivola makawa sara ia se yaga tiko nikua.

Eroni: E yaga vakacava?

Bose: Vakasamataka tale mada qo: Era tu ena iVolatabu na ivakavuvuli veiganiti era yaga nikua me vaka ga na veisenitiuri sa sivi.

Eroni: iVakavuvuli cava?

Bose: Nida vinakata meda vakayagataka vakavuku na ilavo se me bula marau noda vuvale se meda itokani vinaka, e rawa sara ga ni dusimaki keda na ivakavuvuli vakaivolatabu. E vaka e dua na mape me dusimaki keda ina vanua meda yaco yani kina. Vakacava, o dau vakila ni sega ni rawarawa nomu saga mo tagane vakawati vinaka se tama nuitaki nikua?

Eroni: Io au duavata kei iko ena tikina qori. Sa dua na yabaki noqu bula vakawati, vaka ga me dau dredre toka me keirau duavata vakaveiwatini ena so na ka.

Bose: Dau yaco ga eso na ka va qori. Ia e tu ena iVolatabu na ivakavuvuli rawarawa qai yaga. Kaya mada na Efeso wase 5. Daru wilika na tikina e 22, 23, kei na 28. O taleitaka mo wilika?

Eroni: Io. E kaya: “Mera vakarorogo vei watidra na yalewa me vaka na nodra vakarorogo vua na Turaga, ni o tagane e ulu i watina me vaka ga ni ulu tale ga ni ivavakoso na Karisito, o koya na ivakabula ni yago qo.” Tukuni ena tikina e 28: “E dodonu gona vei ira na tagane mera lomani watidra me vaka ga nodra lomana na yagodra. O koya e lomani watina e lomani koya.”

Bose: Vinaka. Ke ra saga na veiwatini mera muria na ivakasala rawarawa qori, ena vinaka na bula vakavuvale, se vakacava?

Eroni: Io, de dua. Dau rawarawa tu ga na kena tukuni, kena muri sa bau va toka ya.

Bose: Io, baleta nida sega ni uasivi kece. Na wase tiko ga qori e veiuqeti e dua na tikina meda dau yalorawarawa.a Vinakati ena bula vakawati mera dau veinanumi ra qai yalorawarawa na veiwatini. Na iVolatabu e vukei keirau vakaveiwatini me keirau cakava qori.

Eroni: Vakavure vakasama na tikina qori.

Bose: Sa tu tale ga ena neimami Web site na iVakadinadina i Jiova na ivakasala yaga me baleta na bula vakawati kei na bula vakavuvale. Taleitaka meu vakaraitaka vei iko vakalekaleka.

Eroni: Donu.

Bose: Vinaka. Na yaca ni Web site qo na www.pr2711.com. Raica mada.

Eroni: Totoka na itaba qori.

Bose: Qori na itaba ni cakacaka vakaitalatala keimami cakava tiko e vuravura. Toka sara qo na vanua me daru na rai kina. Daru raica mada na laibri, qai vaqarai kina na ulutaga me baleta na vakawati, taipataka ga e ke, ena qai vakaraitaka vei iko e levu na ulutaga ni vakawati. Dua o taleitaka?

Eroni: Io. “iVakasala Yaga Vei Ira na Veiwatini.” Ena rawa ni yaga vei au qori!

Bose: Era tu ena ulutaga qo na ivakasala yaga vakaivolatabu mo marautaka kina nomu bula vakawati. Raica mada na parakaravu qo. Taleitaka mo wilika?

Eroni: Io. E kaya: “Ia, era na doka vakacava na watidra o ira na tagane vakawati? Me dokai na yalewa e kena ibalebale me lomani qai rokovi.” Totoka vakaoti na ivakamacala qo.

Bose: Vinaka. Dua tale na tikinivolatabu e toka qo e cake. Rawa ni o wilika mada mai?

Eroni: Io, na Efeso 5:​22, 25. E kaya: “Oi kemudou na yalewa vakawati, mo dou dui vakamalumalumutaki kemudou vua na watimudou, me vaka vei koya na Turaga. Oi kemudou na tagane vakawati, lomani ira na watimudou.”

Bose: Raica rawa ni tiko na ka me rau cakava ruarua?

Eroni: Cava ya?

Bose: Macala ga nida dau vinakata na tagane mera vakamalumalumu vei keda na watida. O ira tale ga na watida era dau vinakata meda lomani ira vakalevu, se vakaevei?

Eroni: Io. Dina taucoko.

Bose: Ke da dau qara na tagane vakawati na sala meda vakaraitaka kina noda lomani watida, ena rawarawa sara nodra dokai keda.

Eroni: Io rawa ni dina qori.

Bose: Se volai sara na tikinivolatabu qo ena rauta na 2,000 na yabaki sa oti, ia e tiko kina na ivakasala yaga vei ira na veiwatini, ena yaga ke muri vaka ga daru sa wilika oti mai “me dokai na yalewa e kena ibalebale me lomani qai rokovi.”

Eroni: Sega sara ga ni dau va qori noqu rai me baleta na iVolatabu.

Bose: Marau ni o sa bau kauai kina. Au na vinakata me daru mai sota tale e ke me daru veitalanoataka na ka o wilika ena ulutaga qo “iVakasala Yaga Vei Ira na Veiwatini” e tiko ena Web siteb ni iVakadinadina i Jiova.

Eroni: Io. Keirau na wilika sara ga vakaveiwatini.