E Kauaitaki Iko Na Kalou?

E dodonu beka vei Tevita me namaka ni na kauaitaki koya na Kalou? Vakacava e kauaitaki iko na Kalou? E levu era sega ni vakabauta ni kauaitaki ira e dua na Kalou kaukaua. Na vuna?

Kena imatai, ni kabula o koya qai cecere vei keda na tamata. Ni rai mai na nona itikotiko tabu, era “vaka e dua na mata ni wai e nai takitaki, ka vaka na kuvu-ni-soso e na dari ni vakarau” na veimatanitu. (Aisea 40:15) E kaya e dua na dauvolaivola e dauveivakadiloi tale ga, e “ka vakalialia me vakabauti ni tiko e dua na Kalou e kauaitaki iko, e kauaitaka tale ga na veika o cakava.”

Kena iKarua, eso era nanuma ni na sega ni kauaitaki ira na Kalou ena vuku ni nodra ivalavala. Kena ivakaraitaki, e kaya e dua na turaga o Jim: “Au dau masulaka meu kua ni yalototolo meu lewai au vakamatau, ia e levu na gauna au dau cudru. Au mani vakasamataka niu tamata ca qai sega tu ga ni rawa vua na Kalou me vukei au.”

Vakacava e yawaki keda na Kalou me sega kina ni kauaitaki keda? Cava nona rai me baleti ira nona bulibuli sega ni uasivi? Ke sega ni vakavulici keda na Kalou ena veika me baleti koya, ena sega ni dua e rawa ni vosa ena vukuna se me sauma na veitaro qori. E vakadeitaka vei keda na vosa uqeti vakalou na iVolatabu ni sega ni yawa na Kalou vei keda, e kauaitaki keda yadudua tale ga. E tukuna “ni sega ni yawa o koya vei keda yadua.” (Cakacaka 17:27) Eda na dikeva ena va na ulutaga tarava na ka e tukuna na Kalou me baleta nona kauaitaki keda kei na sala e vakaraitaka kina.