“Vakasamataka Sara Vakabibi”

“Sa dodonu kina me da vakasamataka sara vakabibi na veika e da a sa rogoca oti me da kakua kina ni lako sese.”​—IPERIU 2:​1, VV.

1. Vakamacalataka se yaco vakacava na vakacalaka nida oga ena so tale na ka.

ERA mate e veiyabaki e rauta ni 37,000 na tamata e Mereke ena vakacalaka e gaunisala. Era kaya na kenadau ni a rawa mera bula e le levu kevaka wale ga era vakasama vinaka na draiva. So era vakaogai ira nira wilika na veika e volai tu e yasa ni gaunisala se nira talevoni tiko. So era dau kana nira draiva tiko. E laurai ena vakacalaka oqori nira oga na draiva ena so tale na ka.

2, 3. Na ivakasala cava e solia o Paula vei ira na Jiu lotu Vakarisito? Na cava e veiganiti kina?

² Ni se vo e 2,000 na yabaki me qai buli na motoka, sa cavuta na yapositolo o Paula e dua na ka e veivakaogai a vakaleqai ira tiko e so na Jiu lotu Vakarisito. A vakabibitaka o Paula na kena soli vei Jisu Karisito vakaturi oti na itutu e uasivi ira na agilosi, sa dabe tale tiko ga ena liga imatau ni Kalou. Qai kaya na yapositolo: “O koya gona sa dodonu kina me da vakasamataka sara vakabibi na veika e da a sa rogoca oti me da kakua kina ni lako sese.”​—Iperiu 2:​1, VV.

³ Na cava e vinakati kina vei ira na Jiu lotu Vakarisito mera ‘vakasamataka sara vakabibi na veika era rogoca’ me baleti Jisu? Sa voleka ni 30 na yabaki nona biuti vuravura o Jisu. Ni sa yali na nodra iliuliu, era sa tekivu biuta tiko na vakabauta dina e so na Jiu lotu Vakarisito. Sa dreti ira tale tiko na nodra lotu makawa, na lotu Vakajiu.

Dodonu Mera Vakasamataka Vakabibi

4. Na cava beka e dreti ira e so na lotu Vakarisito mera suka ina lotu Vakajiu?

⁴ Na cava beka e dreti ira tale na lotu Vakarisito ina lotu Vakajiu? E laurai votu na ivakarau ni sokalou e yavutaki ena Lawa. E rawa vei ira na tamata mera raici ira na bete ra qai boica na vakamai ni isoro. E duidui sara na lotu Vakarisito. E nodra Bete Levu o Jisu Karisito, ia sa 30 na yabaki na nona sega ni laurai e vuravura. (Iperiu 4:​14) E tiko nodra valenisoro, ia e tiko mai lomalagi na kena tikina tabu. (Iperiu 9:​24) Me duidui mai na veicilivi vakayago, e ‘cilivi na yalona’ na lotu Vakarisito. (Roma 2:​29, VV) Ena rawa gona ni vaka e buawa vua na Jiu lotu Vakarisito na lotu Vakarisito dina.

5. E vakaraitaka vakacava o Paula ni sokalou e tauyavutaka o Jisu e uasivia na kena e vauci ena Lawa?

⁵ A vinakati vei ira na Jiu lotu Vakarisito mera kila e dua na ka bibi me baleta na sokalou e tauyavutaka o Karisito. E yavutaki ena vakabauta, sega ni veika e laurai, e uasivia tale ga na Lawa e soli vei Mosese na parofita. E vola o Paula: “Ia kevaka sa vakasavasavataka ka sa vuya na duka ni yagodra na tamata na kena kureitaki vei ira na dra ni me kei na bulumakau kei na dravusa ni bulumakau yalewa gone, sa na qai wacava li na dra i Karisito! Ni a vakacabori koya vua na Kalou na Karisito e na Yalo Tabu tawa mudu e na nona savasava taucoko. Ia na nona dra e na vakasavasavataka na noda lewa e loma mai na veicakacaka tawa yaga me da qarava kina na Kalou bula.” (Iperiu 9:​13, 14, VV) Io, na vosoti ni ivalavala ca ena vuku ni isoro i Jisu Karisito e uasivi sara mai na isoro e vakacabori e vakaroti ena Lawa.​—Iperiu 7:​26-​28.

6, 7. (a) Na cava sa yaco tiko e vinakati kina vei ira na Jiu lotu Vakarisito mai Jerusalemi mera ‘vakasamataka sara vakabibi na veika era rogoca’? (b) Sa vo e vica na yabaki me vakarusai o Jerusalemi ena gauna e vola kina o Paula nona ivola vei ira na Iperiu? (Raica na ivakamacala e ra.)

⁶ E dua tale na vuna e vinakati kina vei ira na Jiu lotu Vakarisito mera vakasamataka vakabibi na veika era rogoca me baleti Jisu. E parofisaitaka ni na vakarusai o Jerusalemi. Kaya o Jisu: “Ni na yaco mai na siga, ena viribaiti iko kina ko ira na nomu meca, ka buku druadrua ka sogolati iko e na veiyasana kecega, ka na vakalolovirataki iko kira, kei ira na luvemu e na kemu maliwa, ka na sega ni vo vei iko na veivatu me veitaqataqai; ni ko sa sega ni kila na gauna ko sa lakovi kina.”​—Luke 19:​43, 44.

⁷ Ena yaco ni naica? E sega ni tukuna o Jisu na kena siga kei na aua. Ia, e veivakaroti ga: “Ni dou sa raica sa buku na druadrua mai Jerusalemi e na mataivalu eso, dou kila kina ni sa qai voleka na kena ca sara: me qai dro ki na veiulu-ni-vanua ko ira era sa tiko e Jutia; ia ko ira sa tiko eloma me ra lako tani yani; me kakua talega ni curu mai kina ko ira sa tiko e na veiyasana ki vanua.” (Luke 21:​20, 21) Oti e 30 na yabaki mai na gauna e cavuta kina na vosa oya o Jisu, era sa sega ni nanamaki e so na lotu Vakarisito baleta ni sa vakawelei ira e so tale na sasaga. E vaka era sega ni raica na gaunisala nira draiva tiko. Ke ra sega ni veisautaka na nodra rai, era na sotava na leqa. Se era nanuma mera veisau se sega, sa voleka sara na gauna me vakarusai kina o Jerusalemi!a E vakabauti ni a vakayadrati ira na lotu Vakarisito mai Jerusalemi era moce tu vakayalo na ivakasala oya i Paula.

“Vakasamataka Sara Vakabibi” Nikua

8. Na cava meda “vakasamataka sara vakabibi” kina na veika dina ni Vosa ni Kalou?

⁸  E vinakati tale ga meda “vakasamataka sara vakabibi” na veika dina ni Vosa ni Kalou, me vakataki ira na lotu Vakarisito ena imatai ni senitiuri. Baleta? Sa vakarau cabolo tale ga oqo e dua na veivakarusai, sega ni vakarusai ga kina e dua na matanitu, ena rusa kina na ivakarau ni veika kece. (Vakatakila 11:18; 16:​14, 16) Ia, eda sega ni kila ga na siga kei na aua ena veivakarusai kina o Jiova. (Maciu 24:36) Eda raica votu tiko na kena vakayacori na parofisai ena iVolatabu e vakaraitaka nida sa bula tiko ena “iotioti ni veisiga.” (2 Timoci 3:​1-5, NW) Meda qarauna gona me kua ni dua na ka e vakacalai keda. Meda vakasamataka tiko ga na Vosa ni Kalou da qai yadra tiko me rawa kina nida “bula mai na ka kecega oqo ena yaco mai.”​—Luke 21:36.

9, 10. (a) Eda vakaraitaka vakacava nida kauaitaka na veika vakayalo? (b) E rawa vakacava me ‘rarama ina noda sala’ na vosa ni Kalou, e ‘cina ni yavada’ vakacava?

⁹ E rawa vakacava meda “vakasamataka sara vakabibi” na veika vakayalo ena gauna lewalewai dredre oqo? Meda dau tiko wasoma ena soqoni vakarisito, soqo ni tabacakacaka, kei na soqo ni tikina. Meda vulica vagumatua na iVolatabu me rawa kina nida veivolekati kei koya e vakavuna, o Jiova. (Jemesa 4:8) Ke torocake tiko noda kilai Jiova ena noda vuli vakataki keda kei na noda dau tiko ena soqoni, eda na vakataki koya na daunisame e kaya vua na Kalou: “A nomuni vosa na cina ki na yavaqu, kei na rarama ki na noqu sala.”​—Same 119:105.

¹⁰ E vaka na ‘rarama ina noda sala’ na iVolatabu ni vakaraitaka na veika e baleta na bula e se bera mai. E ‘cina tale ga ni yavada.’ E rawa tale ga ni dusia na ka meda cakava tarava nida sotava na bula dredre. Oya na vuna e vinakati kina meda “vakasamataka sara vakabibi” na veika eda vulica nida soqoni kei ira eda vakabauta vata, vaka kina nida wilika vakataki keda na Vosa ni Kalou. Na veika eda vulica oqo ena vakavukui keda meda vakatulewa vinaka me marau kina na loma i Jiova. (Vosa Vakaibalebale 27:11; Aisea 48:17) E rawa nida toroya cake vakacava na dede ni noda vakarorogo ena gauna ni soqoni kei na noda vuli vakataki keda me rawa ni yaga vinaka vei keda na isolisoli vakayalo ni Kalou?

Me Vinaka Cake Noda Vakarorogo ena Soqoni

11. Na cava e ka ni bolebole kina na noda vakarorogo vinaka ena gauna ni soqoni vakaivavakoso?

¹¹ So na gauna e dau ka ni bolebole noda vakarorogo vinaka ena soqoni. E rawa ni vakaleqa noda vakarorogo vinaka nira tagi na gone se nira vaqara idabedabe tiko na bera mai. Rawa tale ga nida oca baleta nida a cakacaka ena siga taucoko. De se sega ni matau ena vosa o koya e vunau tiko mai, me vakavuna me ciriyawa noda vakasama se da sosovu sara. Ni rui bibi na veika e dau tukuni mai, ena vinaka meda saga vakaukaua meda vakarorogo vinaka ena gauna ni soqoni vakaivavakoso. Na cava e rawa meda cakava?

12. Na cava ena vakarawarawataka noda vakarorogo vinaka ena gauna ni soqoni?

¹² Ena rawarawa noda vakarorogo vinaka ena gauna ni soqoni ke da vakavakarau vinaka. Vakacava meda vakayagataka e so na gauna meda vakasamataka kina na veika ena veivosakitaki? E taura ga e vica na miniti na wiliki kei na vakasamataki ni wase ni iVolatabu e wiliki ena loma ni macawa. Ke da tuvana vinaka na noda gauna ena rawa tale ga meda vakarautaka na Vuli iVola ni iVavakoso kei na vulici ni Vale ni Vakatawa. Se mani ituvatuva cava eda tuvana, oqo ga na ka e bibi: Ena rawarawa noda vakarorogo vinaka ena gauna ni soqoni ke da vakavakarau vinaka.

13. Na cava e rawa ni vukei keda meda rogoca vinaka na veika e tukuni ena soqoni?

¹³ Me ikuri ni vakavakarau vinaka, e so era dau lai dabe ena vica na iyatu ni idabedabe e liu me rawa kina nira vakarorogo vinaka. Nida raica sara tiko ga na mata i koya e vunau, da wilika tale ga na tikinivolatabu e wilika, da qai toqa e so na ka e tukuna ena dredre kina ni ciriyawa noda vakanananu. Ia, e bibi cake noda vakarautaka na lomada mai na so tale na ivukevuke ni vakarorogo vinaka. Me matata vinaka vei keda na inaki ni noda dau soqoni. Eda soqoni tale ga kei ira eda vakabauta vata ni oya e noda sokalou vei Jiova. (Same 26:12; Luke 2:​36, 37) Eda dau vakani vakayalo ena gauna ni soqoni. (Maciu 24:​45-​47) E rawa tale ga meda “veivakauqeti kina e na loloma kei na cakacaka vinaka.”​—Iperiu 10:​24, 25, VV.

14. Na cava e vakavuna me yaga na soqoni?

¹⁴ So era vakatautaka na vinaka ni soqoni mai na ivakarau ni nodra veivakavulici na vakaitavi. Kevaka era veivakavulici vinaka o ira na vakaitavi, e vakatokai na soqoni oya me soqoni vinaka. Ia kevaka e sega era sega ni taleitaka na soqoni. E dodonu mera vakayagataka na iwalewale ni veivakavulici vinaka o ira na vakaitavi ena porokaramu me rawa kina nira tara na lomadra na vakarorogo. (1 Timoci 4:​16) Ia, meda kua ni veivakalewai na vakarorogo. Dina ni bibi na ivakarau ni nodra veivakavulici na vakaitavi, ia e sega ni vakatau duadua kina na yaga ni soqoni. Eda sega li ni vakadinadinataka ni bibi cake meda kauaitaka na ivalavala ni noda vakarorogo, mai na ivakarau ni nona vosa e dua e vakaitavi? Nida tiko ena soqoni da qai vakarogoca vinaka na veika e tukuni, eda sa sokalou tiko ena sala e vakadonuya na Kalou. Oya sara ga na yaga ni soqoni. Ke da gadreva dina meda kila na Kalou, eda na taleitaka na soqoni, veitalia ke ra sega sara ni maqosa na vakaitavi. (Vosa Vakaibalebale 2:​1-5) Meda saga gona meda “vakasamataka sara vakabibi” na veika eda rogoca ena soqoni.

Me Yaga Noda Vuli Vakataki Keda

15. E vukei keda vakacava na vuli vakataki keda kei na noda vakasamataka na ka?

¹⁵ Ena yaga vakalevu noda ‘vakasamataka sara vakabibi na veika’ eda vulica nida vuli vakataki keda da qai vakasamataka na veika eda vulica. Nida vakasamataka na veika eda wilika ena iVolatabu kei na ivola vakaivolatabu, oqo ena rawa ni vakadeitaka i lomada na veika dina mai na Vosa ni Kalou. Ena vakilai tale ga ena ivakarau ni noda rai kei na ka eda cakava. Eda na marautaka tale ga noda cakava na loma i Jiova. (Same 1:2; 40:8) E dodonu gona meda toroya cake na ivalavala ni noda kauai me rawa kina nida tauca na yaga ni noda vuli. Ia, e sega ni ka rawarawa oya! E so na veika lalai me vaka na vosa ena talevoni se na irorogo e so e rawa ni vakaleqa na noda kauai. Se eda sega ga ni dau rawa ni vuli vakataki keda vakadede. Eda via kania dina na kakana vakayalo, ia sega ga ni dede sa ciriyawa noda vakanananu. E rawa vakacava meda ‘vakasamataka sara vakabibi na veika’ eda vulica vakataki keda ena Vosa ni Kalou?

16. (a) Na cava e bibi kina me dua noda ituvatuva ni vuli vakataki keda? (b) O wasea vakacava na gauna mo vulica kina na Vosa ni Kalou?

¹⁶ Ena vinaka me dua noda ituvatuva ni vuli da qai digitaka vinaka na gauna meda vuli kina. E levu vei keda sa lailai sara ga na gauna eda vakayagataka vei keda. E kuitaki keda na ogaoga ni veisiga me vaka ga e kuitaka na uciwai kui e dua na tabanikau lailai. E dodonu meda saqata na kui oya me rawa kina nida wasea e so na gauna meda vuli vakataki keda kina. E sega ni rawa meda waraka me qai basika ga mai na gauna ni vuli. Meda wasea tani sara ga na gauna ni noda vuli vakataki keda. (Efeso 5:​15, 16) E so era vuli ena matakacaca baleta e se lailai kina na veivakasosataki. So era kaya ni vinaka cake ena bogi. E rui bibi meda kua ni taura vakamamada na kena vinakati meda vulici rau na Kalou kei Luvena. (Joni 17:3) Meda navuca gona na gauna ni noda vuli vakataki keda da qai muria vinaka na noda ituvatuva.

17. Na cava na vakasamataka vakatitobu na ka, e yaga vakacava vei keda?

¹⁷ E yaga sara vakalevu na noda vakasamataka vakatitobu se vakasamataka lesu na veika eda vulica. E vukea noda tokitaka na vakasama ni Kalou mai na ivola ki na lomada. E vukei keda tale ga meda raica se eda na bulataka vakacava na ivakasala ena iVolatabu me rawa kina nida “muria na vosa ka kakua ni rogoca walega.” (Jemesa 1:​22-​25) Eda na volekati Jiova tale ga kevaka eda dau vakasama vakatitobu, ni rawa meda vakasamataka na nona itovo kei na kena vakabibitaki ena tikina eda vulica tiko.

18. Na cava e vinakati meda qai rawa kina ni vakasama vakatitobu?

¹⁸ Me yaga dina na noda vuli vakataki keda kei na noda vakasama vakatitobu, meda saga me kua ni osooso na noda vakasama. Me rawa nida qai ciqoma e so na itukutuku vou nida vakasamataka vakatitobu, e dodonu meda kua tale ni vakasamataka ena gauna oya na veika e baleta noda bula e veisiga. E vinakati kina na gauna kei na noda tiko duadua baleta ni veivakacegui dina noda kania na kakana vakayalo kei na noda gunuva na wai ni ka dina mai na Vosa ni Kalou.

19. (a) Na cava e vukei ira e so me dede nodra vuli vakataki ira? (b) Me vakacava na noda raica na vuli oqo, e yaga vakacava vei keda?

¹⁹ Vakacava ke dau lekaleka na gauna ni noda kauai baleta ni dau ciriyawa noda vakasama ni se sega ni dede na noda vuli? So era navuca me lekaleka ga na gauna ni nodra vuli ra qai vakabalavutaka tiko vakamalua. E noda inaki meda vakayagataka vinaka na gauna ni vuli, meda kua ni vakusakusataka ga. Meda saga meda taleitaka dina na veika eda vulica. Meda vakekeli tale ga ena ivola era sa bini tu oqo e tabaka na ilawalawa dauveiqaravi yalodina ka vuku. Ena yaga dina na noda dikeva na “veika titobu ni Kalou.” (1 Korinica 2:​10) Oqo ena kuria na noda kila vinaka na Kalou qai vukei keda tale ga meda dau vakavulica na lomada. (Iperiu 5:​14) Nida vulica vagumatua na Vosa ni Kalou, ena qai ‘rawa meda vakavulici ira na tani.’​—2 Timoci 2:​2, VV.

20. E rawa vakacava me dei tiko ga na noda veiwekani voleka kei na Kalou o Jiova?

²⁰ Noda dau tiko ena soqoni vakarisito kei na noda vuli vakataki keda ena vukea vakalevu me dei tiko ga na noda veiwekani voleka kei Jiova. E vakadinadinataka oqori na daunisame ni a kaya vua na Kalou: “A ka vakaidina na noqu loloma ki na nomuni vunau! Au sa vakanananu kina e na siga taucoko ka bogi.” (Same 119:97) Meda saga vakaukaua gona meda dau tiko ena soqoni, soqo ni tabacakacaka, kei na soqo ni tikina. Meda volia tale ga na gauna meda vulica kina na iVolatabu da qai vakasamataka vakatitobu. Eda na tauca na kena yaga baleta nida “vakasamataka sara vakabibi” na Vosa ni Kalou.

[iVakamacala e ra]

O se Nanuma?

• Na cava era biuta kina na vakabauta dina e so na Jiu lotu Vakarisito?

• E rawa vakacava meda vakarorogo vinaka ena soqoni vakarisito?

• Na cava ena vukea me yaga noda vuli iVolatabu vakataki keda kei na noda vakasama vakatitobu?

[iYaloyalo ena tabana e 11]

Vinakati vei ira na Jiu lotu Vakarisito mera yadrava tiko na kena vakarau rusa o Jerusalemi

[iYaloyalo ena tabana e 13]

Mera vukei luvedra na itubutubu me rawa ni yaga vei ira na soqoni vakarisito