iTalanoa ni Nona Bula

Sa Qai Duavata na Neitou Vuvale!

TALANOATAKA O SUMIKO HIRANO

Au sa qai kunea na bula vinaka duadua, au gadreva me keirau marautaka vata kei watiqu. Ia e taura e 42 na yabaki me qai yaco na gagadre oqo.

KEIRAU vakamau kei watiqu ena 1951, niu sa yabaki 21. Ena loma ga ni va na yabaki rau sucu kina na luvequ tagane, e vaka au sa marautaka dina tiko na noqu bula.

Ena dua na siga ena 1957, a tukuna vei au o tuakaqu ni dau sikovi koya tiko e dua na daukaulotu ni iVakadinadina i Jiova. E lotu Buda o koya, ia sa vulica tiko na iVolatabu kei na daukaulotu o tuakaqu qai uqeti au meu vulica tale ga na iVolatabu. Au vakadonuya. Niu lewena tiko e dua na lotu Vukitani, au na rawa ni dusia e so na ivakavuvuli au nanuma nira cala kina na iVakadinadina i Jiova.

Ia au qai raica ga ni lailai dina na ka au kila me baleta na iVolatabu. E tini sara ena noqu taroga na daukaulotu, “O cei o Jiova?” Au se sega ni bau rogoca ni vakayagataki na yaca oya ena noqu lotu. Na daukaulotu oya, o Daphne Cooke (qai veisau na yacana me Pettitt), e dusimaki au ina Aisea 42:​8, e tukuni vakamatata kina ni yaca ni Kalou Kaukaua Duadua o Jiova. E dau vakayagataka na iVolatabu o Daphne me sauma kece noqu taro.

Au taroga na noqu italatala na taro kece oya. E tukuna vei au: “Na vakatataro e ivalavala ca. Vakabauta ga na ka e tukuni vei iko.” Au sega ni raica ni cala na vakatataro. Ena loma ni ono na vula e tarava, au dau lai lotu ena noqu lotu ena veimataka ni Sigatabu ia ena yakavi au dau lako ina nodra soqoni na iVakadinadina i Jiova.

Tara na Noqu Vakawati

Au marautaka dina na veika au vulica tiko ena iVolatabu, au vakaraitaka tale ga vei watiqu o Kazuhiko. Au dau tukuna kece vua na veika au vulica ena vuli iVolatabu kei na soqoni. Ia sa vaka e viria vei keirau e dua na ilati. E sega ni vinakata o koya meu iVakadinadina i Jiova. Ia ena levu ni noqu marautaka na vulica na iVolatabu au tomana tiko ga na noqu vuli kei na noqu veimaliwai kei ira na iVakadinadina.

Ni bera noqu lako ina soqoni ena bogi, au dau vakarautaka na kakana e dau taleitaka o Kazuhiko me kena ivakayakavi, ia e qai dau lai kana e valenikana. Niu suka mai ena soqoni, sa dau rarawa tu o koya qai sega ni via vosa vei au. E dau taura e rua se tolu na siga me seavu na nona yaloca, ia sa donuya tale na siga ni soqoni e tarava.

Donuya na gauna oqo e tauvi au na mate ni gacagaca, na mate e vakavuna mera leqa e vica na weka i watiqu. E lomaleqa dina o Kazuhiko, e tukuna vei au ni gauna ga au bula kina, ena rawa meu cakava na ka ga au vinakata. Au kerea ga vua me kua ni tarovi au ena noqu lako ina soqoni e veimacawa. E vakadonuya o koya.

E taura e ono na vula meu bula vinaka tale, au vulica sara vakaukaua na iVolatabu ena loma ni gauna oya. Au tovolea meu vakacala na nodra ivakavuvuli na iVakadinadina, niu lalawataka niu na muduka na noqu vuli kevaka au kunea e dua ga na ivakavuvuli lasu. Au sega ni kunea e dua. Sa qai votu ga vakalevu na cala ni lotu Vukitani. Au mai kila ga na loloma kei na dodonu i Jiova kei na yaga ni noda muria na nona lawa.

Niu sa bula mai na tauvimate, e dei o watiqu ena nona vosa ni yalayala me kua ni tarova na noqu lako ina soqoni. Au kaukaua cake tiko ga vakayalo me yacova niu papitaiso meu iVakadinadina i Jiova ena vula o Me ni 1958. Au diva me ratou tomani au na noqu vuvale me keitou qarava vata na Kalou dina.

Vukei Rau Vakayalo na Luvequ

Rau dau tomani au ina soqoni kei na cakacaka vakavunau na luvequ, ia au vakila ni sa torocake tiko na nodrau kila na iVolatabu niu rogoca e so na ka erau kaya. Ena dua na siga, a qito tiko e tuba na luvequ yabaki ono o Masahiko. Au rogoca e dua na ka e katuvu kei na domo ni kaila. E cici mai loma ni neitou vale e dua keitou tiko veivolekati qai kacivaka mai ni coqai luvequ na motoka. E se bula beka? Au saga vakaukaua meu kua ni taqaya ena gauna au cici kina i tuba. Au sautaninini niu raica na kakalobilobi ni basikeli, ia ni oti ga oya au raici luvequ sara ni sa lako tiko mai qai mavoa ga vakalailai. E kaya ni kubeti au, “Na, e vakabulai au o Jiova.” Au tagi niu rogoca na vosa oya kei na noqu raica ni se bula tiko.

Ni keirau cakacaka vakavunau tiko kei luvequ ena dua na siga, e karaci au e dua na kena turaga ena nona kaya: “Na cava o kauta voli mai kina e dua na gone lailai? Au rui lomani koya.” Ni bera niu sauma na vosa oya, sa kaya cake mai na luvequ yabaki walu o Tomoyoshi: “Tukaqu, e sega ni vakasaurarataki au o tinaqu meu mai vunau. Au vunau tiko baleta niu via qaravi Jiova.” E ga balavu na kena turaga oya ni sega ni tukuna rawa e dua na ka.

Ena rai vakayalo, e vaka erau luveniyali na luvequ. A vakatau vei au na nodrau vulica na ka dina mai na iVolatabu, dina ga ni levu tale ga na ka e vinakati meu vulica. Au vakaitovotaki au ena loloma, vakabauta, kei na lomakatakata au qai tovolea meu ivakaraitaki vinaka. Au vakavinavinaka e veisiga vei Jiova ni rau vakarorogo tu na luvequ. Au talanoataka vei rau na ka au sotava ena cakacaka vakavunau. Oqo e vakauqeti rau. Ni rau qai tarogi se cava erau painia kina, se dauvunau vakatabakidua ni iVakadinadina i Jiova, erau sauma, “Keirau raica ni marautaka o tina i keirau na cakacaka vakapainia, keirau via marau tale ga.”

Au dau qarauna vinaka meu kua ni vosa beci tamadrau se dua na lewe ni ivavakoso. Au raica rawa ni na vakaleqai rau na luvequ na vosa e veivakacacani. Ena rawa me rau sega ni dokai koya e tauci vua na vosa kei koya e tauca na vosa.

Wali na Leqa e Tarova na Toso

Ena 1963 e toki keitou i Taiwan na cakacaka nei watiqu. E tukuna vei au o watiqu ni na vakavu leqa kevaka au vunau vei ira na kai Japani e kea. Ena rogo ca kina na nona kabani, keitou na vakau lesu tale i Japani. E vinakata me keitou yawaki ira na iVakadinadina.

Era kidavaki keitou na mataveitacini e Taiwan. E vakayagataki na vosa vakaJaina ena gauna ni soqoni. Au vulica na vosa vakaJaina meu rawa kina ni vunau vei ira na lewenivanua e kea, meu kua kina ni vunau vei ira na kai Japani. Au na levea kina na leqa e tukuna o watiqu.

E vakaukauataki keitou na neitou veikilai kei ira na iVakadinadina e Taiwan. Rau vukei keitou vakalevu e dua na veiwatini daukaulotu o Harvey kei Kathy Logan. E yaco o Brother Logan me vaka e tamadrau vakayalo na luvequ. E vakaraitaka vei rau ni marautaki na qaravi Jiova, e sega ni veivesuki. Au vakabauta ni rau vakatulewataka na luvequ me rau qaravi Jiova ena gauna keitou tiko kina mai Taiwan.

Rau vuli o Tomoyoshi kei Masahiko ena dua na koronivuli ni Mereke, rau vulica kina na vosa vakavalagi kei na vosa vakaJaina. Na vuli oya e vakaiyaragitaki rau me rau italatala ni Kalou dina, o Jiova. Au vakavinavinakataki Jiova ena nona veisautaka me gauna marautaki na gauna ke a rawa ni dredre sara vei keitou. Keitou suka vakaveiluveni i Japani ni oti e tolu veimama na yabaki guiguilecavi dredre mai Taiwan.

Erau sa itabagone na luvequ, rau sa via lewai rau ga. Au vakayagataka e dua na gauna levu meu dau vakaraitaka kina vei rau na ivakavuvuli vakaivolatabu. E vukei rau o Jiova ena gauna dredre oya. E tekivu painia o Tomoyoshi ni oti na nona vuli ena sekeneri. E vukei iratou e lewe va me ratou yalayala qai papitaiso ena imatai ni vica na yabaki ni nona painia. Me vakataki tuakana, e tekivu painia tale ga o Masahiko ni oti ga na nona vuli ena sekeneri. E vukei iratou tale ga e va na gone me ratou iVakadinadina ena imatai ni va na yabaki ni nona cakacaka vakapainia.

O Jiova e vakalougatataki rau vakalevu na luvequ. O Tomoyoshi e qai vuli iVolatabu kei na watina e dua na marama au vukea me vulica na ka dina. Rau qai iVakadinadina tale ga na luvedrau yalewa. E qai wati Tomoyoshi o Nobuko, o koya e qase vei rau, qai wati Masahiko o Masako, o koya e gone. Rau sa veiqaravi tiko ena itikotiko liu ni iVakadinadina i Jiova e Brooklyn, Niu Yoka, o Tomoyoshi kei Nobuko. O Masahiko kei Masako erau daukaulotu tiko mai Paraguay.

Veisau Vakalailai o Watiqu

A sega ni dau taleitaka o watiqu na ka keitou vakabauta, ia keitou sa raica tiko e so na ivakatakilakila ni nona sa veisau. Ni so era saqata na noqu vakabauta, e dau tokoni au o koya, dina ga ni sega ni vakila ni sa tokona sara tiko ga na iVolatabu. E dau vukei ira na iVakadinadina era leqa vakayago. E kaya ena dua na nona vosa lekaleka ena gauna e vakamau kina e dua na luve i keirau: “E cakacaka vinaka duadua na vakavulici ira na tamata mera muria na ivakarau ni bula vinaka, e cakacaka bibi tale ga. Rau sa digitaka na luvequ kei na watidrau na cakacaka dredre oqo. Ni yalovinaka, ni vukei iratou.” Na veika vaka oya e vakavuna meu vakabauta ni na tomani keitou ena qaravi Jiova.

Au sureti ira mai na noqu itokani iVakadinadina me keimami veimaliwai e vale. Au dau sureti Kazuhiko ina soqoni kei na veisoqo lelevu vaka kina ina iVakananumi ni nona mate o Karisito. E dau tiko ena veisoqoni oqori ni galala mai na nona cakacaka, dina ga ni lako ena voraki. Au dau sureti ira mai na qase ni ivavakoso i vale baleta niu nanuma ni sa na makutu me vuli iVolatabu. Ia e sega ni via vuli. Au dau vaqaqa se cava e leqa tiko.

E votu vei au na vosa ni yapositolo o Pita: “O i kemuni na yalewa vakawati, ni vakamalumalumutaka vaka kina na yalomuni vei ira na watimuni. Kevaka e so vei ira era sega ni vakabauta na vosa ni Kalou, e na rawa ni yaco me ra vakabauta e na vuku ni nomuni i vakarau ga na watidra, ka na sega ni yaga mo ni tauca e dua na vosa ni ra sa na raica tiko ga na nomuni i vakarau vakarokoroko ka savasava.” (1 Pita 3:​1, 2, VV) Au vakila niu sega ni dau muria vinaka na ivakasala oya. Meu muria vinaka, e vinakati meu toroya cake na ivakatagedegede ni noqu bula vakayalo.

Au tekivu painia ena 1970 me rawa kina ni torocake na ivakatagedegede ni noqu bula vakayalo. Au painia tiko me tini na yabaki, lai 20 sara. Ia e se sega ga ni veisau o watiqu. A tukuna ena dua na gauna e dua e vuli iVolatabu tiko: “Ena via dredre toka nomu lai vukei ira e so tale ni o sega mada ga ni rawati watimu.” E vakayalolailaitaki au oya, ia au sega ni soro.

Ni bera ni cava na veiyabaki ni 1980, rau sa malumalumu na neirau itubutubu ruarua. E vakaocai au vakalevu na noqu qaravi iratou kei na noqu cakava tale tiko ga na noqu itavi. Eratou dau tusaqata voli mai na noqu vakabauti Jiova, ia au saga meu lomani iratou vinaka. Ni bera toka ga ni leqa, e kaya vei au o tinaqu yabaki 96: “Sumiko, kevaka au vakaturi, au na lewena tale ga na nomu lotu.” Au kila kina ni yaga na noqu sasaga.

E kauaitaka o watiqu na veika kece au cakava vei iratou na neirau itubutubu. E vakaraitaka na nona vakavinavinaka ena nona tomani au wasoma ina soqoni. Sa vakayabaki na nona dau lako tiko ina soqoni, ia e sega ni bau toso vakayalo. Au vakayalovinakataki koya tiko ga. Au dau sureti ira mera mai kana i vale na nona itokani kei ira era cakacaka vata era gole mai vanuatani. Au tomani koya ena vanua e gade kina. Ni vakalailaitaki na aua ni painia me 70, au vakalevutaka na gauna au vakayagataka vua.

Veisau ni Cegu Mai na Cakacaka

E cegu mai na cakacaka o watiqu ena 1993. Au nanuma ni sa na qai galala me vuli iVolatabu. Ia e kaya o koya ni sega ni veidokai kevaka e qarava na Kalou baleta wale ga ni sa galala. E tukuna ni na qarava na Kalou kevaka sa qai lomana, meu kua ni vakasaurarataki koya.

E tarogi au ena dua na siga o Kazuhiko se au na vakayagataka na vo ni noqu bula vua se sega. Au rarawataka na ka e tukuna baleta niu dau solia noqu maqosa taucoko vua me tekivu mai na gauna keirau vakamau kina. Au saga vakaukaua meu vakamarautaki koya, ia e nanuma o koya niu vakaliuci Jiova cake tiko. Ni oti noqu vakasamataka na vosa oya, au tukuna vua ni veiganiti na veika au sa cakava tiko vua. Ia kevaka e via tomani au ena ka au cakava tiko, keirau rawa ni tekivutaka e dua na ivakarau ni bula vou ena sega ni vakaiyalayala. E sega ni tukuna e dua na ka o watiqu ena vica na siga. Oti oya sa qai taroga, “O rawa ni vakavulici au ena iVolatabu?” E dau marau na lomaqu ena veigauna kece au nanuma kina na vosa oya.

Au kerea e dua na qase ni ivavakoso me rau vuli kei watiqu, ia e tukuna vei au, “Au vinakata mo vakavulici au ga.” Keirau tekivu vuli iVolatabu sara e veisiga. Niu lewena tiko na ivavakoso vosa vakaJaina qai kila vinaka na vosa oya o watiqu, keirau mani vuli ena vosa vakaJaina. Keirau wilika tasevu na iVolatabu ni se bera ni cava e dua na yabaki.

Donuya na gauna oqo, erau kauaitaki keirau sara e dua na qase ni ivavakoso vosa vakaJaina, kei watina. Dina ga ni rau gone vei rau na luve i keirau, ia keitou sa mai veitokani vinaka sara. Era levu tale na iVakadinadina era dau kauaitaki watiqu. Era dau vakacegui keirau ra qai vosa vei Kazuhiko me vaka e tamadra. E marau sara ga kina o koya.

Dua na siga e vakau mai vei watiqu e dua na ivola ni veisureti ni vakamau e caka ena ivavakoso. E tarai koya sara ga na nona vakaliuci oya me ulunivuvale, e lalawataka sara me tiko ena vakamau. Sega ni dede sa veimaliwai vinaka sara kei ira na iVakadinadina rau qai vuli iVolatabu kei na dua na qase ni ivavakoso. E vukei koya me toso vakayalo na nona vulica na iVolatabu, dau tiko ena soqoni, kei na nodra lomani koya na lewe ni ivavakoso.

Duavata na Neitou Vuvale

E papitaiso o watiqu ena Tiseba 2000, me vakaraitaka kina ni sa yalataki koya vei Jiova. Ratou lako sara mai vakayawa o rau na luve i keirau kei na watidrau me ratou mai raica na “cakamana” oqo. E taura e 42 na yabaki me qai duavata na neitou vuvale.

Ena gauna oqo keirau dau veivosakitaka na tikinivolatabu ni veisiga, keirau dau wili iVolatabu vata tale ga. Keirau marautaka e veisiga na veivosakitaka na veika vakayalo vaka kina na neirau vakaitavi ena kena cakacaka. Sa dauveiqaravi ni ivavakoso o watiqu. E se qai vakaitavi ga oqo ena dua na ivunau soqovi levu ena vosa vakaJaina. Au vakavinavinakataki Jiova ena nona vakaduavatataki keitou. Au duavata kei ira na wekaqu kei na noqu itokani ena nuitaka na gauna au na lai vakacerecerea kina na yaca i Jiova me tawamudu.

[Mape ena tabana e 13]

(Raica tale na ivola)

JAINA

DEMOCRATIC PEOPLE’S REPUBLIC OF KOREA

REPUBLIC OF KOREA

Sea of Japan

JAPANI

Tokio

East China Sea

TAIWAN

Taipei

[iYaloyalo ena tabana e 12]

O yau kei na noqu vuvale niu papitaiso ena 1958

[iYaloyalo ena tabana e 13]

Era vakaukauataki keitou vakayalo na neitou itokani me vakataki Harvey kei Kathy Logan ni keitou toki mai Tokio i Taipei

[iYaloyalo ena tabana e 15]

Keitou sa duavata vakavuvale ena sokalou dina