Dodonu me Solevutaka na Lotu vaKarisito na nona vakaturi o Jisu se na Easter?

E vakamacalataki ena ivola Encyclopædia Britannica ni Easter e “nodra soqo bibi na lotu vaKarisito me baleta na Vakaturi i Jisu Karisito.” Vakacava, e dodonu mera solevutaka na lotu vaKarisito na soqo qo?

Vakasamataka mada na kena vakadikevi e dua na iyaya makawa, dau bibi sara ga me kilai na kena itukutuku matailalai. Tautauvata vinaka qori kei na Easter, ena vinaka meda kila na kena itukutuku lalai kece meda vakadeitaka kina ke dodonu meda solevutaka na lotu vaKarisito se sega.

A kerei iratou nona imuri o Jisu me ratou vakananuma nona mate, sega ni nona vakaturi. Vakatoka na soqo ni mate qori na yapositolo o Paula me “ivakayakavi ni Turaga.”—1 Korinica 11:20; Luke 22:19, 20.

E kaya na Britannica ni vakabibitaki ga na “ivakavuvuli vakatamata” ena Easter, “sega so” nona vakaturi o Jisu. Kena ivakaraitaki na ivakatakarakara ni yaloka kei na ravete. E kaya na Encyclopedia of Religion: “Na yaloka e vakatakarakarataka na bula vou se itekitekivu ni bula, me vaka ga nona diridiri na yaloka.” E kaya tale ga: “Na ravete e vakatakarakarataka na vakatubukawa.”

E vakamacalataka o Philippe Walter, e dua na parofesa ni ivola era volai ena veiyabaki ni 500-1500 B.G.V., na kena mai okati tu eso na vakabauta va qori ena Easter. E vola ni “gauna e sagai me vaKarisitotaki kina o lotu butobuto,” e rawarawa ni semai nodra solevu na lotu butobuto me baleta na “vulaililiwa kei na vulaitubutubu” ina nona mate kei na nona vakaturi o Jisu. E kaya tale o Walter ni tauyavutaki nodra “ivakananumi na lotu vaKarisito” ena nodra ivola ni yabaki na lotu butobuto, e vakarawarawataka gona nodra tavuki e levu.

A sega ni vakayacori na veika qori nira se bula tiko na yapositolo baleta nira dau ‘tarova’ na nodra ivakavuvuli na lotu butobuto. (2 Cesalonaika 2:7) E vakasalataka o Paula ni gauna e “lako” kina, eso “era na vakatanitaka na ivakavuvuli dina mera vakacalai ira kina na tisaipeli mera muri ira.” (Cakacaka 20:29, 30) E vola o Joni ena icavacava ni imatai ni senitiuri ni so era vakacalai ira tiko na lotu vaKarisito. (1 Joni 2:18, 26) Totolo kina na kena muri nodra ivalavala na lotu butobuto.

Era kaya eso ni sega ni cala eso na ivalavala e dau muri ena kena solevutaki na Easter—nira na rawa kina ni kila vinaka na “lotu butobuto” na ibalebale ni nona vakaturi o Jisu. Ia sega ni duavata kina o Paula. A lakova e levu na vanua qali vakaRoma, qai raica na veimataqali ivalavala ni lotu butobuto, a sega ga ni vakayagataka qori me veivakavulici kina ena nona kilai vinaka o Jisu. E vakaroti ira ga na lotu vaKarisito: “Moni kua ni vauci vata kei na dua e sega ni vakabauta, ni oni sega sara ga ni tautauvata. Erau na veitokani vakacava na yalododonu kei koya e sega ni yalododonu? Se rau tautauvata vakacava na rarama kei na butobuto? ‘O koya gona, ni lako tani mai na kedra maliwa, ni tawasei kemuni,’ e kaya o Jiova, ‘ni kua ni tara tiko na ka e sega ni savasava.’”—2 Korinica 6:14, 17.

Cava e kilai ena itukutuku eda dikeva qo? E sega ga ni dodonu meda solevutaka na lotu vaKarisito na Easter.