O BAU KILA?
Cava nona itavi e dua na turaganivalu ni Roma?
Vakatakarakara kei turaganivalu Marcus Favonius Facilis
Cavuti e vica na turaganivalu ni Roma ena iVolatabu vaKirisi vaKarisito. E turaganivalu o koya e liutaka nona vakamatei o Jisu, vaka kina o Konilio, na imatai ni kai Veimatanitu me tavuki ina lotu vaKarisito. Rau turaganivalu tale ga o koya e liutaka nona mokulaki o Paula kei koya e tomani Paula i Roma, o Juliase.—Marika 15:39; Cakacaka 10:1; 22:25; 27:1.
Na turaganivalu e dau liutaki ira e le 50 ina 100 na sotia. E dau veivakavulici, e raica nodra vakaukauayago, nodra isulu, iyaya ni valu, veivakaroti tale ga nira vala tiko.
Qo na itutu cecere duadua vei ira na sotia. Dau soli ga vei ira na via veiqaravi vakatabakidua ena tabana qo, vinakati tale ga mera dau veiliutaki vinaka. Na kaukaua kei na gumatua ni mataivalu ni Roma e vakatau sara tiko ga ena nodra veiliutaki. Tukuni ena dua na itukutuku ni o ira na turaganivalu e “tiko vei ira na kila, ra buta vinaka tale ga ena levu na ka.”
Era duidui vakacava na iloilo ena gauna vakaivolatabu kei na gauna qo?
iLoilo NI Ijipita makawa
Na iloilo era sa tu nikua era sega ni tautauvata kei na iloilo ena gauna vakaivolatabu. Na iloilo ena gauna oya era kaukamea qai dau masi sara vakavinaka, levu ga era parasa, so na gauna era kopa, siliva, koula, se koula e waki kei na siliva. Na imatai ni gauna me cavuti kina na iloilo ena iVolatabu e donuya tiko na tara ni valeniveitavaki, na imatai ni vanua era sokalou kina na Isireli. Era cautaka na iloilo na marama me buli kina na beseni kopa tabu kei na kena itutu. (Lako Yani 38:8) Macala ga nira na vakawaicalataki mada na iloilo ni bera ni vakayagataki ena inaki qori.
Kune ena vakekeli e Isireli kei na so tale na vanua voleka na iloilo ra qai tu vata kei na iyaya era dau tokara na marama kei na so na iyaya ni sasauni. E raoni na kena irairai, e dia kau, kaukamea, ileu se bati ni manumanu, via vaka toka na kedra ibulibuli na marama. Ke sega ni masi vakavinaka, ena sega ni ukutaki.
E sega ni dau laurai vinaka na ka ena iloilo makawa ni vakatauvatani kei na kena era sa tu nikua. Rawa ni kilai kina na ka a vakaibalebaletaka tiko o Paula ena nona kaya: “Qo e vaka eda se titiro ena iloilo kaukamea e buawa.”—1 Korinica 13:12.