Vakayagataka Donu na iLoilo

E tukuna na tisaipeli o Jemesa ni iVolatabu e vaka na iloilo, eda rawa ni dikevi keda kina meda kila na ka e tu e lomada. (Jeme. 1:​22-25) Eda na vakayagataka donu vakacava na iVolatabu me vaka na iloilo?

Wilika vinaka. Ke da raici keda totolo ga ena iloilo, eda na rairai sega ni raica rawa na duka e takavi keda tiko. Ke da via raica tale ga na ka me vakavinakataki ena tamata e loma, e bibi meda dikeva matua na Vosa ni Kalou nida wilika sara vakavinaka.

Raica mada ga e liu na ka mo vakavinakataka. Ke o taura vakababa na iloilo, o na rawa ni raica na ka e leqa vei ira eso tale. Eda na rairai vakayagataka va qori na iVolatabu meda vakalewai ira kina eso tale. Ia ke da cakava qori eda na sega ni veisautaka noda malumalumu.

Mo yalorawarawa. Ke o kauaitaka tiko ga na ka e leqa ena kemu irairai, o na rawa ni yalolailai. E bibi gona meda yalorawarawa nida wilika na Vosa ni Kalou, ya nida sega ni namaka vakasivia na ka, ia meda raici keda ga mai na rai i Jiova.​—Jeme. 3:17.