E Vakacava na Kequ iRairai ena Mata i Jiova?
1. E vakatauvatani vakacava na iVolatabu kei na iloilo?
1 O dau titiro wasoma ena iloilo? Levu era dau cakava qori mera kila kina na ka mera cakava me totoka tiko ga kina na kedra irairai. Na iVolatabu e vakatauvatani kei na iloilo. Nida wilika na Vosa ni Kalou eda na kila na ivakarau ni lomada, qori na ka e raica o Jiova. (1 Sam. 16:7; Jeme. 1:22-24) Na Vosa ni Kalou e rawa ni “vakavotuya na nanuma kei na inaki ni lomada.” (Iper. 4:12) Ena vukei keda vakacava na wili iVolatabu e veisiga kei na vakasama vakatitobu meda kila kina na veika meda vakavinakataka me rawa nida italatala gugumatua?—Same 1:1-3.
2. E yaga vakacava na iVolatabu ena noda dikevi keda?
2 Mo Titiro ena iVolatabu: Nida dikeva na kedra italanoa na tamata yalodina i Jiova, eda na raica rawa na itovo e taleitaka vei ira o Jiova. Kena ivakaraitaki o Tevita, e laurai vua ni lomakatakatataka na yaca i Jiova. (1 Sam. 17:45, 46) A bole o Aisea me vunau ena yalodoudou ena yalava dredre sara. (Aisea 6:8, 9) Ena nona lomani Tamana tale ga o Jisu e raica kina o koya na cakacaka vakaitalatala me veivakabulabulataki qai vu ni vakacegu, sega ni raica me icolacola bibi. (Joni 4:34) Era vunau tale ga vagumatua na lotu vaKarisito ena imatai ni senitiuri, era vakararavi vei Jiova qai sega vakadua nira bau soro. (Caka. 5:41, 42; 2 Kor. 4:1; 2 Tim. 4:17) Nida vakasamataka vakatitobu na ivakaraitaki qori, eda na vakavinakataka tiko ga na ivakatagedegede ni noda veiqaravi tabu.
3. Na cava meda kua kina ni lokuyara ni cakava na veisau e gadrevi?
3 Vakayacora na Veisau e Gadrevi: Ena sega na betena nomu rai ena iloilo ni o sega ni kauaitaka na leqa o raica vei iko. Eda rawa gona ni kerei Jiova me solia vei keda na igu meda dikeva kina na keda ituvaki, meda cakava tale ga na veisau e gadrevi. (Same 139:23, 24; Luke 11:13) Sa lekaleka sara na gauna e vo qai rivarivabitaki tale ga nodra bula e levu nikua, meda kua gona ni lokuyara ni cakava na veisau e gadrevi.—1 Kor. 7:29; 1 Tim. 4:16.
4. Na cava ena yacovi koya e dikeva na Vosa ni Kalou qai veisautaka na ka e gadrevi?
4 E kauaitaka vakabibi o Jiova na ivakarau ni lomada, sega ni keda irairai ga e sau. (1 Pita 3:3, 4) O kila na ka e yacovi koya e dikeva na vosa ni Kalou qai veisautaka na ka e gadrevi? “Ena marau ni cakava tiko baleta ni sega wale ga ni dau rogoca na vosa, e dau muria tale ga.” (Jeme. 1:25) Io, eda na yaco meda italatala gugumatua qai mamarau nida ‘vakavotuya na lagilagi i Jiova me vaka na iloilo.’—2 Kor. 3:18.