Saumi na Taro Vakaivolatabu
Cava mo cakava mo itubutubu vinaka kina?
O dau tuberi ira na luvemu mera lomana na Kalou?
Ke rau veilomani rau qai veidokai na itubutubu, era na taleitaka na gone nodrau veisusu. (Kolosa 3:14, 19) Na itubutubu vinaka era na dau lomani ira na luvedra, ra vakacaucautaki ira tale ga me vaka ga e dau cakava na Kalou o Jiova vei Luvena.—Wilika Maciu 3:17.
Na Tamada vakalomalagi e dau vakarogoci ira na nona dauveiqaravi, e kauaitaka tale ga na nodra rai. Ena vinaka mera vakatotomuri koya na itubutubu, mera dau rogoca na ka era kaya na luvedra. (Jemesa 1:19) Mera kauaitaka na ka era tukuna na luvedra, ke sega mada ga ni rogorogo vinaka.—Wilika Tiko Voli Mai na Lekutu 11:11, 15.
O na susugi luvemu vakacava me nuitaki?
E tu vei ira na itubutubu na dodonu mera vakatulewa vei ira na luvedra. (Efeso 6:1) Moni vuli ena ivakaraitaki ni Kalou. E vakaraitaka nona loloma vei ira na luvena ni vakamatatataka na nona lawa kei na veika ca ena yaco ke sega ni muri. (Vakatekivu 3:3) E sega ni vakasaurarataki ira mera muria, ia e tuberi ira mera raica na yaga ni nodra cakava na ka e dodonu.—Wilika Aisea 48:18, 19.
Me nomu isausau mada ga mo tuberi luvemu me lomana na Kalou. Era na vakatulewa vakayalomatua ena gauna mada ga o ni sega ni tiko kina. E dau veivakavulici na Kalou ena nona ivakaraitaki, mera vuli tale ga na luvemu ena nomu ivakaraitaki ni o dau lomana na Kalou.—Wilika Vakarua 6:5-7; Efeso 4:32; 5:1.